ഞാൻ ആരെന്നാണ് നിങ്ങൾ പറയുന്നത്?

2020 സെപ്റ്റംബർ 25
ആണ്ടുവട്ടത്തിലെ ഇരുപത്തിയഞ്ചാം ആഴ്ചയിലെ വെള്ളിയാഴ്ച
ഇന്നത്തെ വായനകൾ

“ഞാൻ ആരെന്നാണ് ജനക്കൂട്ടം പറയുന്നത്?” അവർ മറുപടി പറഞ്ഞു: “സ്നാപകയോഹന്നാൻ; മറ്റു ചിലർ ഏലിയാ എന്നും, ഇനിയും ചിലർ ‘പുരാതന പ്രവാചകന്മാരിൽ ഒരാൾ ഉയിർത്തെഴുന്നേറ്റിരിക്കുന്നു’ എന്നും പറയുന്നു.” അപ്പോൾ അവൻ അവരോടു ചോദിച്ചു: “എന്നാൽ, ഞാൻ ആരെന്നാണ് നിങ്ങൾ പറയുന്നത്?” പത്രോസ് മറുപടി പറഞ്ഞു: “ദൈവത്തിന്റെ ക്രിസ്തു.”  ലൂക്കാ 9:18c-20

പത്രോസ് പറഞ്ഞത് ശരിയായിരുന്നു.  യേശു “ദൈവത്തിന്റെ ക്രിസ്തു” ആയിരുന്നു.  മറ്റു പലരും അവിടുത്തെ കേവലം ഒരു മഹാപ്രവാചകനായി വിശേഷിപ്പിച്ചു; എന്നാൽ പത്രോസ് കൂടുതൽ ആഴത്തിൽ കണ്ടു.  യേശു ദൈവത്തിൽനിന്നുള്ള അതുല്യനായ അഭിഷിക്തനാണെന്ന് അവൻ തിരിച്ചറിഞ്ഞു.  മറ്റൊരു വിധത്തിൽ പറഞ്ഞാൽ, യേശു ദൈവമായിരുന്നു.

ഇത് സത്യമാണെന്ന് നമുക്ക് അറിയാമെങ്കിലും, ഈ “വിശ്വാസരഹസ്യത്തിന്റെ” ആഴം പൂർണ്ണമായി ഗ്രഹിക്കാൻ ചിലപ്പോൾ നമുക്ക് കഴിയാതെപോകാം.  യേശു മനുഷ്യനാണ്; അവിടുന്ന് ദൈവവുമാണ്.  ഇത് ഗ്രഹിക്കാൻ പ്രയാസമാണ്.  യേശുവിന്റെ കാലത്തുള്ളവർക്കും ഈ മഹാരഹസ്യം ഗ്രഹിക്കാൻ പ്രയാസമായിരുന്നിരിക്കണം.  യേശുവിന്റെ മുമ്പിലിരുന്ന് അവിടുത്തെ വാക്കുകൾ കേൾക്കുന്നതായി സങ്കൽപ്പിക്കുക.  നിങ്ങൾ അവിടുത്തെ മുമ്പിൽ ഉണ്ടായിരുന്നെങ്കിൽ, അവിടുന്ന് പരിശുദ്ധ ത്രിത്വത്തിലെ രണ്ടാമത്തെ വ്യക്തികൂടിയാണെന്ന നിഗമനത്തിൽ എത്തുമായിരുന്നോ?  അവിടുന്ന് അനാദിമുതൽ നിലനിൽക്കുന്നവനും ‘ഞാൻ ആകുന്നവൻ ഞാനാകുന്നു’ എന്ന മഹാനുമാണെന്ന് നിങ്ങൾ നിഗമനം ചെയ്യുമായിരുന്നോ?  അവിടുന്ന് എല്ലാ വിധത്തിലും പൂർണ്ണനാണെന്നും സകലത്തിന്റെയും സ്രഷ്ടാവും സകലത്തെയും അസ്തിത്വത്തിൽ നിലനിർത്തുന്നവനുമാണെന്നും നിങ്ങൾ നിഗമനം ചെയ്യുമായിരുന്നോ?

യേശു “ദൈവത്തിന്റെ ക്രിസ്തു” ആയിരുന്നു എന്നതിന്റെ യഥാർഥ അർഥത്തിന്റെ ആഴം നമ്മിലാരും പൂർണ്ണമായി ഗ്രഹിക്കുമായിരുന്നില്ല എന്നതാണ് ഏറെ സാധ്യത.  അവിടുത്തെക്കുറിച്ച് എന്തോ പ്രത്യേകത നാം തിരിച്ചറിയുമായിരുന്നിരിക്കാം; എന്നാൽ അവിടുന്ന് യഥാർഥത്തിൽ ആരാണെന്ന്, അവിടുത്തെ സത്തയുടെ പൂർണ്ണതയിൽ കാണാൻ നമുക്ക് കഴിയുമായിരുന്നില്ല.

ഇന്നും ഇതുതന്നെയാണ് സ്ഥിതി.  പരിശുദ്ധ കുർബാനയിലേക്കു നോക്കുമ്പോൾ നാം ദൈവത്തെ കാണുന്നുണ്ടോ?  അനാദിമുതൽ നിലനിൽക്കുന്നവനും എല്ലാ നന്മയുടെയും ഉറവിടവും സകലത്തിന്റെയും സ്രഷ്ടാവുമായ, സർവശക്തനും സർവപ്രതാപിയും എല്ലാവരെയും സ്നേഹിക്കുന്നവനുമായ ദൈവത്തെ നാം കാണുന്നുണ്ടോ?  ഒരുപക്ഷേ, ഉത്തരം “അതെ” എന്നും “ഇല്ല” എന്നും ആയിരിക്കാം.  നാം വിശ്വസിക്കുന്നു എന്ന അർഥത്തിൽ “അതെ”; നാം പൂർണ്ണമായി മനസ്സിലാക്കുന്നില്ല എന്ന അർഥത്തിൽ “ഇല്ല”.

ഇന്ന് ക്രിസ്തുവിന്റെ ദൈവത്വത്തെക്കുറിച്ച് ധ്യാനിക്കുക.  പരിശുദ്ധ കുർബാനയിൽ സന്നിഹിതനായ അവിടുത്തെക്കുറിച്ചും, നമുക്കു ചുറ്റുമുള്ള അവിടുത്തെ സാന്നിധ്യത്തെക്കുറിച്ചും ധ്യാനിക്കുക.  നിങ്ങൾ അവിടുത്തെ കാണുന്നുണ്ടോ?  നിങ്ങൾ വിശ്വസിക്കുന്നുണ്ടോ?  അവിടുത്തിലുള്ള നിങ്ങളുടെ വിശ്വാസം എത്ര ആഴമുള്ളതും പൂർണ്ണവുമാണ്?  യേശു തന്റെ ദൈവത്വത്തിൽ ആരാണെന്ന് കൂടുതൽ ആഴത്തിൽ മനസ്സിലാക്കാൻ നിങ്ങളെത്തന്നെ വീണ്ടും സമർപ്പിക്കുക.  നിങ്ങളുടെ വിശ്വാസത്തിൽ ഒരുപടി കൂടുതൽ ആഴത്തിലേക്കു കടക്കാൻ ശ്രമിക്കുക.

കർത്താവേ, ഞാൻ വിശ്വസിക്കുന്നു.  അങ്ങ് ദൈവത്തിന്റെ ക്രിസ്തുവാണെന്ന് ഞാൻ വിശ്വസിക്കുന്നു.  അതിന്റെ അർഥം കൂടുതൽ ആഴത്തിൽ ഗ്രഹിക്കാൻ എന്നെ സഹായിക്കണമേ.  അങ്ങയുടെ ദൈവത്വം കൂടുതൽ വ്യക്തമായി കാണാനും അങ്ങയിൽ കൂടുതൽ പൂർണ്ണമായി വിശ്വസിക്കാനും എന്നെ സഹായിക്കണമേ.  ഈശോയേ, ഞാൻ അങ്ങയിൽ ശരണപ്പെടുന്നു.

നാലാം ദിവസം: ലിസ്യുവിലെ വിശുദ്ധ കൊച്ചുത്രേസ്യയ്ക്കുള്ള നൊവേന – ചെറുപുഷ്പം

കൂടുതൽ സുവിശേഷ വിചിന്തനങ്ങൾ

ദൈവകരുണയെക്കുറിച്ചുള്ള വിചിന്തനങ്ങൾ

ഇന്നത്തെ വിശുദ്ധർ/തിരുനാളുകൾ

വിശുദ്ധ കുർബാനയിലെ വായനകൾക്കുള്ള തിരഞ്ഞെടുപ്പുകൾ

ചിത്രം: ഡൊമെനിക്കോ ഗിർലൻദായോ വരച്ച അപ്പസ്തോലന്മാരുടെ വിളി