Nobiyembre 7, 2024
Huwebes sa Ikakatloan ug Usa nga Semana sa Panahon sa Tuig
Mga Pagbasa Karong Adlawa
Hulagway gikan sa Pixabay
Paminaw sa Iningles
“Kinsa man kaninyo nga adunay usa ka gatos ka karnero ug mawad-an sa usa niini ang dili mobiya sa kasiyaman ug siyam didto sa kamingawan ug mangita sa nawala hangtod nga iyang makit-an? Ug sa dihang iyang makit-an kini, malipayon kaayo niya kining pas-anon sa iyang mga abaga ug, sa iyang pag-abot sa balay, iyang tigomon ang iyang mga higala ug mga silingan ug ingnon sila, ‘Paglipay kamo uban kanako kay nakit-an ko na ang akong nawalang karnero.’” Lucas 15:4–6
Ang pipila sa dagkong mga santos nagpasabot nga ang gidaghanong usa ka gatos nagrepresentar sa kahingpitan. Ang usa ka gatos nagtumong sa kahingpitan sa Gingharian sa Diyos, nga naglakip dili lamang sa tanang santos sa Langit kondili usab sa mga anghel. Ang usa ka nawalang karnero nagrepresentar sa tibuok katawhan samtang nagpanaw kita niining kinabuhia. Si Jesus, siyempre, mao ang Magbalantay nga nagpunting sa Iyang pagtagad sa nahulog nga katawhan, nga makugihong nangita kanato aron pas-anon kita pauli.
Una, matikdi nga ang Magbalantay nangita sa usa ka nahisalaag nga karnero dili tungod sa kasuko kondili tungod sa pagpakabana ug gugma. Kinahanglang masabtan nato kini aron husto ang atong pagsabot sa pagtan-aw sa atong Ginoo kanato kon mahisalaag kita. Kinahanglan natong makita ang Iyang lawom nga pagpakabana, ang Iyang kakugi sa pagpangita, ug ang Iyang dili matarog nga tinguha nga makit-an kita sa atong pagkahisalaag. Dili kini usa ka Diyos nga naghulat lamang sa paghukom ug kasuko, kondili usa ka Diyos nga mianhi kanato, miangkon sa atong nahulog nga tawhanong kinaiya, ug miantos sa tanang pag-antos aron makit-an kita ug madala pauli.
Matikdi usab nga niining sambingaya, gibutang sa Magbalantay ang nawalang karnero sa Iyang mga abaga ug gipas-an kini pauli. Kasagaran mahulog kita sa lit-ag sa paghunahuna nga kinahanglan kitang mobalik sa Diyos pinaagi lamang sa atong kaugalingong paningkamot. Apan ang tinuod mao nga ang Diyos anaa kanunay, naghulat nga sapnayon kita ug pas-anon pauli. Ang atong katungdanan mao ang pagtugyan sa Iyang maluluy-ong mga kamot ug paghunong sa paglayas. Mahimo kini pinaagi sa pagdangop Kaniya ug pagtugot Kaniya nga moduol ug moatiman kanato. Sa dihang itugyan na nato ang atong kaugalingon ngadto sa Iyang malumong mga Kamot, ang atong Ginoo na ang mohimo sa pangunang paningkamot.
Sa kataposan, matikdi nga ang paglipay nga gihisgotan niining sambingaya mao ang paglipay sa Magbalantay. Siyempre, malipay usab kita nga sapnayon ug pas-anon pauli ngadto sa kahingpitan sa Gingharian sa Diyos, apan ang atong paglipay maoy tubag sa kalipay sa atong Ginoo. Gidapit kita sa pag-ambit sa Iyang kalipay. Ang Iyang kasingkasing mao ang napuno sa pagpasalamat samtang gitugotan nato Siya nga malumong mopas-an kanato pauli. “Paglipay kamo uban Kanako kay nakit-an Ko na ang Akong nawalang karnero,” matod Niya.
Pamalandongi karon kining balaang hulagway sa Maayong Magbalantay. Samtang imong gipamalandongan kining sambingay ug ang hulagway niini, hatagi og pagtagad ang nagkalainlaing hunahuna, handomanan, pagbati ug kahadlok nga mapukaw sa imong sulod. Matag usa kanato managlahi, ug ang atong Ginoo adunay lawom nga tinguha nga moduol sa matag usa kanato diha gayod sa atong nahimutangan, taliwala sa atong mga sala. Ang pagpamalandong sa kalooy niining Maayong Magbalantay moabli sa pultahan aron ang atong Ginoo makigsulti kanimo ug personal nga modapit kanimo sa pagduol Kaniya, nga motalikod sa mga dalan diin ikaw mismo nahisalaag. Ayaw paglayas. Magpabiling masaligon samtang Siya moduol kanimo. Paminawa ang Iyang tingog ug tubaga Siya og “Oo” samtang Iya kang alsahon aron pas-anon pauli.
Akong malumo nga Jesus, Ikaw ang Maayong Magbalantay. Gihigugma Mo ako ug makugihon ug matinumanon Ka nga nangita kanako. Hinaot mosalig ako Kanimo sa igo aron mohunong na ako sa paglayas gikan Kanimo ug pagtago gikan sa Imong malumo nga tingog. Palihog duola ako, alsaha ako, ibutang ako sa Imong mga abaga ug dad-a ako pauli. Jesus, misalig ako Kanimo.
Mga Pamalandong sa Balaang Kasulatan alang sa Panahon sulod sa Tuig
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Santos/Kasaulogan Karong Adlawa
Mga Kapilian sa mga Basahon sa Misa
