ചോദിക്കുവിൻ, അന്വേഷിക്കുവിൻ, മുട്ടുവിൻ

2020 ഒക്ടോബർ 8
ആണ്ടുവട്ടക്കാലത്തിലെ ഇരുപത്തിയേഴാം ആഴ്ചയിലെ വ്യാഴാഴ്ച
ഇന്നത്തെ വായനകൾ

“ഞാൻ നിങ്ങളോടു പറയുന്നു: ചോദിക്കുവിൻ, നിങ്ങൾക്കു ലഭിക്കും; അന്വേഷിക്കുവിൻ, നിങ്ങൾ കണ്ടെത്തും; മുട്ടുവിൻ, നിങ്ങൾക്കു വാതിൽ തുറന്നുകിട്ടും. എന്തെന്നാൽ, ചോദിക്കുന്ന ഏവർക്കും ലഭിക്കുന്നു; അന്വേഷിക്കുന്നവൻ കണ്ടെത്തുന്നു; മുട്ടുന്നവനു വാതിൽ തുറന്നുകിട്ടും.”  ലൂക്കാ 11:9-10

ചിലപ്പോൾ ഈ തിരുവചനഭാഗം തെറ്റായി മനസ്സിലാക്കപ്പെടാം. നാം പ്രാർഥിക്കണം, കൂടുതൽ പ്രാർഥിക്കണം, കൂടുതൽ തീക്ഷ്ണമായി പ്രാർഥിക്കണം, ഒടുവിൽ ദൈവം നമ്മുടെ പ്രാർഥനകൾക്ക് ഉത്തരം നൽകും എന്നാണ് ഇതിന്റെ അർഥമെന്ന് ചിലർ കരുതിയേക്കാം. വേണ്ടത്ര തീക്ഷ്ണമായി പ്രാർഥിക്കുന്നില്ലെങ്കിൽ ദൈവം പ്രാർഥനയ്ക്ക് ഉത്തരം നൽകുകയില്ല എന്നാണ് ഇതിന്റെ അർഥമെന്ന് മറ്റു ചിലർ കരുതിയേക്കാം. ചോദിച്ചുകൊണ്ടിരുന്നാൽ മാത്രം മതി, നാം പ്രാർഥിക്കുന്നതെന്തും നമുക്കു ലഭിക്കുമെന്ന് വേറെ ചിലർ കരുതിയേക്കാം. ഈ കാര്യങ്ങളിൽ പ്രധാനപ്പെട്ട ചില വ്യക്തതകൾ നമുക്ക് ആവശ്യമാണ്.

തീർച്ചയായും നാം തീക്ഷ്ണമായും കൂടെക്കൂടെയും പ്രാർഥിക്കണം. എന്നാൽ മനസ്സിലാക്കേണ്ട ഒരു പ്രധാന ചോദ്യം ഇതാണ്: ഞാൻ എന്തിനുവേണ്ടിയാണ് പ്രാർഥിക്കേണ്ടത്? ഇത് നിർണായകമാണ്. കാരണം, നാം പ്രാർഥിക്കുന്ന കാര്യം ദൈവത്തിന്റെ മഹത്വപൂർണവും പരിപൂർണവുമായ തിരുവിഷ്ടത്തിന്റെ ഭാഗമല്ലെങ്കിൽ, അതിനുവേണ്ടി എത്രകാലം എത്ര തീക്ഷ്ണമായി പ്രാർഥിച്ചാലും അവിടുന്ന് അതു നമുക്കു നൽകുകയില്ല. ഉദാഹരണത്തിന്, ഒരാൾ രോഗബാധിതനായി മരണത്തോടടുക്കുകയാണെന്നും, ആ വ്യക്തി മരിക്കാൻ അനുവദിക്കുക എന്നത് ദൈവത്തിന്റെ അനുവദനാത്മകമായ തിരുവിഷ്ടത്തിന്റെ ഭാഗമാണെന്നും കരുതുക. അങ്ങനെയെങ്കിൽ, ലോകത്തിലെ എല്ലാ പ്രാർഥനകളും ചേർന്നാലും സ്ഥിതിഗതികൾ മാറുകയില്ല. പകരം, ആ മരണം മനോഹരവും വിശുദ്ധവുമാകേണ്ടതിന്, പ്രയാസകരമായ ഈ സാഹചര്യത്തിലേക്ക് ദൈവത്തെ ക്ഷണിച്ചുകൊണ്ടായിരിക്കണം പ്രാർഥിക്കേണ്ടത്. അതിനാൽ, ഒരു കുട്ടി മാതാപിതാക്കളോടു ചെയ്യുന്നതുപോലെ, നാം ആഗ്രഹിക്കുന്നതു ചെയ്യാൻ ദൈവത്തെ സമ്മതിപ്പിക്കുന്നതുവരെ അവിടുത്തോട് യാചിച്ചുകൊണ്ടിരിക്കുന്നതല്ല കാര്യം. മറിച്ച്, നാം ഒരേയൊരു കാര്യത്തിനുവേണ്ടി മാത്രം പ്രാർഥിക്കണം… ദൈവത്തിന്റെ തിരുവിഷ്ടം നിറവേറാൻ നാം പ്രാർഥിക്കണം. ദൈവത്തിന്റെ മനസ്സു മാറ്റാനല്ല പ്രാർഥിക്കുന്നത്; മറിച്ച്, നമ്മെ രൂപാന്തരപ്പെടുത്താനും ശക്തിപ്പെടുത്താനും, ദൈവം നമ്മോടു ചെയ്യാൻ ആവശ്യപ്പെടുന്നതെല്ലാം പൂർണമായി ഏറ്റെടുക്കാൻ നമ്മെ പ്രാപ്തരാക്കാനുമാണ്.

നിങ്ങൾ എങ്ങനെയാണ് പ്രാർഥിക്കുന്നതെന്ന് ഇന്ന് വിചിന്തനം ചെയ്യുക. എല്ലാ കാര്യങ്ങളിലും ദൈവത്തിന്റെ തിരുവിഷ്ടം മാത്രമാണോ നിങ്ങൾ അന്വേഷിക്കുന്നതും അതിനുവേണ്ടി ആഴമായി പ്രാർഥിക്കുന്നതും? ക്രിസ്തുവിന്റെ വിശുദ്ധവും പരിപൂർണവുമായ പദ്ധതി തേടി അവിടുത്തെ ഹൃദയവാതിലിൽ നിങ്ങൾ മുട്ടുന്നുണ്ടോ? നിങ്ങൾക്കായി അവിടുന്ന് മനസ്സിൽ കരുതിയിരിക്കുന്നതെല്ലാം പൂർണമായി സ്വീകരിക്കാൻ നിങ്ങളെയും മറ്റുള്ളവരെയും പ്രാപ്തരാക്കുന്ന കൃപയ്ക്കായി നിങ്ങൾ അപേക്ഷിക്കുന്നുണ്ടോ? തീക്ഷ്ണമായി പ്രാർഥിക്കുക; ആ പ്രാർഥന നിങ്ങളുടെ ജീവിതത്തെ മാറ്റുമെന്ന് പ്രതീക്ഷിക്കുക.

കർത്താവേ, ദിവസവും അങ്ങയെ അന്വേഷിക്കാനും പ്രാർഥനയിലൂടെ എന്റെ വിശ്വാസജീവിതത്തിൽ വളരാനും എന്നെ സഹായിക്കണമേ. അങ്ങയുടെ വിശുദ്ധവും പരിപൂർണവുമായ തിരുവിഷ്ടം എന്റെ ജീവിതത്തിൽ സ്വീകരിക്കാൻ എന്റെ പ്രാർഥന എന്നെ സഹായിക്കട്ടെ. ഈശോയേ, ഞാൻ അങ്ങയിൽ വിശ്വസിക്കുന്നു.

കൂടുതൽ സുവിശേഷ വിചിന്തനങ്ങൾ

ദൈവകരുണയെക്കുറിച്ചുള്ള വിചിന്തനങ്ങൾ

ഇന്നത്തെ വിശുദ്ധർ/തിരുനാളുകൾ

വിശുദ്ധ കുർബാനയിലെ വായനകൾക്കുള്ള തിരഞ്ഞെടുപ്പുകൾ

ചിത്രം: പീറ്റർ കാൾ ഗൈസ്‌ലർ പത്തൊൻപതാം നൂറ്റാണ്ടിൽ ഉരുക്കിൽ കൊത്തിയ ഈശോമിശിഹായുടെ ചിത്രം

പുതിയത്!

ആഴങ്ങളിലേക്കുള്ള അന്വേഷണം

ഇഗ്നേഷ്യൻ പാഠങ്ങളും ധ്യാനങ്ങളും
ആരാധനാക്രമവത്സരമനുസരിച്ച് ക്രമീകരിച്ചത്