നവംബർ 4, 2021
ആണ്ടുവട്ടത്തിലെ മുപ്പത്തിയൊന്നാം ആഴ്ചയിലെ വ്യാഴാഴ്ച
ഇന്നത്തെ വായനകൾ
വിശുദ്ധ ചാൾസ് ബൊറോമിയോ, മെത്രാൻ—ഓർമ്മ
“നിങ്ങളിൽ ആർക്കെങ്കിലും നൂറ് ആടുകളുണ്ടായിരിക്കെ അവയിൽ ഒന്നിനെ നഷ്ടപ്പെട്ടാൽ, തൊണ്ണൂറ്റൊമ്പതിനെയും മരുഭൂമിയിൽ വിട്ടിട്ട്, നഷ്ടപ്പെട്ടതിനെ കണ്ടെത്തുന്നതുവരെ അതിനെ അന്വേഷിച്ചുപോകാതിരിക്കുമോ? അതിനെ കണ്ടെത്തുമ്പോൾ അവൻ അത്യന്തം സന്തോഷത്തോടെ അതിനെ തോളിലേറ്റുന്നു. വീട്ടിലെത്തുമ്പോൾ സ്നേഹിതരെയും അയൽക്കാരെയും വിളിച്ചുകൂട്ടി അവരോടു പറയുന്നു: ‘എന്നോടുകൂടെ സന്തോഷിക്കുവിൻ; കാരണം, നഷ്ടപ്പെട്ട എന്റെ ആടിനെ ഞാൻ കണ്ടെത്തിയിരിക്കുന്നു.’” ലൂക്കാ 15:4–6
നൂറ് എന്ന സംഖ്യ പൂർണ്ണതയെ സൂചിപ്പിക്കുന്നുവെന്ന് മഹാന്മാരായ ചില വിശുദ്ധർ ചൂണ്ടിക്കാട്ടുന്നു. നൂറ് എന്നത് ദൈവരാജ്യത്തിന്റെ പൂർണ്ണതയെ സൂചിപ്പിക്കുന്നു; അതിൽ സ്വർഗ്ഗത്തിലെ എല്ലാ വിശുദ്ധരും മാത്രമല്ല, മാലാഖമാരും ഉൾപ്പെടുന്നു. നഷ്ടപ്പെട്ട ആ ഒരാട്, ഈ ജീവിതത്തിലൂടെ യാത്ര ചെയ്യുന്ന മനുഷ്യകുലത്തെ മുഴുവൻ പ്രതിനിധീകരിക്കുന്നു. തീർച്ചയായും, യേശുവാണ് ആ ഇടയൻ. നമ്മെ വീട്ടിലേക്ക് ചുമന്നുകൊണ്ടുപോകാൻ ശ്രദ്ധാപൂർവം അന്വേഷിക്കുന്ന അവിടുത്തെ ശ്രദ്ധ പതിതമനുഷ്യകുലത്തിലേക്കു തിരിയുന്നു.
ആദ്യം, വഴിതെറ്റിപ്പോയ ആ ഒരാടിനെ ഇടയൻ അന്വേഷിക്കുന്നത് കോപംകൊണ്ടല്ല, കരുതലും സ്നേഹവുംകൊണ്ടാണെന്നു ശ്രദ്ധിക്കുക. നാം വഴിതെറ്റുമ്പോൾ നമ്മുടെ കർത്താവ് നമ്മെ എങ്ങനെ കാണുന്നു എന്നു ശരിയായി മനസ്സിലാക്കാൻ ഇത് ഗ്രഹിക്കേണ്ടത് അത്യാവശ്യമാണ്. അവിടുത്തെ ആഴമായ കരുതലും, നമ്മെ അന്വേഷിക്കുന്നതിലുള്ള അവിടുത്തെ നിതാന്തശ്രദ്ധയും, വഴിതെറ്റിയ അവസ്ഥയിൽ നമ്മെ കണ്ടെത്താനുള്ള അവിടുത്തെ അചഞ്ചലമായ പ്രതിബദ്ധതയും നാം കാണണം. വിധിയും കോപവുമായി മാറിയിരിക്കുന്ന ദൈവമല്ല അവിടുന്ന്; മറിച്ച്, നമ്മെ കണ്ടെത്തി വീട്ടിലേക്കു കൊണ്ടുവരാൻ നമ്മുടെ അടുത്തേക്കു വരുകയും പതിതമായ നമ്മുടെ മനുഷ്യസ്വഭാവം സ്വീകരിക്കുകയും എല്ലാ സഹനങ്ങളും ഏറ്റെടുക്കുകയും ചെയ്ത ദൈവമാണ്.
ഈ ഉപമയിൽ ഇടയൻ നഷ്ടപ്പെട്ട ആടിനെ തോളിലേറ്റി വീട്ടിലേക്ക് ചുമന്നുകൊണ്ടുപോകുന്നുവെന്നതും ശ്രദ്ധിക്കുക. സ്വന്തം പരിശ്രമത്താൽ നാം ദൈവത്തിലേക്കു മടങ്ങിച്ചെല്ലണമെന്ന ചിന്തയുടെ കെണിയിൽ പലപ്പോഴും നാം വീണുപോകാം. എന്നാൽ നമ്മെ എടുത്തുയർത്തി വീട്ടിലേക്ക് ചുമന്നുകൊണ്ടുപോകാൻ ദൈവം എപ്പോഴും അവിടെയുണ്ട്, നമുക്കായി കാത്തിരിക്കുന്നു എന്നതാണ് സത്യം. അവിടുത്തെ കരുണയുള്ള കരങ്ങളിൽ നമ്മെത്തന്നെ സമർപ്പിക്കുകയും ഓടിയകലുന്നത് നിർത്തുകയും ചെയ്യുക എന്നതാണ് നമ്മുടെ കടമ. അവിടുത്തേക്കു തിരിഞ്ഞ്, നമ്മുടെ അടുത്തേക്കു വരാനും നമ്മെ ശുശ്രൂഷിക്കാനും അവിടുത്തെ അനുവദിച്ചുകൊണ്ടാണ് നാം ഇതു ചെയ്യുന്നത്. അവിടുത്തെ സൗമ്യമായ കരങ്ങളിൽ നമ്മെത്തന്നെ സമർപ്പിച്ചുകഴിഞ്ഞാൽ, മുഖ്യമായ പരിശ്രമം നടത്തുന്നത് നമ്മുടെ കർത്താവാണ്.
അവസാനമായി, ഈ ഉപമയിൽ പറയുന്ന ആനന്ദം ഇടയന്റേതാണെന്നു ശ്രദ്ധിക്കുക. തീർച്ചയായും, നമ്മെ എടുത്തുയർത്തി ദൈവരാജ്യത്തിന്റെ പൂർണ്ണതയാകുന്ന ഭവനത്തിലേക്ക് ചുമന്നുകൊണ്ടുപോകുമ്പോൾ നാമും സന്തോഷിക്കും. എന്നാൽ നമ്മുടെ ആനന്ദം നമ്മുടെ കർത്താവിന്റെ ആനന്ദത്തോടുള്ള പ്രതികരണമാണ്. അവിടുത്തെ ആനന്ദത്തിൽ പങ്കുചേരാനാണ് നാം ക്ഷണിക്കപ്പെടുന്നത്. നമ്മെ സ്നേഹപൂർവം വീട്ടിലേക്ക് ചുമന്നുകൊണ്ടുപോകാൻ നാം അവിടുത്തെ അനുവദിക്കുമ്പോൾ നന്ദിയാൽ നിറയുന്നത് അവിടുത്തെ ഹൃദയമാണ്. “എന്നോടുകൂടെ സന്തോഷിക്കുവിൻ; കാരണം, നഷ്ടപ്പെട്ട എന്റെ ആടിനെ ഞാൻ കണ്ടെത്തിയിരിക്കുന്നു,” എന്ന് അവിടുന്ന് പറയുന്നു.
നല്ലിടയന്റെ ഈ പരിശുദ്ധ ചിത്രത്തെക്കുറിച്ച് ഇന്ന് ധ്യാനിക്കുക. ഈ ഉപമയും ഇതിലെ ദൃശ്യവും ധ്യാനിക്കുമ്പോൾ, നിങ്ങളുടെ ഉള്ളിൽ ഉണരുന്ന വിവിധ ചിന്തകൾ, ഓർമ്മകൾ, വികാരങ്ങൾ, ഭയങ്ങൾ എന്നിവ ശ്രദ്ധിക്കുക. നമ്മിൽ ഓരോരുത്തരും വ്യത്യസ്തരാണ്. നാം എവിടെയായിരുന്നാലും, നമ്മുടെ പാപങ്ങളുടെ നടുവിൽത്തന്നെ, നമ്മിൽ ഓരോരുത്തരുടെയും അടുത്തേക്കു വരാൻ നമ്മുടെ കർത്താവ് ആഴമായി ആഗ്രഹിക്കുന്നു. ഈ നല്ലിടയന്റെ അനുകമ്പയെക്കുറിച്ച് ധ്യാനിക്കുന്നത്, നിങ്ങളോടു സംസാരിക്കാനും നിങ്ങൾ വ്യക്തിപരമായി വഴിതെറ്റിപ്പോയ പാതകളിൽനിന്നു പിന്തിരിഞ്ഞ് അവിടുത്തെ അടുത്തേക്കു വരാൻ നിങ്ങളെ നേരിട്ട് ക്ഷണിക്കാനും നമ്മുടെ കർത്താവിനു വാതിൽ തുറന്നുകൊടുക്കും. ഓടിയകലരുത്. അവിടുന്ന് നിങ്ങളുടെ അടുത്തേക്കു വരുമ്പോൾ വിശ്വാസത്തോടെ നിലകൊള്ളുക. അവിടുത്തെ സ്വരം ശ്രവിക്കുക; നിങ്ങളെ വീട്ടിലേക്ക് ചുമന്നുകൊണ്ടുപോകാൻ അവിടുന്ന് എടുത്തുയർത്തുമ്പോൾ അവിടുത്തോട് “അതെ” എന്നു പറയുക.
സൗമ്യനായ എന്റെ യേശുവേ, അങ്ങാണ് നല്ലിടയൻ. അങ്ങ് എന്നെ സ്നേഹിക്കുകയും നിതാന്തശ്രദ്ധയോടും വിശ്വസ്തതയോടുംകൂടെ എന്നെ അന്വേഷിക്കുകയും ചെയ്യുന്നു. അങ്ങയിൽനിന്ന് ഓടിയകലുന്നതും അങ്ങയുടെ സൗമ്യസ്വരത്തിൽനിന്ന് ഒളിച്ചിരിക്കുന്നതും അവസാനിപ്പിക്കാൻ കഴിയുന്നത്ര അങ്ങയിൽ ആശ്രയിക്കാൻ എനിക്കാകട്ടെ. ദയവായി എന്റെ അടുത്തേക്കു വന്ന്, എന്നെ എടുത്തുയർത്തി അങ്ങയുടെ തോളിലേറ്റി വീട്ടിലേക്ക് ചുമന്നുകൊണ്ടുപോകണമേ. യേശുവേ, ഞാൻ അങ്ങയിൽ ശരണപ്പെടുന്നു.
ദൈവകരുണയെക്കുറിച്ചുള്ള വിചിന്തനങ്ങൾ
ഇന്നത്തെ വിശുദ്ധൻ – വിശുദ്ധ ചാൾസ് ബൊറോമിയോ, മെത്രാൻ
വിശുദ്ധ കുർബാനയിലെ വായനകൾക്കുള്ള തിരഞ്ഞെടുപ്പുകൾ
മുകളിൽ നൽകിയിരിക്കുന്ന മുഖ്യചിത്രം: Pixabay-യിൽനിന്നുള്ള Myriams-Fotos-ന്റെ ചിത്രം
