2021 മേയ് 29
ആണ്ടുവട്ടകാലത്തിലെ എട്ടാം വാരത്തിലെ ശനിയാഴ്ച
വിശുദ്ധ പോൾ ആറാമൻ മാർപാപ്പ—ഐച്ഛിക അനുസ്മരണം
“ഞാൻ നിങ്ങളോട് ഒരു ചോദ്യം ചോദിക്കാം. എനിക്ക് ഉത്തരം നൽകുക; അപ്പോൾ എന്ത് അധികാരത്താലാണ് ഞാൻ ഇവ ചെയ്യുന്നതെന്ന് നിങ്ങളോടു പറയാം. യോഹന്നാന്റെ സ്നാനം സ്വർഗത്തിൽനിന്നുള്ളതായിരുന്നോ മനുഷ്യരിൽനിന്നുള്ളതായിരുന്നോ? എനിക്ക് ഉത്തരം നൽകുക.” മർക്കോസ് 11:29–30
ദേവാലയപരിസരത്തുവച്ച് പ്രധാനപുരോഹിതന്മാരും നിയമജ്ഞരും ജനപ്രമാണികളും യേശുവിനെ സമീപിച്ച്, എന്ത് അധികാരത്താലാണ് അവിടുന്ന് ഇവ ചെയ്യുന്നതെന്ന് ചോദിച്ചപ്പോൾ യേശു നൽകിയ മറുപടിയാണിത്. എന്തായിരുന്നു യേശു ചെയ്തത്? തലേദിവസം യേശു ദേവാലയത്തിൽ വന്ന് നാണയമാറ്റക്കാരെ പുറത്താക്കിയിരുന്നു. അവിടുന്ന് അവരോടു പറഞ്ഞു: “‘എന്റെ ഭവനം സകല ജനതകൾക്കുമുള്ള പ്രാർഥനാലയം എന്നു വിളിക്കപ്പെടും’ എന്ന് എഴുതപ്പെട്ടിട്ടില്ലേ? എന്നാൽ നിങ്ങൾ അതിനെ കവർച്ചക്കാരുടെ ഗുഹയാക്കിയിരിക്കുന്നു.” ഇത് മതനേതാക്കളെ രോഷാകുലരാക്കി. യേശുവിനെ എങ്ങനെ വധിക്കാമെന്ന് അവർ ഉടൻതന്നെ ചർച്ച ചെയ്യാൻ തുടങ്ങി.
ആദ്യം, അവിടെ നിലനിന്നിരുന്ന സംഘർഷാവസ്ഥയെക്കുറിച്ച് ചിന്തിക്കുക. ദൈവപുത്രനായ യേശുവിനെ വധിക്കാൻ അവർ യഥാർഥത്തിൽ ഗൂഢാലോചന നടത്തുകയായിരുന്നു. വെറുപ്പും അസൂയയും നിറഞ്ഞ അവർ അവിടുന്നിൽ വിശ്വസിക്കാൻ വിസമ്മതിച്ചു. അവരുടെ ഹൃദയകാഠിന്യം കണ്ട യേശു, അവരുടെ ചോദ്യത്തിന് ഉത്തരം നൽകുന്നതിനുമുമ്പ് തന്റെ ചോദ്യത്തിന് ഉത്തരം നൽകേണ്ട സാഹചര്യം അവർക്കു മുന്നിൽ സൃഷ്ടിച്ചു. യേശു ഇങ്ങനെ ചെയ്തത് എന്തുകൊണ്ടായിരിക്കും?
യേശു അവരോടു ചോദിച്ച ചോദ്യം യഥാർഥത്തിൽ അവിടുത്തെ വലിയൊരു കാരുണ്യപ്രവൃത്തിയായിരുന്നു. മാനസാന്തരപ്പെടാൻ അവിടുന്ന് അവർക്ക് ഒരവസരം നൽകി. വിനീതമായ വിശ്വാസത്തോടും സത്യസന്ധതയോടുംകൂടി അവിടുത്തെ ചോദ്യത്തിന് ഉത്തരം നൽകിയിരുന്നെങ്കിൽ, അവർക്ക് സ്വന്തം ജീവൻ രക്ഷിക്കാമായിരുന്നു. പകരം, അവിടുത്തെ ചോദ്യത്തെക്കുറിച്ച് അവർ പരസ്പരം ചർച്ച ചെയ്ത്, ആരെയും പിണക്കാത്ത ഒരു മറുപടി നൽകി. യോഹന്നാന്റെ സ്നാനം ദൈവത്തിൽനിന്നല്ല, മനുഷ്യരിൽനിന്നുള്ളതാണെന്ന് പറഞ്ഞാൽ ജനം തങ്ങൾക്കെതിരെ തിരിയുമെന്ന് അവർ ഭയപ്പെട്ടു. അതിനാൽ, “ഞങ്ങൾക്ക് അറിയില്ല” എന്നു മാത്രം അവർ പറഞ്ഞു. എന്നാൽ അവർ ശരിയായ ഉത്തരം നൽകിയിരുന്നെങ്കിൽ എന്തു സംഭവിക്കുമായിരുന്നുവെന്ന് സങ്കൽപ്പിക്കുക. യോഹന്നാന്റെ സ്നാനം യഥാർഥത്തിൽ ദൈവത്തിൽനിന്നുള്ളതാണെന്നും തങ്ങൾ അവനിൽ വിശ്വസിക്കേണ്ടിയിരുന്നുവെന്നും പരസ്പരം ചർച്ച ചെയ്ത് അവർ നിഗമനത്തിലെത്തിയിരുന്നെങ്കിലോ? അവർ തങ്ങളെത്തന്നെ താഴ്ത്തി, യോഹന്നാന്റെ കാര്യത്തിൽ തങ്ങൾക്ക് ഗുരുതരമായി തെറ്റുപറ്റിയെന്ന് സമ്മതിച്ചിരുന്നെങ്കിൽ, യേശു അവരുടെ ചോദ്യത്തിന് ഉത്തരം നൽകുമായിരുന്നു; അവരുടെ യഥാർഥ വിശ്വാസജീവിതത്തിന് തുടക്കമാകുകയും ചെയ്യുമായിരുന്നു. എന്നാൽ അവർ അങ്ങനെ ചെയ്തില്ല. അവർ ദുശ്ശാഠ്യത്തിൽ തുടർന്നു. തങ്ങൾക്കു തെറ്റുപറ്റിയെന്ന് സമ്മതിക്കാൻ അവർക്ക് കഴിഞ്ഞില്ല.
ഏറ്റവും അപകടകരമായ പാപങ്ങളിൽ ഒന്നാണ് ദുശ്ശാഠ്യം. അത് ക്ഷമിക്കപ്പെടാൻ കഴിയാത്ത ഒരു പാപമാണ്; കാരണം, അടിസ്ഥാനപരമായി അത് മാറ്റത്തിനുള്ള വിസമ്മതമാണ്. ഒരാൾ സ്വന്തം പാപം സമ്മതിക്കാനും മാറ്റം വരുത്താനും വിസമ്മതിക്കുമ്പോൾ, ദൈവത്തിന് അയാളെ സഹായിക്കാൻ കഴിയില്ല. അങ്ങനെയുള്ളവർ സ്വന്തം പാപത്തിൽ വഴിതെറ്റിയവരായി തുടരുകയും അതിന്റെ പ്രത്യാഘാതങ്ങൾ അനുഭവിക്കുകയും ചെയ്യുന്നു.
നിങ്ങളുടെ ജീവിതത്തിൽ ദുശ്ശാഠ്യവുമായി നിങ്ങൾ മല്ലിടുന്നുണ്ടോ? നിങ്ങൾക്കു തെറ്റുപറ്റുമ്പോൾ അത് സമ്മതിക്കാൻ ബുദ്ധിമുട്ടുണ്ടോ? മറ്റൊരാളോട് ക്ഷമ ചോദിക്കാനും മാറ്റത്തിനായി പരിശ്രമിക്കാനും നിങ്ങൾക്ക് ബുദ്ധിമുട്ടുണ്ടോ?
നിങ്ങൾ ഇപ്പോഴും ദുശ്ശാഠ്യം പുലർത്തുന്ന ഏതൊരു കാര്യത്തെക്കുറിച്ചും ഇന്ന് ചിന്തിക്കുക. നിങ്ങൾ വിശ്വസിക്കാൻ വിസമ്മതിക്കുന്ന വിശ്വാസസത്യങ്ങളുണ്ടോ? വിനയത്തോടെ പുനഃസ്ഥാപിക്കാൻ നിങ്ങൾ വിസമ്മതിക്കുന്ന തകർന്ന ബന്ധങ്ങളുണ്ടോ? നിങ്ങളുടെ പാപത്തെ ന്യായീകരിക്കുകയും നിങ്ങളുടെ കുറ്റവും മാറ്റത്തിന്റെ ആവശ്യകതയും സമ്മതിക്കാൻ വിസമ്മതിക്കുകയും ചെയ്യുന്നുണ്ടോ? വിനീതമായ ഒരു ഹൃദയമെന്ന ദാനത്തിനായി നമ്മുടെ കർത്താവിനോടു പ്രാർഥിക്കുക. പല വിധത്തിലും, എളിമ എന്നത് ദൈവതിരുമുമ്പിൽ നിങ്ങളോടുതന്നെയും മറ്റുള്ളവരോടും പൂർണമായും സത്യസന്ധരായിരിക്കുക എന്നതല്ലാതെ മറ്റൊന്നുമല്ല. ഈ മതനേതാക്കളുടെ മാതൃക പിന്തുടരരുത്. നമ്മുടെ കർത്താവിന് നിങ്ങളുടെ ഹൃദയത്തിൽ പ്രവേശിക്കാനും നിങ്ങളുടെ ജീവിതത്തിലേക്ക് അവിടുത്തെ കാരുണ്യം കൊണ്ടുവരാനും കഴിയേണ്ടതിന്, ഹൃദയത്തിലെ എല്ലാ ദുശ്ശാഠ്യവും നീക്കാൻ വിനയത്തോടെ പരിശ്രമിക്കുക.
ദൃഢനിശ്ചയമുള്ള എന്റെ യേശുവേ, അഹങ്കാരവും ധിക്കാരവും ദുശ്ശാഠ്യവും ഉള്ളവരെ അങ്ങ് വലിയ കരുത്തോടും സ്നേഹത്തോടുംകൂടി നേരിടുന്നു. അവരുടെ ഹൃദയത്തിന്റെ ദുശ്ശാഠ്യത്തെ അതിജീവിക്കാൻ അവരെ സഹായിക്കുന്നതിനാണ് അങ്ങ് അങ്ങനെ ചെയ്യുന്നത്. പ്രിയ കർത്താവേ, എന്റെ പാപം സമ്മതിക്കാനും സ്നേഹത്തോടെ അങ്ങയിലേക്കു തിരിയാനും എപ്പോഴും എനിക്കു കഴിയേണ്ടതിന് എളിമയുടെ കൃപ എനിക്കു നൽകണമേ. യേശുവേ, ഞാൻ അങ്ങയിൽ ശരണപ്പെടുന്നു.
ദൈവകരുണയെക്കുറിച്ചുള്ള വിചിന്തനങ്ങൾ
ഇന്നത്തെ വിശുദ്ധൻ – വിശുദ്ധ പോൾ ആറാമൻ മാർപാപ്പ
വിശുദ്ധ കുർബാനയിലെ വായനകൾക്കുള്ള തിരഞ്ഞെടുപ്പുകൾ
