(നിങ്ങളുടെ രൂപതയിൽ ഇന്ന് സ്വർഗാരോഹണത്തിരുനാൾ ആഘോഷിക്കുന്നുവെങ്കിൽ, താഴെയുള്ള വിചിന്തനം വായിക്കുക. അല്ലെങ്കിൽ, ഇന്നത്തേക്കുള്ള അടുത്ത വിചിന്തനത്തിലേക്കു പോകുക; ഞായറാഴ്ച സ്വർഗാരോഹണത്തെക്കുറിച്ചുള്ള വിചിന്തനത്തിലേക്കു മടങ്ങിവരുക.)
വ്യാഴാഴ്ച, മേയ് 13, 2021
നമ്മുടെ കർത്താവിന്റെ സ്വർഗാരോഹണ മഹോത്സവം (വർഷം B)
യേശു തന്റെ ശിഷ്യന്മാരോടു പറഞ്ഞു: “നിങ്ങൾ ലോകമെങ്ങും പോയി സകല സൃഷ്ടികളോടും സുവിശേഷം പ്രഘോഷിക്കുവിൻ. വിശ്വസിക്കുകയും മാമ്മോദീസ സ്വീകരിക്കുകയും ചെയ്യുന്നവൻ രക്ഷിക്കപ്പെടും; വിശ്വസിക്കാത്തവൻ ശിക്ഷിക്കപ്പെടും.” മർക്കോസ് 16:15–16
ദൈവപുത്രന്റെ ദൗത്യത്തിന്റെ പൂർത്തീകരണത്തിലേക്കുള്ള മറ്റൊരു പടികൂടിയാണ് നാം ഇന്ന് ആഘോഷിക്കുന്നത്. കാലത്തിന്റെ ആരംഭത്തിൽ മനുഷ്യകുലം പാപം ചെയ്യുകയും ആദിമ നിഷ്കളങ്കതയിൽനിന്നു വീണുപോവുകയും ചെയ്തു. നോഹയോടും അബ്രാഹത്തോടും മോശയോടും ഉടമ്പടി സ്ഥാപിച്ചുകൊണ്ട്, നിത്യവീണ്ടെടുപ്പിന്റെ ദാനത്തിനായി ദൈവം ഉടൻതന്നെ ലോകത്തെ ഒരുക്കാൻ തുടങ്ങി. വരാനിരിക്കുന്നതിനായി തന്റെ ജനത്തെ കൂടുതൽ ഒരുക്കുവാൻ അവിടുന്ന് വിവിധ പ്രവാചകന്മാരെയും രാജാക്കന്മാരെയും ഉയർത്തി. തുടർന്ന്, ഉചിതമായ സമയമായപ്പോൾ, പരിശുദ്ധ കന്യകാമറിയത്തിലൂടെ ദൈവം നമ്മുടെ ലോകത്തിലേക്കു പ്രവേശിച്ചു. ദൈവപുത്രനായ യേശു പിന്നീട് തന്റെ പരസ്യശുശ്രൂഷ ആരംഭിച്ചു: അവിടുന്ന് പഠിപ്പിക്കുകയും അത്ഭുതങ്ങൾ പ്രവർത്തിക്കുകയും വിശ്വാസികളെ തന്നിലേക്കു കൂട്ടിച്ചേർക്കുകയും മരിക്കുകയും ഉയിർത്തെഴുന്നേൽക്കുകയും ചെയ്തു; തുടർന്ന് സ്വർഗാരോഹണത്തിനുള്ള ഒരുക്കമായി തന്റെ ശിഷ്യന്മാർക്കു പ്രത്യക്ഷപ്പെട്ടു. സ്വർഗാരോഹണം ദൈവപുത്രന്റെ ദൗത്യം പൂർത്തിയാക്കുന്നു. രൂപാന്തരപ്പെട്ടതും ഉത്ഥാനം ചെയ്തതുമായ തന്റെ മനുഷ്യസ്വഭാവത്തിൽ പുത്രനായ ദൈവം സ്വന്തം ശക്തിയാൽ പിതാവിന്റെ അടുക്കലേക്ക് ആരോഹണം ചെയ്യുന്ന ആ നിർണായക നിമിഷത്തെ ഇന്ന് നാം ആദരിക്കുന്നു. മനുഷ്യകുലം മുഴുവനും തന്നോടൊപ്പം ആരോഹണം ചെയ്യേണ്ടതിന് അവിടുന്ന് നമ്മുടെ മനുഷ്യത്വത്തെയും തന്നോടൊപ്പം കൊണ്ടുപോകുന്നു.
യേശുവിന്റെ സ്വർഗാരോഹണം ആഘോഷിക്കുമ്പോൾ, ആ നിമിഷത്തിലേക്കു നയിച്ച എല്ലാ കാര്യങ്ങളും നാം ആദ്യം കാണുകയും അതിനു മുമ്പുണ്ടായ ആ സംഭവങ്ങളോടെല്ലാം നമ്മെത്തന്നെ ഐക്യപ്പെടുത്താൻ ശ്രമിക്കുകയും വേണം. പഴയനിയമത്തിലെ പൂർവപിതാക്കന്മാരുടെയും പ്രവാചകന്മാരുടെയും വാക്കുകൾ നാം ശ്രവിക്കണം. പ്രത്യേകിച്ച്, പുതിയനിയമത്തിലെ യേശുവിന്റെ പ്രബോധനങ്ങൾ ശ്രവിക്കുകയും അവിടുത്തെ വചനങ്ങൾ മടികൂടാതെ സ്വീകരിക്കുകയും വേണം. അവിടുത്തെ ഉത്ഥാനത്തിൽ നമുക്കും പങ്കുചേരാൻ കഴിയേണ്ടതിന്, പാപത്തിനു മരിച്ചുകൊണ്ട് അവിടുത്തെ മരണത്തോടു നമ്മെത്തന്നെ ഐക്യപ്പെടുത്തണം. യേശുവിനോടൊപ്പം പിതാവിന്റെ അടുക്കലേക്ക് ആരോഹണം ചെയ്യാൻ നമുക്കെല്ലാവർക്കും ലഭിച്ചിരിക്കുന്ന ക്ഷണവും ഇന്ന് നാം തിരിച്ചറിയണം. മഹത്വപൂർണമായ ഈ നിമിഷത്തിലേക്കു നയിച്ച സംഭവങ്ങളെയെല്ലാം വിശ്വസിക്കുകയും സ്വീകരിക്കുകയും ജീവിതത്തിൽ പകർത്തുകയും ചെയ്താൽ, യേശു പോയിരിക്കുന്നിടത്തേക്ക് അവിടുത്തെ അനുഗമിക്കാൻ നാമും ക്ഷണിക്കപ്പെട്ടിരിക്കുന്നുവെന്ന് നാം മനസ്സിലാക്കണം.
സ്വർഗാരോഹണം യേശുവിന്റെ ഭൂമിയിലെ ജീവിതത്തിന്റെ അവസാനമായിരുന്നു; എന്നാൽ സ്വർഗീയജീവിതത്തിൽ നാം പങ്കുചേരുന്നതിന്റെ ആരംഭവുമായിരുന്നു അത്. യേശു സ്വർഗാരോഹണം ചെയ്തപ്പോൾ, പുറപ്പെട്ടുപോയി “സകല സൃഷ്ടികളോടും സുവിശേഷം പ്രഘോഷിക്കാൻ” തന്റെ ശിഷ്യന്മാരെ നിയോഗിച്ചു. ആദത്തിന്റെയും ഹവ്വായുടെയും കാലത്ത് ആരംഭിക്കുകയും സ്വർഗാരോഹണത്തോടെ പൂർത്തിയാവുകയും ചെയ്ത ദൈവത്തിന്റെ രക്ഷാകരപദ്ധതിയെക്കുറിച്ച് അവർ എല്ലാവരോടും പ്രഘോഷിക്കേണ്ടിയിരുന്നു.
യേശുവിന്റെ സ്വർഗാരോഹണത്തിന്റെ മഹത്വപൂർണമായ ഈ നിമിഷത്തിൽ പങ്കുചേരാൻ മാത്രമല്ല, പുറപ്പെട്ടുപോയി മറ്റുള്ളവരെ ഈ പുതിയ ജീവിതത്തിലേക്ക് ആകർഷിക്കാൻ കഴിയുന്നതെല്ലാം ചെയ്യാനുമുള്ള നിങ്ങളുടെ വിളിയെക്കുറിച്ച് ഇന്ന് വിചിന്തനം ചെയ്യുക. മറ്റുള്ളവരെ ആ മലയിലേക്കു കൊണ്ടുവരാൻ നിങ്ങളെ ക്ഷണിച്ചുകൊണ്ട് ഇന്നും നിങ്ങളോടു സംസാരിക്കുന്ന യേശുവിനെക്കുറിച്ചു വിചിന്തനം ചെയ്യുക. സുഹൃത്തുക്കളെയും കുടുംബാംഗങ്ങളെയും സുവിശേഷം പങ്കുവയ്ക്കാനായി ദൈവം നിങ്ങളെ ഏൽപ്പിച്ചിരിക്കുന്ന എല്ലാവരെയും പഠിപ്പിക്കുന്നതിലൂടെ, “ലോകമെങ്ങും പോകുവിൻ” എന്ന ക്രിസ്തുവിന്റെ ദൗത്യം നിങ്ങൾ നിറവേറ്റുന്നു. അങ്ങനെ, ചിതറിക്കിടക്കുന്ന ജനത്തെ ക്രിസ്തുവിന്റെ ഒരേയൊരു ആട്ടിൻകൂട്ടത്തിലേക്കു കൂട്ടിച്ചേർത്ത്, ഒരുനാൾ അവിടുത്തോടൊപ്പം നിത്യതയിലേക്ക് ആരോഹണം ചെയ്യാൻ അവരെ ഒരുക്കുന്നു.
സ്വർഗാരോഹണം ചെയ്ത എന്റെ കർത്താവേ, അങ്ങയുടെ പിതാവിനോടൊപ്പം എന്നേക്കും ആയിരിക്കേണ്ടതിന് വീണുപോയ മനുഷ്യകുലത്തെ അങ്ങ് സ്വർഗത്തിലേക്ക് ആനയിച്ച ആ നിമിഷത്തിനുള്ള ഒരുക്കം മാത്രമായിരുന്നു ചരിത്രത്തിലുടനീളമുള്ള സകല കാര്യങ്ങളും. അങ്ങയുടെ സ്വർഗാരോഹണത്തിൽ ഞാനും പങ്കുചേരേണ്ടതിന്, അങ്ങയുടെ വിശുദ്ധവചനങ്ങൾ സദാ ശ്രദ്ധിച്ചു പാലിക്കാൻ എന്നെ സഹായിക്കണമേ. പ്രിയ കർത്താവേ, അങ്ങ് വിളിച്ചിരിക്കുന്ന എല്ലാവരാലും രാജ്യം നിറയേണ്ടതിന്, പുറപ്പെട്ടുപോയി അനേകരെ അങ്ങയിലേക്ക് ആകർഷിക്കാൻ എന്നെയും ഉപയോഗിക്കണമേ. യേശുവേ, ഞാൻ അങ്ങയിൽ ശരണപ്പെടുന്നു.
പരിശുദ്ധാത്മാവിനോടുള്ള നൊവേന
പന്തക്കുസ്താത്തിരുനാളിനുള്ള ഒരുക്കമായി ചൊല്ലുന്നത്
മേയ് 14 വെള്ളിയാഴ്ച ആരംഭിക്കുന്നു
ദൈവകരുണയെക്കുറിച്ചുള്ള വിചിന്തനങ്ങൾ
കൂടുതൽ വായനയ്ക്ക് – സ്വർഗാരോഹണം
സ്വർഗാരോഹണ തിരുനാളിനുള്ള പ്രാർഥനാധ്യാനം
ഫാത്തിമാ മാതാവ്—ഐച്ഛിക അനുസ്മരണം
വിശുദ്ധ കുർബാനയിലെ വായനകൾക്കുള്ള തിരഞ്ഞെടുപ്പുകൾ
