ಮಾರ್ಚ್ 5, 2021
ತಪಸ್ಸುಕಾಲದ ಎರಡನೇ ವಾರದ ಶುಕ್ರವಾರ
ಇಂದಿನ ವಾಚನಗಳು
ವೀಡಿಯೊ
“ಆದ್ದರಿಂದ ನಾನು ನಿಮಗೆ ಹೇಳುತ್ತೇನೆ: ದೇವರ ರಾಜ್ಯವನ್ನು ನಿಮ್ಮಿಂದ ಕಸಿದುಕೊಂಡು, ಅದರ ಫಲವನ್ನು ಕೊಡುವ ಜನರಿಗೆ ನೀಡಲಾಗುವುದು.” ಮತ್ತಾಯ 21:42
ದೇವರ ರಾಜ್ಯವನ್ನು ಯಾರಿಂದ ಕಸಿದುಕೊಳ್ಳಲಾಗುವುದೋ ಅವರಲ್ಲಿ ನೀವೂ ಇದ್ದೀರಾ? ಅಥವಾ ಒಳ್ಳೆಯ ಫಲವನ್ನು ನೀಡುವಂತೆ ಅದನ್ನು ಪಡೆಯುವವರಲ್ಲಿ ಇದ್ದೀರಾ? ಇದು ನೀವು ಪ್ರಾಮಾಣಿಕವಾಗಿ ಉತ್ತರಿಸಬೇಕಾದ ಮುಖ್ಯವಾದ ಪ್ರಶ್ನೆ.
ಮೊದಲ ಗುಂಪಿನ ಜನರನ್ನು, ಅಂದರೆ ದೇವರ ರಾಜ್ಯವನ್ನು ಕಳೆದುಕೊಳ್ಳುವವರನ್ನು, ಈ ಸಾಮತಿಯಲ್ಲಿ ದ್ರಾಕ್ಷಿತೋಟದ ಗೇಣಿದಾರರು ಪ್ರತಿನಿಧಿಸುತ್ತಾರೆ. ದುರಾಶೆ ಅವರ ಅತಿ ದೊಡ್ಡ ಪಾಪಗಳಲ್ಲಿ ಒಂದು ಎಂಬುದು ಸ್ಪಷ್ಟವಾಗಿದೆ. ಅವರು ಸ್ವಾರ್ಥಿಗಳು. ದ್ರಾಕ್ಷಿತೋಟವನ್ನು ತಮ್ಮ ಸಂಪತ್ತನ್ನು ಹೆಚ್ಚಿಸಿಕೊಳ್ಳುವ ತಾಣವಾಗಿ ನೋಡುತ್ತಾರೆ; ಇತರರ ಒಳಿತಿನ ಬಗ್ಗೆ ಅವರಿಗೆ ಕಾಳಜಿ ಬಹಳ ಕಡಿಮೆ. ದುಃಖಕರ ಸಂಗತಿಯೆಂದರೆ, ನಮ್ಮ ಸ್ವಂತ ಜೀವನದಲ್ಲಿಯೂ ಈ ಮನೋಭಾವವನ್ನು ಅಳವಡಿಸಿಕೊಳ್ಳುವುದು ಸುಲಭ. ನಾವು “ಮುಂದೆ ಬರಲು” ಸಿಗುವ ಅವಕಾಶಗಳ ಸರಮಾಲೆಯಾಗಿ ಜೀವನವನ್ನು ನೋಡುವುದು ಸುಲಭ. ಇತರರ ಒಳಿತನ್ನು ಪ್ರಾಮಾಣಿಕವಾಗಿ ಬಯಸುವುದಕ್ಕಿಂತ ಸದಾ ನಮ್ಮ ಸ್ವಂತ ಹಿತವನ್ನೇ ನೋಡಿಕೊಳ್ಳುವ ರೀತಿಯಲ್ಲಿ ಜೀವನ ನಡೆಸುವುದು ಸುಲಭ.
ಎರಡನೇ ಗುಂಪಿನ ಜನರು, ಅಂದರೆ ಒಳ್ಳೆಯ ಫಲವನ್ನು ನೀಡುವಂತೆ ದೇವರ ರಾಜ್ಯವನ್ನು ಪಡೆಯುವವರು, ಜೀವನದ ಮುಖ್ಯ ಉದ್ದೇಶ ಕೇವಲ ತಮ್ಮ ಸಂಪತ್ತನ್ನು ಹೆಚ್ಚಿಸಿಕೊಳ್ಳುವುದಲ್ಲ, ಬದಲಾಗಿ ದೇವರ ಪ್ರೀತಿಯನ್ನು ಇತರರೊಂದಿಗೆ ಹಂಚಿಕೊಳ್ಳುವುದು ಎಂದು ಅರ್ಥಮಾಡಿಕೊಂಡವರು. ಇತರರಿಗೆ ತಾವು ನಿಜವಾದ ಆಶೀರ್ವಾದವಾಗಬಲ್ಲ ಮಾರ್ಗಗಳನ್ನು ಇವರು ಸದಾ ಹುಡುಕುತ್ತಿರುತ್ತಾರೆ. ಸ್ವಾರ್ಥ ಮತ್ತು ಉದಾರತೆಯ ನಡುವಿನ ವ್ಯತ್ಯಾಸ ಇದೇ.
ಆದರೆ ನಾವು ಮುಖ್ಯವಾಗಿ ಯಾವ ಉದಾರತೆಗೆ ಕರೆಯಲ್ಪಟ್ಟಿದ್ದೇವೆಯೋ ಅದು ದೇವರ ರಾಜ್ಯವನ್ನು ಕಟ್ಟಿಬೆಳೆಸುವ ಉದಾರತೆ. ಇದನ್ನು ಪ್ರೀತಿಯ ಕಾರ್ಯಗಳ ಮೂಲಕ ಮಾಡಲಾಗುತ್ತದೆ; ಆದರೆ ಆ ಪ್ರೀತಿಗೆ ಸುವಾರ್ತೆಯೇ ಪ್ರೇರಣೆಯಾಗಿರಬೇಕು ಮತ್ತು ಸುವಾರ್ತೆಯೇ ಅದರ ಅಂತಿಮ ಗುರಿಯಾಗಿರಬೇಕು. ಅಗತ್ಯದಲ್ಲಿರುವವರ ಆರೈಕೆ, ಬೋಧನೆ, ಸೇವೆ ಮುಂತಾದವೆಲ್ಲವೂ ಕ್ರಿಸ್ತನೇ ಅವುಗಳ ಪ್ರೇರಣೆಯೂ ಅಂತಿಮ ಗುರಿಯೂ ಆಗಿದ್ದಾಗ ಮಾತ್ರ ಒಳ್ಳೆಯವುಗಳಾಗುತ್ತವೆ. ನಮ್ಮ ಜೀವನದ ಮೂಲಕ ಜನರು ಯೇಸುವನ್ನು ಇನ್ನಷ್ಟು ಅರಿತು ಪ್ರೀತಿಸಬೇಕು, ಇನ್ನಷ್ಟು ಅರ್ಥಮಾಡಿಕೊಂಡು ಅನುಸರಿಸಬೇಕು. ವಾಸ್ತವವಾಗಿ, ನಾವು ಬಡತನದಲ್ಲಿರುವ ಅನೇಕ ಜನರಿಗೆ ಊಟ ನೀಡಿದರೂ, ರೋಗಿಗಳನ್ನು ಆರೈಕೆ ಮಾಡಿದರೂ ಅಥವಾ ಒಂಟಿಯಾಗಿರುವವರನ್ನು ಭೇಟಿಯಾದರೂ, ಅಂತಿಮವಾಗಿ ಯೇಸು ಕ್ರಿಸ್ತನ ಸುವಾರ್ತೆಯನ್ನು ಹಂಚಿಕೊಳ್ಳುವುದನ್ನು ಬಿಟ್ಟು ಬೇರೆ ಕಾರಣಗಳಿಗಾಗಿ ಇವುಗಳನ್ನು ಮಾಡಿದರೆ, ನಮ್ಮ ಕೆಲಸವು ಸ್ವರ್ಗರಾಜ್ಯವನ್ನು ಕಟ್ಟಿಬೆಳೆಸುವ ಒಳ್ಳೆಯ ಫಲವನ್ನು ನೀಡುವುದಿಲ್ಲ. ಆ ಸಂದರ್ಭದಲ್ಲಿ ನಾವು ದೇವರ ಪ್ರೀತಿಯ ಪ್ರೇಷಿತರಾಗುವುದಕ್ಕೆ ಬದಲಾಗಿ ಕೇವಲ ಮಾನವಸೇವಕರಾಗುತ್ತೇವೆ.
ತಮ್ಮ ರಾಜ್ಯವನ್ನು ಕಟ್ಟಿಬೆಳೆಸಲು ಹೇರಳವಾಗಿ ಒಳ್ಳೆಯ ಫಲವನ್ನು ನೀಡುವಂತೆ ನಮ್ಮ ಪ್ರಭು ನಿಮಗೆ ವಹಿಸಿರುವ ಧ್ಯೇಯದ ಕುರಿತು ಇಂದು ಚಿಂತಿಸಿ. ನೀವು ಹೇಗೆ ನಡೆದುಕೊಳ್ಳಬೇಕೆಂದು ದೇವರು ಪ್ರೇರೇಪಿಸುತ್ತಿದ್ದಾರೋ ಆ ಮಾರ್ಗವನ್ನು ಪ್ರಾರ್ಥನಾಪೂರ್ವಕವಾಗಿ ಹುಡುಕುವುದರಿಂದ ಮಾತ್ರ ಇದನ್ನು ಸಾಧಿಸಬಹುದು ಎಂಬುದನ್ನು ಅರಿತುಕೊಳ್ಳಿ. ನೀವು ಮಾಡುವುದೆಲ್ಲವೂ ದೇವರ ಮಹಿಮೆಗಾಗಿ ಮತ್ತು ಆತ್ಮಗಳ ರಕ್ಷಣೆಗಾಗಿ ಆಗುವಂತೆ, ಅವರ ಚಿತ್ತವನ್ನು ಮಾತ್ರ ನೆರವೇರಿಸಲು ಪ್ರಯತ್ನಿಸಿ.
ನನ್ನ ಮಹಿಮಾವಂತ ಅರಸನೇ, ನಿನ್ನ ರಾಜ್ಯವು ಬೆಳೆಯಲಿ ಮತ್ತು ಅನೇಕ ಆತ್ಮಗಳು ನಿನ್ನನ್ನು ತಮ್ಮ ಪ್ರಭುವೂ ದೇವರೂ ಎಂದು ಅರಿಯಲಿ ಎಂದು ನಾನು ಪ್ರಾರ್ಥಿಸುತ್ತೇನೆ. ಪ್ರಿಯ ಪ್ರಭುವೇ, ಆ ರಾಜ್ಯವನ್ನು ಕಟ್ಟಿಬೆಳೆಸಲು ನನ್ನನ್ನು ಬಳಸಿಕೋ; ನನ್ನ ಜೀವನದ ಎಲ್ಲ ಕಾರ್ಯಗಳು ಹೇರಳವಾಗಿ ಒಳ್ಳೆಯ ಫಲವನ್ನು ನೀಡುವಂತೆ ಸಹಾಯಮಾಡು. ಯೇಸುವೇ, ನಾನು ನಿನ್ನಲ್ಲಿ ಭರವಸೆಯಿಡುತ್ತೇನೆ.
ಶಿಲುಬೆಯ ಬುಡದಲ್ಲಿ 40 ದಿನಗಳು – ಧ್ಯಾನ ಹದಿನಾರು – ಅದ್ಭುತಗಳಲ್ಲಿ ಅತ್ಯಂತ ಮಹತ್ತಾದದ್ದು
ತಪಸ್ಸುಕಾಲಕ್ಕಾಗಿ ಪವಿತ್ರ ಗ್ರಂಥದ ಧ್ಯಾನಗಳು
ಮೇಲೆ ಪ್ರದರ್ಶಿಸಿರುವ ಚಿತ್ರ: ದುಷ್ಟ ಗೇಣಿದಾರರ ಸಾಮತಿ, ಚಿತ್ರಕಾರ ಮಾರ್ಟೆನ್ ವಾನ್ ವಾಲ್ಕೆನ್‌ಬೋರ್ಖ್
.jpg){kind=link}