ಆಗಸ್ಟ್ 3, 2022
ಸಾಮಾನ್ಯ ಕಾಲದ ಹದಿನೆಂಟನೆಯ ವಾರದ ಬುಧವಾರ
ಇಂದಿನ ವಾಚನಗಳು
ಆದರೆ ಆ ಸ್ತ್ರೀ ಬಂದು ಅವರಿಗೆ ಅಡ್ಡಬಿದ್ದು, “ಪ್ರಭುವೇ, ನನಗೆ ಸಹಾಯಮಾಡಿ” ಎಂದಳು. ಅವರು ಪ್ರತ್ಯುತ್ತರವಾಗಿ, “ಮಕ್ಕಳ ಆಹಾರವನ್ನು ತೆಗೆದು ನಾಯಿಗಳಿಗೆ ಎಸೆಯುವುದು ಸರಿಯಲ್ಲ” ಎಂದರು. ಅವಳು, “ಹೌದು ಪ್ರಭುವೇ, ಆದರೂ ನಾಯಿಗಳು ಸಹ ತಮ್ಮ ಯಜಮಾನರ ಮೇಜಿನಿಂದ ಬೀಳುವ ಚೂರುಗಳನ್ನು ತಿನ್ನುತ್ತವಲ್ಲಾ” ಎಂದಳು. ಮತ್ತಾಯ 15:25-27
ಈ ಸ್ತ್ರೀಗೆ ಸಹಾಯಮಾಡುವುದು ನಾಯಿಗಳಿಗೆ ಆಹಾರವನ್ನು ಎಸೆದಂತೆ ಎಂದು ಯೇಸು ನಿಜವಾಗಿಯೂ ಸೂಚಿಸಿದರೇ? ನಮ್ಮ ಅಹಂಕಾರದ ಕಾರಣದಿಂದ, ಯೇಸು ಹೇಳಿದ ಮಾತಿನಿಂದ ನಮ್ಮಲ್ಲಿ ಹೆಚ್ಚಿನವರು ತೀವ್ರವಾಗಿ ನೊಂದುಕೊಳ್ಳುತ್ತಿದ್ದೆವು. ಆದರೆ ಅವರು ಹೇಳಿದ ಮಾತು ಸತ್ಯವಾಗಿತ್ತು; ಅದು ಯಾವುದೇ ರೀತಿಯಲ್ಲೂ ಒರಟಾಗಿರಲಿಲ್ಲ. ಯೇಸು ಒರಟಾಗಿ ವರ್ತಿಸಲು ಸಾಧ್ಯವೇ ಇಲ್ಲ ಎಂಬುದು ಸ್ಪಷ್ಟ. ಆದರೂ, ಮೇಲ್ನೋಟಕ್ಕೆ ಅವರ ಮಾತು ಒರಟಾಗಿ ಕಾಣುತ್ತದೆ.
ಮೊದಲನೆಯದಾಗಿ, ಅವರ ಮಾತು ಹೇಗೆ ಸತ್ಯವಾಗಿದೆ ಎಂಬುದನ್ನು ನೋಡೋಣ. ಈ ಸ್ತ್ರೀ ಯೇಸುವನ್ನು ಬಂದು ತನ್ನ ಮಗಳನ್ನು ಗುಣಪಡಿಸಬೇಕೆಂದು ಕೇಳಿಕೊಳ್ಳುತ್ತಿದ್ದಳು. ಮೂಲತಃ, ಈ ಅನುಗ್ರಹಕ್ಕೆ ಅವಳು ಯಾವುದೇ ರೀತಿಯಲ್ಲೂ ಅರ್ಹಳಲ್ಲ ಎಂದು ಯೇಸು ಅವಳಿಗೆ ಹೇಳುತ್ತಾರೆ. ಅದು ಸತ್ಯವೂ ಹೌದು. ಮೇಜಿನ ಆಹಾರವನ್ನು ಪಡೆಯಲು ನಾಯಿಗೆ ಅರ್ಹತೆ ಇಲ್ಲದಿರುವಂತೆಯೇ, ದೇವರ ಅನುಗ್ರಹವನ್ನು ಪಡೆಯಲು ನಮಗೂ ಅರ್ಹತೆ ಇಲ್ಲ. ಇದನ್ನು ಈ ರೀತಿ ಹೇಳುವುದು ಆಘಾತಕಾರಿಯಾಗಿದ್ದರೂ, ನಮ್ಮ ಪಾಪಮಯ ಸ್ಥಿತಿ ಮತ್ತು ಅಯೋಗ್ಯತೆಯ ಸತ್ಯವನ್ನು ಮೊದಲು ತೋರಿಸಿಕೊಡಲೆಂದೇ ಯೇಸು ಹೀಗೆ ಹೇಳುತ್ತಾರೆ. ಈ ಸ್ತ್ರೀ ಅದನ್ನು ಸ್ವೀಕರಿಸುತ್ತಾಳೆ.
ಎರಡನೆಯದಾಗಿ, ಯೇಸುವಿನ ಮಾತು ಈ ಸ್ತ್ರೀಗೆ ಅತ್ಯಂತ ದೀನತೆಯಿಂದಲೂ ವಿಶ್ವಾಸದಿಂದಲೂ ಪ್ರತಿಕ್ರಿಯಿಸಲು ಅವಕಾಶ ನೀಡುತ್ತದೆ. ಮೇಜಿನಿಂದ ತಿನ್ನುವ ನಾಯಿಗೆ ತನ್ನನ್ನು ಹೋಲಿಸಿದ್ದನ್ನು ಅವಳು ನಿರಾಕರಿಸದಿರುವುದರಲ್ಲಿ ಅವಳ ದೀನತೆ ಕಾಣುತ್ತದೆ. ಬದಲಾಗಿ, ನಾಯಿಗಳು ಸಹ ಚೂರುಗಳನ್ನು ತಿನ್ನುತ್ತವೆ ಎಂದು ಅವಳು ದೀನತೆಯಿಂದ ಸೂಚಿಸುತ್ತಾಳೆ. ಅಬ್ಬಾ, ಎಂಥ ದೀನತೆ! ವಾಸ್ತವವಾಗಿ, ಯೇಸು ಅವಳೊಂದಿಗೆ ಸ್ವಲ್ಪ ಅವಮಾನಕರವೆನಿಸುವ ಈ ರೀತಿಯಲ್ಲಿ ಮಾತನಾಡಿದ್ದು, ಅವಳು ಎಷ್ಟು ದೀನಳಾಗಿದ್ದಳು ಎಂಬುದು ಅವರಿಗೆ ತಿಳಿದಿದ್ದರಿಂದಲೇ ಎಂದು ನಾವು ಖಚಿತವಾಗಿ ಹೇಳಬಹುದು. ತನ್ನ ವಿಶ್ವಾಸವನ್ನು ವ್ಯಕ್ತಪಡಿಸುವಂತೆ ತನ್ನ ದೀನತೆ ಬೆಳಗಲು ಅವಕಾಶ ನೀಡುವ ಮೂಲಕ ಅವಳು ಪ್ರತಿಕ್ರಿಯಿಸುವಳೆಂಬುದೂ ಅವರಿಗೆ ತಿಳಿದಿತ್ತು. ತನ್ನ ಅಯೋಗ್ಯತೆಯ ಬಗ್ಗೆ ದೀನಗೊಳಿಸುವ ಸತ್ಯವನ್ನು ಕೇಳಿ ಅವಳು ನೊಂದುಕೊಳ್ಳಲಿಲ್ಲ; ಬದಲಾಗಿ, ಅದನ್ನು ಸ್ವೀಕರಿಸಿದಳು ಮತ್ತು ತನ್ನ ಅಯೋಗ್ಯತೆಯ ಹೊರತಾಗಿಯೂ ದೇವರ ಅಪಾರ ಕರುಣೆಯನ್ನು ಬೇಡಿದಳು.
ದೀನತೆಗೆ ವಿಶ್ವಾಸವನ್ನು ಚಿಗುರಿಸುವ ಸಾಮರ್ಥ್ಯವಿದೆ; ವಿಶ್ವಾಸವು ದೇವರ ಕರುಣೆ ಮತ್ತು ಶಕ್ತಿಯು ಹರಿದುಬರುವಂತೆ ಮಾಡುತ್ತದೆ. ಕೊನೆಯಲ್ಲಿ, ಯೇಸು ಎಲ್ಲರಿಗೂ ಕೇಳಿಸುವಂತೆ, “ಓ ಸ್ತ್ರೀಯೇ, ನಿನ್ನ ವಿಶ್ವಾಸ ದೊಡ್ಡದು!” ಎನ್ನುತ್ತಾರೆ. ಅವಳ ವಿಶ್ವಾಸವು ಪ್ರಕಟವಾಯಿತು; ಆ ದೀನ ವಿಶ್ವಾಸಕ್ಕಾಗಿ ಅವಳನ್ನು ಗೌರವಿಸುವ ಅವಕಾಶವನ್ನು ಯೇಸು ಬಳಸಿಕೊಂಡರು.
ಇಂದು, ದೇವರ ಮುಂದೆ ನಿಮ್ಮ ಸ್ವಂತ ದೀನತೆಯ ಬಗ್ಗೆ ಚಿಂತಿಸಿ. ಯೇಸು ನಿಮ್ಮೊಂದಿಗೆ ಈ ರೀತಿ ಮಾತನಾಡಿದ್ದರೆ ನೀವು ಹೇಗೆ ಪ್ರತಿಕ್ರಿಯಿಸುತ್ತಿದ್ದಿರಿ? ನಿಮ್ಮ ಅಯೋಗ್ಯತೆಯನ್ನು ಒಪ್ಪಿಕೊಳ್ಳುವಷ್ಟು ದೀನತೆ ನಿಮ್ಮಲ್ಲಿರುತ್ತಿತ್ತೇ? ಹಾಗಿದ್ದರೆ, ನಿಮ್ಮ ಅಯೋಗ್ಯತೆಯ ಹೊರತಾಗಿಯೂ ದೇವರ ಕರುಣೆಗಾಗಿ ಮೊರೆಯಿಡುವಷ್ಟು ವಿಶ್ವಾಸವೂ ನಿಮ್ಮಲ್ಲಿರುತ್ತಿತ್ತೇ? ಈ ಅದ್ಭುತ ಗುಣಗಳು (ದೀನತೆ ಮತ್ತು ವಿಶ್ವಾಸ) ಜೊತೆಜೊತೆಯಾಗಿ ಸಾಗುತ್ತವೆ ಮತ್ತು ದೇವರ ಕರುಣೆಯು ಹರಿದುಬರುವಂತೆ ಮಾಡುತ್ತವೆ!
ಪರಮ ಕರುಣಾಮಯನಾದ ನನ್ನ ಪ್ರಭುವೇ, ನಾನು ಅಯೋಗ್ಯನು. ಇದನ್ನು ಅರಿತುಕೊಳ್ಳಲು ನನಗೆ ಸಹಾಯಮಾಡಿ. ನನ್ನ ಜೀವನದಲ್ಲಿ ನಿಮ್ಮ ಅನುಗ್ರಹವನ್ನು ಪಡೆಯಲು ನಾನು ಅರ್ಹನಲ್ಲ ಎಂಬುದನ್ನು ಅರಿತುಕೊಳ್ಳಲು ನನಗೆ ಸಹಾಯಮಾಡಿ. ಆದರೆ ಈ ಸತ್ಯವನ್ನು ವಿನಮ್ರತೆಯಿಂದ ಒಪ್ಪಿಕೊಳ್ಳುತ್ತಾ, ನಿಮ್ಮ ಅಪಾರ ಕರುಣೆಯನ್ನೂ ನಾನು ಅರಿತುಕೊಳ್ಳುವಂತಾಗಲಿ; ಕರುಣೆಗಾಗಿ ನಿಮ್ಮನ್ನು ಕರೆಯಲು ಎಂದಿಗೂ ಭಯಪಡದಿರಲಿ. ಯೇಸುವೇ, ನಾನು ನಿಮ್ಮಲ್ಲಿ ಭರವಸೆಯಿಡುತ್ತೇನೆ.
ಸಾಧಾರಣ ಕಾಲ: 18-34ನೇ ವಾರಗಳು
