Agosto 20, 2023
Ika-20 nga Domingo sa Ordinaryong Panahon (Tuig A)
Mga Pagbasa Karong Adlawa
Paminaw sa Iningles
Niadtong panahona, mibiya si Hesus ug miadto sa dapit sa Tiro ug Sidon. Ug usa ka babayeng Canaanhon nga tagaadtong dapita miduol ug misinggit, “Kaloy-i ako, Ginoo, Anak ni David! Ang akong anak nga babaye grabeng gisakit sa usa ka demonyo.” Mateo 15:21–22
Human mapintasong gisukmat si Hesus sa mga Pariseo, Siya ug ang Iyang mga tinun-an mipanaw og 35 ka milya paamihanan-kasadpan ngadto sa usa ka dapit sa teritoryo sa mga pagano, gawas sa hurisdiksiyon ni Herodes ug sa mga pangulo sa mga Judio. Mahimong panahon kini sa pagpahulay alang Kaniya ug sa Iyang mga tinun-an, ug usa ka higayon alang kang Hesus sa pag-umol sa mga tinun-an sa mas direktang paagi. Atol niining ilang pagpalayo gikan sa kadaghanan, usa ka babayeng pagano miduol aron mangayo og tabang kang Hesus.
Samtang nagpadayon ang sugilanon, atong makita nga ang iyang pag-ampo usa ka sulondan alang kanatong tanan. Una, giila niya kon Kinsa si Hesus—ang Anak ni David. Kini usa ka pagpadayag sa iyang pagtuo ug klarong kasukwahi sa kakulang sa pagtuo nga nasinati ni Hesus gikan sa daghang tawo sa Galilea. Ikaduha, ang iyang hangyo gipahayag sa prangka ug yano nga mga pulong, “Kaloy-i ako!” Ug, “Ginoo, tabangi ako.” Ikatulo, makanunayon ang iyang pag-ampo. Gitugotan siya ni Hesus sa pagpakita sa iyang pagkamakanunayon pinaagi sa dili una pagtubag sa iyang hangyo ug dayon pag-ingon kaniya, “Dili angay kuhaon ang pagkaon sa mga anak ug ilabay ngadto sa mga iro.” Dayag nga wala kini isulti ni Hesus aron magminaldito, kondili aron dapiton siya sa pagpadayag sa iyang pagtuo sa makanunayong paagi. Ug mao gayod kini ang iyang gibuhat. Sa kataposan, ang iyang pag-ampo puno sa lawom nga pagpaubos. Mitubag siya, “Palihog, Ginoo, kay bisan ang mga iro mokaon sa mga mumho nga mangatagak gikan sa lamesa sa ilang mga agalon.” Nagpakilooy siya alang sa mga “mumho” sa kalooy ni Hesus, ug nadawat niya ang Iyang kalooy sa madagayaong paagi.
Gitinguha ba nimo ang mga mumho sa kalooy ni Hesus sama sa pagtinguha sa usa ka iro sa mga mumho gikan sa lamesa sa iyang agalon? Hinaot nga mao kini ang imong tinguha. Mao kini ang kinaiya nga kinahanglan natong tanan sa pag-ampo. Usahay, tungod sa garbo, maghunahuna kita nga aduna kitay katungod sa kalooy sa Dios. Maghunahuna kita nga adunay utang ang Dios kanato. Ug bisan pa kon naamgohan nato nga dili nato takos dawaton ang kalooy, kinahanglan natong tugotan kining kamatuoran nga motisok pag-ayo sa atong kasingkasing. Mao nga importante kaayo kining sugilanon. Gipakita niini kanato ang labing maayong paagi sa pag-ampo ug ang mapaubsanong kahimtang sa kasingkasing nga kinahanglan natong batonan sa pagduol sa Dios.
Sa hilom nga pag-ampo, pamalandongi ang hulagway sa usa ka iro nga nagpakilooy alang sa mga mumho gikan sa lamesa. Kon hatagan ang iro sa mga salin, malipay kaayo kini. Alang kanato, dili makapadani ang pagkaon sa mga mumho gikan sa plato sa laing tawo. Apan kon ang “plato” iya sa Manluluwas sa Kalibotan ug ang “pagkaon” mao ang Iyang grasya ug kalooy, mausab ang tanan. Sa kataposan, dapiton usab kita sa Agalon ngadto sa lamesa ug pakan-on sa labing maayong espirituhanong pagkaon. Apan dili kana makausab sa kamatuoran nga kinahanglan kanunay natong batonan ang mapaubsanong kinaiya nga gipakita niining mapaubsanong babaye.
Pamalandongi karon kining balaang babaye. Sa kataposan, mipahayag si Hesus, “O babaye, dako ang imong pagtuo!” Apan wala kini mahitabo hangtod nga kinasingkasing niyang gipahayag ang iyang pagtuo uban sa pagpaubos ug pagkamakanunayon. Uban kaniya isip masanag nga sulondan, pamalandongi kon giunsa nimo pag-ampo ngadto sa Dios. Nag-ampo ka ba nga nag-isip sa imong kaugalingon nga matarong, nga daw takos kang modawat sa kalooy sa Dios? May hilig ka ba sa pagtan-aw sa Dios ingong adunay utang kanimo? Masuko ka ba sa Dios kon dili Niya dayon tubagon ang imong mga gipangayo nga daw imong katungod? Paningkamoti nga magpaubos sama niining babaye. Pagpakilooy alang sa bisan unsang gusto sa Dios nga ihatag kanimo. Buhata kini uban sa pagkamakanunayon ug bug-os nga pagsalig. Kon buhaton nimo kini, dili lamang ibubo sa atong Ginoo ang mga mumho sa Iyang kalooy, kondili iya ka usab nga alsahon ug dapiton ngadto sa mahimayaong kombira sa Iyang madagayaong grasya.
Labing maloloy-ong Jesus, nangamuyo ako Kanimo nga hatagan bisan sa mga mumho lamang gikan sa lamesa sa Imong kalooy. Nangamuyo ako niini Kanimo sa tibuok kong kasingkasing. Bisan dili ako takos Kanimo, gipangita ko gihapon Ikaw. Nahibalo Ka sa akong gikinahanglan, minahal nga Ginoo; palihog itugyan kanako ang Imong kalooy alang niadtong mga panginahanglan. Jesus, nagsalig ako Kanimo.
Nobena kang Santa Monica
(Ilabinang giampo alang sa mga anak nga nahisalaag)
Agosto 18-26
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Pamalandong sa Balaang Kasulatan alang sa Panahon sulod sa Tuig
Santos sa Adlaw – San Bernard of Clairvaux, Abad ug Doktor sa Simbahan
Dili saulogon isip liturhikanhong handumanan karong tuiga kay natunong kini sa Domingo
Mga Kapilian sa mga Basahon sa Misa
Gipakitang hulagway sa ibabaw: Si Kristo ug ang Babayeng Canaanhon, pinaagi sa Web Gallery of Art
