സെപ്റ്റംബർ 16, 2020
ആണ്ടുവട്ടത്തിലെ ഇരുപത്തിനാലാം ആഴ്ചയിലെ ബുധനാഴ്ച
ഇന്നത്തെ വായനകൾ
രക്തസാക്ഷികളായ വിശുദ്ധർ: കൊർണേലിയൂസ് പാപ്പാ, സിപ്രിയാൻ മെത്രാൻ—ഓർമ്മ
യേശു ജനക്കൂട്ടത്തോടു പറഞ്ഞു: “ഈ തലമുറയിലെ മനുഷ്യരെ ഞാൻ എന്തിനോടു താരതമ്യം ചെയ്യും? അവർ ആരെപ്പോലെയാണ്? ചന്തസ്ഥലത്ത് ഇരുന്ന് പരസ്പരം വിളിച്ചുപറയുന്ന കുട്ടികളെപ്പോലെയാണ് അവർ: ‘ഞങ്ങൾ നിങ്ങൾക്കായി കുഴലൂതി, എന്നാൽ നിങ്ങൾ നൃത്തം ചെയ്തില്ല. ഞങ്ങൾ വിലാപഗാനം പാടി, എന്നാൽ നിങ്ങൾ കരഞ്ഞില്ല.’” ലൂക്കാ 7:31-32
അപ്പോൾ ഈ കഥ നമ്മോട് എന്താണ് പറയുന്നത്? ഒന്നാമതായി, കുട്ടികൾ പരസ്പരം പാടുന്ന ‘പാട്ടുകളെ’ അവഗണിക്കുന്നു എന്നാണ് ഈ കഥയുടെ അർഥം. ചില കുട്ടികൾ ദുഃഖഗാനം പാടുന്നു; മറ്റുള്ളവർ ആ ഗാനം നിരസിക്കുന്നു. ചിലർ നൃത്തം ചെയ്യാനുള്ള ആനന്ദഗാനങ്ങൾ പാടി; എന്നാൽ മറ്റുള്ളവർ നൃത്തത്തിൽ പങ്കുചേർന്നില്ല. മറ്റൊരു വിധത്തിൽ പറഞ്ഞാൽ, അവർ സംഗീതത്തിലൂടെ നൽകിയ ക്ഷണത്തിന് ഉചിതമായ പ്രതികരണം ലഭിച്ചില്ല.
യേശുവിനു മുമ്പു വന്ന അനേകം പ്രവാചകന്മാർ, പാപത്തെക്കുറിച്ച് ദുഃഖിക്കാനും സത്യത്തിൽ ആനന്ദിക്കാനും ജനങ്ങളെ ക്ഷണിച്ചുകൊണ്ട് ‘പാട്ടുകൾ പാടി’ (അതായത്, പ്രസംഗിച്ചു) എന്ന വസ്തുതയിലേക്കുള്ള വ്യക്തമായ സൂചനയാണിത്. എന്നാൽ പ്രവാചകന്മാർ തങ്ങളുടെ ഹൃദയം തുറന്നു സംസാരിച്ചിട്ടും, അനേകം ആളുകൾ അവരെ അവഗണിച്ചു.
പ്രവാചകന്മാരുടെ വാക്കുകൾ കേൾക്കാൻ വിസമ്മതിച്ചതിന് യേശു അക്കാലത്തെ ജനങ്ങളെ ശക്തമായി കുറ്റപ്പെടുത്തുന്നു. പലരും സ്നാപകയോഹന്നാനെ ‘പിശാചുബാധിതൻ’ എന്നു വിളിച്ചെന്നും യേശുവിനെ ‘ഭോജനപ്രിയനും മദ്യപാനിയും’ എന്നു വിളിച്ചെന്നും അവിടുന്ന് തുടർന്ന് ചൂണ്ടിക്കാട്ടുന്നു. ജനങ്ങളെ യേശു കുറ്റപ്പെടുത്തുന്നത് പ്രത്യേകിച്ചും ഒരു പാപത്തെ കേന്ദ്രീകരിച്ചാണ്: ദുശ്ശാഠ്യം. ദൈവത്തിന്റെ സ്വരം കേൾക്കാനും മാറ്റം വരുത്താനും ശാഠ്യത്തോടെ വിസമ്മതിക്കുന്നത് ഗൗരവമായ പാപമാണ്. വാസ്തവത്തിൽ, പരിശുദ്ധാത്മാവിനെതിരായ പാപങ്ങളിൽ ഒന്നായിട്ടാണ് പരമ്പരാഗതമായി ഇതിനെ വിശേഷിപ്പിക്കുന്നത്. ഈ പാപത്തിൽ കുറ്റക്കാരാകാൻ നിങ്ങൾ ഇടവരുത്തരുത്. ദുശ്ശാഠ്യത്തോടെ ദൈവത്തിന്റെ സ്വരം കേൾക്കാൻ വിസമ്മതിക്കരുത്.
ദൈവം നമ്മോടു സംസാരിക്കുമ്പോൾ നാം കേൾക്കണം എന്നതാണ് ഈ സുവിശേഷത്തിന്റെ ക്രിയാത്മകമായ സന്ദേശം! നിങ്ങൾ അങ്ങനെ ചെയ്യുന്നുണ്ടോ? നിങ്ങൾ ശ്രദ്ധയോടെ കേൾക്കുകയും പൂർണഹൃദയത്തോടെ പ്രതികരിക്കുകയും ചെയ്യുന്നുണ്ടോ? നിങ്ങളുടെ മുഴുവൻ ശ്രദ്ധയും ദൈവത്തിലേക്കു തിരിക്കാനും അവിടുന്ന് പുറപ്പെടുവിക്കുന്ന മനോഹരമായ ‘സംഗീതം’ കേൾക്കാനുമുള്ള ഒരു ക്ഷണമായി നിങ്ങൾ ഇതിനെ വായിക്കണം.
കേൾക്കാനുള്ള നിങ്ങളുടെ സന്നദ്ധതയെക്കുറിച്ച് ഇന്ന് ധ്യാനിക്കുക. കേൾക്കാതിരിക്കുകയും തന്റെ വാക്കുകൾ ശ്രവിക്കാൻ വിസമ്മതിക്കുകയും ചെയ്തവരെ യേശു ശക്തമായി കുറ്റപ്പെടുത്തി. നിങ്ങൾ അവരുടെ കൂട്ടത്തിൽ ഉൾപ്പെടാതിരിക്കട്ടെ.
കർത്താവേ, അങ്ങയുടെ പരിശുദ്ധമായ സ്വരം ഞാൻ ശ്രദ്ധിക്കാനും കേൾക്കാനും മനസ്സിലാക്കാനും അതിനോടു പ്രതികരിക്കാനും ഇടയാകണമേ. അത് എന്റെ ആത്മാവിന് നവോന്മേഷവും പോഷണവും നൽകട്ടെ. ഈശോയേ, ഞാൻ അങ്ങയിൽ ശരണപ്പെടുന്നു.
ദൈവകരുണയെക്കുറിച്ചുള്ള വിചിന്തനങ്ങൾ
ഇന്നത്തെ വിശുദ്ധർ – രക്തസാക്ഷികളായ വിശുദ്ധ കൊർണേലിയൂസ് പാപ്പാ, വിശുദ്ധ സിപ്രിയാൻ മെത്രാൻ
വിശുദ്ധ കുർബാനയിലെ വായനകൾക്കുള്ള തിരഞ്ഞെടുപ്പുകൾ
മുകളിൽ നൽകിയിരിക്കുന്ന ചിത്രം: കൊച്ചുകുട്ടികളുടെ സുഹൃത്തായ യേശു. ചിത്രകാരൻ: വ്ലാഹോ ബുക്കോവാത്സ്
