Nobyembre 7, 2023
Martes sa Ika-31 nga Semana sa Ordinaryong Panahon
Mga Pagbasa Karong Adlawa
Paminaw sa Iningles
“May usa ka tawo nga nag-andam ug dakong panihapon ug nagdapit ug daghang mga tawo. Sa pag-abot sa takna sa panihapon, iyang gisugo ang iyang sulugoon sa pagsulti sa mga dinapit, ‘Dali na kamo, andam na ang tanan.’ Apan usa-usa silang tanan nga nangatarongan aron dili motambong.” Lucas 14:16–18
Nangatarongan ka ba usahay aron dili mosunod sa kabubut-on sa Diyos? Gipalabay mo ba ang Iyang pagdapit sa pagsalo sa lamesa sa Iyang dakong panihapon? Labaw sa tanan, ang pagdapit sa Diyos kanato niining “dakong panihapon” maoy pagdapit sa pag-apil sa Santos nga Misa ug sa pag-ampo. Ang kamatuoran nga adunay kanunayng mangatarongan aron dili motubag sa maong pagdapit nagpakita nga wala sila makasabot kon unsa ang ilang gidapitan. Ang uban motambong sa lawas, apan sa ilang kinasuloran layo sila sa kombira nga ilang gitambongan.
Niining sambingaya, sunodsunod nga wala motambong ang mga dinapit. Busa ang tawo nga nag-andam sa panihapon nagpadala ug pagdapit ngadto sa “mga kabos ug mga bakol, mga buta ug mga piang.” Kini nagtumong sa mga Hudiyo sa panahon ni Jesus nga miila sa ilang panginahanglan sa gasa sa kaluwasan. Sila kadtong nahibalo sa ilang mga kahuyang ug mga sala ug nasayod nga si Jesus mao ang tubag.
Human miabot sa kombira ang mga kabos, mga bakol, mga buta ug mga piang, may luna pa gihapon. Busa gisugo sa tawo ang iyang mga sulugoon sa pagdapit sa mga tawo gikan sa “mga dalan ug daplin sa mga koral,” nga nagtumong sa pagsangyaw sa Ebanghelyo ngadto sa mga Hentil nga dili mga Hudiyo sa kaliwat.
Karon, padayon gihapong gitanyag kini nga kombira. Apan daghang mga Katoliko nga nagpabaya sa ilang pagtuo ang nagdumili sa pagtambong. Adunay naghunahuna nga puliki ra kaayo ang ilang kinabuhi aron makagahin pa silag panahon sa pag-ampo ug sa Misa. Sila kadtong nalulong pag-ayo sa kalibotanong mga tinguha nga gamay ra ang ilang makitang personal nga kaayohan sa pagpahinungod sa ilang kaugalingon sa pagsaulog sa Santos nga Eukaristiya.
Kon buot kang mahiapil sa mga motambong sa kombira sa atong Ginoo, kinahanglan maningkamot ka sa pag-ila nga ikaw usab sama sa mga kabos, mga bakol, mga buta ug mga piang. Kinahanglan ilhon nimo ang imong pagkasamad, mga kahuyang ug mga sala. Dili ka angayng magpanuko sa pagtan-aw sa imong kaugalingon niining paagiha, kay ngadto sa mga sama niini gipadala ni Jesus ang Iyang hilabihang matinguhang pagdapit. Kining hilabihang pangandoy Niya maoy tinguha nga naghari sa Iyang tibuok pagkatawo nga kita makaambit sa Iyang gugma. Buot Niyang higugmaon ug ayohon kadtong nanginahanglan. Kita mao kadtong nanginahanglan.
Kon moduol kita sa Kombira sa atong Ginoo pinaagi sa pag-ampo, pagkamatinud-anon sa Iyang Pulong, ug pag-apil sa mga Sakramento, mamatikdan nato nga buot Niya nga ang uban mosalo usab kanato sa Iyang kombira. Busa, kinahanglan usab natong tan-awon ang atong kaugalingon ingon nga mga sulugoon nga gipadala ngadto sa mga dalan ug daplin sa mga koral diin makaplagan nato kadtong wala mosunod sa kabubut-on sa Diyos. Kinahanglan silang dapiton. Bisan tuod tingali mobati sila nga wala silay dapit didto, gusto sa Diyos nga maanaa sila sa Iyang kombira. Kita ang kinahanglang modapit kanila.
Pamalandongi karon ang duha ka butang. Una, pamalandongi ang bisan unsang pangatarongan nga kanunay nimong gamiton sa dihang dapiton ka sa Diyos sa pag-ampo, sa pagpalalom sa imong pagtuo, ug sa pag-apil sa Eukaristiya. Motubag ka ba dayon ug uban sa kahinam? O mas kanunay ka bang mangatarongan kay sa buot nimong angkonon? Pamalandongi usab ang katungdanan nga gihatag kanimo sa Diyos sa pagpangita sa mga kalag nga labing nahisalaag aron dapiton sila sa kombira sa Diyos. Buot sa atong Ginoo nga mahibalo ang tanan nga gidapit sila. Tugoti Siya nga mogamit kanimo sa pagpaabot sa Iyang pagdapit.
Manggihatagon kong Ginoo, gidapit Mo ako sa pag-ambit sa himaya sa Imong dakong Kombira. Gidapit Mo ako matag adlaw sa pag-ampo, sa paglig-on sa akong pagtuo, ug sa pag-ambit sa Balaang Eukaristiya. Hinaot nga kanunay akong motubag Kanimo ug dili gayod mangitag pasangil aron balibaran ang Imong mga pagdapit. Palihog, gamita usab ako, minahal kong Ginoo, sa pagpaabot sa Imong pagdapit ngadto sa mga labing nanginahanglan. Jesus, nagsalig ako Kanimo.
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Pamalandong sa Balaang Kasulatan alang sa Panahon sulod sa Tuig
Mga Santos/Kasaulogan Karong Adlawa
Mga Kapilian sa mga Basahon sa Misa
