ಏಪ್ರಿಲ್ 2, 2022
ತಪಸ್ಸುಕಾಲದ ನಾಲ್ಕನೇ ವಾರದ ಶನಿವಾರ
ಇಂದಿನ ವಾಚನಗಳು
ಪಾವೊಲಾದ ಸಂತ ಫ್ರಾನ್ಸಿಸ್, ಏಕಾಂತವಾಸಿ—ಐಚ್ಛಿಕ ಸ್ಮರಣೆ
ಕಾವಲುಗಾರರು, “ಈ ಮನುಷ್ಯನಂತೆ ಹಿಂದೆ ಯಾರೂ ಮಾತನಾಡಿದ್ದೇ ಇಲ್ಲ” ಎಂದು ಉತ್ತರಿಸಿದರು. ಯೋಹಾನ 7:46
ಕಾವಲುಗಾರರೂ ಇನ್ನೂ ಅನೇಕರೂ ಯೇಸುವಿನ ಮಾತುಗಳನ್ನು ಕೇಳಿ ಬೆರಗಾಗಿ, ಅವರ ಬಗ್ಗೆ ವಿಸ್ಮಯಗೊಂಡಿದ್ದರು. ಮಹಾಯಾಜಕರು ಮತ್ತು ಫರಿಸಾಯರ ಆಜ್ಞೆಯ ಮೇರೆಗೆ ಈ ಕಾವಲುಗಾರರನ್ನು ಯೇಸುವನ್ನು ಬಂಧಿಸಲು ಕಳುಹಿಸಲಾಗಿತ್ತು. ಆದರೆ ಅವರನ್ನು ಬಂಧಿಸಲು ಕಾವಲುಗಾರರಿಗೆ ಮನಸ್ಸು ಬರಲಿಲ್ಲ. ಯೇಸುವಿನಲ್ಲಿದ್ದ “ವಿಸ್ಮಯಗೊಳಿಸುವ ಶಕ್ತಿ”ಯ ಮುಂದೆ ಅವರು ಅಸಹಾಯಕರಾದರು.
ಯೇಸು ಬೋಧಿಸಿದಾಗ, ಅವರ ಮಾತುಗಳನ್ನು ಮೀರಿದ ಯಾವುದೋ ಒಂದು ಸಂಗತಿಯೂ ಜನರಿಗೆ ತಲುಪುತ್ತಿತ್ತು. ಹೌದು, ಅವರ ಮಾತುಗಳು ಶಕ್ತಿಯುತವಾಗಿದ್ದವು ಮತ್ತು ಪರಿವರ್ತನೆಯನ್ನು ತರುತ್ತಿದ್ದವು; ಆದರೆ ಅವರು ಮಾತನಾಡುತ್ತಿದ್ದ ರೀತಿಯೂ ಅಷ್ಟೇ ಮುಖ್ಯವಾಗಿತ್ತು. ಅದನ್ನು ವಿವರಿಸುವುದು ಕಷ್ಟವಾಗಿತ್ತು. ಆದರೆ ಅವರು ಮಾತನಾಡಿದಾಗ, ಒಂದು ಶಕ್ತಿ, ಪ್ರಶಾಂತತೆ, ದೃಢನಿಶ್ಚಯ ಮತ್ತು ಸಾನ್ನಿಧ್ಯವನ್ನೂ ಜನರಿಗೆ ಅನುಭವಗೊಳಿಸುತ್ತಿದ್ದರು ಎಂಬುದು ಸ್ಪಷ್ಟವಾಗಿದೆ. ಅವರು ತಮ್ಮ ದೈವಿಕ ಸಾನ್ನಿಧ್ಯವನ್ನು ಅನುಭವಗೊಳಿಸುತ್ತಿದ್ದರು; ಅದರಲ್ಲಿ ಯಾವ ಸಂದೇಹಕ್ಕೂ ಎಡೆಯಿರಲಿಲ್ಲ. ಯೇಸು ಎಂಬ ಈ ವ್ಯಕ್ತಿ ಉಳಿದ ಎಲ್ಲರಿಗಿಂತ ಭಿನ್ನರಾಗಿದ್ದಾರೆಂದು ಜನರಿಗೆ ಸುಮ್ಮನೆ ತಿಳಿಯುತ್ತಿತ್ತು ಮತ್ತು ಅವರು ಅವರ ಪ್ರತಿಯೊಂದು ಮಾತನ್ನೂ ತದೇಕಚಿತ್ತದಿಂದ ಆಲಿಸುತ್ತಿದ್ದರು.
ದೇವರು ಇಂದಿಗೂ ಈ ರೀತಿಯಲ್ಲೇ ನಮ್ಮೊಂದಿಗೆ ಸಂವಹನ ನಡೆಸುತ್ತಾರೆ. ಯೇಸು ಇಂದಿಗೂ ಈ “ವಿಸ್ಮಯಗೊಳಿಸುವ ಶಕ್ತಿ”ಯೊಂದಿಗೆ ನಮ್ಮೊಡನೆ ಮಾತನಾಡುತ್ತಾರೆ. ನಾವು ಅದಕ್ಕೆ ಗಮನಕೊಟ್ಟರೆ ಸಾಕು. ದೇವರು ಅಧಿಕಾರದಿಂದ, ಸ್ಪಷ್ಟತೆಯಿಂದ ಮತ್ತು ದೃಢನಿಶ್ಚಯದಿಂದ, ನಮ್ಮ ಮನಮುಟ್ಟುವಂತೆ ಸ್ಪಷ್ಟವಾಗಿ ಮಾತನಾಡುವ ರೀತಿಗಳನ್ನು ಗಮನಿಸಲು ನಾವು ಶ್ರಮಿಸಬೇಕು. ಅದು ಯಾರಾದರೂ ಹೇಳುವ ಮಾತಾಗಿರಬಹುದು ಅಥವಾ ನಮ್ಮ ಮನಸ್ಸನ್ನು ಸ್ಪರ್ಶಿಸುವ ಇನ್ನೊಬ್ಬರ ಕ್ರಿಯೆಯಾಗಿರಬಹುದು. ಅದು ನಾವು ಓದುವ ಪುಸ್ತಕವಾಗಿರಬಹುದು ಅಥವಾ ನಾವು ಆಲಿಸುವ ಪ್ರವಚನವಾಗಿರಬಹುದು. ಅದು ಯಾವುದಾದರೂ ಆಗಿರಲಿ, ನಾವು ಈ ವಿಸ್ಮಯಗೊಳಿಸುವ ಶಕ್ತಿಯನ್ನು ಹುಡುಕಬೇಕು; ಏಕೆಂದರೆ ಅಲ್ಲಿಯೇ ನಾವು ಸ್ವತಃ ಯೇಸುವನ್ನು ಕಂಡುಕೊಳ್ಳುತ್ತೇವೆ.
ಆಸಕ್ತಿಕರ ಸಂಗತಿಯೆಂದರೆ, ಈ ವಿಸ್ಮಯಗೊಳಿಸುವ ಶಕ್ತಿ ತೀವ್ರ ಟೀಕೆಯನ್ನೂ ಆಹ್ವಾನಿಸಿತು. ಸರಳವಾದ, ಪ್ರಾಮಾಣಿಕವಾದ ವಿಶ್ವಾಸವುಳ್ಳವರು ಉತ್ತಮವಾಗಿ ಸ್ಪಂದಿಸಿದರು. ಆದರೆ ಸ್ವಾರ್ಥಿಗಳಾಗಿದ್ದವರು ಮತ್ತು ತಾವೇ ನೀತಿವಂತರೆಂದು ಭಾವಿಸಿಕೊಂಡಿದ್ದವರು ಖಂಡನೆ ಮತ್ತು ಕೋಪದಿಂದ ಪ್ರತಿಕ್ರಿಯಿಸಿದರು. ಅವರು ಅಸೂಯೆಪಟ್ಟದ್ದು ಸ್ಪಷ್ಟವಾಗಿತ್ತು. ಯೇಸುವಿನಿಂದ ಪ್ರಭಾವಿತರಾದ ಕಾವಲುಗಾರರನ್ನೂ ಇತರರನ್ನೂ ಸಹ ಅವರು ಟೀಕಿಸಿದರು.
ದೇವರು ತಮ್ಮ ಸಂದೇಶ ಮತ್ತು ಪ್ರೀತಿಯ ಮೂಲಕ ನಿಮ್ಮನ್ನು ವಿಸ್ಮಯಗೊಳಿಸಿದ ರೀತಿಗಳ ಕುರಿತು ಇಂದು ಚಿಂತಿಸಿ. ದೃಢನಿಶ್ಚಯವೂ ಸ್ಪಷ್ಟತೆಯೂ ತುಂಬಿರುವ ಅವರ ಸ್ವರವನ್ನು ಹುಡುಕಿ. ದೇವರು ನಿಮ್ಮೊಡನೆ ಸಂವಹನ ನಡೆಸಲು ಪ್ರಯತ್ನಿಸುತ್ತಿರುವ ರೀತಿಗೆ ಮನಸ್ಸನ್ನು ತೆರೆದಿಡಿ. ಅವರ ಸ್ವರವನ್ನು ಅನುಸರಿಸಲು ನೀವು ಪ್ರಯತ್ನಿಸುವಾಗ ಎದುರಾಗಬಹುದಾದ ಅಪಹಾಸ್ಯ ಮತ್ತು ಟೀಕೆಗಳಿಗೆ ಗಮನಕೊಡಬೇಡಿ. ಅವರ ಸ್ವರವೇ ಮೇಲುಗೈ ಸಾಧಿಸಿ ನಿಮ್ಮನ್ನು ತನ್ನತ್ತ ಸೆಳೆಯಬೇಕು; ಆಗ ಅವರು ಹೇಳಬಯಸುವ ಎಲ್ಲವನ್ನೂ ನೀವು ಆಸ್ವಾದಿಸಬಹುದು.
ಅಪಾರ ಭಯಭಕ್ತಿಯನ್ನು ಮೂಡಿಸುವ ನನ್ನ ಪ್ರಭುವೇ, ನಿಸ್ಸಂದೇಹವಾಗಿ ನಿಮ್ಮದೆಂದು ಗುರುತಿಸಬಹುದಾದ ನಿಮ್ಮ ಸ್ವರಕ್ಕೂ ನೀವು ಮಾತನಾಡುವ ಅಧಿಕಾರಕ್ಕೂ ನಾನು ಗಮನಕೊಡುವಂತಾಗಲಿ. ನೀವು ಹೇಳಬಯಸುವ ಎಲ್ಲ ಮಾತುಗಳಿಗೂ ನಾನು ಬೆರಗಾಗುವಂತಾಗಲಿ. ಪ್ರಿಯ ಪ್ರಭುವೇ, ನಾನು ನಿಮ್ಮ ಮಾತುಗಳನ್ನು ಆಲಿಸುವಾಗ, ಇತರರ ಪ್ರತಿಕ್ರಿಯೆ ಏನೇ ಆಗಿದ್ದರೂ ವಿಶ್ವಾಸದಿಂದ ಸ್ಪಂದಿಸುವ ಧೈರ್ಯವನ್ನು ನನಗೆ ದಯಪಾಲಿಸಿ. ಪ್ರಿಯ ಪ್ರಭುವೇ, ನಾನು ನಿಮ್ಮನ್ನು ಪ್ರೀತಿಸುತ್ತೇನೆ; ವಿಸ್ಮಯ ಮತ್ತು ಭಯಭಕ್ತಿಯಿಂದ ಆಲಿಸುತ್ತಾ, ನಿಮ್ಮ ಪ್ರತಿಯೊಂದು ವಾಕ್ಯದ ಮೇಲೂ ತದೇಕಚಿತ್ತದಿಂದ ನೆಲೆಸಲು ಬಯಸುತ್ತೇನೆ. ಯೇಸುವೇ, ನಾನು ನಿಮ್ಮಲ್ಲಿ ಭರವಸೆಯಿಟ್ಟಿದ್ದೇನೆ.
(ತಪಸ್ಸುಕಾಲದ ನಾಲ್ಕನೇ ವಾರದ ಶನಿ.)
ತಪಸ್ಸುಕಾಲಕ್ಕಾಗಿ ಪವಿತ್ರ ಗ್ರಂಥದ ಧ್ಯಾನಗಳು
ಇಂದಿನ ಸಂತರು – ಪಾವ್ಲಾದ ಸಂತ ಫ್ರಾನ್ಸಿಸ್, ಏಕಾಂತವಾಸಿ
_-_James_Tissot_-_overall.jpg){kind=link}