ಜನವರಿ 29, 2022
ಸಾಮಾನ್ಯ ಕಾಲದ ಮೂರನೆಯ ವಾರದ ಶನಿವಾರ
ಇಂದಿನ ವಾಚನಗಳು
ಯೇಸು ದೋಣಿಯ ಹಿಂಭಾಗದಲ್ಲಿ ತಲೆದಿಂಬಿನ ಮೇಲೆ ನಿದ್ರಿಸುತ್ತಿದ್ದರು. ಶಿಷ್ಯರು ಅವರನ್ನು ಎಬ್ಬಿಸಿ, “ಗುರುವೇ, ನಾವು ನಾಶವಾಗುತ್ತಿದ್ದೇವೆ; ನಿಮಗೆ ಚಿಂತೆಯಿಲ್ಲವೇ?” ಎಂದು ಕೇಳಿದರು. ಅವರು ಎದ್ದು, ಗಾಳಿಯನ್ನು ಗದರಿಸಿ, ಸಮುದ್ರಕ್ಕೆ, “ಸುಮ್ಮನಿರು! ಶಾಂತವಾಗಿರು!” ಎಂದರು. ಗಾಳಿ ನಿಂತುಹೋಯಿತು; ಸಂಪೂರ್ಣ ಶಾಂತಿ ನೆಲೆಸಿತು. ಮಾರ್ಕ 4:38-39
ಆಗ ಮಹಾ ಪ್ರಶಾಂತತೆ ಉಂಟಾಯಿತು! ಇದು ಸಮುದ್ರವು ಶಾಂತವಾದುದನ್ನು ಸೂಚಿಸಿದರೂ, ಜೀವನದಲ್ಲಿ ಕೆಲವೊಮ್ಮೆ ನಾವು ಎದುರಿಸುವ ಅಶಾಂತಿಯ ಕುರಿತಾದ ಸಂದೇಶವೂ ಆಗಿದೆ. ಯೇಸು ನಮ್ಮ ಜೀವನದಲ್ಲಿ ಮಹಾ ಪ್ರಶಾಂತತೆಯನ್ನು ತರಲು ಬಯಸುತ್ತಾರೆ.
ಜೀವನದಲ್ಲಿ ಧೈರ್ಯ ಕಳೆದುಕೊಳ್ಳುವುದು ತುಂಬ ಸುಲಭ. ನಮ್ಮ ಸುತ್ತಲಿರುವ ಗೊಂದಲದ ಮೇಲೆಯೇ ಗಮನ ಕೇಂದ್ರೀಕರಿಸುವುದೂ ತುಂಬ ಸುಲಭ. ಬೇರೆಯವರ ಕಠೋರವಾದ, ಚುಚ್ಚುವ ಮಾತಾಗಲಿ, ಕುಟುಂಬದ ಸಮಸ್ಯೆಯಾಗಲಿ, ನಾಗರಿಕ ಅಶಾಂತಿಯಾಗಲಿ, ಹಣಕಾಸಿನ ಚಿಂತೆಗಳಾಗಲಿ—ನಮ್ಮಲ್ಲಿ ಪ್ರತಿಯೊಬ್ಬರೂ ಭಯ, ಹತಾಶೆ, ಖಿನ್ನತೆ ಮತ್ತು ಆತಂಕದ ಬಲೆಗೆ ಬೀಳಲು ಸಾಕಷ್ಟು ಕಾರಣಗಳಿವೆ.
ಆದರೆ ಇದೇ ಕಾರಣಕ್ಕಾಗಿಯೇ ಯೇಸು ತಮ್ಮ ಶಿಷ್ಯರೊಂದಿಗೆ ಈ ಘಟನೆ ನಡೆಯಲು ಅವಕಾಶ ನೀಡಿದರು. ಅವರು ತಮ್ಮ ಶಿಷ್ಯರೊಂದಿಗೆ ದೋಣಿಯನ್ನು ಹತ್ತಿ, ತಾವು ನಿದ್ರಿಸುತ್ತಿರುವಾಗ ಅವರು ಭೀಕರ ಬಿರುಗಾಳಿಯನ್ನು ಅನುಭವಿಸಲು ಅವಕಾಶ ನೀಡಿದರು. ಈ ಅನುಭವದ ಮೂಲಕ ನಮ್ಮೆಲ್ಲರಿಗೂ ಸ್ಪಷ್ಟವಾದ ಮತ್ತು ಮನವರಿಕೆ ಮಾಡುವ ಸಂದೇಶವನ್ನು ನೀಡುವುದೇ ಅವರ ಉದ್ದೇಶವಾಗಿತ್ತು.
ಈ ಘಟನೆಯಲ್ಲಿ ಶಿಷ್ಯರು ಒಂದೇ ವಿಷಯದ ಮೇಲೆ ಗಮನ ಕೇಂದ್ರೀಕರಿಸಿದ್ದರು: ತಾವು ನಾಶವಾಗುತ್ತಿದ್ದೇವೆ ಎಂಬುದರ ಮೇಲೆ! ಸಮುದ್ರವು ಅವರನ್ನು ತಳ್ಳಾಡಿಸುತ್ತಿತ್ತು; ಸನ್ನಿಹಿತವಾಗಿದ್ದ ವಿಪತ್ತನ್ನು ಕಂಡು ಅವರು ಭಯಗೊಂಡಿದ್ದರು. ಆದರೆ ಇದೆಲ್ಲದರ ನಡುವೆಯೂ ಯೇಸು ಅಲ್ಲಿಯೇ ಗಾಢನಿದ್ರೆಯಲ್ಲಿದ್ದರು; ಅವರು ತಮ್ಮನ್ನು ಎಬ್ಬಿಸುವುದಕ್ಕಾಗಿ ಕಾಯುತ್ತಿದ್ದರು. ಅವರು ಯೇಸುವನ್ನು ಎಬ್ಬಿಸಿದಾಗ, ಯೇಸು ಬಿರುಗಾಳಿಯನ್ನು ತಮ್ಮ ಹಿಡಿತಕ್ಕೆ ತೆಗೆದುಕೊಂಡು ಸಂಪೂರ್ಣ ಶಾಂತಿಯನ್ನು ತಂದರು.
ನಮ್ಮ ಜೀವನದಲ್ಲಿಯೂ ಇದೇ ಸತ್ಯ ಅನ್ವಯಿಸುತ್ತದೆ. ದಿನನಿತ್ಯದ ಜೀವನದ ಒತ್ತಡಗಳು ಮತ್ತು ಕಷ್ಟಗಳಿಂದ ನಾವು ಬಹಳ ಸುಲಭವಾಗಿ ತಲ್ಲಣಗೊಳ್ಳುತ್ತೇವೆ. ನಾವು ಎದುರಿಸುವ ಸಮಸ್ಯೆಗಳು ನಮ್ಮನ್ನು ಸಂಪೂರ್ಣವಾಗಿ ಆವರಿಸಿಕೊಳ್ಳಲು ನಾವು ಆಗಾಗ ಅವಕಾಶ ಕೊಡುತ್ತೇವೆ. ನಮ್ಮ ಕಣ್ಣುಗಳನ್ನು ಯೇಸುವಿನ ಕಡೆಗೆ ತಿರುಗಿಸುವುದೇ ಮುಖ್ಯ. ಅಲ್ಲಿ ನಿಮ್ಮ ಮುಂದೆ ನಿದ್ರಿಸುತ್ತಾ, ನೀವು ತಮ್ಮನ್ನು ಎಬ್ಬಿಸುವುದಕ್ಕಾಗಿ ಕಾಯುತ್ತಿರುವ ಅವರನ್ನು ಕಾಣಿರಿ. ಅವರು ಯಾವಾಗಲೂ ಅಲ್ಲಿದ್ದಾರೆ, ಸದಾ ಕಾಯುತ್ತಿದ್ದಾರೆ, ಸದಾ ಸಿದ್ಧರಾಗಿದ್ದಾರೆ.
ನಮ್ಮ ಪ್ರಭುವನ್ನು ಎಬ್ಬಿಸುವುದು ಎಂದರೆ ಬಿರುಗಾಳಿಯಿಂದ ಅಲ್ಲೋಲಕಲ್ಲೋಲವಾಗಿರುವ ಸಮುದ್ರದಿಂದ ನಮ್ಮ ಕಣ್ಣುಗಳನ್ನು ತಿರುಗಿಸಿ, ಅವರ ದೈವಿಕ ಸಾನ್ನಿಧ್ಯದಲ್ಲಿ ಭರವಸೆ ಇಡುವಷ್ಟು ಸರಳವಾದದ್ದು. ಇಲ್ಲಿ ಮುಖ್ಯವಾದದ್ದು ಭರವಸೆಯೇ. ಸಂಪೂರ್ಣವಾದ, ಅಚಲವಾದ ಭರವಸೆ. ನೀವು ಅವರಲ್ಲಿ ಭರವಸೆ ಇಡುತ್ತೀರಾ?
ನಿಮಗೆ ಪ್ರತಿದಿನ ಆತಂಕ, ಭಯ ಅಥವಾ ಗೊಂದಲವನ್ನು ಉಂಟುಮಾಡುವ ಸಂಗತಿಯನ್ನು ಇಂದು ಮನನ ಮಾಡಿರಿ. ನಿಮ್ಮನ್ನು ಅತ್ತಿತ್ತ ತಳ್ಳಾಡಿಸುತ್ತಾ ಒತ್ತಡ ಮತ್ತು ಚಿಂತೆಯನ್ನು ಉಂಟುಮಾಡುತ್ತಿರುವಂತೆ ಕಾಣುವುದು ಯಾವುದು? ಈ ಹೊರೆಯನ್ನು ನೋಡುವಾಗ, ಅಲ್ಲಿ ನಿಮ್ಮೊಂದಿಗಿರುವ ಯೇಸುವನ್ನೂ ಕಾಣಿರಿ. ನಿಮ್ಮ ಜೀವನದಲ್ಲಿ ನೀವು ಎದುರಿಸುವ ಪ್ರತಿಯೊಂದು ಸನ್ನಿವೇಶವನ್ನೂ ತಮ್ಮ ಹಿಡಿತಕ್ಕೆ ತೆಗೆದುಕೊಳ್ಳಲು, ನೀವು ಭರವಸೆಯಿಂದ ತಮ್ಮ ಬಳಿಗೆ ಬರುವುದಕ್ಕಾಗಿ ಅವರು ಕಾಯುತ್ತಿದ್ದಾರೆ. ಅವರು ನಿಮ್ಮನ್ನು ಪ್ರೀತಿಸುತ್ತಾರೆ ಮತ್ತು ಖಂಡಿತವಾಗಿಯೂ ನಿಮ್ಮನ್ನು ನೋಡಿಕೊಳ್ಳುತ್ತಾರೆ.
ನಿದ್ರಿಸುತ್ತಿರುವ ನನ್ನ ಪ್ರಭುವೇ, ಜೀವನದ ಸವಾಲುಗಳ ನಡುವೆ ನಾನು ನಿಮ್ಮ ಕಡೆಗೆ ತಿರುಗುತ್ತೇನೆ; ನಿಮ್ಮನ್ನು ಎಚ್ಚರಗೊಳಿಸಿ ನನ್ನ ನೆರವಿಗೆ ಬರುವಂತೆ ಕೋರಲು ಬಯಸುತ್ತೇನೆ. ಎಲ್ಲ ವಿಷಯಗಳಲ್ಲಿಯೂ ನಾನು ನಿಮ್ಮಲ್ಲಿ ಭರವಸೆಯಿಡುವುದಕ್ಕಾಗಿ ಕಾಯುತ್ತಾ, ನೀವು ಯಾವಾಗಲೂ ನನ್ನ ಬಳಿಯೇ ಇರುವಿರಿ ಎಂದು ನನಗೆ ತಿಳಿದಿದೆ. ನನ್ನ ಕಣ್ಣುಗಳನ್ನು ನಿಮ್ಮ ಕಡೆಗೆ ತಿರುಗಿಸಲು ಮತ್ತು ನನ್ನ ಮೇಲಿರುವ ನಿಮ್ಮ ಪರಿಪೂರ್ಣ ಪ್ರೀತಿಯಲ್ಲಿ ವಿಶ್ವಾಸವಿಡಲು ನನಗೆ ಸಹಾಯಮಾಡಿ. ಯೇಸುವೇ, ನಾನು ನಿಮ್ಮಲ್ಲಿ ಭರವಸೆಯಿಡುತ್ತೇನೆ.
ಸಾಮಾನ್ಯ ಕಾಲಕ್ಕಾಗಿ ಪವಿತ್ರ ಗ್ರಂಥದ ಧ್ಯಾನಗಳು
_-_James_Tissot_-_overall.jpg){kind=link}