Oktubre 22, 2023
Ikakawhaan ug Siyam nga Domingo sa Panahon sulod sa Tuig (Tuig A)
Mga Pagbasa alang Karong Adlawa
Paminaw sa Iningles
Milakaw ang mga Pariseo ug naglaraw kon unsaon nila paglit-ag Kaniya pinaagi sa Iyang kaugalingong mga pulong. Gipadala nila ngadto Kaniya ang ilang mga tinun-an, uban sa mga Herodiano, nga miingon, “Magtutudlo, nasayod kami nga matinud-anon Ka ug nga nagtudlo Ka sa dalan sa Dios sumala sa kamatuoran. Ug wala Ka magtagad sa opinyon ni bisan kinsa, kay dili Ka motan-aw sa kahimtang sa usa ka tawo. Busa, sultihi kami, unsa may Imong hunahuna: Nahiuyon ba sa balaod ang pagbayad sa buhis sa sensus ngadto kang Cesar o dili?” Mateo 22:15–17
Adunay panultihon nga “ang kaaway sa akong kaaway akong higala.” Sa laing pagkasulti, ang duha ka tawo nga nagkaaway sagad maghiusa kon makakita sila og higayon sa pagtinabangay sa pag-atake sa mas dako nilang kaaway. Mao kini ang nahitabo sa Ebanghelyo karong adlawa. Giisip si Jesus nga labing dakong kaaway sa mga Pariseo ug sa mga Herodiano, ug kining duha ka pundok naghiusa sa usa ka laraw sa pagbitik kang Jesus bisan pa sa ilang dakong kasilag sa usag usa.
Ang mga Pariseo mainitong nagmahal sa ilang nasod ug hugot nga nagtuman sa Balaod ni Moises. Alang kanila, dili angay nga obligahon ang katawhan sa pagbayad og buhis ngadto sa mga Romano, ug daghan sa katawhan ang miuyon niini. Ang mga Herodiano nagsuporta sa mga Romano ug, busa, mga tigpaluyo usab sila ni Herodes, ang pangulong Judio nga gitudlo sa Emperador sa Roma. Usa sa mga katungdanan ni Herodes mao ang pagpangolekta og buhis gikan sa mga Judio aron gamiton sa kagamhanang Romano. Ang mga mosupak sa pagbayad og buhis ngadto sa mga Romano mahimo pa ganing silotan og kamatayon.
Kining ilang hiniusang pagpangutana kang Jesus adunay usa lamang ka tumong: ang pagbutang Kaniya sa kalisdanan. Kon moingon si Jesus nga supak sa balaod ang pagbayad og buhis kang Cesar, mahimong dakpon Siya sa mga sundalo ni Herodes. Kon moingon si Jesus nga ang katawhan kinahanglan mobayad og buhis kang Cesar, mahimong agnihon sa mga Pariseo ang katawhan sa pagsupak Kaniya. Daw bisan unsa pay Iyang itubag sa ilang pangutana, mapildi gayod Siya. Hinuon, hingpit ang tubag ni Jesus. Wala Niya lapasa ang Balaod sa Dios, ug wala usab Niya lapasa ang balaod sibil. Sa pagkadungog sa Iyang tubag, ang tanan nga nakadungog Kaniya “nahibulong, ug gibiyaan nila siya ug nanglakaw.”
Ang leksiyon nga atong makat-onan gikan niining tekstoha ilabinang importante nga ipatuman sa kinabuhi sa pamilya. Kasagarang motungha matag karon ug unya ang mga panagbangi tali sa mga tawo nga suod sa usag usa. Kon mahitabo kana, sagad natong sulayan ang pagbitik sa laing tawo ug ang pagpangita og sayop sa iyang mga pulong pinaagi sa atong malimbongong pangatarongan. Kon mahitabo kini tali sa duha ka tawo, ang panag-istoryahanay sagad mahimong sininggitay diin ang matag usa nagtinguha lamang sa pagpangitag sayop sa usa. Yano ra ang solusyon sa ingon niana nga mga kahimtang. Ang matag panagbangi kinahanglang sulbaron pinaagi sa kamatuoran. Hingpit kining gibuhat ni Jesus. Wala Siya moatake sa dihang giatake Siya. Wala Siya manalipod sa Iyang kaugalingon sa paagi nga supak sa hustong pangatarongan. Wala Siya molikay sa pag-atubang sa mga misupak Kaniya. Wala Niya tuisa ang kamatuoran alang sa Iyang kaugalingong kaayohan. Hinuon, dayag ug matinud-anon Niyang gisulti ang tibuok kamatuoran ug midumili Siya sa pag-apil sa pagpanikas sa Iyang mga kaatbang.
Pamalandongi kining pangutanaha. Unsa kaha kon ikaw ang anaa sa kahimtang ni Jesus ug moduol kanimo ang mga Pariseo aron ipangutana kini kanimo? Unsay imong matintalang itubag? Lagmit, maningkamot ka sa pagtubag kanila sa paagi nga makapahimuot kanila. Tingali mohunghong ka, “Dili kita angay mobayad sa mga buhis apan ayaw kana isulti sa mga Herodiano.” Ug kon ang mga Herodiano maoy mangutana niana kanimo, tingali matintal ka sa paghatag og lahi nga tubag nga makapahimuot kanila.
Kasagaran, kon mobati kita nga adunay laing tawo nga naningkamot sa pagbitik kanato, pagkondena kanato, o paghagit kanato, mas mabalaka kita sa pagpanalipod sa atong kaugalingon kay sa tinuod nga kamatuoran. Mahimo kitang mahadlok sa pagsulti og bisan unsa nga makahatag kanila og hinungdan sa pag-atake kanato. Matintal kita sa pagtuis sa atong mga tubag imbes nga mosulti sa prangka, sinsero, ug matinud-anong paagi. Dili gayod kini makasulbad og panagbangi. Ang bugtong paagi sa pagsulbad sa bisan unsa mao ang kamatuoran.
Pamalandongi karon kon giunsa nimo pagsulbad ang panagbangi sa dihang motungha kini. Mas susama ka ba sa mga Pariseo ug mga Herodiano kansang bugtong tumong mao ang paglimbong, paglit-ag ug pagdaog? Niadtong mga higayona, giisip mo ba ang imong kaatbang nga usa ka kaaway? O naningkamot ka ba nga mahisama kang Jesus nga wala molikay sa panag-istorya, kondili mitubag sa matinud-anon ug diretsong paagi? Siyempre, sayon alang kang Jesus ang pagsulti sa kamatuoran kay wala man Siyay bisan unsang sayop. Sa atong kinabuhi, ang kamatuoran mahimong magkinahanglan nga atong angkonon ang atong sala ug mangayo og pasaylo kon adunay moatubang kanato bahin niini. Apan, kon ang kamatuoran, ang tibuok kamatuoran ug walay lain kondili ang kamatuoran mao ang atong tumong, nan ang atong panag-istorya mosunod sa panig-ingnan ni Jesus ug, kasagaran, mosangpot sa malinawon nga kasulbaran.
Ginoo kong matinud-anon, hingpit ang Imong kaalam ug ang Imong mga pulong mao ang kamatuoran. Palihog hatagi ako sa mga gasa sa kaalam ug sa tibuok kamatuoran, ilabina kon motungha ang mga panagbangi. Niadtong mga higayona, palihog pugngi ako sa pagtubag nga masuk-anon ug mapanalipdon sa kaugalingon aron mahimo akong kanunay nga instrumento sa panaghiusa nga Imong gitinguha. Jesus, misalig ako Kanimo.
Nobena kang San Judas
Alang sa mga Sitwasyon ug mga Kasong Daw Wala nay Paglaom
Iampo sa bisan unsang panahon sa tuig, ilabina sa Oktubre 19–27
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Pamalandong sa Balaang Kasulatan alang sa Panahon sulod sa Tuig
Santos sa Adlaw – San Juan Pablo II, Papa—Opsiyonal nga Handumanan
Dili saulogon isip liturhikanhong handumanan karong tuiga kay natunong kini sa Domingo
Mga Kapilian sa mga Basahon sa Misa
Gipiling hulagway sa ibabaw: Si Jesus ug ang salapi Ni Renáta Sedmáková
