Septiyembre 30, 2023
Sabado sa Ikakawhaag-lima nga Semana sa Panahon sulod sa Tuig
Mga Pagbasa alang sa Karong Adlawa
San Jeronimo, Pari ug Doktor sa Simbahan—Handumanan
Paminaw sa Iningles
“Pamatia pag-ayo ang akong isulti kaninyo. Ang Anak sa Tawo itugyan ngadto sa mga tawo.” Apan wala sila makasabot niining gisulti; gitago gikan kanila ang kahulogan niini aron dili nila kini masabtan, ug nahadlok silang mangutana Kaniya mahitungod niining gisulti. Lucas 9:44–45
Kini ang ikaduhang higayon nga gitagna ni Jesus ngadto sa Iyang mga Apostoles ang Iyang umaabot nga pag-antos. Human Niya sila sultihi nga Siya itugyan, ang Ebanghelyo nag-asoy nga “wala sila makasabot niining gisulti.” Nag-ingon usab kini nga “nahadlok silang mangutana Kaniya mahitungod niining gisulti.” Nganong wala man sila makasabot, ug nganong nahadlok man silang mangutana kang Jesus mahitungod sa Iyang umaabot nga pag-antos?
Ang mga Apostoles suod kaayo sa atong Ginoo, sa espirituhanong bahin ug sa ilang mga pagbati. Ug maayo kini. Apan usahay ang atong mga pagbati makalubog sa atong panghunahuna ug makapalisod sa pagsabot sa mas lawom nga espirituhanong mga kamatuoran sa kinabuhi. Bisan tuod kinaiyanhon ang atong mga pagbati, kinahanglan kanunay kining magiyahan sa kabubut-on sa Dios. Pananglitan, kon maningkamot kita sa pagsabot sa mga pagbati ni Jesus, makaingon gayod kita nga sa espiritu ug sa kasingkasing, gitinguha Niya ang paghalad sa Iyang kinabuhi alang sa kaluwasan sa mga kalag sumala sa kabubut-on sa Amahan. Dili lamang Niya kini gipili pinaagi sa Iyang kabubut-on, kondili gitinguha usab Niya kini sa Iyang kasingkasing, tungod kay hingpit nga husto ang pagkahan-ay sa Iyang mga pagbati.
Apan ang mga Apostoles wala makasabot nga kinahanglan ihalad ni Jesus ang Iyang kinabuhi, isalikway, mag-antos ug mamatay. Usa sa mga hinungdan niini mao ang ilang lawom nga emosyonal nga pagkasuod ug pagmahal kang Jesus. Busa niining higayona, ang ilang tawhanong gugma ug pagkasuod kang Jesus nakababag sa ilang katakos sa pagsabot sa mas dakong espirituhanong kaayohan sa paghalad ni Jesus sa Iyang kinabuhi.
Palandonga usab ang atong Mahal nga Inahan. Unsa kaha ang iyang reaksiyon kon moingon si Jesus nga kinahanglan Siya itugyan, isalikway, mag-antos ug mamatay? Bisan tuod makapaguol kini kaniya sa usa ka balaang kasubo, ang kahingpitan sa iyang tawhanong kinaiya magdala unta kaniya dili lamang sa pagsabot ug pagdawat niining lawom nga espirituhanong kamatuoran, kondili sa pagtinguha usab sa iyang kasingkasing nga mahitabo kini, tungod kay hingpit niyang gitinguha ang katumanan sa kabubut-on sa Amahan. Wala untay panagsumpaki sa iyang sulod tali sa kabubut-on sa Amahan ug sa iyang kaugalingong tinguha.
Sa atong kaugalingong kinabuhi, kanunay kitang makasinati sa samang pakigbisog nga nasinati sa mga Apostoles. Kon mag-atubang kita og usa ka malisod nga krus sa kinabuhi, usa ka krus nga gitawag kita sa Amahan sa paggakos nga kinabubut-on, kasagaran atong mamatikdan nga mosukol ang atong mga pagbati. Kon mahitabo kini, malibog kita ug mahadlok pa gani sa umaabot. Busa, ang bugtong paagi sa pagbuntog sa kahadlok mao ang pagpaningkamot sa pagtugyan sa matag emosyon, matag pagbati sa kasingkasing ug matag tawhanong pagkasuod ngadto sa kabubut-on sa Amahan, aron ang Iyang kabubut-on lamang ang atong tinguhaon uban sa tanang gahom sa atong kalag.
Pamalandongi karon ang pakigbisog sa sulod sa kasingkasing niining mga Apostoles sa dihang giatubang nila ang ikaduhang higayon nga gisugdan sila ni Jesus sa pag-andam sa pagdawat, pagsabot, pagpili ug pagtinguha sa Iyang pag-antos. Hunahunaa ang ilang pakigbisog sa sulod niadtong panahona ug bisan sa dihang nakita na nila kini nga nahitabo. Sa kataposan, nakasabot ra sila. Sa kataposan, nahanaw ang tanang kahadlok. Ug sa kataposan, uban sa paghigugma, nalipay sila sa sakripisyo ni Jesus. Apan nagkinahanglan kini og taas nga panahon ug dakong pagtugyan sa kaugalingon. Pamalandongi ang mga paagi diin gidapit ka sa atong Ginoo sa pagpili sa Iyang Krus sa imong kinabuhi. Kon makita nimong nagasukol ang imong mga pagbati, paningkamoti nga itugyan ang imong kaugalingon, pag-ampo alang sa pagsabot ug pangitaa ang kaisog nga imong gikinahanglan aron tinguhaon ang Iyang Krus sa tibuok mong kalag.
Ginoo ko nga nagpadayag sa Imong kaugalingon, Imong giablihan ang Imong balaang kasingkasing ngadto sa Imong mga Apostoles ug gidapit sila sa pagsabot ug pagpili sa Imong pag-antos ug kamatayon. Ug bisan pa sa ilang pagduhaduha ug pakigbisog, padayon Mo silang gidapit sa pagdawat sa kabubut-on sa Amahan. Hatagi ako sa grasya nga akong gikinahanglan, minahal kong Ginoo, aron dawaton una sa tanan ang matag espirituhanong kamatuoran ug tugotan kana nga Kamatuoran nga magpahigawas kanako gikan sa kahadlok ug magpuno kanako sa gasa sa pagsabot. Jesus, misalig ako Kanimo.
Nobena kang Santa Thérèse sa Lisieux: Septiyembre 22-30
Ikasiyam nga Adlaw- Septiyembre 30
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Pamalandong sa Balaang Kasulatan alang sa Panahon sulod sa Tuig
Santos sa Adlaw – San Jeronimo, Pari ug Doktor sa Simbahan
Mga Kapilian sa mga Basahon sa Misa
