Oktubre 25, 2024
Biyernes sa Ika-kawhaan ug Siyam nga Semana sa Kasagarang Panahon
Mga Pagbasa Karong Adlawa
Братья Белоусовы (Палех), Publikong dominyo, pinaagi sa Wikimedia Commons
Paminaw sa Iningles
“Nganong dili man kamo mismo ang mohukom kon unsay matarong? Kon moadto ka uban sa imong kaatbang atubangan sa usa ka mahistrado, paningkamoti nga makighusay kaniya samtang anaa pa kamo sa dalan; kay kon dili, itugyan ka sa imong kaatbang ngadto sa maghuhukom, ug ang maghuhukom motugyan kanimo ngadto sa tinugyanan, ug ang tinugyanan molabay kanimo sa bilanggoan. Sultihan ko ikaw, dili ka makagawas hangtod nga mabayran nimo ang kataposang sentimo.” Lucas 12:57–59
Ang mga Amahan sa Simbahan nagtanyag og daghang nagkalainlaing paghubad niining tekstoha. Lakip kanila, si San Beda nag-ingon nga ang atong “kaatbang” mahimong sabton ingon nga ang Pulong sa Diyos, sa diwa nga ang Pulong sa Diyos nakiggubat batok sa atong mga kahuyang ug mga sala. Kon maminaw kita sa Pulong sa Diyos, ipaila sa atong Ginoo kanato ang atong mga sayop aron mapahiuyon nato ang atong kinabuhi sa Kamatuoran sa Pulong sa Diyos mismo.
Kon hunahunaon nimo ang balaang Pulong sa Diyos sa kinatibuk-an niini, unsa ang labing nakapabati kanimo sa imong kasaypanan? Usahay sulayan nato sa pagpakagamay ang maong personal nga mga pagbadlong sa konsensiya. Mangatarongan kita aron hatagag katarongan ang atong mga binuhatan ug isalikway ang gisulti sa Diyos kanato. Aduna ka bay mahinumdoman nga mga pagtulon-an ni Jesus nga tinuod gayong mituhop ug mihasol sa imong kasingkasing? Kon aduna, kini usa ka grasya, ug usa ka higayon sa pagtuman sa leksiyon nga gitudlo sa atong Ginoo diha sa teksto sa ibabaw. Dili ipaila sa Diyos ang atong mga sala sa atong kasingkasing aron silotan kita. Hinunoa, isip kaatbang sa atong sala, Iyang ipaila kini kanato aron kita “maningkamot nga makighusay samtang anaa pa sa dalan.” Ang konsensiya usa ka talagsaong gasa gikan sa atong Ginoo ug mahimong ipakasama sa teksto sa ibabaw. Kini sama sa usa ka hukmanan diin ang atong Ginoo dili buot nga mapugos sa pagpahamtang og silot kanato. Hinunoa, buot Niya nga atong tagdon ang Iyang balaang Pulong, paminawon ang Iyang gisulti, ug husayon ang atong sala pinaagi sa paghinulsol dayon.
Sa daghang mga leksiyon nga gitudlo sa atong Ginoo, kasagaran ang leksiyon nga kusog nga makakuha sa atong pagtagad, bisan sa paagi nga makapakurat, mao ang angay natong hatagan sa labing dakong pagtagad. Kanunayng ipahibalo sa Diyos kanato ang Iyang labing dinaliang mga pagtulon-an pinaagi sa pagpabati kanato og pagkasad-an nga dili nato ikalimod. Kon paminawon nato kining mga pagbadlong sa konsensiya, dili na kita kinahanglan nga moatubang sa Maghuhukom. Apan kon dili kita maminaw, kon ilubong nato kining mga pagbadlong, pakagamyon ug ibaliwala, nan makita sa atong Ginoo nga gikinahanglan ang pagpadayon sa pagbadlong kanato. Magsugod kitag pagsinati sa Iyang paghukom, ug makita nato ang mga epekto sa pagkawala sa Iyang maayong pag-uyon. Ug sa kataposan, kon dili kita maghinulsol sa mas bug-at nga mga sala sa atong kinabuhi, paninglon kita bisan sa labing gagmay nga mga sala. Kinahanglan natong “bayran ang kataposang sentimo.”
Pamalandongi karong adlawa nga ang Pulong sa Diyos, ang tanan nga gitudlo sa atong Ginoo kanato, mao ang kaatbang sa sala diha sa imong kalag. Kining maayo ug balaang kaatbang walay laing gitinguha kondili ang labing maayo alang kanimo. Ipahinungod ang imong kaugalingon sa padayong pagbasa sa balaang Pulong sa Diyos aron kanunay kang andam sa pagpaminaw sa tanan nga buot isulti sa Diyos kanimo ug aron makig-uli ka sa atong Ginoo sa dili pa Siya mapugos sa pagpahamtang sa Iyang mga paghukom.
Akong labing maloloy-ong Maghuhukom, buot Mo nga maminaw ako sa Imong balaang Pulong, nga gipadayag pinaagi sa Kasulatan, aron madawat ko ang Imong labing maloloy-ong pagpaila kanako sa akong sala. Nag-ampo ako nga kanunay akong bukas sa pagpaminaw sa tanan nga buot Mong isulti kanako aron makatubag ako uban sa pagkamanggihatagon ug pagsalig, ug padayong makig-uli Kanimo ug sa uban sa akong panaw sa kinabuhi. Buhia ang akong konsensiya pinaagi sa Imong balaang Pulong, minahal nga Ginoo. Jesus, misalig ako Kanimo.
Novena kang San Judas
Alang sa mga Sitwasyon ug mga Kaso nga Morag Wala nay Paglaom
Mahimong ampoon bisan kanus-a sa tuig, ilabi na sa Oktubre 19–27
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Pamalandong sa Balaang Kasulatan alang sa Panahon sulod sa Tuig
Mga Santos/Kasaulogan Karong Adlawa
Mga Pag-ampo alang sa Eleksiyon ug sa Nasod
Siyam ka semana nga nobena gikan sa Septiyembre 3 – Nobyembre 4
Mga Kapilian sa mga Basahon sa Misa
_2.jpg){kind=link}