ಜೂನ್ 1, 2021
ಸಾಮಾನ್ಯ ಕಾಲದ ಒಂಬತ್ತನೆಯ ವಾರದ ಮಂಗಳವಾರ
ಇಂದಿನ ವಾಚನಗಳು
“ಸೀಸರನಿಗೆ ಜನಗಣತಿ ತೆರಿಗೆ ಕೊಡುವುದು ಧರ್ಮಸಮ್ಮತವೋ ಅಲ್ಲವೋ? ನಾವು ಕೊಡಬೇಕೋ, ಕೊಡಬಾರದೋ?” ಅವರ ಕಪಟವನ್ನು ಅರಿತ ಯೇಸು ಅವರಿಗೆ, “ನನ್ನನ್ನು ಏಕೆ ಪರೀಕ್ಷಿಸುತ್ತೀರಿ? ನಾನು ನೋಡಲು ಒಂದು ದೆನಾರಿಯ ನಾಣ್ಯವನ್ನು ತನ್ನಿರಿ” ಎಂದರು. ಮಾರ್ಕ 12:14–15
ಈ ಫರಿಸಾಯರನ್ನು ಮತ್ತು ಹೆರೋದ್ಯರನ್ನು ಯೇಸುವಿನ ಮಾತಿನಲ್ಲೇ ಅವರನ್ನು ಸಿಕ್ಕಿಹಾಕಲು ಕಳುಹಿಸಲಾಗಿತ್ತು. ಈ ಜನರ ಮನಸ್ಸು ರಾಜಕೀಯದಲ್ಲೇ ಮುಳುಗಿತ್ತು; ಯಾವುದಾದರೂ ಒಂದು ಪಕ್ಷವನ್ನು ವಹಿಸಿ, ಇತರರಲ್ಲಿ ತಪ್ಪು ಹುಡುಕುವುದರಲ್ಲಿ ಅವರು ಆಸಕ್ತಿ ಹೊಂದಿದ್ದರು. ತಾವೇ ನೀತಿವಂತರೆಂದು ಭಾವಿಸುತ್ತಿದ್ದ ಅವರಿಗೆ ಆತ್ಮಗಳ ರಕ್ಷಣೆಯ ಬಗ್ಗೆ ಕಾಳಜಿ ಅಷ್ಟಾಗಿ ಇರಲಿಲ್ಲ. ಆದ್ದರಿಂದ ಅವರು ಮುಗ್ಧವಾಗಿ ತೋರುವ ಒಂದು ಪ್ರಶ್ನೆಯೊಂದಿಗೆ ಯೇಸುವಿನ ಬಳಿಗೆ ಬಂದರು. ಸೀಸರನಿಗೆ ಜನಗಣತಿ ತೆರಿಗೆ ಕೊಡುವುದನ್ನು ಯೇಸು ವಿರೋಧಿಸುವರೆಂದು ಅವರು ಊಹಿಸಿದ್ದಂತೆ ತೋರುತ್ತದೆ. ಅವರು ಹಾಗೆ ಮಾಡಿದರೆ, ಅವರನ್ನು ನಾಗರಿಕ ಅಧಿಕಾರಿಗಳಿಗೆ ದೂರು ನೀಡಲು ಇವರು ಸಿದ್ಧರಾಗಿದ್ದರು. ಅವರಿಗೆ ಸತ್ಯದ ಬಗ್ಗೆ ಕಾಳಜಿ ಇರಲಿಲ್ಲ; ನಮ್ಮ ದೈವಿಕ ಪ್ರಭುವನ್ನು ಸಿಕ್ಕಿಹಾಕುವುದರ ಬಗ್ಗೆಯಷ್ಟೇ ಕಾಳಜಿ ಇತ್ತು. ಸೀಸರನ ಚಿತ್ರವಿದ್ದ ರೋಮನ್ ನಾಣ್ಯವನ್ನು ಅವರು ಯೇಸುವಿನ ಬಳಿಗೆ ತಂದಾಗ, ಯೇಸು ಅಪಾರ ಜ್ಞಾನದಿಂದ ಕೂಡಿದ ಈ ಮಾತನ್ನು ಹೇಳಿದರು: “ಸೀಸರನಿಗೆ ಸೇರಿದ್ದನ್ನು ಸೀಸರನಿಗೆ ಮತ್ತು ದೇವರಿಗೆ ಸೇರಿದ್ದನ್ನು ದೇವರಿಗೆ ಸಲ್ಲಿಸಿರಿ.”
ಕಪಟಿಗಳಾದ ಈ ಧಾರ್ಮಿಕ ಮುಖಂಡರು ವಿನಯ ಮತ್ತು ಪ್ರಾಮಾಣಿಕತೆಯಿಂದ ಯೇಸುವಿನ ಬಳಿಗೆ ಬಂದಿದ್ದರೆ, ಯೇಸು ಅವರಿಗೆ ತೀರ ಭಿನ್ನವಾಗಿ ಪ್ರತಿಕ್ರಿಯಿಸುತ್ತಿದ್ದರು ಎಂಬುದು ಸ್ಪಷ್ಟ. ಆದರೆ ನಮ್ಮ ಪ್ರಭುವನ್ನು ಸಿಕ್ಕಿಹಾಕಲು, ಅವರ ಮಾತುಗಳನ್ನು ತಿರುಚಲು ಮತ್ತು ಅವರನ್ನು ನಾಶಮಾಡಲು ಮಾತ್ರ ಅವರು ಬಂದಿದ್ದರಿಂದ, ಯೇಸು ದೈವಿಕ ಜ್ಞಾನದ ಮೂಲಕ ಅವರಿಗೆ ತಕ್ಕ ಉತ್ತರ ನೀಡುತ್ತಾರೆ. ಜನಗಣತಿ ತೆರಿಗೆ ಕೊಡುವುದಕ್ಕೆ ಅವರು ಬೆಂಬಲವನ್ನೂ ಸೂಚಿಸುವುದಿಲ್ಲ, ಅದರ ವಿರುದ್ಧವೂ ಮಾತನಾಡುವುದಿಲ್ಲ. ಆದ್ದರಿಂದ ಈ ಸುವಾರ್ತೆಯ ಭಾಗವು, “ಅವರು ಆತನನ್ನು ಕಂಡು ಬೆರಗಾದರು” ಎಂಬ ಮಾತಿನೊಂದಿಗೆ ಕೊನೆಗೊಳ್ಳುತ್ತದೆ. “ಬೆರಗು” ಸರಿಯಾದ ಪ್ರತಿಕ್ರಿಯೆಯೇ ಆಗಿದೆ. ಹೀಗಾಗಿ, ಒಂದು ಅರ್ಥದಲ್ಲಿ, ಕಪಟಿಗಳಾದ ಈ ಧಾರ್ಮಿಕ ಮುಖಂಡರಿಂದ ನಾವು ಕಲಿಯಬಹುದು. ದೇವರ ಅಗಾಧ ಜ್ಞಾನವನ್ನು ನಾವು ಮುಖಾಮುಖಿಯಾಗಿ ಎದುರಿಸಿದಾಗಲೆಲ್ಲ, ಪೂಜ್ಯಭಾವವನ್ನೂ ಪವಿತ್ರವಾದ ಬೆರಗನ್ನೂ ಅನುಭವಿಸಬೇಕು.
ಅವರು ಬೆರಗಾದದ್ದು ಯೇಸು ತಮ್ಮ ದುಷ್ಟ ಸಂಚನ್ನು ವಿಫಲಗೊಳಿಸಿದ್ದರಿಂದಲೇ ಎಂಬುದು ನಿಜ. ಆದರೂ, ದೇವರ ಜ್ಞಾನವನ್ನು ಎಂದಿಗೂ ಮೀರಿಸಲಾಗದು ಎಂಬುದನ್ನು ನಾವು ಇದರಿಂದ ಕಲಿಯಬಹುದು. ದೇವರ ಜ್ಞಾನವು ಈ ಕಾಲದ ಮೂರ್ಖತನವನ್ನು ಮೌನಗೊಳಿಸುತ್ತದೆ ಮತ್ತು ಆ ಕೆಡುಕಿನ ಹಿಂದೆ ಅಡಗಿರುವ ದುರುದ್ದೇಶವನ್ನು ಬಯಲುಮಾಡುತ್ತದೆ.
ನಮ್ಮ ಕಾಲದ ಲೌಕಿಕ ಮನೋಭಾವದ “ಎಲ್ಲವನ್ನೂ ಬಲ್ಲವರ” ಕುತಂತ್ರವನ್ನು ನೀವು ಎಂದಾದರೂ ಎದುರಿಸಿದ್ದೀರಾ? ಯಾರಾದರೂ ನಿಮ್ಮನ್ನು ಸವಾಲು ಮಾಡಿದ್ದಾರಾ, ನಿಮ್ಮ ವಿಶ್ವಾಸದ ಮೇಲೆ ನೇರವಾಗಿ ದಾಳಿ ಮಾಡಿದ್ದಾರಾ ಅಥವಾ ನಿಮ್ಮ ನೈತಿಕ ನಂಬಿಕೆಗಳನ್ನು ಪ್ರಶ್ನಿಸಿದ್ದಾರಾ? ನಿಮ್ಮ ವಿಶ್ವಾಸವನ್ನು ಬಹಿರಂಗವಾಗಿಯೂ ಧೈರ್ಯದಿಂದಲೂ ಜೀವಿಸಲು ನೀವು ಆರಿಸಿಕೊಂಡಿದ್ದರೆ, ಬಹುಶಃ ಬೇರೆಯವರ ದಾಳಿಯನ್ನು ಅನುಭವಿಸಿರಬಹುದು. ಆಳವಾದ ವಿಶ್ವಾಸವೂ ದೈವಿಕ ಜ್ಞಾನದ ಸ್ಪಷ್ಟ ವರವೂ ಇಲ್ಲದವರಿಗೆ, ಇಂತಹ ಕುತಂತ್ರವು ಗೊಂದಲ ಮತ್ತು ಆತಂಕವನ್ನು ಉಂಟುಮಾಡಬಹುದು. ಹೇಗೆ ಉತ್ತರಿಸಬೇಕೆಂದು ನಿಮಗೆ ತಿಳಿಯದೆ ಹೋಗಬಹುದು; ಈ ಕಾಲದ ತಪ್ಪಾದ “ಜ್ಞಾನ”ದ ಬಲೆಗೆ ಸಿಕ್ಕಿಹಾಕಿಕೊಂಡಂತೆ ಅನಿಸಬಹುದು. ಅಂತಹ ಸಂದರ್ಭದಲ್ಲಿ ನೀವು ಏನು ಮಾಡುತ್ತೀರಿ? ಹೆಚ್ಚೆಚ್ಚು ಲೌಕಿಕವೂ ನಾಸ್ತಿಕವೂ ಆಗುತ್ತಿರುವ ಲೋಕದಲ್ಲಿ ನಾವೆಲ್ಲರೂ ಎದುರಿಸಲಿರುವ ಸುಳ್ಳು ಸಿದ್ಧಾಂತಗಳು ಮತ್ತು ವಂಚನೆಗಳಿಗೆ ಏಕೈಕ ಉತ್ತರವೆಂದರೆ ದೈವಿಕ ಜ್ಞಾನದಿಂದ ಬರುವ ಉತ್ತರವೇ. ಈ ತಪ್ಪುಗಳನ್ನು ಎದುರಿಸಲು ನಮ್ಮ ಸ್ವಂತ ಜ್ಞಾನ ಯಾರಿಗೂ ಸಾಕಾಗುವುದಿಲ್ಲ. ಆದ್ದರಿಂದ, ದೇವರ ಜ್ಞಾನದ ಕಡೆಗೆ ನಿರಂತರವಾಗಿ ತಿರುಗುವುದೇ ನಮಗಿರುವ ಏಕೈಕ ಆಶ್ರಯ.
ಪ್ರಾರ್ಥನೆ ಮತ್ತು ಪವಿತ್ರ ವಿಷಯಗಳ ಅಧ್ಯಯನದ ಮೂಲಕ ನಾವು ದೇವರ ಜ್ಞಾನದ ಕಡೆಗೆ ತಿರುಗುತ್ತೇವೆ. ಶುದ್ಧ ಸತ್ಯವನ್ನೇ ನುಡಿಯುವ ದೇವರ ಸ್ಪಷ್ಟ ಸ್ವರಕ್ಕೆ ನಮ್ಮ ಪ್ರಾರ್ಥನೆಯು ನಮ್ಮ ಮನಸ್ಸನ್ನು ತೆರೆಯುತ್ತದೆ. ಪವಿತ್ರ ವಿಷಯಗಳ ಅಧ್ಯಯನವು, ವಿಶೇಷವಾಗಿ ಪವಿತ್ರ ಗ್ರಂಥ, ಧರ್ಮಸಭೆಯ ಬೋಧನೆಗಳು ಮತ್ತು ಸಂತರ ಜೀವನಗಳ ಅಧ್ಯಯನವು, ದೇವರ ಸ್ವರವನ್ನು ಸ್ಪಷ್ಟವಾಗಿ ಅರಿಯಲು ಮತ್ತು ಲೋಕವು ನಮ್ಮ ಮೇಲೆ ಹೇರಲು ಯತ್ನಿಸುವ ಗೊಂದಲವನ್ನು ಹೋಗಲಾಡಿಸಲು ನೆರವಾಗುತ್ತದೆ. ಕೊನೆಗೆ, ದೇವರ ನಿಜವಾದ ಜ್ಞಾನದಲ್ಲಿ ನಾವು ನಮ್ಮ ಮನಸ್ಸನ್ನು ಮುಳುಗಿಸದಿದ್ದರೆ, ಲೋಕದಲ್ಲಿ ಎದುರಾಗುವ ಸಂಗತಿಗಳಿಗೆ ನಾವು ಸಿದ್ಧರಾಗಿರುವುದಿಲ್ಲ.
ಲೋಕದ ಕುತಂತ್ರ ಮತ್ತು ಮೂರ್ಖತನಗಳ ನಡುವೆ ಸರಿಯಾದ ದಾರಿಯಲ್ಲಿ ಸಾಗಲು ದೈವಿಕ ಜ್ಞಾನದಿಂದ ತುಂಬಿಕೊಳ್ಳುವ ನಿಮ್ಮ ಅಗತ್ಯದ ಬಗ್ಗೆ ಇಂದು ಧ್ಯಾನಿಸಿರಿ. ಜೀವನದ ಗೊಂದಲವನ್ನು ಭೇದಿಸಿ ಸಾಗಲು ನಿಮ್ಮ ಸ್ವಂತ ಜ್ಞಾನ ಸಾಕಾಗುವುದಿಲ್ಲ ಎಂಬುದನ್ನು ಒಪ್ಪಿಕೊಳ್ಳಿರಿ. ಜ್ಞಾನದ ವರಕ್ಕಾಗಿ ಪ್ರಾರ್ಥಿಸಿರಿ ಮತ್ತು ನಮ್ಮ ಪ್ರಭು ಅದನ್ನು ನಿಮಗೆ ದಯಪಾಲಿಸಲು ಅವಕಾಶ ಕೊಡಿರಿ.
ಸಕಲ ಸತ್ಯದ ಪ್ರಭುವೇ, ನಿಮ್ಮ ಜ್ಞಾನವು ಲೋಕದ ಎಲ್ಲ ಜ್ಞಾನವನ್ನೂ ಮೀರಿದೆ; ನೀವು ದುಷ್ಟನ ಕುತಂತ್ರವನ್ನು ವಿಫಲಗೊಳಿಸುತ್ತೀರಿ. ಪ್ರಿಯ ಪ್ರಭುವೇ, ಜೀವನದ ಸವಾಲುಗಳ ನಡುವೆ ಸರಿಯಾದ ದಾರಿಯಲ್ಲಿ ಸಾಗಲು ಸಾಧ್ಯವಾಗುವಂತೆ ನಿಮ್ಮ ಪವಿತ್ರ ಸತ್ಯಕ್ಕೆ ನನ್ನ ಮನಸ್ಸನ್ನು ತೆರೆಯಿರಿ. ಪ್ರಿಯ ಪ್ರಭುವೇ, ನೀವು ಎಲ್ಲಿಗೆ ನಡೆಸಿದರೂ ನಾನು ನಿಮ್ಮನ್ನು ಹಿಂಬಾಲಿಸುವಂತೆ ನಿಮ್ಮ ಜ್ಞಾನವನ್ನು ನನಗೆ ದಯಪಾಲಿಸಿರಿ. ಯೇಸುವೇ, ನಾನು ನಿಮ್ಮಲ್ಲಿ ಭರವಸೆ ಇಡುತ್ತೇನೆ.
ಯೇಸುವಿನ ಪವಿತ್ರ ಹೃದಯಕ್ಕೆ ನೊವೇನಾ
ನೊವೇನಾ ದಿನಾಂಕಗಳು: ಜೂನ್ 2-10, 2021
ಜೂನ್ 11, 2021: ಯೇಸುವಿನ ಪವಿತ್ರ ಹೃದಯದ ಮಹೋತ್ಸವ
ಇಂದಿನ ಸಂತರು – ರಕ್ತಸಾಕ್ಷಿ ಸಂತ ಜಸ್ಟಿನ್
ಮೇಲೆ ನೀಡಿರುವ ಚಿತ್ರ: ಕಪ್ಪದ ಹಣ, ಚಿತ್ರಕಾರ: ಲಿಯೊಪೋಲ್ಡ್ ಲೇಯರ್, Wikimedia Commons ಮೂಲಕ
