ಮೇ 3, 2020
ಪಾಸ್ಕ ಕಾಲದ ನಾಲ್ಕನೆಯ ಭಾನುವಾರ (ವರ್ಷ A)
ಇಂದಿನ ವಾಚನಗಳು
“ಆದರೆ ಬಾಗಿಲಿನ ಮೂಲಕ ಪ್ರವೇಶಿಸುವವನೇ ಕುರಿಗಳ ಕುರುಬನು. ಬಾಗಿಲಿನ ಕಾವಲುಗಾರನು ಅವನಿಗೆ ಬಾಗಿಲನ್ನು ತೆರೆಯುತ್ತಾನೆ; ಕುರಿಗಳು ಅವನ ಸ್ವರವನ್ನು ಕೇಳುತ್ತವೆ. ಕುರುಬನು ತನ್ನ ಕುರಿಗಳನ್ನು ಹೆಸರಿಡಿದು ಕರೆದು ಹೊರಗೆ ನಡೆಸುತ್ತಾನೆ.” ಯೋಹಾನ 10:2-4
ಈ ಕಥೆಯಲ್ಲಿ ನಾಲ್ಕು ಸಂಗತಿಗಳು ನಡೆಯುತ್ತವೆ:
ಮೊದಲನೆಯದಾಗಿ, ಬಾಗಿಲಿನ ಕಾವಲುಗಾರನು ಕುರುಬನಿಗೆ ಬಾಗಿಲನ್ನು ತೆರೆಯುತ್ತಾನೆ.
ಎರಡನೆಯದಾಗಿ, ಕುರುಬನು ತನ್ನ ಕುರಿಗಳನ್ನು ಹೆಸರಿಡಿದು ಕರೆಯುತ್ತಾನೆ.
ಮೂರನೆಯದಾಗಿ, ಕುರಿಗಳು ಅವನ ಸ್ವರವನ್ನು ಕೇಳುತ್ತವೆ.
ನಾಲ್ಕನೆಯದಾಗಿ, ಕುರುಬನು ಕುರಿಗಳನ್ನು ಬಾಗಿಲಿನ ಮೂಲಕ ನಡೆಸುತ್ತಾನೆ.
“ಬಾಗಿಲಿನ ಕಾವಲುಗಾರನು” ಯಾರು? ಬಾಗಿಲಿನ ಕಾವಲುಗಾರರು ಪವಿತ್ರಾತ್ಮರು ಎಂಬುದು ಇದಕ್ಕೆ ಒಂದು ಉತ್ತರ ಎಂದು ಸಂತ ಅಗಸ್ಟಿನ್ ಹೇಳುತ್ತಾರೆ. ಸತ್ಯವನ್ನು ಅರಿಯಲು, ಪವಿತ್ರ ಗ್ರಂಥವನ್ನು ಇನ್ನಷ್ಟು ಆಳವಾಗಿ ಅರ್ಥಮಾಡಿಕೊಳ್ಳಲು, ಆ ಮೂಲಕ ಕ್ರಿಸ್ತರನ್ನೇ ಇನ್ನಷ್ಟು ಆಳವಾಗಿ ಅರಿತುಕೊಳ್ಳಲು ನಮ್ಮ ಮನಸ್ಸನ್ನು ತೆರೆಯುವುದು ಪವಿತ್ರಾತ್ಮರ ಪಾತ್ರವಾಗಿದೆ. ಆದ್ದರಿಂದ, ನೀವು ಅವರಿಗೆ ಅವಕಾಶ ನೀಡಿದರೆ, ಕ್ರಿಸ್ತರನ್ನು ನಿಮ್ಮ ಕುರುಬರಾಗಿ ಅರಿತು ಪ್ರೀತಿಸುವಂತೆ ಪವಿತ್ರಾತ್ಮರು ನಿಮ್ಮ ಮನಸ್ಸನ್ನೂ ಹೃದಯವನ್ನೂ ತೆರೆಯುವರು.
ಇದು ಸಂಭವಿಸಿದಾಗ, ಒಳ್ಳೆಯ ಕುರುಬರಾದ ಯೇಸು ನಿಮ್ಮನ್ನು ವೈಯಕ್ತಿಕವಾಗಿ ಹೆಸರಿಡಿದು ಕರೆಯುವರು. ಕಿವಿಗೆ ಕೇಳಿಸುವ ರೀತಿಯಲ್ಲಿ ಅಲ್ಲ, ಬದಲಾಗಿ ವಿಶ್ವಾಸದ ವರದ ಮೂಲಕ. ನೀವು ಅನೇಕ ಕುರಿಗಳಲ್ಲಿ ಕೇವಲ ಒಬ್ಬರಲ್ಲ; ಬದಲಾಗಿ, ಅವರು ಆಪ್ತವಾಗಿ ಮತ್ತು ವೈಯಕ್ತಿಕವಾಗಿ ಅರಿತು ಪ್ರೀತಿಸುವ ಅವರ ಪ್ರಿಯರಾದವರು ನೀವು. ಆದ್ದರಿಂದ, ಈ ವಾಕ್ಯಭಾಗವು ಒಳ್ಳೆಯ ಕುರುಬರಾದ ಕ್ರಿಸ್ತರೊಂದಿಗೆ ಆಪ್ತವಾದ ಮತ್ತು ವೈಯಕ್ತಿಕವಾದ ಸಂಬಂಧಕ್ಕೆ ನಮ್ಮನ್ನು ಕರೆಯುತ್ತದೆ.
ಕ್ರಿಸ್ತರು ನಮ್ಮನ್ನು ವೈಯಕ್ತಿಕವಾಗಿ ಮತ್ತು ಆಪ್ತವಾಗಿ ಪ್ರೀತಿಸುತ್ತಾರೆ, ನಮ್ಮನ್ನು ಹೆಸರಿಡಿದು ಕರೆಯುತ್ತಾರೆ ಎಂಬ ಅರಿವು, ಆಲಿಸಲು ನಮ್ಮನ್ನು ಆಹ್ವಾನಿಸಿ ಪ್ರೋತ್ಸಾಹಿಸುತ್ತದೆ. ನೀವು ಆಲಿಸುತ್ತೀರಾ? ಆಲಿಸಿದರೆ, ಅವರ ಮಾತು ನಿಮಗೆ ಕೇಳಿಸುತ್ತದೆಯೇ? ಈ ವೈಯಕ್ತಿಕ ಮತ್ತು ಆಪ್ತ ರೀತಿಯಲ್ಲಿ ಕ್ರಿಸ್ತರು ನಮ್ಮೊಂದಿಗೆ ಮಾತನಾಡುವುದನ್ನು “ಕೇಳುವುದು” ಕಾರ್ಯಪ್ರವೃತ್ತರಾಗಲು ನಮ್ಮನ್ನು ಪ್ರೇರೇಪಿಸಬೇಕು.
ಯಾವ ಕಾರ್ಯ? ಅವರು ನಮ್ಮನ್ನು ನಡೆಸಲು ಅವಕಾಶ ನೀಡುವುದು. ಸಾಮಾನ್ಯವಾಗಿ ಕುರುಬನು ಕುರಿಗಳ ಹಿಂದೆ ನಡೆಯುತ್ತಾನೆ, ಅವು ಮುಂದೆ ಓಡುತ್ತವೆ. ಆದರೆ ಈ ಕಥೆಯಲ್ಲಿ, ನಿಮ್ಮನ್ನು ಹೆಸರಿಡಿದು ಕರೆಯುವ ಒಳ್ಳೆಯ ಕುರುಬರಾದ ಯೇಸು ನಿಮ್ಮನ್ನು “ಬಾಗಿಲಿನ ಮೂಲಕ” ನಡೆಸುತ್ತಾರೆ. ಯೇಸುವೇ ಆ ಬಾಗಿಲು. ಅವರೊಂದಿಗೆ ಒಂದಾಗಲು ಮತ್ತು ಅವರ ಮೂಲಕ ಸ್ವರ್ಗದಲ್ಲಿರುವ ತಂದೆಯ ಮಡಿಲನ್ನು ಸೇರಲು ನಮಗೆ ಕರೆ ನೀಡಲಾಗಿದೆ. ಅವರ ಮೂಲಕ ನಾವು ಹೊಸ ಜೀವವನ್ನೇ ಪ್ರವೇಶಿಸುತ್ತೇವೆ; ಅದು ನಮ್ಮ ಕುರುಬರಾದ ಅವರೊಂದಿಗೆ ಐಕ್ಯವಾಗಿರುವ ಜೀವನ.
ನಿಮಗೆ ಕರೆ ನೀಡಲಾಗಿರುವ ಈ ನಾಲ್ಕು ಹಂತಗಳ ಪಯಣದ ಕುರಿತು ಇಂದು ಚಿಂತಿಸಿ. ಕ್ರಿಸ್ತರನ್ನು ಅರಿತು ಪ್ರೀತಿಸಲು ನಿಮ್ಮ ಮನಸ್ಸೂ ಹೃದಯವೂ ತೆರೆಯಲ್ಪಡುವಂತೆ ಪವಿತ್ರಾತ್ಮರಿಗೆ ಪ್ರಾರ್ಥಿಸಿ. ನಂತರ ಕ್ರಿಸ್ತರು ನಿಮ್ಮೊಂದಿಗೆ ಮಾತನಾಡುವುದನ್ನು ಪ್ರಾರ್ಥನಾಪೂರ್ವಕವಾಗಿ ಆಲಿಸಿ. ಅವರ ಮಾತನ್ನು ಕೇಳಿ, ಅವರಿಗೆ ಪ್ರತಿಕ್ರಿಯಿಸಿ ಮತ್ತು ಪರಿಪೂರ್ಣ ಪ್ರೀತಿಯಿಂದ ತೆರೆದಿರುವ ತಮ್ಮ ಹೃದಯದೊಳಗೆ ನಿಮ್ಮನ್ನು ಸೆಳೆದುಕೊಳ್ಳಲು ಅವರಿಗೆ ಅವಕಾಶ ನೀಡಿ.
ಪವಿತ್ರಾತ್ಮರೇ, ಒಳ್ಳೆಯ ಕುರುಬರ ಸ್ವರಕ್ಕೆ ನನ್ನ ಕಿವಿಗಳನ್ನೂ, ಅವರು ಹೇಳುವ ಎಲ್ಲ ಮಾತುಗಳಿಗೆ ನನ್ನ ಮನಸ್ಸನ್ನೂ ದಯವಿಟ್ಟು ತೆರೆಯಿರಿ. ನನ್ನ ಅಮೂಲ್ಯ ಪ್ರಭು ಯೇಸುವೇ, ನೀವೇ ನನ್ನ ಕುರುಬರು. ನೀವು ಮಾತನಾಡುವಾಗ ನಿಮ್ಮ ಸ್ವರವನ್ನು ಅನುಸರಿಸಲು ಮತ್ತು ಸಂಪೂರ್ಣ ಭರವಸೆ ಹಾಗೂ ಸಮರ್ಪಣೆಯೊಂದಿಗೆ ಹಾಗೆ ಮಾಡಲು ನಾನು ಇಂದು ನಿರ್ಧರಿಸುತ್ತೇನೆ. ನನ್ನ ಪ್ರಭುವೇ, ನಾನು ನಿಮ್ಮನ್ನು ಪ್ರೀತಿಸುತ್ತೇನೆ. ಇಷ್ಟೊಂದು ಕೋಮಲವಾದ ಮತ್ತು ಆಪ್ತವಾದ ಕಾಳಜಿಯಿಂದ ನನ್ನನ್ನು ಪ್ರೀತಿಸುವುದಕ್ಕಾಗಿ ನಿಮಗೆ ಧನ್ಯವಾದ ಸಲ್ಲಿಸುತ್ತೇನೆ. ನನ್ನ ಒಳ್ಳೆಯ ಕುರುಬರಾದ ಯೇಸುವೇ, ನಾನು ನಿಮ್ಮಲ್ಲಿ ಭರವಸೆ ಇಡುತ್ತೇನೆ.
ಇಂದಿನ ಸಂತರು – ಪ್ರೇಷಿತರಾದ ಸಂತ ಫಿಲಿಪ್ಪ ಮತ್ತು ಸಂತ ಯಾಕೋಬ
ಈ ವರ್ಷ ಇದು ಭಾನುವಾರ ಬರುವುದರಿಂದ ಆರಾಧನಾ ವಿಧಿಯ ಸ್ಮರಣೆಯಾಗಿ ಆಚರಿಸಲಾಗುವುದಿಲ್ಲ
