ಬುಧವಾರ, ಸೆಪ್ಟೆಂಬರ್ 29, 2021
ಪ್ರಧಾನ ದೇವದೂತರಾದ ಸಂತ ಮಿಖಾಯೇಲ್, ಗಬ್ರಿಯೇಲ್ ಮತ್ತು ರಫಾಯೇಲರ ಹಬ್ಬ
“ನಿಮಗೆ ನಿಜನಿಜವಾಗಿ ಹೇಳುತ್ತೇನೆ, ಸ್ವರ್ಗವು ತೆರೆದಿರುವುದನ್ನೂ ದೇವದೂತರು ಮನುಷ್ಯಕುಮಾರನ ಮೇಲೆ ಏರುತ್ತಾ ಇಳಿಯುತ್ತಾ ಇರುವುದನ್ನೂ ನೀವು ಕಾಣುವಿರಿ.” ಯೋಹಾನ 1:51
ಸ್ವರ್ಗದಲ್ಲಿ ನಾವು ಎಲ್ಲವನ್ನೂ ದೇವರು ನೋಡುವಂತೆಯೇ ನೋಡುವೆವು. ಆ ಸಂಪೂರ್ಣ ದೃಷ್ಟಿಕೋನದ ಮಹಿಮೆ ವರ್ಣನೆಗೂ ಮೀರಿದ್ದಾಗಿರುತ್ತದೆ. ಸ್ವರ್ಗದ ದೃಷ್ಟಿಕೋನದಿಂದ ನೋಡಿದಾಗ ನಮ್ಮನ್ನು ವಿಸ್ಮಯಗೊಳಿಸುವ ಅನೇಕ ಸಂಗತಿಗಳಲ್ಲಿ ಒಂದು, ದೇವರ ರಾಜ್ಯವನ್ನು ಸ್ಥಾಪಿಸುವುದರಲ್ಲಿ ದಿವ್ಯ ದೂತರು ಪಾಲ್ಗೊಳ್ಳುವ ಅತ್ಯಂತ ಶಕ್ತಿಶಾಲಿ ವಿಧಾನಗಳೇ ಆಗಿವೆ. ಸೆರಾಫಿಮರು, ಕೆರೂಬಿಮರು, ಸಿಂಹಾಸನದೂತರು, ಪ್ರಭುತ್ವದೂತರು, ಸದ್ಗುಣದೂತರು, ಅಧಿಕಾರದೂತರು, ಅಧಿಪತ್ಯದೂತರು, ಪ್ರಧಾನದೂತರು ಮತ್ತು ರಕ್ಷಕದೂತರು—ಇವರೆಲ್ಲರೂ ದೇವರ ಅನುಗ್ರಹದೊಂದಿಗೆ ಸಹಕರಿಸುತ್ತಾರೆ. ಇದು ಒಂದು ಸುಂದರ ಸಂಗೀತ ಕೃತಿಯನ್ನು ನುಡಿಸಲು ವಾದ್ಯವೃಂದದ ಪ್ರತಿಯೊಬ್ಬ ಸದಸ್ಯನೂ ಒಗ್ಗಟ್ಟಿನಿಂದ ಕೆಲಸಮಾಡುವ ರೀತಿಯನ್ನು ಹೋಲುತ್ತದೆ. ದೇವರೇ ಆ ವಾದ್ಯವೃಂದದ ನಿರ್ದೇಶಕ. ಆದರೆ ಈ ದಿವ್ಯ ದೂತರು ಅವರ ದೈವಿಕ ಅನುಗ್ರಹದ ಜೀವಂತ ಸಾಧನಗಳಾಗಿ ಕಾರ್ಯನಿರ್ವಹಿಸುತ್ತಾ, ದೇವರ ಚಿತ್ತದ ಮಹೋನ್ನತ ನೆರವೇರಿಕೆಯಲ್ಲಿ ಪಾಲ್ಗೊಳ್ಳುತ್ತಾರೆ.
ಇಂದಿನ ಹಬ್ಬವು ಪವಿತ್ರ ಗ್ರಂಥದಲ್ಲಿ ಉಲ್ಲೇಖಿಸಲಾದ ಮಹಾನ್ ಪ್ರಧಾನದೂತರಲ್ಲಿ ಮೂವರನ್ನು ಗೌರವಿಸುತ್ತದೆ: ಮಿಖಾಯೇಲ್, ಗಬ್ರಿಯೇಲ್ ಮತ್ತು ರಫಾಯೇಲ್. ಪ್ರಧಾನದೂತ ಮಿಖಾಯೇಲರನ್ನು ಹಳೆಯ ಒಡಂಬಡಿಕೆಯ ದಾನಿಯೇಲರ ಗ್ರಂಥದಲ್ಲಿ ರಕ್ಷಕರೆಂದೂ, ಪ್ರಕಟಣೆ ಮತ್ತು ಯೂದರ ಗ್ರಂಥಗಳಲ್ಲಿ ಸೈತಾನನ ವಿರುದ್ಧ ಹೋರಾಡುವವರೆಂದೂ ವರ್ಣಿಸಲಾಗಿದೆ. ಪ್ರಕಟಣೆ ಗ್ರಂಥದಲ್ಲಿ ಮಿಖಾಯೇಲರು ಸೈತಾನನನ್ನೂ ಇತರ ಪತಿತ ದೂತರನ್ನೂ ಸ್ವರ್ಗದಿಂದ ಹೊರದಬ್ಬುತ್ತಾರೆ. ಪ್ರಧಾನದೂತ ಗಬ್ರಿಯೇಲರನ್ನು ದಾನಿಯೇಲರ ದರ್ಶನದ ಅರ್ಥವನ್ನು ವಿವರಿಸುವವರೆಂದು ದಾನಿಯೇಲರ ಗ್ರಂಥದಲ್ಲಿಯೂ ಹೇಳಲಾಗಿದೆ. ಹೊಸ ಒಡಂಬಡಿಕೆಯಲ್ಲಿ, ಮಹಾಯಾಜಕ ಜಕರೀಯರು ದೇವಾಲಯದಲ್ಲಿ ಬಲಿಯರ್ಪಿಸುತ್ತಿರುವಾಗ ಅವರಿಗೆ ಕಾಣಿಸಿಕೊಂಡವರು ಗಬ್ರಿಯೇಲರೆಂದು ಗುರುತಿಸಲಾಗಿದೆ. ಆ ದರ್ಶನದಲ್ಲಿ, ಜಕರೀಯರ ಪತ್ನಿ ವಯಸ್ಸಿನಲ್ಲಿ ಮುಂದುವರಿದಿದ್ದರೂ ಆಕೆಗೆ ಮಗುವಾಗುವುದೆಂದು ಗಬ್ರಿಯೇಲರು ಅವರಿಗೆ ತಿಳಿಸಿದರು. ಪೂಜ್ಯ ಕನ್ಯೆ ಮರಿಯಮ್ಮನವರು ಲೋಕರಕ್ಷಕನ ತಾಯಿಯಾಗುವರೆಂದು ಅವರಿಗೆ ತಿಳಿಸಲು ಕಳುಹಿಸಲ್ಪಟ್ಟ ದೂತರೆಂಬುದೇ ಬಹುಶಃ ಗಬ್ರಿಯೇಲರ ಅತ್ಯಂತ ಪರಿಚಿತ ಪಾತ್ರವಾಗಿದೆ. ಕೊನೆಯದಾಗಿ, ಪ್ರಧಾನದೂತ ರಫಾಯೇಲರ ಕುರಿತು ಹಳೆಯ ಒಡಂಬಡಿಕೆಯ ತೋಬಿತರ ಗ್ರಂಥದಲ್ಲಿ ಉಲ್ಲೇಖಿಸಲಾಗಿದೆ. ತೋಬಿತರ ಕಣ್ಣುಗಳನ್ನು ಗುಣಪಡಿಸಲು ಅವರನ್ನು ಕಳುಹಿಸಲಾಯಿತೆಂದು ಹೇಳಲಾಗಿದೆ.
ಈ ಮೂವರು ಪ್ರಧಾನದೂತರನ್ನು ನಾವು ಗೌರವಿಸುವಾಗ, ದೇವರೊಂದಿಗೆ ಸಹಕರಿಸುತ್ತಾ ಅವರ ಅನುಗ್ರಹವನ್ನೂ ಅವರ ಚಿತ್ತವನ್ನೂ ನಮ್ಮ ಲೋಕದಲ್ಲಿ ಸಾಕಾರಗೊಳಿಸುವ ಅಸಂಖ್ಯಾತ ದೂತರಲ್ಲಿ ಇವರೂ ಮೂವರೆಂದು ನಾವು ಖಚಿತವಾಗಿ ತಿಳಿಯಬಹುದು. ಈ ಗಹನ ಸತ್ಯವನ್ನು ಕಲ್ಪಿಸಿಕೊಳ್ಳಲು ಪ್ರಯತ್ನಿಸಿ. ಕೆಲವು ದೂತರು ದೇವರ ಸಿಂಹಾಸನದ ಮುಂದೆ ಅವರನ್ನು ನಿರಂತರವಾಗಿ ಆರಾಧಿಸುವುದಕ್ಕೆ ತಮ್ಮ ಅಸ್ತಿತ್ವವನ್ನೇ ಮುಡಿಪಾಗಿಟ್ಟು ದೇವರ ರಾಜ್ಯವನ್ನು ಕಟ್ಟುತ್ತಾರೆ. ಇವರಲ್ಲಿ ಅತ್ಯುನ್ನತರು ಸೆರಾಫಿಮರು. ಇತರ ದೂತರು ದೇವರ ಚಿತ್ತಕ್ಕೆ ಅನುಸಾರವಾಗಿ ನಮ್ಮ ಜೀವನದಲ್ಲಿ ಮಧ್ಯಪ್ರವೇಶಿಸುತ್ತಾ, ದೇವರ ಅನುಗ್ರಹವನ್ನೂ ಸತ್ಯವನ್ನೂ ನಮಗೆ ತಲುಪಿಸುವ ಮೂಲಕ ಅವರ ರಾಜ್ಯವನ್ನು ಕಟ್ಟುತ್ತಾರೆ. ಇವರು ವಿಶೇಷವಾಗಿ ರಕ್ಷಕದೂತರು. ಪ್ರಧಾನದೂತರಿಗೆ, ಅವರಲ್ಲಿ ಮೂವರನ್ನು ನಾವು ಇಂದು ಗೌರವಿಸುತ್ತಿದ್ದೇವೆ, ದೇವರಿಂದ ಬರುವ ಅತ್ಯಂತ ಮಹತ್ವದ ಸಂದೇಶಗಳನ್ನೂ ಅನುಗ್ರಹಗಳನ್ನೂ ನಮಗೆ ತಲುಪಿಸುವ ವಿಶೇಷ ಕಾರ್ಯವಿದೆ.
ದಿವ್ಯ ದೂತರ ಸಮಸ್ತ ಗಣದ ಮಹಿಮಾಮಯ ವಾಸ್ತವತೆಯ ಕುರಿತು ಇಂದು ಧ್ಯಾನಿಸಿ. ನಮಗೆ ಹೆಸರು ತಿಳಿದಿರುವ ಮಿಖಾಯೇಲ್, ಗಬ್ರಿಯೇಲ್ ಮತ್ತು ರಫಾಯೇಲ್ ಎಂಬ ಈ ಮೂವರು ದಿವ್ಯ ದೂತರ ಮಧ್ಯಸ್ಥಿಕೆಯನ್ನು ವಿಶೇಷವಾಗಿ ಬೇಡಿಕೊಳ್ಳಿ. ಹಾಗೆಯೇ ನಮ್ಮ ರಕ್ಷಕದೂತರ ಮತ್ತು ಇತರ ಎಲ್ಲ ದಿವ್ಯ ದೂತರ ಮಧ್ಯಸ್ಥಿಕೆಯನ್ನೂ ಬೇಡಿಕೊಳ್ಳಿ. ಹೀಗೆ ಮಾಡುವ ಮೂಲಕ ನಾವು ನಮ್ಮನ್ನು ಅವರ ಪ್ರೀತಿಯ ಆರೈಕೆಗೆ ಒಪ್ಪಿಸಿಕೊಡುವುದು ಮಾತ್ರವಲ್ಲದೆ, ತಮ್ಮ ರಾಜ್ಯವನ್ನು ಸ್ಥಾಪಿಸಲು ದೇವರು ಈ ದಿವ್ಯ ದೂತರನ್ನು ಬಳಸಿಕೊಳ್ಳಲು ಆರಿಸಿಕೊಂಡಿದ್ದಾರೆ ಎಂಬ ನಮ್ಮ ನಂಬಿಕೆಯನ್ನು ವ್ಯಕ್ತಪಡಿಸಿ, ದೇವರಲ್ಲಿ ನಮ್ಮ ವಿಶ್ವಾಸವನ್ನೂ ಪ್ರಕಟಿಸುತ್ತೇವೆ. ತಮ್ಮ ಸ್ವಂತ ಶಕ್ತಿಯಿಂದ ಕಾರ್ಯನಿರ್ವಹಿಸಲು ದೂತರಿಗೆ ಸಾಮರ್ಥ್ಯವಿಲ್ಲ. ಆದರೆ ಅವರು ದೇವರ ಚಿತ್ತದೊಂದಿಗೆ ಏಕತೆಯಲ್ಲಿ ಮಾತ್ರ ಕಾರ್ಯನಿರ್ವಹಿಸುವುದರಿಂದ, ಅವರ ಮಧ್ಯಸ್ಥಿಕೆಯು ದೇವರ ಅನುಗ್ರಹದಷ್ಟೇ ಶಕ್ತಿಶಾಲಿಯಾಗಿದೆ; ಏಕೆಂದರೆ ಅವರ ಮೂಲಕ ಕಾರ್ಯನಿರ್ವಹಿಸುವವರು ದೇವರೇ. ಇಂದು ಅವರನ್ನು ಗುರುತಿಸಿ ಗೌರವಿಸಿ, ಅವರ ಮಧ್ಯಸ್ಥಿಕೆಯನ್ನು ಬೇಡಿಕೊಳ್ಳಿ ಮತ್ತು ದೇವರ ರಾಜ್ಯವನ್ನು ಕಟ್ಟಲು ಅವರು ಮಾಡುವ ಮಹಿಮಾಮಯ ಕಾರ್ಯದಲ್ಲಿ ನಿಮ್ಮ ವಿಶ್ವಾಸವನ್ನು ಪ್ರಕಟಿಸಿ.
ಅತ್ಯಂತ ಮಹಿಮಾವಂತ ಪ್ರಧಾನದೂತರಾದ ಮಿಖಾಯೇಲ್, ಗಬ್ರಿಯೇಲ್ ಮತ್ತು ರಫಾಯೇಲರೇ, ದಯಮಾಡಿ ನನ್ನ ನೆರವಿಗೆ ಬನ್ನಿರಿ. ನನ್ನನ್ನೂ ನನ್ನ ಕುಟುಂಬವನ್ನೂ ನಮ್ಮ ಧರ್ಮಸಭೆಯನ್ನೂ ಇಡೀ ಜಗತ್ತನ್ನೂ ನಿಮ್ಮ ಪ್ರೀತಿಯ ಮಧ್ಯಸ್ಥಿಕೆಗೆ ಒಪ್ಪಿಸಿಕೊಡುತ್ತೇನೆ. ದಯಮಾಡಿ ನಮ್ಮ ಜೀವನದಲ್ಲಿ ದೇವರ ಅನುಗ್ರಹವನ್ನು ತಂದುಕೊಡಿ, ದೇವರ ವಾಕ್ಯವನ್ನೂ ಅವರ ಪವಿತ್ರ ಚಿತ್ತವನ್ನೂ ನಮಗೆ ತಿಳಿಸಿ, ಎಲ್ಲ ಕೇಡುಗಳಿಂದ ನಮ್ಮನ್ನು ರಕ್ಷಿಸಿ ಮತ್ತು ಗುಣಹೊಂದುವ ಅಗತ್ಯವಿರುವವರಿಗೆ ಸ್ವಸ್ಥತೆಯನ್ನು ತಂದುಕೊಡಿ. ದೇವದೂತರೇ, ನಮಗಾಗಿ ಪ್ರಾರ್ಥಿಸಿರಿ. ಯೇಸುವೇ, ನಾನು ನಿಮ್ಮಲ್ಲಿ ಭರವಸೆಯಿಡುತ್ತೇನೆ.
ಪುಟ್ಟ ಪುಷ್ಪವಾದ ಸಂತ ತೆರೇಸಾರ ನೊವೇನಾ
ಸೆಪ್ಟೆಂಬರ್ 22-30
ಸಾಮಾನ್ಯ ಕಾಲಕ್ಕಾಗಿ ಪವಿತ್ರ ಗ್ರಂಥದ ಧ್ಯಾನಗಳು
ಇಂದಿನ ಹಬ್ಬ– ಪ್ರಧಾನದೂತರಾದ ಸಂತ ಮಿಖಾಯೇಲ್, ಗಬ್ರಿಯೇಲ್ ಮತ್ತು ರಫಾಯೇಲ್
ಮೇಲೆ ನೀಡಿರುವ ಚಿತ್ರ: ಏಳು ಪವಿತ್ರ ಪ್ರಧಾನದೂತರ ಸಭೆ. ರಷ್ಯನ್ ಪವಿತ್ರ ಪ್ರತಿಮೆಚಿತ್ರ, Wikimedia Commons ಮೂಲಕ
