Agosto 14, 2023
Lunes sa Ikanapulog Siyam nga Semana sa Kasagarang Panahon
Mga Pagbasa Karong Adlawa
San Maximilian Mary Kolbe, Pari ug Martir—Handumanan
Paminaw sa Iningles
Kang kinsa man maningil ang mga hari sa yuta og mga bayranan o buhis sa sensus? Sa ilang mga sakop o sa mga langyaw?” Sa dihang mitubag siya, “Sa mga langyaw,” miingon si Jesus kaniya, “Busa gawasnon sa buhis ang mga sakop. Apan aron dili kita makapasilo kanila, adto sa dagat, ihulog ang kaw-it, ug kuhaa ang unang isda nga motukob. Ablihi ang baba niini ug makakita ka og sensilyo nga ang kantidad doble sa buhis sa templo. Ihatag kana kanila alang kanako ug kanimo.” Mateo 17:25–27
Sa wala pa kining gamay nga milagro, bag-o pa lamang gisultihan ni Jesus ang Iyang mga tinun-an sa ikaduhang higayon bahin sa Iyang umaabot nga pag-antos. Lisod na usab kini nilang dawaton. Hinumdomi nga human sa unang pagpahibalo ni Jesus sa Iyang umaabot nga pag-antos ug kamatayon, gidala Niya si Pedro, Santiago ug Juan ngadto sa bukid ug nausab ang Iyang panagway sa ilang atubangan. Usa sa mga katuyoan sa Pagkausab sa Panagway mao ang pagwagtang sa kahadlok sa mga tinun-an ug paghatag kanila og paglaom alang sa umaabot. Ug karon, human sa ikaduhang pagpahibalo ni Jesus sa Iyang pag-antos, laing milagro ang gihimo alang kang Pedro mismo, aron dasigon siya ug hatagan og paglaom.
Hunahunaa nga ikaw si Pedro. Hunahunaa nga imong gisunod ang mga sugo ni Jesus pinaagi sa pag-adto sa dagat, paghulog sa kaw-it, pagbira sa usa ka isda ug dayon pag-abli sa baba niini. Lagmit napuno si Pedro sa paglaom ug kahinam samtang gibira niya kining isdaa, nga naghunahuna kon matuman ba ang mga pulong ni Jesus. Ug sa dihang nakita ni Pedro ang sensilyo, sumala gayod sa giingon ni Jesus, lagmit napuno siya sa kahingangha. Sa hinayhinay, ang kahadlok ug kabalaka nga iyang gibati tungod niining ikaduhang pagpahibalo sa pag-antos ug kamatayon ni Jesus nagsugod unta sa paghupay samtang nasaksihan ni Pedro ang laing talagsaong timaan gikan sa iyang Ginoo.
Ang Dios nagbuhat og mga milagro sa atong kinabuhi matag adlaw. Ang problema mao nga kasagaran dili nato kini mailhan. Matag higayon nga ang Iyang mahimayaong gahom molihok sa atong sulod aron lig-onon kita o pun-on kita sa kaisog, paglaom, gugma ug sa tanang ubang hiyas, kini usa ka milagro sa grasya nga nagbag-o kanato. Ang Dios kanunayng nahibalo kon unsay atong gikinahanglan sa kinabuhi. Nahibalo Siya sa atong mga pakigbisog ug mga pagduhaduha. Usahay, magpabilin Siyang hilom aron madani kita ngadto sa mas lawom nga relasyon Kaniya pinaagi sa tinuyo nga pag-ampo ug mga buhat sa pagtuo. Ug usahay, kalit na lang natong mabati nga nakadawat kita og bag-ong katin-aw sa kinabuhi nga bunga sa paglihok sa Iyang grasya.
Nahibalo si Jesus nga gikinahanglan ni Pedro kining dugang nga grasya sa milagro nga gihimo alang kaniya mismo, aron malabwan niya ang iyang mga kahadlok ug mga pakigbisog ug ibutang ang iyang tibuok pagsalig kang Jesus. Si Jesus kasaligan. Mao kini ang konklusyon nga makab-ot unta ni Pedro. Siya kasaligan. Busa, ang tanan Niyang gisulti angay tuohan. Pagkanindot nga konklusyon nga angay natong maabot nga tanan.
Pamalandongi karon ang mga paagi diin gipasaligan ka sa Dios sa Iyang diosnong presensya ug paglihok sa imong kinabuhi. Bisan kon ang mga milagro nga gihimo sa Dios sa imong kinabuhi aron sa pagpasalig kanimo dili makita sa pisikal nga paagi, ang mga buhat sa Dios makapakombinsir usab kanato kon tin-aw nato kining mailhan. Unsa may buot ipasiguro sa Dios kanimo bahin sa imong kinabuhi? Unsang kalisdanan o pagduhaduha ang imong ginaatubang? Kon naglisod ka, ipunting ang imong hunahuna sa mga paagi diin ang Dios anaa ug naglihok sa imong kinabuhi. Pamalandongi ang Iyang pagpataliwala ug ang mga paagi sa Iyang pag-atiman ug paggiya kanimo. Pagmapasalamaton ug tugoti nga ang handumanan sa gibuhat sa Dios mahimong imong kusog karong adlawa ug tinubdan sa paglaom sa mga panahong labing gikinahanglan nimo kini.
Akong Ginoo nga nagbuhat og mga milagro, ang Imong paglihok sa akong kinabuhi tinuod nga mahimayaon ug makapahingangha. Dili gayod Ka mapakyas sa pagtagana sa akong gikinahanglan. Tabangi ako nga modangop Kanimo sa matag higayon nga maglisod ako, aron mapuno ako sa bag-ong paglaom diha Kanimo. Kanunay Kang matinumanon, hinigugmang Ginoo. Kanimo ko gayod gibutang ang tanan kong paglaom. Jesus, nagsalig ako Kanimo.
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Pamalandong sa Balaang Kasulatan alang sa Panahon sulod sa Tuig
Santos sa Adlaw – San Maximilian Mary Kolbe, Pari ug Martir
Mga Kapilian sa mga Basahon sa Misa
