Hunyo 22, 2024
Sabado sa Ika-onse nga Semana sa Ordinaryong Panahon
Mga Pagbasa Karong Adlawa
San Paulino sa Nola, Obispo—Opsyonal nga Handumanan
San Juan Fisher, Obispo ug Martir ug Santo Tomas More, Martir—Opsyonal nga Handumanan
Paminaw sa Iningles
Miingon si Jesus sa iyang mga tinun-an: “Walay makaalagad sa duha ka agalon. Kay dumtan niya ang usa ug higugmaon ang lain, o magmaunongon siya sa usa ug tamayon ang lain. Dili kamo makaalagad sa Diyos ug sa mammon.” Matthew 6:24
Ang mammon maoy laing pulong alang sa salapi. Tin-aw ang giingon ni Jesus nga kinahanglan kang mopili kon ang Diyos ba o ang salapi ang imong alagaran, apan dili ang duha. Dili igo ang kasingkasing nga nabahin. Si San Juan de la Cruz, sa iyang klasiko nga sinulat bahin sa espirituhanong kinabuhi nga “Ascent to Mount Carmel,” nagpasabot ug susama niini. Matod niya, kinahanglang mahinloan sa hingpit ang atong mga tinguha hangtod nga ang Diyos ug ang Iyang balaang kabubut-on na lamang ang atong tinguhaon. Ang tanang ubang tinguha sa kinabuhi kinahanglang wagtangon aron ang atong debosyon bug-os nga mapahinungod sa Diyos lamang. Nagpasabot ba kini nga ang Diyos ug ang Diyos lamang ang angay natong higugmaon sa bug-os natong gugma? Oo, gayod. Apan kinahanglang sabton sa husto kining kamatuorana.
Kon atong palandongon ang tawag sa Diyos kanato sa paghigugma, tinuod nga kinahanglan natong higugmaon dili lamang ang Diyos kondili usab ang daghang ubang butang sa kinabuhi. Kinahanglan natong higugmaon ang atong pamilya, mga higala, mga silingan, ug bisan ang atong mga kaaway. Hinaot nga gihigugma usab nato ang ubang bahin sa atong kinabuhi, sama sa atong bokasyon, trabaho, panimalay, usa ka kalingawan, ug uban pa. Busa, unsaon nato paghigugma sa Diyos uban sa debosyon nga alang lamang Kaniya samtang aduna usab kitay daghang ubang butang nga kinahanglan natong higugmaon?
Yano ra kaayo ang tubag. Ingon niini ang gugma alang sa Diyos: kon ang Diyos lamang ang atong himoong tumong sa atong gugma ug debosyon, ang atong gugma alang Kaniya moawas sa labaw-sa-kinaiyanhong paagi. Mao kini ang kinaiya sa gugma alang sa Diyos. Samtang gihigugma nato ang Diyos, atong masabtan nga gitawag kita Niya sa paghigugma Kaniya pinaagi sa paghigugma sa ubang tawo ug bisan sa nagkalainlaing bahin sa atong kinabuhi. Samtang gihigugma nato ang buot sa Diyos nga atong higugmaon ug gipadayag nato ang atong gugma alang sa tanang nalakip sa Iyang kabubut-on, gihigugma gihapon nato ang Diyos sa bug-os natong kasingkasing, hunahuna, kalag ug kusog.
Apan balikan nato ang teksto sa Balaang Kasulatan sa ibabaw. Nganong dili man nato mahimong higugmaon ang Diyos ug ang salapi? Ang “mammon” niini nga teksto kinahanglang sabton isip usa ka gugma nga nahimong dili maayong pagkagapos ug tinguha. Mahimo natong “higugmaon” ang salapi pinaagi sa pagtugot nga ang atong tinguha niini mahimong dili husto ang pagkahan-ay ug, sa ingon, dili na tagdon ang kabubut-on sa Diyos nianang “gugma.” Dili daotan ang salapi kon gamiton lamang kini sumala sa kabubut-on sa Diyos. Niana nga kahimtang, ang salapi nga atong gigamit makahatag ug dakong himaya sa Diyos. Apan kon ang salapi, o bisan unsang butang nga atong gitinguha, magsugod sa pagbaton, ingnon ta, ug kaugalingong kinabuhi nga bulag sa kabubut-on sa Diyos, nan kana nga tinguha mosukwahi na sa atong gugma alang sa Diyos. Ang paghigugma sa Diyos ug sa Diyos lamang nagpasabot nga gihigugma nato ang Diyos ug ang tanan nga buot Niyang atong higugmaon sa kinabuhi.
Pamalandongi karon ang panginahanglan nga bug-os nga ipahinungod ang imong kaugalingon sa Diyos lamang. Samtang imong itugyan ang imong kaugalingon niining gugma nga alang lamang Kaniya, palandonga usab kon kinsa ug unsa ang gitawag ka sa Diyos nga higugmaon diha Kaniya ug pinaagi Kaniya. Asa ka dad-a sa Iyang hingpit nga kabubut-on, ug giunsa ka pagtawag sa pagpakita sa imong gugma alang sa Diyos pinaagi sa paghigugma sa uban? Palandonga usab ang bisan unsang paagi nga imong gitugotan ang dili maayong pagkagapos sa salapi o sa bisan unsang butang sa kinabuhi nga makapahilayo kanimo gikan sa bugtong ug kinatas-ang katuyoan sa imong kinabuhi. Tugoti ang Diyos sa pagwagtang nianang dili maayong mga tinguha ug bakak nga mga “gugma” gikan sa imong kasingkasing aron gawasnon kang makahigugma sumala sa katuyoan sa paglalang kanimo.
Akong Ginoo ug Dios, takos Ka sa tibuok nakong gugma. Ikaw ug Ikaw lamang ang kinahanglang mahimong bugtong sentro sa tibuok nakong gugma. Samtang gihigugma Ko Ikaw, hinigugmang Ginoo, tabangi ako sa pag-ila sa tanan nga gimando sa Imong kabubut-on nga mas higugmaon nako ug sa tanan nga gitawag ako sa Imong kabubut-on nga buhian. Hinaot nga Ikaw lamang ang akong pilion ug ang tanan nga nalakip sa Imong balaan ug hingpit nga kabubut-on. Jesus, misalig ako Kanimo.
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Pamalandong sa Balaang Kasulatan alang sa Panahon sulod sa Tuig
Mga Santos sa Adlaw –
Si San John Fisher, Obispo ug Martir, ug si San Thomas More, Martir
Mga Kapilian sa mga Basahon sa Misa
_-_James_Tissot.jpg){kind=link}