Ang Anaa sa Sulod

Pebrero 7, 2024
Miyerkules sa Ikalimang Semana sa Ordinaryong Panahon
Mga Pagbasa Karong Adlawa

Bidyo

Gitawag pag-usab ni Jesus ang panon sa katawhan ug miingon kanila, “Pamati kanako, kamong tanan, ug sabta kini. Walay bisan unsang mosulod sa tawo gikan sa gawas nga makahugaw kaniya; kondili ang mga butang nga mogula gikan sa sulod mao ang makahugaw.” Marcos 7:14–15

Unsa ang anaa sa imong sulod? Unsa ang anaa sa imong kasingkasing? Ang Ebanghelyo karong adlawa natapos sa usa ka lista sa mga bisyo nga, makapasubo man, naggikan sa sulod: “daotang mga hunahuna, pagkadili putli, pagpangawat, pagpatay, pagpanapaw, kahakog, pagkadaotan, paglimbong, pagpatuyang sa kaulag, kasina, pagpasipala, pagkamapahitas-on, kabuangan.” Siyempre, walay usa niining mga bisyo nga tilinguhaon kon tan-awon sumala sa tinuod nilang kinaiya. Tanan kini makaluod gayod. Apan sa kasagaran, kini mao ang mga sala nga kanunayng giatubang sa mga tawo, sa dako o gamay nga sukod.

Tagda, pananglitan, ang kahakog. Kon masabtan kini sa tin-aw, walay gustong mailhan nga hakog. Makauulaw kini nga kinaiya. Apan kon ang kahakog dili ilhon nga kahakog, sayon rang mahulog sa lit-ag sa pagkinabuhi niini. Ang tawo nga hakog nagtinguha og sobra-sobrang gidaghanon niini o nianang butanga. Mas daghang kuwarta, mas maayong balay, mas nindot nga sakyanan, mas maluho nga mga bakasyon, ug uban pa. Busa, kon ang usa ka tawo naglihok sa hakog nga paagi, ang kahakog dili makita nga usa ka butang nga angay likayan. Masabtan lamang ang tinuod nga kinaiya sa kahakog kon tan-awon kini nga walay pagpihig.

Niining Ebanghelyo, pinaagi sa paghingalan niining taas nga lista sa mga bisyo, gipakita ni Jesus kanato ang usa ka talagsaong buhat sa kalooy. Iya kitang pukawon ug tawgon sa paghunong kadiyot ug pagtan-aw sa sala sumala sa tinuod niini nga kinaiya. Giklaro usab ni Jesus nga kon magkinabuhi ka sa usa o labaw pa niining mga bisyo, mahugawan ka. Mahimo kang hakog, bakakon, bangis, tabian, madumtanon, mapahitas-on, ug uban pa. Sa walay pagpihig nga pagtan-aw, walay tawo nga gusto niini.

Asa niadtong listaha sa mga bisyo ang labing lisod nimong pakigbisogan? Unsa ang imong makita sulod sa imong kaugalingong kasingkasing? Pagmatinud-anon sa imong kaugalingon atubangan sa Dios. Gitinguha ni Jesus nga ang imong kasingkasing mahimong putli ug balaan, gawasnon gikan niini ug sa tanang kahugawan. Apan kon dili nimo matan-aw ang imong kaugalingong kasingkasing sa matinud-anong paagi, malisod ang pagsalikway sa sala nga imong gipakigbisogan.

Pamalandongi, karong adlawa, kining lista sa mga sala nga gihisgotan sa atong Ginoo. Tagda ang matag usa ug tugoti ang imong kaugalingon nga makita ang matag sala sumala sa tinuod niini nga kinaiya. Tugoti ang imong kaugalingon nga dumtan kining mga salaa uban sa balaang kasuko, ug dayon ipunting ang imong pagtagad ngadto sa sala nga labing lisod nimong pakigbisogan. Hibaloi nga samtang tinuyo nimong giila ug gisalikway kanang salaa, ang atong Ginoo magsugod sa paglig-on kanimo ug pagputli sa imong kasingkasing aron mahigawas ka gikan nianang kahugawan ug, hinuon, mahimong matahom nga anak sa Dios nga maoy katuyoan sa Iyang paglalang kanimo.

Akong maloloy-ong Ginoo, tabangi ako nga makita ang sala sumala sa tinuod niini nga kinaiya. Ilabina, tabangi ako nga makita ang akong kaugalingong sala—kanang sala sulod sa akong kasingkasing nga makahugaw kanako isip Imong hinigugmang anak. Samtang makita ko ang akong sala, hatagi ako sa grasya nga akong gikinahanglan aron isalikway kini ug modangop Kanimo sa tibuok kong kasingkasing, aron mahimo akong bag-ong binuhat diha sa Imong grasya ug kalooy. Jesus, misalig ako Kanimo!

Duha ka adlaw-adlaw nga debosyonal alang sa Kwaresma:
40 Days in the Desert
&
40 Days at the Foot of the Cross

Dugang nga mga Pamalandong sa Ebanghelyo

Mga Pamalandong sa Diosnong Kalooy

Mga Pamalandong sa Balaang Kasulatan alang sa Panahon sulod sa Tuig

Mga Santos/Kasaulogan Karong Adlawa

Mga Kapilian sa mga Basahon sa Misa

Gipiling hulagway sa ibabaw: Si Kristo nga Nagsangyaw ni Rembrandt, pinaagi sa  Wikimedia Commons