Agosto 21, 2024
Mga Pagbasa Karong Adlawa
Mga Pagbasa alang sa Miyerkules sa Ikakawhaan nga Semana sa Ordinaryong Panahon
Paminaw sa Iningles
Sa paggawas niya sa mga alas singko sa hapon, nakakita siya og uban nga nagtindog lang didto, ug miingon siya kanila, “Nganong nagtindog lang man kamo dinhi nga walay gibuhat sa tibuok adlaw?” Mitubag sila, “Kay walay mikuha kanamo aron motrabaho.” Miingon siya kanila, “Adto usab kamo sa akong ubasan.” Mateo 20:6–7
Kini mga pulong nga nagpakita sa dakong pagkamanggihatagon sa tag-iya sa yuta. Sumala sa gisaysay sa sambingay, kining tag-iya sa yuta mikuha og mga mamumuo alang sa iyang ubasan sayo sa buntag, ug mikuha pag-usab sa alas nuybe, sa udto, sa alas tres sa hapon, ug sa kataposan sa alas singko sa hapon. Apan sa kataposan sa adlaw, gibayran niya silang tanan sa samang inadlaw nga suhol, nga daw silang tanan nagtrabaho sukad pa sa sayong buntag. Ang mga unang gikuha nasuko kay naghunahuna sila nga dili makiangayon nga ang mga nagtrabaho og usa lang ka oras nakadawat sa samang suhol nga ilang nadawat. Apan ang tag-iya sa yuta mitapos sa pag-ingon, “Unsa man diay kon buot kong hatagan kining naulahi sama sa akong gihatag kanimo? O dili ba ako gawasnon sa pagbuhat sa akong gusto sa kaugalingon kong salapi? Nasina ka ba tungod kay manggihatagon ako?” Ang Dios, diha sa Iyang kalooy, manggihatagon labaw pa sa atong masabtan. Apan kita, isip mga tawo nga nahulog sa sala, kanunayng nagsusi kon nakadawat ba kita sa atong makiangayong bahin ug nagtandi sa atong kaugalingon ngadto sa uban. May kalagmitan kitang mangandoy og dugang pa ug dali rang masina kon makita nato nga ang uban nagmalampuson o nakadawat og mga panalangin nga wala kanato. Pananglitan, kon adunay mas ilado kay kanato sa social media, o nagmaneho og mas nindot nga sakyanan, o adunay mas dakong balay, o nagbakasyon nga dakog gasto, kasagaran makamatikod kita niini uban sa usa ka matang sa kasubo tungod kay wala kanato ang anaa kanila. Ug kana mao ang kasina.
Ang tambal sa kasina mao ang kinasingkasing nga pagkamanggihatagon. Dili lamang pagkamanggihatagon sa atong salapi, kondili usab sa atong pagbati ngadto sa uban ug sa atong katakos sa paglipay sa mga panalangin nga ilang nadawat. Pananglitan, kon adunay mosulti kanimo nga sa sunod bulan moadto siya sa usa ka maanindot nga bakasyon sa dapit nga dugay mo nang gipangandoy nga maadtoan, unsa may imong reaksiyon? Tingali moingon ka nga nagkomedya, “Wow, nangabugho ko!” Ang pangabugho daling mahimong kasina, nga usa ka matang sa kasubo tungod sa mga panalangin nga anaa sa uban apan wala kanimo. Ug kanang kasubo tungod sa mga panalangin sa uban mahimong mosangpot sa kasuko.
Kining mga mamumuo sa ubasan nga nagtrabaho sa tibuok adlaw ug nakadawat sa samang kantidad nga nadawat sa mga nagtrabaho og usa lamang ka oras mahimo unta nga mipahalipay sa mga ulahing mamumuo ug gani miingon nga nagkomedya, “Swerteha ninyo, maayo pa untag sa alas singko na lang usab ko miabot!” Apan hinuon, nagbagulbol sila ug misulay sa pagpugong sa pagkamanggihatagon sa tag-iya sa yuta pinaagi sa pag-ingon, “Kining mga naulahi nagtrabaho og usa lamang ka oras, apan gihimo mo silang sama kanamo, nga nag-antus sa kabug-at sa trabaho ug sa kainit sa tibuok adlaw.” Sa makausa pa, kini kasina, kay ang ilang kasubo tungod sa pagkamanggihatagon sa tag-iya sa yuta nagtukmod kanila sa pagsulay sa pagpugong sa panalangin nga nadawat sa uban.
Sa matag higayon nga mamatikdan nimo kining matang sa dili balaang kasubo diha kanimo, hatagi kini og pagtagad. Nagpasabot kini nga kulang ka sa pagkamanggihatagon ngadto sa uban nga walay paghunahuna sa kaugalingon. Ug kon makita nimo nga gipanalanginan sa Dios ang uban og espirituhanong mga bahandi, paningkamoti nga malipay ka niini sa kinasingkasing. Dayega ug pasalamati ang Dios tungod sa Iyang kaayo. Ayaw ipunting ang imong hunahuna sa imong kaugalingon, ug isalikway ang matag tentasyon sa pagtandi sa imong kaugalingon sa uban. Sa daghang paagi, ang matag usa kanato girepresentar niadtong mitrabaho og usa lamang ka oras apan nakadawat sa tibuok adlaw nga suhol. Kini tungod kay dili gayod nato maangkon ang grasya sa kaluwasan pinaagi sa atong kaugalingong paningkamot. Ang bugtong hinungdan nga makadawat kita sa gasa sa walay kataposang kaluwasan ug sa tanang ubang grasya nga gihatag kanato sa Dios mao nga walay kinutoban ang Iyang pagkamanggihatagon. Busa, ang kaayo ug pagkamanggihatagon sa Dios kinahanglan mao kanunay ang atong tutokan, ug kinahanglan kitang malipay nianang pagkamanggihatagon kon kini ipakita kanato ug kon ipakita usab kini ngadto sa uban.
Pamalandongi karon ang bisan unsang kahilig nimo sa kasina. Hunahunaa ang mga panalangin nga nadawat sa uban apan wala nimo madawat. Matinud-anong susiha ang imong tubag sa sulod sa imong kasingkasing niini, ug pag-ampo nga hatagan ka sa Dios sa gasa nga makahimo kang malipay sa kinasingkasing tungod niadtong mga panalangin. Ang matag panalangin nga gihatag sa Dios kinahanglan mahimong hinungdan sa atong kalipay, gihatag man kini kanato o ngadto sa uban.
Akong labing manggihatag nga Ginoo, madagayaon Ka kaayong naghatag sa Imong mga panalangin ngadto sa tanan. Sa dihang makita nako ang mga paagi sa Imong pagpanalangin sa uban, tabangi ako sa pag-ugmad og kinasingkasing nga pagpasalamat alang sa tanan nilang nadawat. Tabangi ako nga tinuod nga malipay sa daghang paagi sa Imong pagpanalangin sa tanan Mong katawhan. Luwasa ako gikan sa kasina, minahal nga Ginoo, aron dili ako mabug-atan nianang mangil-ad nga sala. Jesus, misalig ako Kanimo.
Nobena kang Santa Monica
(Ilabinang giampo alang sa mga anak nga nahisalaag)
Agosto 18-26
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Pamalandong sa Balaang Kasulatan alang sa Panahon sulod sa Tuig
Santos sa Adlaw – San Pio X, Papa
Mga Kapilian sa mga Basahon sa Misa
