ಪವಿತ್ರ ಮುಗ್ಧ ಶಿಶುಗಳ, ರಕ್ತಸಾಕ್ಷಿಗಳ ಹಬ್ಬ

ಡಿಸೆಂಬರ್ 28, 2019
ಪವಿತ್ರ ಮುಗ್ಧ ಶಿಶುಗಳು, ರಕ್ತಸಾಕ್ಷಿಗಳು—ಹಬ್ಬ
ಕ್ರಿಸ್ಮಸ್ ಅಷ್ಟದಿನೋತ್ಸವದ ನಾಲ್ಕನೆಯ ದಿನ
ಇಂದಿನ ವಾಚನಗಳು

ಜ್ಞಾನಿಗಳು ತನ್ನನ್ನು ವಂಚಿಸಿದ್ದಾರೆಂದು ಅರಿತಾಗ ಹೆರೋದನು ತೀವ್ರವಾಗಿ ಕೋಪಗೊಂಡನು.  ಜ್ಞಾನಿಗಳಿಂದ ತಾನು ತಿಳಿದುಕೊಂಡಿದ್ದ ಸಮಯಕ್ಕೆ ಅನುಸಾರವಾಗಿ, ಬೆತ್ಲೆಹೇಮ್ ಮತ್ತು ಅದರ ಸುತ್ತಮುತ್ತಲಿನ ಪ್ರದೇಶಗಳಲ್ಲಿದ್ದ ಎರಡು ವರ್ಷ ಹಾಗೂ ಅದಕ್ಕಿಂತ ಕಡಿಮೆ ವಯಸ್ಸಿನ ಎಲ್ಲ ಗಂಡುಮಕ್ಕಳನ್ನು ಕೊಲ್ಲುವಂತೆ ಅವನು ಆಜ್ಞಾಪಿಸಿದನು.  ಮತ್ತಾಯ 2:16

ಇಂದು, ಕ್ರಿಸ್ಮಸ್ ಅಷ್ಟದಿನೋತ್ಸವದ ನಾಲ್ಕನೆಯ ದಿನದಂದು, ಡಿಸೆಂಬರ್ 26ರಂದು ಸಂತ ಸ್ತೇಫನರ ರಕ್ತಸಾಕ್ಷಿತ್ವದ ಹಬ್ಬದಲ್ಲಿ ನಮಗೆ ದೊರೆತಂತಹ ಸಾಕ್ಷ್ಯವೇ ಮತ್ತೊಮ್ಮೆ ದೊರೆಯುತ್ತದೆ.  ಆದರೆ ಇಂದಿನ ಹಬ್ಬವು ಅದೇ ಕೆಡುಕನ್ನು ಬೇರೊಂದು, ಇನ್ನೂ ಹೆಚ್ಚು ದುರಂತಮಯವಾದ ರೀತಿಯಲ್ಲಿ ನಮ್ಮ ಮುಂದಿಡುತ್ತದೆ.  ಇಲ್ಲಿ, ಅಸೂಯೆ ಮತ್ತು ದ್ವೇಷದಿಂದ ಹೆರೋದನು, ನವಜಾತ ಅರಸನಾದ ಯೇಸುವನ್ನು ನಿರ್ಮೂಲಗೊಳಿಸುವ ಪ್ರಯತ್ನದಲ್ಲಿ ಅಸಂಖ್ಯಾತ ಮುಗ್ಧ ಮಕ್ಕಳನ್ನು ಕೊಲ್ಲಿಸಿದನು.  

ಹೆತ್ತವರು ಅಸಹಾಯಕರಾಗಿ ನೋಡುತ್ತಿದ್ದಂತೆಯೇ ಸೈನಿಕರು ಆ ಮುಗ್ಧ ಮಕ್ಕಳನ್ನು ಕೊಲ್ಲುತ್ತಾ ಹೋದಾಗ, ಬೆತ್ಲೆಹೇಮ್ ಪಟ್ಟಣ ಮತ್ತು ಅದರ ಸುತ್ತಮುತ್ತಲಿನ ಪ್ರದೇಶಗಳನ್ನು ಆವರಿಸಿದ್ದ ದುಃಖವನ್ನು ನಾವು ಕೇವಲ ಊಹಿಸಿಕೊಳ್ಳಬಲ್ಲೆವು.  ಒಂದೆಡೆ, ದೇವರು ಇದಕ್ಕೆ ಅವಕಾಶಕೊಟ್ಟರು ಎಂದು ತಿಳಿಯುವುದು ಆಘಾತಕಾರಿಯಾಗಿದೆ.  ಮತ್ತೊಂದೆಡೆ, ಆಳವಾದ ವಿಶ್ವಾಸದ ನೆಲೆಯಲ್ಲಿ, ಈ ಮುಗ್ಧ ಮಕ್ಕಳು ನೀಡಿದ ಸಾಕ್ಷ್ಯವನ್ನು ಅರ್ಥಮಾಡಿಕೊಳ್ಳಲು ನಾವು ಶ್ರಮಿಸಬೇಕು.

ಇದು ವರ್ಣಿಸಲಸಾಧ್ಯವಾದ ಅಪರಾಧವೂ ಕೆಡುಕೂ ಆಗಿದ್ದರೂ, ನಿತ್ಯತ್ವದ ದೃಷ್ಟಿಯಿಂದ ನೋಡಿದರೆ, ದೇವರು ಇದನ್ನು ಸರಿಪಡಿಸುವರು.  ಸ್ವರ್ಗದಲ್ಲಿ ಎಂದೆಂದಿಗೂ ಈ ಮುಗ್ಧ ಬಲಿಪಶುಗಳು ರಕ್ತಸಾಕ್ಷಿಯ ಕಿರೀಟವನ್ನು ಧರಿಸುವರು; ನವಜಾತ ಅರಸನಿಗೆ ಮೊದಲ ಸಾಕ್ಷಿಗಳೆಂದು ದೇವದೂತರು ಮತ್ತು ಸಂತರು ಅವರನ್ನು ಗೌರವಿಸುವರು.  ಆ ಸಮಯದಲ್ಲಿ ಇದು ನೋವನ್ನು ಕಡಿಮೆ ಮಾಡಿರದಿದ್ದರೂ, ಆ ಕುಟುಂಬಗಳು ಸ್ವರ್ಗದ ನ್ಯಾಯವನ್ನು ಪ್ರವೇಶಿಸುವಾಗ, ಅವರು ಅನುಭವಿಸಿದ ನೋವನ್ನು ಇದು ಖಂಡಿತವಾಗಿಯೂ ಪರಿವರ್ತಿಸುತ್ತದೆ.

ಅವರ ಸಾಕ್ಷ್ಯವು ನಮ್ಮ ಸ್ವಂತ ಜೀವನದ ಕುರಿತು ಬಹಳಷ್ಟನ್ನು ನಮಗೆ ತಿಳಿಸುತ್ತದೆ.  ಜೀವನದಲ್ಲಿ ಅನೇಕ ಸಂದರ್ಭಗಳಲ್ಲಿ ಸಂಗತಿಗಳು ಸಮಂಜಸವಾಗಿಯೂ ನ್ಯಾಯಯುತವಾಗಿಯೂ ಇರುವುದಿಲ್ಲ ಎಂಬುದನ್ನು ಅದು ತೋರಿಸುತ್ತದೆ.  ಈ ಮುಗ್ಧ ಮಕ್ಕಳ ಹತ್ಯಾಕಾಂಡವು ಈ ಸತ್ಯವನ್ನು ಪ್ರಬಲವಾಗಿ ನೆನಪಿಸುತ್ತದೆ.  ಆದರೆ ಕೊನೆಯಲ್ಲಿ ದೇವರು ಪ್ರತಿಯೊಂದು ಅನ್ಯಾಯವನ್ನೂ ಸರಿಪಡಿಸುವರು ಎಂಬ ಒಂದು ಸಂಗತಿಯನ್ನು ನಾವು ದೃಢವಾಗಿ ಹಿಡಿದಿಟ್ಟುಕೊಳ್ಳಬೇಕು.  ದೇವರು ಈ ದುರಂತವನ್ನು ಮಹಿಮಾಮಯವಾದುದಾಗಿ ಪರಿವರ್ತಿಸಿದ್ದಾರೆ ಎಂಬುದನ್ನು ಸಾರುವ ಸಲುವಾಗಿ, ಇಂದು ನಾವು ಈ ಮಕ್ಕಳ ಗೌರವಾರ್ಥವಾಗಿ ಶ್ರದ್ಧಾಪೂರ್ವಕವಾಗಿ ಹಬ್ಬವನ್ನು ಆಚರಿಸುತ್ತೇವೆ.  

ನಮ್ಮಲ್ಲಿ ಪ್ರತಿಯೊಬ್ಬರ ವಿಷಯದಲ್ಲಿಯೂ ಇದೇ ಸತ್ಯವಾಗಿದೆ.  ನಿಮ್ಮ “ದುರಂತ” ಏನೇ ಆಗಿರಲಿ, ಎಲ್ಲವನ್ನೂ ಸರಿಪಡಿಸುವುದಕ್ಕಾಗಿ ದೇವರ ಪುತ್ರರು ಪತನಗೊಂಡ ನಮ್ಮ ಮಾನವ ಸ್ವಭಾವವನ್ನು ಧರಿಸಿಕೊಂಡು ನಮ್ಮ ಲೋಕಕ್ಕೆ ಬಂದರು ಎಂಬುದನ್ನು ತಿಳಿಯಿರಿ.  

ಈ ಕ್ರಿಸ್ಮಸ್ ಕಾಲದಲ್ಲಿ ನಿಮಗೆ ಅತ್ಯಂತ ನೋವುಂಟುಮಾಡುವ ಸಂಗತಿಯ ಕುರಿತು ಇಂದು ಧ್ಯಾನಿಸಿ.  ಅದು ಏನೇ ಆಗಿರಲಿ, ಈ ಪುಟ್ಟ ಮಕ್ಕಳನ್ನು ಕಳೆದುಕೊಂಡ ಕುಟುಂಬಗಳ ದುಃಖದೊಂದಿಗೆ ನಿಮ್ಮ ಮನದ ಗಾಯ ಮತ್ತು ನೋವನ್ನು ಇಂದು ಒಂದಾಗಿಸಲು ನಿಮಗೆ ಕರೆ ನೀಡಲಾಗಿದೆ.  ಅಂತಿಮವಾಗಿ ದೇವರು ಅವರೆಲ್ಲರಿಗಾಗಿ ಮಾಡಿದ್ದನ್ನು ನಿಮಗಾಗಿಯೂ ಮಾಡಲು ಅವಕಾಶಕೊಡಿ.  ಅವರ ಮಾನವಾವತಾರ, ಮರಣ ಮತ್ತು ಪುನರುತ್ಥಾನವು ನಿಮ್ಮ ಮನದ ಗಾಯವನ್ನು ರಕ್ತಸಾಕ್ಷಿತ್ವದ ಕಿರೀಟವಾಗಿ ಪರಿವರ್ತಿಸಲಿ.  ನೀವು ಅವರಿಗೆ ಅವಕಾಶಕೊಟ್ಟರೆ, ಕೊನೆಯಲ್ಲಿ ಪ್ರಭು ನಿಮ್ಮ ಜೀವನದಲ್ಲಿ ವಿಜಯಶಾಲಿಯಾಗುವರು.

ಪ್ರಭುವೇ, ನನ್ನ ಎಲ್ಲ ಮನದ ಗಾಯಗಳನ್ನು, ನೋವನ್ನು ಮತ್ತು ಗೊಂದಲವನ್ನು ನಿಮಗೆ ಸಮರ್ಪಿಸುತ್ತೇನೆ.  ಈ ಪುಟ್ಟ ಮಕ್ಕಳನ್ನು ಕಳೆದುಕೊಂಡವರ ದುಃಖದೊಂದಿಗೆ ಇಂದು ನನ್ನನ್ನು ಒಂದಾಗಿಸಿಕೊಳ್ಳುತ್ತೇನೆ. ಈಗ ಸ್ವರ್ಗದಲ್ಲಿ ನಿಮ್ಮೊಂದಿಗೆ ಆಳುತ್ತಿರುವ ಅವರ ಜೀವನವು ಮುಂದೆ ಬರಲಿರುವ ಸಂಗತಿಗಳ ಸಂಕೇತವಾಗಿದೆ ಎಂದು ನಾನು ಭರವಸೆಯಿಡುತ್ತೇನೆ.  ನಮ್ಮ ಲೋಕದಲ್ಲಿ ನಿಮ್ಮ ಜನನವು ನೀವೇ ನಮ್ಮ ರಕ್ಷಕರು ಮತ್ತು ನೀವು ಎಲ್ಲವನ್ನೂ ಒಳಿತಾಗಿ ಪರಿವರ್ತಿಸಬಲ್ಲಿರಿ ಎಂಬುದರ ಅತ್ಯಂತ ಶ್ರೇಷ್ಠ ಸಂಕೇತವಾಗಿತ್ತು.  ಯೇಸುವೇ, ನನ್ನ ಜೀವನವನ್ನು ನಿಮಗೆ ಒಪ್ಪಿಸುತ್ತೇನೆ; ನೀವು ಪ್ರತಿಯೊಂದು ಅನ್ಯಾಯವನ್ನೂ ಸರಿಪಡಿಸುವಿರಿ ಎಂದು ನನಗೆ ತಿಳಿದಿದೆ.  ಯೇಸುವೇ, ನಾನು ನಿಮ್ಮಲ್ಲಿ ಭರವಸೆಯಿಡುತ್ತೇನೆ.