Hulyo 30, 2024
Martes sa Ikanapulog-pitong Semana sa Panahon sa Tuig
Mga Pagbasa alang sa Karon
San Pedro Crisologo, Obispo ug Doktor sa Simbahan—Opsiyonal nga Handumanan
Paminaw sa Iningles
“Unya ang mga matarong mosidlak sama sa adlaw sa Gingharian sa ilang Amahan. Ang adunay mga dalunggan kinahanglan mamati.” Mateo 13:43
Kini nga tudling nagtapos sa pagpasabot ni Jesus sa Sambingay sa mga Sagbot sa Uma. Hinumdomi nga niini nga sambingay, adunay maayong mga binhi nga gipugas sa usa ka uma. Ang Magpupugas mao ang Anak sa Tawo, si Jesus, ug ang binhi nga Iyang gipugas mao ang mga anak sa Gingharian, nga naglakip sa tanan nga anaa sa kahimtang sa grasya. Ang uma mao ang tibuok kalibotan. Busa, si Jesus nag-ingon nga Iyang gipadala ang Iyang mga sumusunod, ang matag usa kanato, ngadto sa kalibotan aron tukoron ang Iyang Gingharian. Apan ang daotan nagpugas usab sa iyang “mga anak,” nga nagtumong sa tanan nga nagkinabuhi sa daotan nga supak sa kabubut-on sa Dios. Ang tudling sa ibabaw nagtumong sa ganti nga madawat sa mga anak sa Gingharian, samtang ang tudling nga nag-una dayon niini nagpunting nga sa kataposan sa kapanahonan, ang mga anak sa daotan pagahukman sa silot ug itambog “ngadto sa hudno nga nagdilaab, diin adunay pagminatay ug pagkagot sa mga ngipon.”
Ang kataposang dangatan sa mga anak sa Gingharian naghatag gayod og dakong paglaom. “Unya ang mga matarong mosidlak sama sa adlaw sa Gingharian sa ilang Amahan.” Kini nga saad sa atong Ginoo angay pamalandongan, tuohan, ug himoong kusog nga nagpalihok sa atong paglaom sa kinabuhi.
Ang paglaom usa ka mahinungdanong hiyas nga kasagaran dili nato igo nga mahisgotan. Ang gasa sa paglaom dili kay pagpangandoy lamang, sama sa paglaom nga makadaog sa lotto. Ang teolohikal nga hiyas sa paglaom usa ka gasa gikan sa Dios nga gipasukad sa kamatuoran. Ang kamatuoran nga gisukaran niini mao ang saad sa kinabuhing walay kataposan sa Langit kon dawaton nato ang tanan nga gisulti sa Dios kanato ug kon tumanon nato ang Iyang mahimayaong kabubut-on sa atong kinabuhi.
Isip pagtandi, pananglitan nga aduna kay dakong utang sa bangko nga giprenda ang imong balay. Ug pananglitan nga ang bangko adunay promosyon diin bayran nila sa hingpit ang maong utang sa usa ka suwerteng pamilya. Ug ang maong pamilya mao ang inyo. Gikontak ka nila ug gipahibalo nga ang kinahanglan lang nimong buhaton mao ang pagsulat sa gikinahanglang impormasyon sa pormularyo sa aplikasyon alang niini nga tabang, ug unya ihatag na kini kanimo. Unsa may imong buhaton? Siyempre, moadto ka ug mokompleto sa aplikasyon. Kasaligan ang bangko, ug masaligon ka nga kon buhaton nimo ang ilang gipangayo, ang gamayng buluhaton sa pagkompleto sa aplikasyon, tumanon nila ang ilang saad nga bayran sa hingpit ang imong utang. Sa usa ka diwa, motungha ang paglaom diha kanimo sa dihang mahibaloan nimo kini nga tanyag; ug kana nga paglaom, nga gipasukad sa usa ka tinuod nga saad, mao ang magpalihok kanimo sa pagbuhat sa gamayng buluhaton sa pagkompleto sa aplikasyon.
Ingon usab niini ang Dios. Ang “utang nga giprenda ang balay” nga Iyang gisaad nga bayran mao ang utang sa tanan natong sala. Ug ang gikinahanglan aron madawat kining Iyang gisaad mao ang pagkamatinumanon sa tanan Niyang gisugo kanato alang sa atong kaayohan. Ang problema mao nga kasagaran dili nato hingpit nga masabtan ang ganti nga gisaad kanato. Mao kini: ang “mosidlak sama sa adlaw” sa Gingharian sa atong Amahan sa Langit. Ang pagbayad sa bangko sa imong utang sa balay usa ka butang nga konkreto, tin-aw, ug hilabihan gayod nga gitinguha. Apan ang ganti nga mosidlak sama sa adlaw sa Gingharian adunay bili nga labaw pa niini sa walay sukod. Nagtuo ka ba niini?
Ang labing maayong paagi aron mapalig-on ang teolohikal nga hiyas sa paglaom sa atong kinabuhi mao ang pagkahimong mas masaligon sa pagkatinuod sa saad sa atong Ginoo. Kinahanglan natong masabtan ang Langit ug ang walay kinutobang bili nga atong madawat kon makab-ot nato kini. Kon tinuod natong masabtan ang gisaad ni Jesus kanato, hilabihan gayod ang atong kadasig sa pagtuman sa tanan Niyang gisugo kanato nga kini mahimong mao na lamang ang tutokan sa atong kinabuhi. Ang paglaom mahimong usa ka kusog nga hilabihan kagamhanan nga bug-os natong igahin ang atong kaugalingon sa pagbuhat sa bisan unsa ug sa tanan nga gikinahanglan aron makab-ot ang maong ganti.
Pamalandungi karon ang kalawom sa paglaom nga anaa sa imong kinabuhi. Unsa ka dako ang pagdasig kanimo sa mga saad sa atong Ginoo? Unsa ka tin-aw ang imong pagsabot niining mga saara? Kon naglisod ka sa paglaom, paggahin og dugang panahon sa pagpamalandong sa kataposang ganti nga gisaad kanimo ni Jesus. Tuohi ang Iyang gisulti ug himoa kanang kataposang tumong nga sentro sa imong kinabuhi.
Akong mahimayaong Hari, gidapit Mo ang tanang tawo sa pag-ambit sa mga himaya sa Langit. Gisaad Mo kanamo nga kon magmatinumanon kami, mosidlak kami sama sa adlaw hangtod sa kahangtoran. Tabangi ako nga masabtan kining mahimayaong gasa aron kini lamang ang akong laoman ug ang makadasig sa tanan kong buhaton sa kinabuhi. Jesus, misalig ako Kanimo.
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Pamalandong sa Balaang Kasulatan alang sa Panahon sulod sa Tuig
Santos sa Adlaw – San Pedro Crisologo, Obispo ug Doktor sa Simbahan—Opsiyonal nga Paghandum
Mga Santos/Kasaulogan Karong Adlawa
Mga Kapilian sa mga Basahon sa Misa
Gipiling hulagway sa ibabaw: Ang mga Santos Mosidlak, gikan sa flickr
