Agosto 23, 2024
Biyernes sa Ikakawhaang Semana sa Panahon sa Tuig
Mga Pagbasa alang sa Karon
Santa Rosa de Lima, Birhen—Opsiyonal nga Paghandum
Paminaw sa Iningles
“Higugmaa ang Ginoo, imong Dios, sa tibuok mong kasingkasing, sa tibuok mong kalag, ug sa tibuok mong hunahuna. Mao kini ang labing dako ug unang sugo. Ang ikaduha susama niini: Higugmaa ang imong isigkatawo sama sa imong kaugalingon.” Mateo 22:37–39
Pamilyar kaayo kita niining teksto sa ibabaw. Kini ang tubag ni Jesus sa mga Pariseo nga miabot aron pagsulay Kaniya. Sa wala pa kini, usa ka grupo sa mga Saduseo misulay sa paglit-ag kang Jesus apan napakyas. Busa karon, ang mga Pariseo na usab ang naningkamot kutob sa ilang mahimo sa paglit-ag sa atong Ginoo. Siyempre, hingpit ang tubag ni Jesus. Ug human Niya pagtubag, Siya na usab ang nangutana sa mga Pariseo og pipila ka mga pangutana nga dili nila matubag, ug niadtong higayona wala na sila mangahas sa pagpangutana pa Kaniya.
Usahay, makatabang kanato kon adunay mohagit kanato bahin sa mga butang sa pagtuo, kay naghatag kini kanato og higayon sa pagpatin-aw kon unsa gayod ang atong gituohan. Bisan tuod wala magkinahanglan si Jesus og katin-awan alang sa Iyang kaugalingon, Iyang gihatag kini nga katin-awan atubangan sa ilang panglimbong aron matabangan ang mga Pariseo ingon man ang Iyang mga sumusunod nga naminaw pag-ayo.
Nakahigayon ka na ba nga gihagit sa uban bahin sa mga butang sa pagtuo? Kon mao, unsa ang imong tubag? Nakatubag ka ba pinaagi sa inspirasyon ug katin-awan nga gihatag sa Espiritu Santo? O mibiya ka nga naglibog ug wala makatubag? Kon hagiton sa uban ang atong pagtuo, mahimo kining mosangpot sa atong kalibog o sa mas lawom natong pagsabot.
Sa paagi sa pagtubag ni Jesus niini nga pangutana, Iyang gipresentar sa bag-o ug hinugpong nga paagi ang tibuok Balaod nga gihatag ni Moises diha sa Napulo ka Sugo. Ang unang tulo sa Napulo ka Sugo may kalabotan sa paghigugma sa Dios, ug ang kataposang pito may kalabotan sa paghigugma sa isigkatawo. Ang ikaduhang sugo nga gihatag ni Jesus, “Higugmaa ang imong isigkatawo sama sa imong kaugalingon,” maoy sangpotanan sa unang sugo. Unsaon nimo “paghigugma sa imong kaugalingon?” Mahimo nimo kini pinaagi sa pagtuman sa unang sugo nga gihatag ni Jesus: “Higugmaa ang Ginoo, imong Dios, sa tibuok mong kasingkasing, sa tibuok mong kalag, ug sa tibuok mong hunahuna.” Kon gihigugma ang Dios labaw sa tanan, nan ang paghigugma sa imong isigkatawo nagpasabot lamang nga gihigugma nimo ang Dios nga nagpuyo diha sa imong isigkatawo, sumala sa paagi sa paghigugma sa Dios kaniya.
Makatabang usab ang paghinumdom nga posible ang “paghigugma” sa atong isigkatawo sa paagi nga supak sa gugma sa Dios. Pananglitan, kon ang atong paghigugma sa isigkatawo gipahayag sa paagi nga supak sa Gugma sa Dios, dili kini tinuod nga gugma. Ibutang ta nga ang imong isigkatawo mipili og paagi sa pagkinabuhi nga grabeng imoral. Unsaon nimo siya paghigugma pinaagi sa gugma sa Dios? Dili nimo siya ingnon, “Gisuportahan ko ikaw sa imong imoral nga pagkinabuhi.” Ang pagbuhat niini dili paghigugma sa Dios; kini usa ka hakog nga matang sa gugma nga mas nagpakabana kon unsay iyang tubag kanimo kay sa pag-atiman sa iyang kalag nga walay kataposan. Ang hustong matang sa paghigugma sa usa nga nahisalaag sa paagi nga imoral sa iyang kaugalingong kinaiya mao ang pagpahibalo kaniya nga gihigugma nimo siya apan wala ka mouyon sa iyang mga pagpili. Ug bisan pa kon dili maayo ang iyang sanong niini, ang pagpakabana sa iyang walay kataposang kaluwasan kinahanglang molabaw sa tanang tinguha nga makig-uyon lamang kaniya.
Ang paghigugma sa isigkatawo usahay lisod, ilabina kon ang maong “isigkatawo” usa ka sakop sa pamilya nga mitalikod sa Diyos. Apan kon mahitabo kini, hunahunaa kon giunsa sa mga Saduseo ug mga Fariseo ang kanunayng pagsulay sa paglit-ag kang Jesus. Kanunay Siyang mitubag uban sa hingpit nga gugma ug wala gayod Niya tugoti nga ang ilang sayop nga pangatarongan magbilin ug kalibog. Busa kita usab kinahanglan mosalig sa kaalam ug gugma sa Diyos kon lisod ang paghigugma sa uban. Sa ingon nga kahimtang, kinahanglan nga ang Diyos mogiya sa matag panag-istoryahanay nato aron mahibalo ang atong kaistorya nga gihigugma siya, ug aron ang atong gugma dili motipas gikan sa putli nga gugma sa Diyos.
Pamalandongi karong adlawa ang halangdong tawag nga imong nadawat: ang paghigugma sa Diyos labaw sa tanan ug ang paghigugma sa imong isigkatawo uban sa mao gihapong gugma nga imong gihuptan alang sa Diyos. Kon malisdan ka sa paghigugma sa usa ka tawo, pag-ampo alang sa kaalam nga imong gikinahanglan aron magpabilin kang matinud-anon kaniya diha lamang sa gugma sa Diyos. Ug kon masulayan ang imong gugma, salig sa atong Ginoo nga mogiya kanimo ug mohatag kanimo sa mga pulong nga imong gikinahanglan sa panahon nga labing gikinahanglan nimo kini.
Akong mahigugmaong Ginoo, gihigugma Mo ang tanang tawo uban sa hingpit nga gugma, ug gitawag Mo kaming tanan sa paghigugma Kanimo sa tibuok namong kasingkasing, kalag ug hunahuna. Ug gitawag Mo kami sa paghigugma sa uban uban sa gugma nga Imong gihuptan alang kanila. Pun-a ang akong kasingkasing sa gugma alang Kanimo ug sa tanang tawo, ilabina niadtong labing lisod higugmaon. Hatagi ako ug kaalam, minahal nga Ginoo, aron mahibalo ako unsaon paghigugma sa uban diha Kanimo aron ilang masinati ang Imong hingpit nga gugma sa ilang kinabuhi. Jesus, nagsalig ako Kanimo!
Nobena kang Santa Monica
(Ilabinang giampo alang sa mga anak nga nahisalaag)
Agosto 18-26
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Pamalandong sa Balaang Kasulatan alang sa Panahon sulod sa Tuig
Santos sa Adlaw – Santa Rosa sa Lima, Birhen
Mga Kapilian sa mga Basahon sa Misa
Gipasiugda nga hulagway sa ibabaw: Ang Mesiyas naghatag sa Bag-ong Balaod, pinaagi sa flickr
