2020 മാർച്ച് 23
നോമ്പുകാലം നാലാം വാരത്തിലെ തിങ്കളാഴ്ച
ഇന്നത്തെ വായനകൾ
മൊഗ്രോവേഹോയിലെ വിശുദ്ധ തുരീബിയൂസ്, മെത്രാൻ—ഐച്ഛിക അനുസ്മരണം
യേശു അയാളോടു പറഞ്ഞു: “അടയാളങ്ങളും അത്ഭുതങ്ങളും കണ്ടാലല്ലാതെ നിങ്ങൾ വിശ്വസിക്കുകയില്ല.” രാജസേവകൻ യേശുവിനോടു പറഞ്ഞു: “പ്രഭോ, എന്റെ കുഞ്ഞു മരിക്കുന്നതിനുമുമ്പ് വരണമേ.” യേശു അയാളോടു പറഞ്ഞു: “പൊയ്ക്കൊള്ളുക; നിന്റെ മകൻ ജീവിക്കും.” യോഹന്നാൻ 4:48–50
തീർച്ചയായും ആ കുഞ്ഞ് ജീവിക്കുന്നു. വീട്ടിലേക്കു മടങ്ങിയെത്തുമ്പോൾ തന്റെ കുഞ്ഞ് സുഖം പ്രാപിച്ചിരിക്കുന്നതു കണ്ട് ആ രാജസേവകൻ അത്യധികം സന്തോഷിക്കുന്നു. അവൻ സുഖം പ്രാപിക്കുമെന്ന് യേശു പറഞ്ഞ അതേ സമയത്തുതന്നെയാണ് ഈ രോഗശാന്തി സംഭവിച്ചത്.
ഈ വചനഭാഗത്തിൽ ശ്രദ്ധിക്കേണ്ട കൗതുകകരമായ ഒരു കാര്യം യേശുവിന്റെ വാക്കുകളിലെ വൈരുധ്യമാണ്. “അടയാളങ്ങളും അത്ഭുതങ്ങളും കണ്ടാലല്ലാതെ നിങ്ങൾ വിശ്വസിക്കുകയില്ല” എന്നു പറയുമ്പോൾ, യേശു കോപിച്ചിരിക്കുന്നതുപോലെയാണ് ആദ്യം തോന്നുക. എന്നാൽ ഉടനെതന്നെ, “നിന്റെ മകൻ ജീവിക്കും” എന്ന് ആ മനുഷ്യനോടു പറഞ്ഞുകൊണ്ട് യേശു ബാലനെ സുഖപ്പെടുത്തുന്നു. യേശുവിന്റെ വാക്കുകളും പ്രവൃത്തിയും തമ്മിൽ പ്രത്യക്ഷത്തിൽ കാണുന്ന ഈ വൈരുധ്യം എന്തുകൊണ്ടാണ്?
യേശുവിന്റെ ആദ്യവാക്കുകൾ ഒരു വിമർശനം എന്നതിലുപരി, സത്യം വെളിപ്പെടുത്തുന്ന വാക്കുകൾ മാത്രമാണെന്നു നാം ശ്രദ്ധിക്കണം. അനേകർക്കു വിശ്വാസമില്ലെന്നോ, കുറഞ്ഞപക്ഷം അവരുടെ വിശ്വാസം ദുർബലമാണെന്നോ ഉള്ള വസ്തുത യേശുവിന് അറിയാം. വിശ്വാസത്തിലേക്കു വരാൻ ആളുകളെ സഹായിക്കുന്നതിന് “അടയാളങ്ങളും അത്ഭുതങ്ങളും” ചിലപ്പോഴൊക്കെ പ്രയോജനപ്പെടുമെന്ന കാര്യവും യേശുവിന് അറിയാം. “അടയാളങ്ങളും അത്ഭുതങ്ങളും” കാണണമെന്ന ഈ ആവശ്യം ഉത്തമമായ വിശ്വാസനിലയിൽനിന്ന് ഏറെ അകലെയാണെങ്കിലും, യേശു ആ ആവശ്യത്തെ കണക്കിലെടുത്തു പ്രവർത്തിക്കുന്നു. അത്ഭുതത്തിനായുള്ള ഈ ആഗ്രഹത്തെ വിശ്വാസം പകർന്നുനൽകാനുള്ള ഒരു മാർഗമായി യേശു ഉപയോഗിക്കുന്നു.
മനസ്സിലാക്കേണ്ട പ്രധാന കാര്യം ഇതാണ്: ശാരീരികമായ രോഗശാന്തി വലിയ സ്നേഹത്തിന്റെ ഒരു പ്രവൃത്തിയായിരുന്നെങ്കിലും, അതായിരുന്നില്ല യേശുവിന്റെ ആത്യന്തിക ലക്ഷ്യം. മറിച്ച്, മകന്റെ രോഗശാന്തി എന്ന ദാനം നൽകിക്കൊണ്ട് ഈ പിതാവിന്റെ വിശ്വാസം വർധിപ്പിക്കുക എന്നതായിരുന്നു യേശുവിന്റെ ആത്യന്തിക ലക്ഷ്യം. ഇതു മനസ്സിലാക്കേണ്ടതു പ്രധാനമാണ്. കാരണം, ജീവിതത്തിൽ നമ്മുടെ കർത്താവിൽനിന്നു നമുക്കു ലഭിക്കുന്ന എല്ലാ അനുഭവങ്ങളുടെയും ലക്ഷ്യം നമ്മുടെ വിശ്വാസത്തെ ആഴപ്പെടുത്തുക എന്നതായിരിക്കും. ചിലപ്പോൾ അത് “അടയാളങ്ങളുടെയും അത്ഭുതങ്ങളുടെയും” രൂപം സ്വീകരിക്കുന്നു. മറ്റു ചിലപ്പോൾ, ദൃശ്യമായ ഒരടയാളമോ അത്ഭുതമോ ഇല്ലാതെതന്നെ, പരീക്ഷണത്തിന്റെ നടുവിൽ നമ്മെ താങ്ങിനിർത്തുന്ന കർത്താവിന്റെ സാന്നിധ്യമായിരിക്കാം അത്. നാം പരിശ്രമിച്ചു നേടേണ്ട ലക്ഷ്യം വിശ്വാസമാണ്. നമ്മുടെ ജീവിതത്തിൽ കർത്താവ് ചെയ്യുന്ന എന്തും നമ്മുടെ വിശ്വാസത്തിന്റെ വളർച്ചയ്ക്ക് ഉറവിടമായിത്തീരാൻ അനുവദിച്ചുകൊണ്ടാണ് നാം ഈ ലക്ഷ്യത്തിനായി പരിശ്രമിക്കേണ്ടത്.
ഇന്ന്, നിങ്ങളുടെ വിശ്വാസവും ആശ്രയബോധവും എത്രത്തോളമുണ്ടെന്ന് വിചിന്തനം ചെയ്യുക. നിങ്ങളുടെ ജീവിതത്തിലെ ദൈവത്തിന്റെ പ്രവൃത്തികൾ കൂടുതൽ വിശ്വാസം ഉളവാക്കുന്നതിനായി, ആ പ്രവൃത്തികളെ തിരിച്ചറിയാൻ പരിശ്രമിക്കുക. ദൈവത്തെ മുറുകെപ്പിടിക്കുക; അവിടുന്നു നിങ്ങളെ സ്നേഹിക്കുന്നുവെന്നു വിശ്വസിക്കുക; നിങ്ങൾക്ക് ആവശ്യമായ ഉത്തരം അവിടുത്തെ പക്കലുണ്ടെന്ന് അറിയുക; എല്ലാ കാര്യങ്ങളിലും അവിടുത്തെ അന്വേഷിക്കുക. അവിടുന്ന് ഒരിക്കലും നിങ്ങളെ കൈവിടുകയില്ല.
കർത്താവേ, എന്റെ വിശ്വാസം വർധിപ്പിക്കണമേ. എന്റെ ജീവിതത്തിൽ അങ്ങ് പ്രവർത്തിക്കുന്നതു കാണാനും എല്ലാ കാര്യങ്ങളിലും അങ്ങയുടെ പരിപൂർണമായ സ്നേഹം കണ്ടെത്താനും എന്നെ സഹായിക്കണമേ. എന്റെ ജീവിതത്തിൽ അങ്ങ് പ്രവർത്തിക്കുന്നതു കാണുമ്പോൾ, അങ്ങയുടെ പരിപൂർണമായ സ്നേഹത്തെ കൂടുതൽ ഉറപ്പോടെ അറിയാൻ എന്നെ സഹായിക്കണമേ. ഈശോയേ, ഞാൻ അങ്ങയിൽ ശരണപ്പെടുന്നു.
കുരിശിൻ ചുവട്ടിൽ 40 ദിനങ്ങൾ – ഇരുപത്തിയാറാം വിചിന്തനം – വിശുദ്ധ സ്ത്രീകളും വെറോനിക്കയും
കൊറോണവൈറസ് മഹാമാരിയെ നേരിടാനുള്ള പ്രാർഥനകളും ഓൺലൈൻ വിശുദ്ധ കുർബാനയും
ദൈവകരുണയെക്കുറിച്ചുള്ള വിചിന്തനങ്ങൾ
വിശുദ്ധ കുർബാനയിലെ വായനകൾക്കുള്ള തിരഞ്ഞെടുപ്പുകൾ
