ಅಕ್ಟೋಬರ್ 9, 2022
ಸಾಮಾನ್ಯ ಕಾಲದ ಇಪ್ಪತ್ತೆಂಟನೆಯ ಭಾನುವಾರ (ವರ್ಷ C)
ಇಂದಿನ ವಾಚನಗಳು
“ಶುದ್ಧರಾದವರು ಹತ್ತು ಮಂದಿ ಅಲ್ಲವೇ? ಉಳಿದ ಒಂಬತ್ತು ಮಂದಿ ಎಲ್ಲಿ? ದೇವರಿಗೆ ಕೃತಜ್ಞತೆ ಸಲ್ಲಿಸಲು ಈ ಪರದೇಶಿಯ ಹೊರತು ಬೇರೆ ಯಾರೂ ಹಿಂತಿರುಗಿ ಬರಲಿಲ್ಲವೇ?” ಲೂಕ 17:17-18
ಯೇಸು ಹತ್ತು ಮಂದಿ ಕುಷ್ಠರೋಗಿಗಳನ್ನು ಗುಣಪಡಿಸಿದ ಬಳಿಕ, ಅವರಲ್ಲಿ ಪರದೇಶಿಯಾಗಿದ್ದ ಒಬ್ಬನು ಮಾತ್ರ ಅವರಿಗೆ ಕೃತಜ್ಞತೆ ಸಲ್ಲಿಸಲು ಹಿಂತಿರುಗಿ ಬಂದಾಗ ಈ ಮಾತುಗಳನ್ನು ಹೇಳಿದರು. ಹತ್ತು ಮಂದಿಯೂ ದೈಹಿಕವಾಗಿ ತಮ್ಮ ಕುಷ್ಠರೋಗದಿಂದ ಗುಣಮುಖರಾದರು, ಆದರೆ ಒಬ್ಬನು ಮಾತ್ರ ಇನ್ನೂ ಹೆಚ್ಚು ಆಳವಾದ ಸ್ವಸ್ಥತೆಯನ್ನು ಪಡೆದನು. ಅವನು ಕೃತಜ್ಞ ಹೃದಯದಿಂದ ಯೇಸುವಿನ ಬಳಿಗೆ ಹಿಂತಿರುಗಿ ಬಂದಾಗ, ಯೇಸು ಆ ಕುಷ್ಠರೋಗಿಗೆ, “ಎದ್ದು ಹೋಗು; ನಿನ್ನ ವಿಶ್ವಾಸವು ನಿನ್ನನ್ನು ರಕ್ಷಿಸಿದೆ” ಎಂದು ಹೇಳಿದರು (ಲೂಕ 17:19).
ಕೃತಜ್ಞ ಹೃದಯದಿಂದ ಹಿಂದಿರುಗಿದ ಈ ಒಬ್ಬ ಕುಷ್ಠರೋಗಿ ಮಾತ್ರ ನಮ್ಮ ಪ್ರಭು ಹೇಳಿದ ಈ ಮಾತುಗಳನ್ನು ಕೇಳಿದನು: “ನಿನ್ನ ವಿಶ್ವಾಸವು ನಿನ್ನನ್ನು ರಕ್ಷಿಸಿದೆ.” ದೇವರಿಗೆ ಕೃತಜ್ಞತೆ ಸಲ್ಲಿಸುವುದು ನಮ್ಮ ಕರ್ತವ್ಯ ಮಾತ್ರವಲ್ಲ, ಅದು ನಮ್ಮ ಜೀವನದಲ್ಲಿ ಸ್ಪಷ್ಟವಾದ ಆಶೀರ್ವಾದಗಳನ್ನೂ ತರುತ್ತದೆ ಎಂಬುದನ್ನು ಇದು ತೋರಿಸುತ್ತದೆ. ದೇವರು ಮಾಡಿರುವ ಎಲ್ಲದಕ್ಕೂ ನಾವು ಪ್ರಾಮಾಣಿಕವಾಗಿ ಕೃತಜ್ಞತೆ ಸಲ್ಲಿಸುವಾಗ, ಅದರ ಮೂಲಕ ದೇವರಲ್ಲಿರುವ ನಮ್ಮ ಮಹಾ ವಿಶ್ವಾಸವನ್ನು ವ್ಯಕ್ತಪಡಿಸುತ್ತೇವೆ. ನಮ್ಮ ಆಶೀರ್ವಾದಗಳ ಮೂಲ ದೇವರು ಮತ್ತು ಅವರ ಒಳ್ಳೆಯತನವೇ ಎಂದು ನಾವು ತೋರಿಸುತ್ತೇವೆ; ಇದನ್ನು ಕಂಡುಕೊಳ್ಳಲು ಮತ್ತು ಬಹಿರಂಗವಾಗಿ ಒಪ್ಪಿಕೊಳ್ಳಲು ವಿಶ್ವಾಸ ಬೇಕು.
ನಿಮ್ಮ ಜೀವನದಲ್ಲಿ ಯಾವ ವಿಷಯಕ್ಕಾಗಿ ನೀವು ಇನ್ನಷ್ಟು ಕೃತಜ್ಞರಾಗಬೇಕಾಗಿದೆ? ಯಾವುದನ್ನು ನೀವು ಸಹಜವಾಗಿಯೇ ಸಿಗುವಂಥದ್ದೆಂದು ಭಾವಿಸಿ, ಅದಕ್ಕಾಗಿ ದೇವರ ಬಳಿಗೆ ಹಿಂದಿರುಗಿ ಯೋಗ್ಯವಾಗಿ ಕೃತಜ್ಞತೆ ಸಲ್ಲಿಸಲು ತಪ್ಪಿದ್ದೀರಿ? ಜೀವನದಲ್ಲಿರುವ ಪ್ರತಿಯೊಂದೂ ಒಂದು ಕೊಡುಗೆ ಎಂಬುದೇ ಸತ್ಯ. ಎಲ್ಲವೂ ಕೊಡುಗೆಯೇ. ನೀವು ಸಹಿಸಿಕೊಳ್ಳುವ ಹೋರಾಟಗಳೂ ಆಶೀರ್ವಾದಗಳಾಗಿ ಪರಿವರ್ತನೆಯಾಗಬಹುದು. ನಿಜವಾಗಿ, ಈ ಘಟನೆಯಲ್ಲಿ ಆದದ್ದೂ ಅದೇ. ಕುಷ್ಠರೋಗದ ಭೀಕರ ಯಾತನೆಯು ದೇವರಿಂದ ಬಂದ ಅನುಗ್ರಹವಾಗಿ ಪರಿವರ್ತನೆಯಾಯಿತು.
ದೇವರು ನಿಮಗಾಗಿ ಮಾಡಿರುವ ಎಲ್ಲದರ ಕುರಿತು ಇಂದು ಮನನ ಮಾಡಿ. ದೇವರು ನಿಮ್ಮ ಜೀವನವನ್ನು ಅನುಗ್ರಹಿಸುವ ಅಸಂಖ್ಯಾತ ರೀತಿಗಳನ್ನೆಲ್ಲ ನೀವು ಅರಿತುಕೊಳ್ಳುವಂತೆ ಪ್ರಾರ್ಥಿಸಿ. ಅವುಗಳನ್ನು ಗುರುತಿಸಿದಾಗ, ಆ ಆಶೀರ್ವಾದಗಳನ್ನು ಮನನ ಮಾಡಿ, ಅವುಗಳನ್ನು ಎಣಿಸಿ ಮತ್ತು ಅವುಗಳಿಗಾಗಿ ಕೃತಜ್ಞರಾಗಿರಿ. ಆ ಕೃತಜ್ಞತೆಯಿಂದ, ದೇವರಿಗೆ ಸಂತೋಷದಿಂದ ಧನ್ಯವಾದ ಸಲ್ಲಿಸಿ. ಆ ಕ್ರಿಯೆಯಲ್ಲಿ ನಿಮ್ಮ ವಿಶ್ವಾಸವು ನಿಮ್ಮನ್ನೂ ರಕ್ಷಿಸುತ್ತದೆ.
ಪ್ರಭುವೇ, ನನ್ನ ಜೀವನದುದ್ದಕ್ಕೂ ನೀವು ನನಗೆ ದಯಪಾಲಿಸಿದ ಅಸಂಖ್ಯಾತ ಆಶೀರ್ವಾದಗಳಿಗಾಗಿ ನಿಮಗೆ ಮನಃಪೂರ್ವಕವಾಗಿ ಕೃತಜ್ಞತೆ ಸಲ್ಲಿಸುತ್ತೇನೆ. ನೀವು ನನಗೆ ಅನುಗ್ರಹವನ್ನು ನೀಡಿ, ನನ್ನನ್ನು ಮುನ್ನಡೆಸಿ, ಗುಣಪಡಿಸಿದ ಎಲ್ಲ ರೀತಿಗಳಿಗಾಗಿ ನಿಮಗೆ ಕೃತಜ್ಞತೆ ಸಲ್ಲಿಸುತ್ತೇನೆ. ನೀವು ನನಗಾಗಿ ಮಾಡಿರುವ ಮತ್ತು ಇನ್ನೂ ಮಾಡುತ್ತಿರುವ ಎಲ್ಲವನ್ನೂ ಸ್ಪಷ್ಟವಾಗಿ ಕಾಣಲು ನನಗೆ ಸಹಾಯಮಾಡಿ. ಈ ಆಶೀರ್ವಾದಗಳನ್ನು ನಾನು ಕಂಡುಕೊಳ್ಳುವಾಗ, ಪ್ರತಿದಿನ ವಿಶ್ವಾಸದಿಂದ ನನ್ನ ಕೃತಜ್ಞತೆಯನ್ನು ವ್ಯಕ್ತಪಡಿಸಲು ನನಗೆ ಸಹಾಯಮಾಡಿ. ಯೇಸುವೇ, ನಾನು ನಿಮ್ಮಲ್ಲಿ ಭರವಸೆಯಿಡುತ್ತೇನೆ.
ಹೊಸದು!
ದೇವರತ್ತ ಅಂತರಂಗದ ಪಯಣ:
ಅವಿಲಾದ ಸಂತ ತೆರೇಸಾರ ಚಿಂತನೆಗಳು
ಇಂದಿನ ಸಂತರು –
ಸಂತ ಜಾನ್ ಹೆನ್ರಿ ನ್ಯೂಮನ್ (ಇಂಗ್ಲೆಂಡ್ ಮತ್ತು ವೇಲ್ಸ್‌ನಲ್ಲಿ ಸ್ಮರಣೆ)
ಸಂತ ಡೆನಿಸ್, ಧರ್ಮಾಧ್ಯಕ್ಷರು ಮತ್ತು ಅವರ ಸಂಗಡಿಗರು, ರಕ್ತಸಾಕ್ಷಿಗಳು
ಈ ವರ್ಷ ಸ್ಮರಣೆಯ ದಿನವು ಭಾನುವಾರದಂದು ಬರುವುದರಿಂದ ಆರಾಧನಾ ಸ್ಮರಣೆಯನ್ನು ಆಚರಿಸದ ಸಂತರು
