2019 ഒക്ടോബർ 18, വെള്ളിയാഴ്ച
സുവിശേഷകനായ വിശുദ്ധ ലൂക്കായുടെ തിരുനാൾ
“വിളവു സമൃദ്ധമാണ്, എന്നാൽ വേലക്കാർ കുറവാണ്; അതിനാൽ തന്റെ വിളവെടുപ്പിനു വേലക്കാരെ അയയ്ക്കാൻ വിളവിന്റെ നാഥനോടു പ്രാർത്ഥിക്കുവിൻ. നിങ്ങൾ പുറപ്പെടുവിൻ; ഇതാ, ചെന്നായ്ക്കളുടെ ഇടയിലേക്കു കുഞ്ഞാടുകളെപ്പോലെ ഞാൻ നിങ്ങളെ അയയ്ക്കുന്നു.” ലൂക്കാ 10:2-3
ഇന്ന് നാം സുവിശേഷകനായ വിശുദ്ധ ലൂക്കായെ ആദരിക്കുന്നു. നാലു സുവിശേഷങ്ങളിൽ ഒന്ന് വിശുദ്ധ ലൂക്കാ രചിച്ചു. വിശുദ്ധ പൗലോസിന്റെ സഹചാരിയും അദ്ദേഹത്തിന് ഏറെ പ്രിയപ്പെട്ടവനുമായിരുന്ന ലൂക്കാ, സുവിശേഷം പ്രസംഗിച്ചുകൊണ്ട് ദൂരദേശങ്ങളിലെല്ലാം സഞ്ചരിക്കുകയും ഒടുവിൽ രക്തസാക്ഷിയായി ജീവൻ അർപ്പിക്കുകയും ചെയ്തു. ആദ്യം അദ്ദേഹം രണ്ടു വർഷം തടവിലാക്കപ്പെട്ടു. മോചിതനായശേഷം പ്രേഷിതപ്രവർത്തനങ്ങൾ തുടരുന്നതിനിടയിൽ അക്കായയ്ക്കു സമീപം അദ്ദേഹം കുരിശിലേറ്റപ്പെട്ടതായി പറയപ്പെടുന്നു.
ഉന്നതമായ സംസ്കാരത്തിനും വിജ്ഞാനത്തിനും പേരുകേട്ട അന്ത്യോക്യ നഗരമായിരുന്നു വിശുദ്ധ ലൂക്കായുടെ സ്വദേശം. വൈദ്യനായിരുന്ന അദ്ദേഹം മികച്ച വിദ്യാഭ്യാസവും സമൂഹത്തിൽ ഉയർന്ന സ്ഥാനവും ഉള്ള വ്യക്തിയായിരുന്നു. ശാരീരികമായി രക്തസാക്ഷിത്വം വരിക്കുന്നതിനുമുമ്പുതന്നെ മറ്റൊരു രൂപത്തിലുള്ള രക്തസാക്ഷിത്വത്തിലൂടെ അദ്ദേഹം കടന്നുപോയിരുന്നുവെന്ന് അദ്ദേഹത്തിന്റെ സാമൂഹികനിലയും വിദ്യാഭ്യാസവും വ്യക്തമാക്കുന്നു. സാമൂഹിക പ്രശസ്തിക്കും അന്തസ്സിനും ഉപരിയായി ക്രിസ്തുവിനെ തിരഞ്ഞെടുക്കുക എന്നതായിരുന്നു അദ്ദേഹം അനുഭവിച്ച ആ രക്തസാക്ഷിത്വം.
സുവിശേഷത്തെ അഭിമുഖീകരിച്ചപ്പോൾ, ക്രിസ്തു തനിക്കു നൽകിയ ദൗത്യത്തെ അന്ത്യോക്യയിലെ സുഖപ്രദമായ ജീവിതത്തിനു തടസ്സമാകുന്ന ഒന്നായി വിശുദ്ധ ലൂക്കായ്ക്ക് എളുപ്പത്തിൽ കാണാമായിരുന്നു. നമ്മുടെ കർത്താവിനെ അനുഗമിക്കാൻ തീരുമാനിക്കുന്നതും സുവിശേഷം പ്രസംഗിക്കാൻ അയയ്ക്കപ്പെടാനുള്ള ക്ഷണം സ്വീകരിക്കുന്നതും ഏറെ ത്യാഗം ആവശ്യപ്പെടുന്നുവെന്ന് അദ്ദേഹം വേഗം മനസ്സിലാക്കിയിരിക്കണം. എങ്കിലും, നമ്മുടെ കർത്താവ് തനിക്കു നൽകിയ ദൗത്യം നിറവേറ്റാനായി എല്ലാം ഉപേക്ഷിക്കാൻ അദ്ദേഹം തീരുമാനിച്ചു. ദൈവം വിശുദ്ധ ലൂക്കായെ പലവിധത്തിൽ ഉപയോഗിച്ചു. പ്രത്യേകിച്ച്, ദൈവവചനം എഴുതാൻ പരിശുദ്ധാത്മാവ് അദ്ദേഹത്തെ പ്രചോദിപ്പിച്ചപ്പോൾ, അദ്ദേഹത്തിന്റെ വിദ്യാഭ്യാസത്തെ അതിനുള്ള ഒരു ഉപകരണമായി ഉപയോഗിച്ചു.
വിശുദ്ധ ലൂക്കായെപ്പോലെ, ഒരു മടിയും കൂടാതെ ദൈവത്തെ അനുഗമിക്കാനും സുവിശേഷപ്രഘോഷണത്തിന്റെ സവിശേഷമായ ഒരു ദൗത്യത്തിനായി അയയ്ക്കപ്പെടാനും നാമെല്ലാവരും ദൈവത്താൽ വിളിക്കപ്പെട്ടിരിക്കുന്നു. ഓരോ വിളിയും വ്യത്യസ്തമാണ്; എന്നാൽ ഓരോ വിളിയിലും സമ്പൂർണ്ണമായും അചഞ്ചലമായും ഉറച്ചുനിൽക്കണം. ക്രിസ്തുവിന് തന്റെ ഇഷ്ടമനുസരിച്ച് നമ്മെ ഉപയോഗിക്കാനാകേണ്ടതിന് നമ്മുടെ കഴിവുകളും ഇഷ്ടങ്ങളും ഭാവിയും നമ്മുടെ ജീവൻതന്നെയും അവിടുത്തേക്ക് സമർപ്പിക്കണം. യേശുവിനെ അനുഗമിക്കുന്നതിന് ഏതെങ്കിലും രൂപത്തിലുള്ള രക്തസാക്ഷിത്വം എപ്പോഴും ആവശ്യമായി വരും. എന്നാൽ നാം സ്വീകരിക്കാൻ വിളിക്കപ്പെടുന്ന രക്തസാക്ഷിത്വം ഏതു രൂപത്തിലുള്ളതായാലും, അത് സ്വർഗ്ഗരാജ്യത്തിനായി ധാരാളം നല്ല ഫലങ്ങൾ പുറപ്പെടുവിക്കും.
ബുദ്ധിമാനും പ്രതിഭാശാലിയുമായ നമ്മുടെ കർത്താവിന്റെ ഈ ശിഷ്യനെക്കുറിച്ച് ഇന്ന് ധ്യാനിക്കുക. സുവിശേഷത്തിലൂടെ വിശുദ്ധ ലൂക്കാ നമുക്കു നൽകിയ ദാനത്തിൽ ആനന്ദിക്കുക. അതോടൊപ്പം, ഈ ശിഷ്യനെപ്പോലെ അതേ അളവിൽ നമ്മുടെ കർത്താവിനെ അനുഗമിക്കാൻ സ്വയം സമർപ്പിക്കുകയും ചെയ്യുക. വിശുദ്ധ ലൂക്കായെപ്പോലെ നിങ്ങളും സുവിശേഷദൗത്യത്തിനായി എല്ലാം ഉപേക്ഷിക്കാൻ വിളിക്കപ്പെടുന്നു. “അതെ” എന്നു പറയാൻ മടിക്കരുത്.
കർത്താവേ, മഹാനായ ഈ സുവിശേഷകനായ വിശുദ്ധ ലൂക്കായെ ഞങ്ങൾ ആദരിക്കുമ്പോൾ, സുവിശേഷത്തോടുള്ള അദ്ദേഹത്തിന്റെ പൂർണ്ണഹൃദയത്തോടെയുള്ള സമർപ്പണം അനുകരിക്കാൻ എന്നെ സഹായിക്കണമേ. പ്രിയ കർത്താവേ, അങ്ങയുടെ വിശുദ്ധ വചനത്തിന്റെ ഉപകരണമായി എന്നെ ഉപയോഗിക്കണമേ. യാതൊരു മടിയും കൂടാതെ എന്റെ ജീവൻ സമർപ്പിക്കാൻ എനിക്ക് ധൈര്യം നൽകണമേ. ഈശോയേ, ഞാൻ അങ്ങയിൽ ശരണപ്പെടുന്നു.
ദൈവകരുണയെക്കുറിച്ചുള്ള വിചിന്തനങ്ങൾ
കൂടുതൽ വായനയ്ക്ക് – സുവിശേഷകനായ വിശുദ്ധ ലൂക്കാ
