Hulyo 21, 2024
Ikanapulog Unom nga Domingo sa Ordinaryong Panahon (Tuig B)
Mga Pagbasa Karong Adlawa
Paminaw sa Iningles
Sa pagkanaog Niya sa sakayan ug pagkakita sa dakong panon sa katawhan, nalooy gayod Siya kanila, kay sama sila sa mga karnero nga walay magbalantay; ug gisugdan Niya sila pagtudlo sa daghang mga butang. Marcos 6:34
Si Jesus ug ang Napulog Duha ka Apostoles naningkamot pag-ayo sa ilang buluhaton. Ang Napulog Duha nangadto sa daghang kasikbit nga mga lungsod alang sa ilang misyon, nga nagsangyaw, nag-ayo sa mga masakiton, ug naghingilin sa mga demonyo. Sa pagkahuman sa ilang misyon, mibalik sila kang Jesus ug gisugilon Kaniya ang tanan nilang nahimo. Unya gidapit sila ni Jesus, “Dali kamo, mangadto kita sa usa ka mingaw nga dapit nga kita-kita lamang ug mopahulay kadiyot.” Apan nabalitaan sa katawhan ang ilang paggikan sakay sa bangka ug midali sila ngadto sa pikas daplin sa Dagat sa Galilea aron makauna sila kang Jesus ug sa Napulog Duha.
Ang teksto nga gikutlo sa ibabaw nagpadayag sa gibati ni Jesus alang sa katawhan sa pagkanaog Niya ug sa Napulog Duha gikan sa sakayan. Bisan tuod naningkamot silang mangadto sa usa ka hilom nga dapit aron magpahulay, determinado ang katawhan nga makauban sila. Siyempre, wala masuko si Jesus bisan napakyas tungod sa katawhan ang Iyang tinguha nga makagahin og hilom nga panahon uban sa Napulog Duha. Hinuon, napuno sa kaluoy ang Iyang kasingkasing. Nakita Niya nga gigutom ang katawhan sa dugang pang pagtulon-an ug nga sila “sama sa mga karnero nga walay magbalantay.” Tungod niini, gisugdan dayon ni Jesus ang pagpakaon kanila pinaagi sa Iyang mga pagtulon-an.
Usa ka mapuslanong punto nga pamalandongon niini nga teksto mao nga ang mga tawo nga nagtigom gihulagway nga usa ka “dakong panon sa katawhan.” Sa mosunod nga teksto sa Ebanghelyo ni Marcos, atong mahibaloan nga sa dihang nahuman na si Jesus sa pagtudlo kanila sa daghang mga butang, gihimo Niya ang milagro sa pagpadaghan sa mga isda ug tinapay ug gipakaon ang 5,000 ka lalaki, wala pay labot ang mga babaye ug mga bata. Sanglit ang gibanabanang katumbasan niadtong panahona sa hamtong nga mga lalaki ngadto sa mga babaye ug mga bata labing menos 5:1, ang panon mahimong miabot og 25,000 ka tawo. Alang sa usa ka kalit nga panagtigom sa katawhan sa usa ka hilit nga dapit sa daplin sa Dagat sa Galilea, dako kaayo kana nga gidaghanon. Labi na kay gibanabana nga mga 1,500 lamang ka tawo ang nagpuyo sa Capernaum niadtong panahona. Ang katawhan midugok ngadto sa atong Ginoo gikan pa sa layo kaayong mga dapit.
Kining dako ug kalit nga panagtigom nagpadayag kanato sa kagutom nga gipukaw ni Jesus diha sa mga kasingkasing sa daghan kaayong tawo. Ang uban kanila nakadungog na kang Jesus nga nagtudlo ug nakasaksi sa Iyang mga milagro. Ang uban mao kadtong bag-o pang gisangyawan sa Napulog Duha didto sa kasikbit nga mga baryo. Pinaagi sa gahom sa Espiritu Santo, tin-aw ug makapakombinsir nga misulti ang Napulog Duha mahitungod kang Jesus, ug daghang tawo ang mitubag, nga nagtinguha nga mas makaila pa sa atong Ginoo.
Samtang imong gipamalandong ang kasibot sa daghan kaayong tawo, sulayi kini pagtandi sa imong kaugalingong kasibot alang kang Jesus. Napalihok ka ba sa pagpangita Kaniya uban sa samang kainit sa tinguha ug kadasig nga milukop niining unang mga sumusunod? O namatikdan ba nimo nga usahay kulang ang imong kadasig ug kasibot? Kining dakong panon sa katawhan, uban sa ilang kadasig ug determinasyon sa pagpangita sa atong Ginoo, angay mahimong tinubdan sa inspirasyon ug pagsusi sa kaugalingon alang kanatong tanan.
Pamalandongi karon kining dakong panon sa katawhan. Sulayi paghanduraw ang imong kaugalingon nga nakig-uban kanila. Handurawa nga natandog ka pag-ayo sa pagsangyaw sa mga Apostoles hangtod nga ang imong bugtong tumong mao ang pagpatagbaw sa imong kagutom pinaagi sa balaang pagtulon-an ni Jesus. Kon lisod alang kanimo ang paghanduraw nga mobuhat ka niini, mapaubsanong ilha nga basin nagkinahanglan ka og dugang kadasig alang kang Jesus diha sa imong kinabuhi. Pag-ampo nga kining balaang mga tinguha mapukaw diha kanimo, ug buhata ang tanan nimong mahimo aron mapalambo ang maong kadasig.
Akong maluluy-ong Ginoo, ang dagkong panon sa katawhan nangita Kanimo aron maminaw Kanimo ug mapakaon sa Imong balaang Pulong. Nagdilaab sila sa tinguha nga makauban Ka, ug gitubag Mo sila uban sa dakong kalooy. Palihog pun-a ang akong kasingkasing sa samang kadasig ug tinguha alang Kanimo. Tudloi ako, Ginoo, pakan-a ako ug dad-a ako nga mas duol Kanimo. Jesus, misalig ako Kanimo.
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Pamalandong sa Balaang Kasulatan alang sa Panahon sulod sa Tuig
Santos sa Adlaw – San Lorenzo sa Brindisi, Pari ug Doktor sa Simbahan
Dili saulogon isip liturhikanhong handumanan karong tuiga kay natunong kini sa Domingo
Mga Kapilian sa mga Basahon sa Misa
Pangunang hulagway sa ibabaw: Milagro sa mga Tinapay ug Isda, gikan sa flickr
