Hulyo 2, 2024
Martes sa Ika-trese nga Semana sa Ordinaryong Panahon
Mga Pagbasa Karong Adlawa
Paminaw sa Iningles
Misakay si Jesus sa usa ka sakayan, ug misunod Kaniya ang Iyang mga tinun-an. Sa kalit, mitumaw ang usa ka kusog nga unos sa dagat, ug hapit nang matabonan sa mga balod ang sakayan; apan Siya natulog. Mateo 8:23–24
Kini nga kasinatian nakahatag og dakong impresyon sa mga tinun-an, nga makita sa kamatuoran nga kini gitala sa tanang tulo ka Sinoptikong Ebanghelyo. Makita usab nato kini sa kataposang mga pulong sa sugilanon human pahiloma ni Jesus ang unos: “Natingala ang mga tawo ug miingon, ‘Unsang matang sa tawo kini, nga bisan ang mga hangin ug ang dagat mituman man Kaniya?’”
Sumala sa tradisyon, kini nga sugilanon gihubad isip hulagway sa tibuok Simbahan ingon man sa matag kalag. Ang sakayan maoy hulagway sa Simbahan, nga pinaagi niini kitang mga Kristohanon molatas sa mga katalagman niining kinabuhia. Kinahanglan kitang magpabilin sa Simbahan aron makalingkawas sa mga katalagman. Ang matag tawo sulod sa sakayan nagrepresentar sa matag usa kanato nga sakop sa Simbahan. Ang mabangis nga unos maoy hulagway sa daghang personal nga mga pakigbisog nga atong giantos sa kinabuhi, ingon man sa mga paglutos nga giantos sa Simbahan ug padayon pa niining antoson hangtod sa kataposan sa panahon.
Samtang gihampak sa unos ang sakayan, si Jesus natulog. Apan may hinungdan ang Iyang pagkatulog. Kon atong tan-awon ang kasaysayan sa katawhan, ilabina ang kasaysayan sa Simbahan, makita nato ang daghang higayon nga daw wala ang Diyos o “natulog” sa dihang mitumaw ang kagubot, paglutos, ug kalisdanan. Daghang tawo, kon dili man tanan, ang nakaagi sa samang kasinatian sa usa ka higayon o lain sa ilang kinabuhi. Samtang nasinati sa mga tinun-an kining unos, gipakita nila kanato ang usa ka maayong sumbanan sa pag-ampo kon kita matintal sa pagkawalay paglaom sa kinabuhi. Gipukaw nila si Jesus ug miingon, “Ginoo, luwasa kami! Mangamatay na kami!” Ug bisan pa og gibadlong sila ni Jesus tungod sa ilang kakulang sa pagtuo ug sa ilang kahadlok, gitubag usab Niya ang ilang mga pangamuyo ug gipahilom ang unos.
Unsa man unta ang angay buhaton sa mga tinun-an niining kahimtanga? Angay ba unta silang misalig ug mipasagdan kang Jesus nga magpadayon sa pagkatulog? Bisan og gibadlong sila sa atong Ginoo tungod sa ilang kakulang sa pagtuo, kini nga sugilanon labaw sa tanan nagpadayag sa kaluoy sa Diyos kon kita matintal sa pagkahadlok. Nahibalo ang Diyos nga usahay kitang tanan mobati nga dili na nato makaya ang atong giatubang ug matintal niining paagiha. Nahibalo Siya nga dili hingpit ang atong pagtuo, busa gitugotan Niya ang Iyang mga tinun-an nga maghatag niini nga panig-ingnan alang kanato. Busa, matag higayon nga mobati kita nga dili na nato makaya ang atong giatubang ug mahadlok kita sa kinabuhi, angay kitang motuaw ngadto Kaniya aron luwason kita. Gusto Niya nga modangop kita Kaniya.
Pamalandongi karon kining pag-ampo sa mga tinun-an. Kon nag-atubang ka og personal nga krisis, o mas dakong kalisdanan sa pamilya nga wala pa masulbad, o mas naamgohan nimo ang ubang mga pakigbisog nga nagpaantos sa Simbahan o sa katilingban sa kinatibuk-an, sulayi ang pagsundog niining pag-ampo sa mga tinun-an: “Ginoo, luwasa kami! Mangamatay na kami!” Bisan tuod sa sinugdan kining mga pulonga daw mga pulong sa pagkawalay paglaom, sa pagkatinuod mga pulong kini sa paglaom ug pagsalig. Kini nagtultol kanato ngadto Kaniya nga mao lamang ang tinubdan sa kalinaw nga atong gipangita sa atong mga kalag, mga pamilya, sa Simbahan ug sa atong kalibotan. Tan-awa ang daghang paagi nga ikaw ug ang uban nakasinati sa pagbati nga daw “mangamatay na,” ug tuaw sa tibuok mong kasingkasing ngadto sa atong Ginoo aron luwason ka ug ang tanan nga nanginahanglan.
Labing gamhanang Ginoo, nahingangha ako sa Imong diyosnong gahom ug katakos sa hingpit nga pagpakalma sa mga unos nga naghasol sa Imong katawhan. Palihog pun-a ako sa paglaom ug pagkamapainubsanon aron dili gayod ako magpanuko sa pagdangop Kanimo sa akong panginahanglan ug sa pagtawag usab Kanimo alang sa Imong padayong pagpangilabot sa kinabuhi sa uban. Pagmata, O Ginoo, ug luwasa ang Imong katawhan, kay mangamatay gayod kami kon wala Ka! Jesus, misalig ako Kanimo.
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Pamalandong sa Balaang Kasulatan alang sa Panahon sulod sa Tuig
Mga Santos/Kasaulogan Karong Adlawa
Mga Kapilian sa mga Basahon sa Misa
