Marso 10, 2024
Ikaupat nga Domingo sa Kwaresma (Tuig B)
Mga Pagbasa Karong Adlawa
Pahinumdom: Kon gamiton ang mga Eskrutinyo sa Misa, mahimong gamiton ang pamalandong ug mga pagbasa alang sa Tuig A puli niini.
Paminaw sa Iningles
Miingon si Jesus kang Nicodemo: “Maingon nga gibayaw ni Moises ang bitin didto sa kamingawan, kinahanglan usab nga bayawon ang Anak sa Tawo, aron ang matag usa nga motuo Kaniya makabaton sa kinabuhing dayon.” Juan 3:14–15
Ang mga pulong nga gikutlo sa ibabaw mao ang panapos sa panag-istorya ni Jesus ug ni Nicodemo, usa ka Pariseo ug sakop sa Sanhedrin. Kini ang una sa tulo ka higayon nga gihisgotan si Nicodemo sa Ebanghelyo ni Juan. Ang ikaduhang higayon nga siya makita mao sa dihang iyang gipahinumdoman ang ubang mga sakop sa Sanhedrin nga kinahanglang paminawon una ang usa ka tawo sa dili pa siya hukman. Ang ikatulong higayon mao sa dihang gipatay si Jesus ug nagdala si Nicodemo og sinagol nga mira ug aloe aron maandam ang lawas ni Jesus alang sa paglubong.
Wala dawata si Jesus sa kadaghanan sa mga Pariseo ug sa mga sakop sa Sanhedrin. Tungod niini, nameligro si Nicodemo sa iyang pag-adto kang Jesus sa gabii aron makig-istorya. Apan klarong nabati ni Jesus ang pagtuo diha sa kasingkasing ni Nicodemo, mao nga sa dihang nangutana si Nicodemo kang Jesus bahin sa Iyang pagtulon-an, gitubag siya ni Jesus. Dili sama sa ubang mga Pariseo, wala mosulay si Nicodemo sa paglit-ag sa atong Ginoo; kinasingkasing siyang nagtinguha nga makasabot.
Sa sinugdanan niining panag-istorya ni Jesus ug ni Nicodemo, gipahayag ni Nicodemo ang iyang nagsugod nga pagtuo kang Jesus sa dihang miingon siya, “Rabbi, nahibalo kami nga Ikaw usa ka magtutudlo nga gikan sa Dios, kay walay makahimo niining mga timailhan nga Imong gibuhat gawas kon ang Dios anaa kaniya” (Juan 3:2). Makapainteres nga dayon nakigsulti si Jesus kang Nicodemo pinaagi sa mahulagwayong mga pulong, nga nag-ingon nga ang usa ka tawo makasulod lamang sa Gingharian sa Dios kon siya “matawo gikan sa kahitas-an” ug “matawo gikan sa tubig ug sa Espiritu.” Naningkamot si Nicodemo nga makasabot apan wala siya makasabot. Unya malumong gibadlong siya ni Jesus pinaagi sa pag-ingon, “Ikaw ang magtutudlo sa Israel ug wala ka makasabot niini?” (Juan 3:10). Dayon mipadayon si Jesus sa pagsulti pinaagi sa simbolikong pinulongan ug mahulagwayong mga pulong, ug gitapos Niya kini sa sinugdanan sa Ebanghelyo karong adlawa nga gikutlo sa ibabaw, diin dili Niya dayag nga gihisgotan ang Iyang umaabot nga pagkalansang sa krus.
Usa ka butang nga importanteng masabtan gikan niining panag-istorya ni Jesus ug ni Nicodemo mao nga wala ipadayag ni Jesus sa hingpit ang Iyang buot ipasabot, kondili migamit Siya og simbolikong pinulongan, tungod kay, bisan tuod anaa na si Nicodemo sa hustong dalan, dili pa siya andam alang sa hingpit nga pagpadayag sa Ebanghelyo. Dili pa niya hingpit nga masabtan ang tanan nga gianhi sa atong Ginoo aron ipadayag. Busa, misulti si Jesus sa dili dayag nga paagi ug gidapit si Nicodemo nga magpadayon sa pagpangita sa tinagong kahulogan niini.
Sa atong kaugalingong kinabuhi, mahimong moduol kita sa Dios ug magtinguha nga mosulti Siya kanato sa tin-aw ug tino nga paagi, nga magpadayag sa Iyang hingpit nga kabubut-on alang sa atong kinabuhi. Apan kasagaran dili Niya kini buhaton. Ngano man? Kay nahibalo ang Dios nga dili pa kita andam alang sa tibuok kamatuoran. Sa dihang mosulti Siya kanato ug makabaton kita og pagsabot sa usa o laing paagi, maayo kini ug nagpakita nga anaa kita sa hustong dalan. Apan ang Ebanghelyo, sa kahingpitan niini, nangayo og lawom kaayong kausaban ug dako kaayong pagpaningkamot nga ang kadaghanan sa mga tawo dili pa andam alang sa tibuok kamatuoran. Busa, sa Iyang kalooy, gihatag lamang sa Dios kanato ang atong maarangan sa pagkakaron. Apan kining kamatuoran nga nagpaubos kanato angay nga magdasig kanato, sama sa gibuhat niini kang Nicodemo, nga dili mohunong ug magpadayon sa pag-abli sa atong kaugalingon ngadto sa kahingpitan sa Pulong sa Dios.
Pamalandongi karong adlawa kon unsa ka bukas ang imong kaugalingon ngadto sa kahingpitan sa Pulong sa Dios. Unsay mahitabo kon ipadayag sa Dios kanimo, pinaagi sa usa ka diha-diha ug personal nga pagpadayag sa diosnong kahibalo, ang tanan nga anaa sa Iyang balaang hunahuna? Labaw ba kini sa imong maarangan? Oo, labaw gayod. Apan kanang mapaubsanong pag-angkon usa ka mahinungdanong lakang paingon nianang maong tumong. Ipaubos karong adlawa ang imong kaugalingon sa mas hingpit nga paagi atubangan sa misteryosong Pulong sa Dios ug pag-ampo nga padayon kang mausab ug magpabiling bukas aron ang katin-aw sa kamatuoran sa Dios mas hingpit nga motuhop sa imong kalag.
Ginoo nga akong Magtutudlo, ang Imong balaang Kamatuoran lawom kaayo, dili matugkad, ug makapausab sa kinabuhi, nga dili pa nako kini hingpit nga masabtan ug madawat. Tungod niini, nagpasalamat ako Kanimo sa Imong kalooy sa pagpakigsulti kanako sa mga paaging dili dayag, aron padayon Mo akong madala ngadto sa mas lawom nga pagtuo ug pag-ila Kanimo. Palihog, padayona ang pag-abli sa akong hunahuna ug kasingkasing nganha Kanimo aron, sa umaabot nga adlaw, masabtan nako ang Imong Kamatuoran sa labing hingpit nga paagi. Jesus, misalig ako Kanimo.
Pamalandong alang sa Ikaupat nga Domingo sa Kwaresma:
40 ka Adlaw sa Kamingawan
Nobena kang San Jose. Giampo gikan sa Marso 10-18.
Mga Kapanguhaan alang sa Kwaresma
Siyam ka Bulan nga Nobena sa Rosaryo kauban si Kardinal Burke
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Pamalandong sa Balaang Kasulatan alang sa Kwaresma
Mga Kapilian sa mga Basahon sa Misa
