സത്യത്തിന്റെ ആത്മാവ്

2020 മേയ് 20
ഉയിർപ്പുകാലത്തിലെ ആറാം ആഴ്ചയിലെ ബുധനാഴ്ച
ഇന്നത്തെ വായനകൾ

സിയേനയിലെ വിശുദ്ധ ബെർണാർദിൻ, പുരോഹിതൻ—ഐച്ഛിക അനുസ്മരണം

യേശു തന്റെ ശിഷ്യന്മാരോടു പറഞ്ഞു: “എനിക്ക് ഇനിയും വളരെ കാര്യങ്ങൾ നിങ്ങളോടു പറയാനുണ്ട്. എന്നാൽ ഇപ്പോൾ അവ താങ്ങാൻ നിങ്ങൾക്കു കഴിയില്ല. എന്നാൽ സത്യത്തിന്റെ ആത്മാവ് വരുമ്പോൾ അവിടുന്ന് നിങ്ങളെ സമ്പൂർണ സത്യത്തിലേക്കു നയിക്കും.”  യോഹന്നാൻ 16:12–13

പന്തക്കുസ്തായുടെ മഹനീയമായ തിരുനാളിനോട് അടുത്തുവരുമ്പോൾ, നാം പരിശുദ്ധാത്മാവിൽ ശ്രദ്ധ കേന്ദ്രീകരിക്കുന്നത് തുടരുന്നു.  ഈ വചനഭാഗം പരിശുദ്ധാത്മാവിനെ പ്രത്യേകമായി “സത്യത്തിന്റെ ആത്മാവ്” എന്നു ചൂണ്ടിക്കാണിക്കുന്നു.

ഈ വിശേഷണത്തിലൂടെ യേശു പരിശുദ്ധാത്മാവിനെ പരിചയപ്പെടുത്തുന്ന വിധം ശ്രദ്ധേയമാണ്.  തനിക്ക് ഇനിയും വളരെ കാര്യങ്ങൾ അവരോടു പറയാനുണ്ടെന്നും എന്നാൽ ഇപ്പോൾ അവ താങ്ങാൻ അവർക്കു കഴിയില്ലെന്നും അവിടുന്ന് വിശദീകരിക്കുന്നു.  മറ്റൊരു വിധത്തിൽ പറഞ്ഞാൽ, പരിശുദ്ധാത്മാവ് അവരുടെ ഉള്ളിൽ സജീവമായി വസിച്ച് അവരെ പഠിപ്പിക്കുന്നില്ലെങ്കിൽ, “സത്യം” അവർക്കു താങ്ങാവുന്നതിലും അപ്പുറമാണ്.  ധ്യാനിക്കേണ്ട അത്ഭുതകരമായ രണ്ടു ഉൾക്കാഴ്ചകൾ ഇതു നമുക്കു നൽകുന്നു.

ഒന്നാമതായി, പരിശുദ്ധാത്മാവിന്റെ ശക്തിക്കും സാന്നിധ്യത്തിനുമായി നമ്മുടെ ജീവിതം യഥാർഥത്തിൽ തുറന്നുകൊടുത്തിട്ടില്ലെങ്കിൽ, സത്യം താങ്ങാൻ നമുക്കു കഴിയില്ലെന്ന് ഉറപ്പിക്കാം.  പരിശുദ്ധാത്മാവ് നമ്മിൽ സജീവമായി വസിക്കുന്നില്ലെങ്കിൽ, ദൈവത്തിന്റെ അഗാധമായ സത്യങ്ങൾ മനസ്സിലാക്കാനോ അവയിൽ വിശ്വസിക്കാനോ നമുക്കു കഴിയില്ല.  ഇതു ഭയപ്പെടുത്തുന്ന ഒരു ചിന്തയാണ്. കാരണം, പരിശുദ്ധാത്മാവ് ഒരാളെ പൂർണമായി ആവേശിക്കുന്നില്ലെങ്കിൽ, എല്ലാ സത്യത്തെയും സംബന്ധിച്ച് ആ വ്യക്തി അന്ധകാരത്തിൽത്തന്നെ കഴിയുന്നു.  സങ്കടകരമെന്നു പറയട്ടെ, തങ്ങൾ അന്ധകാരത്തിലാണെന്നുപോലും അവർ തിരിച്ചറിയുകയില്ല!

ഇതു മനസ്സിലാകുന്നില്ലെങ്കിൽ, ഒരുപക്ഷേ നിങ്ങളും സത്യത്തിന്റെ ആത്മാവിന്റെ അഭാവം അൽപ്പമെങ്കിലും അനുഭവിക്കുന്നുണ്ടാകാം.  എന്തുകൊണ്ട്?  കാരണം, സത്യത്തിന്റെ ആത്മാവ് നിങ്ങളുടെ ഉള്ളിൽ സജീവമായി വസിക്കുമ്പോൾ, നിങ്ങൾ സത്യം അറിയുന്നുവെന്ന് നിങ്ങൾക്കു ബോധ്യമുണ്ടാകും.

രണ്ടാമതായി, നിങ്ങളുടെ മനസ്സും ഹൃദയവും പരിശുദ്ധാത്മാവിനായി പൂർണമായി തുറന്നുകൊടുക്കുമ്പോൾ, നിങ്ങൾ സത്യത്തിനായി ദാഹിക്കും.  പരിശുദ്ധാത്മാവ് “നിങ്ങളെ സമ്പൂർണ സത്യത്തിലേക്കു നയിക്കും.”  സമ്പൂർണ സത്യത്തിലേക്കു നയിക്കപ്പെടുന്നതിന്റെ ഫലങ്ങളിലൊന്ന്, ആ യാത്ര നിങ്ങളെ വിസ്മയഭരിതരാക്കും എന്നതാണ്.  നിങ്ങളുടെ മനസ്സിൽ തെളിഞ്ഞുവരുന്ന കാര്യങ്ങളെക്കുറിച്ചുള്ള ഉൾക്കാഴ്ച നിങ്ങളെ അത്ഭുതാദരങ്ങളാൽ നിറയ്ക്കും.  പുതിയൊരു വിധത്തിൽ കാര്യങ്ങൾ മനസ്സിലാക്കാൻ നിങ്ങൾക്കു കഴിയും.  പരിശുദ്ധാത്മാവാണ് പരിപൂർണനായ “വഴികാട്ടി”; സത്യത്തിലേക്കുള്ള യാത്ര മഹിമയേറിയതുമാണ്.

സ്വർഗസ്ഥനായ പിതാവിന്റെ മനസ്സിൽ നിലകൊള്ളുന്ന സത്യത്തെക്കുറിച്ച് ഇന്ന് ധ്യാനിക്കുക.  സത്യത്തോട് നിങ്ങൾ എത്രമാത്രം തുറവുള്ളവരാണ്?  ദൈവം നിങ്ങൾക്കു വെളിപ്പെടുത്താൻ ആഗ്രഹിക്കുന്നതെല്ലാം എത്ര പൂർണമായി നിങ്ങൾ സ്വീകരിക്കുന്നു?  പരിശുദ്ധാത്മാവിനായി നിങ്ങളെത്തന്നെ കൂടുതൽ പൂർണമായി തുറന്നുകൊടുക്കുക; അവിടുന്ന് നിങ്ങൾക്കു വെളിപ്പെടുത്താൻ ആഗ്രഹിക്കുന്നതെല്ലാം അന്വേഷിക്കുക.

പരിശുദ്ധാത്മാവേ, വന്ന് എന്റെ ജീവിതത്തെ മുഴുവനായി ആവേശിക്കണമേ.  എന്നെ പഠിപ്പിക്കുകയും സമ്പൂർണ സത്യത്തിലേക്ക് എന്നെ നയിക്കുകയും ചെയ്യണമേ.  പരിശുദ്ധാത്മാവേ, ദിവ്യനാഥാ, കരുണാമയനായ പിതാവേ, ഞാൻ അങ്ങയിൽ ശരണപ്പെടുന്നു.

പരിശുദ്ധാത്മാവിനോടുള്ള നൊവേന
പന്തക്കുസ്തായ്ക്കുള്ള ഒരുക്കമായി ചൊല്ലുന്നത്
മേയ് 22 വെള്ളിയാഴ്ച ആരംഭിക്കുന്നു

കൂടുതൽ സുവിശേഷ വിചിന്തനങ്ങൾ

ദൈവകരുണയെക്കുറിച്ചുള്ള വിചിന്തനങ്ങൾ

എല്ലാ വിശുദ്ധരും/തിരുനാളുകളും

ഇന്നത്തെ വിശുദ്ധൻ – സിയേനയിലെ വിശുദ്ധ ബെർണാർദിൻ, പുരോഹിതൻ

വിശുദ്ധ കുർബാനയിലെ വായനകൾക്കുള്ള തിരഞ്ഞെടുപ്പുകൾ

ചിത്രം: ദുച്ചോ ദി ബുവോണിൻസെന്യ വരച്ച ‘അപ്പസ്തോലന്മാരോടു വിടപറയുന്ന ക്രിസ്തു’