Septiyembre 28, 2023
Huwebes sa Ikakawhaag-limang Semana sa Ordinaryong Panahon
Mga Pagbasa Karong Adlawa
San Wenceslao, Martir—Opsiyonal nga Handumanan
San Lorenzo Ruiz ug mga Kauban, mga Martir—Opsiyonal nga Handumanan
Paminaw sa Iningles
Si Herodes nga tetrarka nakadungog sa tanang nanghitabo, ug nalibog siya pag-ayo kay ang uban nag-ingon, “Si Juan nabanhaw gikan sa mga patay”; ang uban nag-ingon, “Si Elias mipakita”; ug ang uban usab, “Usa sa mga propeta sa karaang panahon nabanhaw.” Lucas 9:7–8
Si Herodes nga tetrarka, nga nailhan usab nga Herodes Antipas, nagmando sa mga Judio sa Galilea sulod sa mga kap-atan ug duha ka tuig. Gisugdan niya ang iyang paghari niadtong 2 BC ug nagpadayon kini hangtod nga gipapahawa siya ngadto sa pagkadestiyero sa Emperador sa Roma niadtong 37 AD. Sa panahon sa iyang paghari, daghan siyag panahon nga gigahin sa Tiberias, usa sa mga nag-unang siyudad sa kasadpang daplin sa Dagat sa Galilea. Ang kadaghanan sa ministeryo ni Jesus nahitabo sulod sa teritoryong gimandoan ni Herodes, nga mao ang tibuok Galilea, busa nasayod gayod si Herodes sa daghang mga sugilanon mahitungod kang Jesus.
Ang Ebanghelyo karong adlawa nagtapos sa pag-ingon nga si Herodes padayong naningkamot nga makita si Jesus. Siyempre, si Herodes, sama sa bisan kinsa nga nagpuyo niadtong dapita, mahimo untang moadto bisan kanus-a sa dapit diin nagsangyaw si Jesus aron maminaw Kaniya. Apan wala niya kana buhata. Hinuon, padayon siyang nakadawat og mga taho mahitungod kang Jesus ug nagpabiling mausisaon mahitungod Kaniya, nga nangitag paagi aron masabtan kon Kinsa gayod si Jesus.
Sulayi paghanduraw kon unsay mahitabo unta kon si Herodes miadto sa dapit diin nagsangyaw si Jesus aron maminaw Kaniya uban sa bukas nga kasingkasing. Kon gibuhat pa niya kana ug naminaw gayod, madawat unta ni Herodes ang usa sa labing dagkong mga gasa nga mahunahuna sa tawo. Madawat unta niya ang gasa sa pagtuo ug pagkakabig ug masugdan unta niya ang paglakaw sa dalan padulong sa walay kataposang kaluwasan. Apan si Herodes nagkinabuhi sa imoralidad. Nailhan siya nga usa ka mapintas nga pangulo ug usa usab ka mananapaw nga dili mahinulsolon. Gihigugma niya ang iyang gahom ug hugot kaayo niya kining gibantayan nga dili mawala kaniya. Lagmit nasayod si Herodes, bisan sa kahiladman lamang sa iyang hunahuna, nga kon maminaw siya kang Jesus, kinahanglan siyang magbag-o. Ug lagmit dili siya gustong magbag-o.
Kini naghatag kanatong tanan og usa ka gamhanang leksiyon. Ang matag usa kanato daling makabalewala sa nagkalainlaing mga mensahe ug pagdapit sa atong Ginoo tungod kay, sa kahiladman sa atong kasingkasing, dili kita gustong magbag-o. Ang Dios nakigsulti kanato sa tibuok adlaw, matag adlaw sa atong kinabuhi. Padayon Niyang gitanyag kanato ang Iyang mensahe sa tibuok Ebanghelyo. Ug bisan kon bukas ka sa daghan sa gisulti sa Dios, lagmit adunay mga bahin sa Iyang balaang mensahe nga, tinuyo man o wala nimo mamatikdi, wala nimo pamatia. Ang yawe aron madungog nimo ang tanan nga gustong isulti sa Dios kanimo mao ang pagkaandam sa hingpit nga pagbag-o sa bisan unsa ug sa tanang paagi nga gusto sa Dios nga imong pagabag-ohan.
Pamalandongi karon si Herodes. Una, pamalandongi ang iyang kaikag bahin kang Jesus. Maayo kini nga kinaiya, kay mas maayo kini kay sa pagkawalay pagtagad. Gikan niini, hunahunaa usab nga si Herodes wala gayod moduol kang Jesus aron maminaw Kaniya. Ang una niyang pakigkita kang Jesus nahitabo sa gabii sa pagdakop Kaniya, sa dihang iyang gisukitsukit ug gibiaybiay ang atong Ginoo. Samtang imong pamalandongan ang pagkagahi og ulo ni Herodes, himoa kini nga pagsusi sa imong kaugalingong kinabuhi. Kon makakita ka bisan gamayng timailhan sa pagkagahi og ulo, kahadlok sa pagbag-o, o siradong kasingkasing, paningkamoti nga matul-id kini pinaagi sa pagdangop sa atong Ginoo. Sultihi Siya nga bukas ka sa tanan Niyang buot isulti ug nga andam ug kinabubut-on kang magbag-o sa bisan unsang paagi nga Iyang gitawag kanimo. Ayaw kahadloki ang pagbag-o nga gitinguha sa atong Ginoo alang kanimo. Ang pagdawat niana nga pagbag-o magbutang kanimo sa paspas ug pig-ot nga dalan padulong sa tinuod nga pagkabalaan sa kinabuhi.
Ginoo ko nga kanunayng ania, Imo akong gitawag adlaw ug gabii, nga nagdapit kanako sa pagbag-o samtang maminaw ako sa Imong balaang Pulong. Nagpasalamat ako Kanimo alang niining makanunayong mga pag-aghat sa grasya ug nagsaad nga magpabiling bukas sa tanan Nimong gipangayo kanako. Gipili ko Ikaw, Ginoo ko. Ug samtang modangop ako Kanimo, nag-ampo ako nga maangkon ko ang kaisog nga akong gikinahanglan aron makatubag sa Imong tawag sa tibuok kong kasingkasing. Jesus, nagsalig ako Kanimo.
Nobena kang Santa Teresita sa Lisieux: Septiyembre 22-30
Ikapitong Adlaw- Septiyembre 28
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Pamalandong sa Balaang Kasulatan alang sa Panahon sulod sa Tuig
Mga Santos sa Adlaw –
San Wenceslao, Martir—Opsiyonal nga Handumanan
San Lorenzo Ruiz ug mga Kauban, mga Martir—Opsiyonal nga Handumanan
Mga Kapilian sa mga Basahon sa Misa
_-_John_the_Baptist_Reproving_Herod_-_1420375_-_National_Trust.jpg){kind=link}