Enero 27, 2024
Sabado sa Ikatulong Semana sa Panahon sulod sa Tuig
Mga Pagbasa Karong Adlawa
Santa Angela Merici, Birhen—Opsiyonal nga Handumanan
Paminaw sa Iningles
Gibiyaan nila ang panon sa katawhan ug gidala si Jesus sa sakayan sa iyang kahimtang niadto. May uban pang mga sakayan nga miuban kaniya. Mihuros ang usa ka makusog nga unos, ug ang mga balod mihampak ug misulod sa sakayan, mao nga hapit na kini mapuno sa tubig. Si Jesus didto sa ulin, natulog nga nag-unlan. Marcos 4:36–38
Sa dagan sa atong kinabuhi, makasiguro kita nga moabot gayod ang panahon nga makasugat kita og bagyo. Dili lamang pisikal nga bagyo kondili espirituhanon usab. Mahimo kining moabot sa dagway sa usa ka makalilisang nga hitabo, usa ka lawom nga samad nga gipahinabo sa laing tawo, mga sangpotanan sa atong kaugalingong sala, o uban pang masakit nga kasinatian. Ug alang sa daghang tawo, dili lang kini kausa mahitabo.
Kon makasugat kita og ingon niana nga “bagyo” sa kinabuhi, daw “natulog” si Jesus ug dili dayon anaa aron motabang kanato sa pagsagubang niini. Kon mahitabo kini, dako kaayong tabang ang pagpamalandong uban sa pag-ampo sa mensahe sa Ebanghelyo sa ibabaw.
Sa pagpadayon niining tudling sa Ebanghelyo, mabasa nato nga ang mga tinun-an, nga natarantar, mipukaw kang Jesus ug miingon, “Magtutudlo, wala ka ba mabalaka nga malunod na kita?” Mibangon si Jesus, misulti sa unos ug miingon, “Hilom! Hunong!” ug mikalma ang tanan. Unya miingon Siya sa mga tinun-an, “Nganong nahadlok man kamo? Wala pa ba gihapon kamoy pagtuo?” Ang mga tinun-an nahibilin nga nahibulong ug natingala.
Ang yawe mao ang pagtuo. Kon mag-atubang kita og bagyo sa kinabuhi, kinahanglan nga adunay kita pagtuo. Apan unsa man ang gipasabot niini? Nagpasabot kini nga kinahanglan natong mahibaloan, uban sa lawom nga kasigurohan, nga si Jesus sa pagkatinuod kanunayng ania uban kanato. Kinahanglan natong mahibaloan, uban sa lawom nga kasigurohan, nga kon ibutang nato diha Kaniya ang tanan natong pagsalig ug paglaom, dili gayod kita Niya biyaan. Kinahanglan natong mahibaloan, uban sa lawom nga kasigurohan, nga ang matag bagyo sa kataposan molabay ra ug mosunod ang kalinaw ug kalma.
Ang pag-atubang sa mga bagyo sa kinabuhi uban sa pagtuo makapausab kanato. Ug kasagaran adunay hinungdan nganong daw natulog si Jesus. Ang hinungdan mao nga buot Niya nga mosalig kita. Kasagaran kaayo, itutok nato ang atong mga mata sa bagyo mismo ug tugotan ang kahadlok ug kabalaka nga mogahom sa atong kinabuhi. Apan ang matag bagyo nga atong masugatan usa ka higayon sa pagsalig Kaniya sa bag-o ug mas lawom nga paagi. Kon ang kinabuhi kanunayng sayon ug makapahupay, diyutay ra unta ang atong katarongan sa pagsalig sa lawom gayod. Busa, ang matag bagyo kinahanglan tan-awon isip usa ka higayon sa pagdawat og dakong grasya samtang ibutang nato ang tanan natong pagsalig kang Jesus, bisan pa sa unsay daw makita nato sa maong takna.
Pamalandongi karong adlawa kon unsa gayod kalawom ang imong kaugalingong pagtuo kang Kristo ug kon unsa kini ka lig-on nga nagsuporta kanimo. Mosalig ka ba Kaniya bisan unsay mahitabo? Makasalig ka ba Kaniya kon daw nawala na ang tanan, kon lisod ang kinabuhi, ug kon ang kalibog motintal kanimo? Pangandam na karon alang sa sunod nga ingon niana nga bagyo nga mahimo nimong atubangon, ug paningkamoti nga gamiton kana nga higayon isip takna diin ang imong pagtuo mapadayag ug mahimong kusog nga nagpalig-on sa imong kinabuhi.
Akong Ginoo nga natulog, tabangi ako nga kanunayng ibutang ang tanan kong pagsalig diha Kanimo, bisan unsa pa ang mga kahimtang sa akong kinabuhi sa matag takna. Lig-ona ang akong pagtuo, ilabina sa mga panahon nga nag-atubang ako og mga hagit ug mga tentasyon. Hinaot nga dili gayod ako magduhaduha nga ania Ka uban kanako, naggiya kanako ug nagtipig kanako nga duol sa Imong maluloy-ong Kasingkasing. Jesus, misalig ako Kanimo.
9 ka Adlaw nga Nobena alang sa Kinabuhi
Enero 19–27
Ikasiyam nga adlaw: Enero 27
Dugang nga mga Pamalandong sa Ebanghelyo
Mga Pamalandong sa Diosnong Kalooy
Santos sa Adlaw – Santa Angela Merici, Birhen
Mga Kapilian sa mga Basahon sa Misa
