Oktubre 13, 2024
Ikakawhaan ug Walo nga Domingo sa Ordinaryong Panahon (Tuig B)
Mga Pagbasa alang Karong Adlawa
Jerusalem. Ganghaan sa Jaffa. Mata sa dagom, gikan sa Matson Collection, anaa sa Publikong Dominyo, pinaagi sa Wikimedia.
Paminaw sa Iningles
“Mga anak, pagkalisod gayod sa pagsulod sa gingharian sa Diyos! Mas sayon pa alang sa usa ka kamelyo ang pag-agi sa mata sa dagom kay sa pagsulod sa usa ka adunahan sa gingharian sa Diyos.” Hilabihan silang natingala ug nag-ingnanay, “Nan, kinsa man diay ang maluwas?” Gitan-aw sila ni Jesus ug miingon, “Alang sa mga tawo imposible kini, apan dili alang sa Diyos. Ang tanang butang posible alang sa Diyos.” Mark 10:24–27
Nakasulay ka na ba nga “hilabihang natingala” sa mga gipangayo sa Kristohanong kinabuhi? Hinaot nga nakasulay ka na. Ug kon nakasulay ka na, hinaot nga dili ka na ingon niana karon. Ang pagkahibulong pag-ayo maoy usa sa daghang mga pagputli nga kinahanglan natong agian aron makasulod sa Gingharian sa Diyos.
Ang “mata sa dagom” nagtumong sa usa sa mga ganghaan sa paril nga naglibot sa siyudad sa Jerusalem. Inigkangitngit, sirad-an ang ganghaan ug ang bugtong agianan pasulod mao ang gamayng pultahan sa taliwala nianang ganghaana. Ang tawo makaagi pinaagi sa pagduko, apan ang kamelyo dili makasulod gawas kon moluhod kini sa yuta ug literal nga mokamang agi niini. Nagkinahanglan kini og dakong paningkamot ug paggiya sa tag-iya sa maong kamelyo, apan posible kini.
Ang tuyo niining sugilana mao ang pagpasiugda nga dili kita basta-basta lang makalakaw pasulod sa Langit. Niining higayona, gihisgotan ni Jesus kon unsa kasayon alang sa usa ka tawo nga may kuwarta nga mahigot pag-ayo nianang kuwartaha hangtod nga dili na niya maangkon ang mga bahandi sa Langit. Ang adunahang batan-ong lalaki, nga bag-o pa lang nakigsulti ni Jesus, mibiya nga masulob-on tungod kay mahigugmaon siyang gidapit ni Jesus nga buhian ang iyang kalibotanong bahandi aron maangkon ang mga bahandi sa Langit. Miingon si Jesus kaniya, “Lakaw, ibaligya ang imong mga kabtangan ug ihatag sa mga kabos, ug makabaton ka og bahandi sa langit; unya balik ug sunod kanako.” Tungod niini, ang adunahang batan-ong lalaki mibiya nga masulob-on.
Ang kahakog ug ang pagkahigot sa materyal nga bahandi nga naghari sa tibuok kinabuhi klarong makalaglag sa imong kalag. Kamatuoran kana. Walay paagi nga malikayan kana nga kamatuoran. Apan kini nga pagtulon-an magamit usab sa tanang ubang matang sa pagkahigot. Kon grabe ang atong pagkahigot sa bisan unsang sala ug modumili kita sa pagbulag sa atong kaugalingon gikan niana nga sala, dili kita makasulod sa Gingharian sa Langit. Busa, kon ang gugma sa Diyos dili makadasig kanato sa pagtalikod sa sala, basin ang kahadlok sa impiyerno maoy makadasig kanato.
Sa dihang nakita sa mga tinun-an nga gipalabi niining adunahang batan-ong lalaki ang iyang bahandi kay sa Langit, ug unya si Jesus nagpabiling lig-on sa Iyang baroganan ug mipatin-aw nga lisod kaayo ang pag-abot sa Langit, ang ilang dakong pagkahibulong lagmit nakahagit kanila sa personal nga paagi. Apan maayo kana. Maayo kini kay nagpadayag kini nga nakaamgo usab sila sa ilang kaugalingong dili balaang mga pagkahigot, ug ang ilang pagkahibulong mitumaw gikan sa usa ka balaang kahadlok sa ilang kasingkasing. Samtang nakita nila nga milakaw ang adunahang batan-ong lalaki, lagmit nahunahunaan nila kadtong mga butang nga ila usab nga gikoptan ug nga kinahanglang wagtangon gikan sa ilang kinabuhi. Ang “pagkahibulong” niining kahimtanga mao ang balaang pagkaamgo nga kinahanglan silang magbag-o. Apan ang maayong balita mao nga kon ang usa ka tawo magbag-o ug mahigawas gikan sa mga pagkahigot nga nagpahilayo kaniya sa Diyos, wala na unyay pagkahigot nga makahimo kaniya nga matingala sa mga gipangayo sa Diyos. Ang kataposang tumong mao ang pagbuntog sa pagkahibulong nga gipahinabo sa mga gipangayo sa pagkahimong tinun-an, aron ang pagpahiuyon niining mga gipangayo mahimong paagi sa pagkinabuhi.
Pamalandongi karon ang bisan unsang gitudlo sa atong Ginoo nga lisod nimong atubangon. Aduna bay sugo nga sagad nimong balewalaon? Aduna bay pagtulon-an nga imong paningkamotang hatagan og katarongan aron dili tumanon? Aduna bay gipangayo kanimo nga alang kanimo sobra ra kaayo? Kon buot kang mosulod sa mata sa dagom, kinahanglan nga bug-os sa kasingkasing ang imong pagtugyan. Dili magpanuko si Jesus sa pagpangayo nga hingpit nimong itugyan ang imong kinabuhi ngadto Kaniya. Pamalandongi kadtong mga butang nga padayon nimong gikupotan ug paningkamoti nga makita si Jesus nga nakigsulti kanimo bahin niini, sama sa Iyang pagpakigsulti niining batan-ong adunahan. Buntoga ang tanang kahibulong ug himoa nga paagi sa imong pagkinabuhi ang dili matarog nga pagpasakop sa kabubut-on sa Dios. Kini lamang ang paagi sa pagsulod sa mga ganghaan sa Gingharian sa Dios.
Ginoo nga dako kaayo og gipangayo, ang Imong pagdapit nga mahimong tinun-an usa ka pagdapit sa pagtugyan Kanimo sa matag makasasala nga pagkagapos aron makalingkawas niadtong mga sala. Gihangyo ug gipangayo Mo kanako ang tanan, minahal nga Ginoo. Hinaot dawaton ko ang Imong gipangayo tungod sa balaang gugma ug motubag ako nga madagayaon, nga walay bisan unsang ihikaw, aron makaambit ako sa mga bahandi sa Gingharian. Jesus, misalig ako Kanimo.
Mga Pag-ampo alang sa Eleksiyon ug sa Nasod
Siyam ka semana nga nobena gikan sa Septiyembre 3 – Nobyembre 4
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Pamalandong sa Balaang Kasulatan alang sa Panahon sulod sa Tuig
Mga Santos/Kasaulogan Karong Adlawa
Mga Kapilian sa mga Pagbasa sa Misa
