നവംബർ 18, 2021
ആണ്ടുവട്ടത്തിലെ മുപ്പത്തിമൂന്നാം ആഴ്ചയിലെ വ്യാഴാഴ്ച
ഇന്നത്തെ വായനകൾ
അപ്പസ്തോലന്മാരായ വിശുദ്ധ പത്രോസിന്റെയും പൗലോസിന്റെയും ബസിലിക്കകളുടെ പ്രതിഷ്ഠ—ഐച്ഛിക അനുസ്മരണം
വിശുദ്ധ റോസ് ഫിലിപ്പീൻ ഡുഷേൻ, കന്യക—അമേരിക്കൻ ഐക്യനാടുകളിൽ ഐച്ഛിക അനുസ്മരണം
“നിന്റെ ശത്രുക്കൾ നിനക്കെതിരെ തടിമതിൽ ഉയർത്തുകയും നിന്നെ വളഞ്ഞ് എല്ലാ വശത്തുനിന്നും ഞെരുക്കുകയും ചെയ്യുന്ന ദിവസങ്ങൾ നിന്റെമേൽ വരുന്നു. അവർ നിന്നെയും നിന്റെ ഉള്ളിലുള്ള നിന്റെ മക്കളെയും നിലംപരിശാക്കും. നിന്റെ സന്ദർശനത്തിന്റെ സമയം നീ തിരിച്ചറിയാതിരുന്നതിനാൽ, നിന്റെ ഉള്ളിൽ കല്ലിന്മേൽ കല്ല് ശേഷിക്കാൻ അവർ അനുവദിക്കുകയില്ല.” ലൂക്കാ 19:43–44
തന്റെ പീഡാനുഭവത്തിനും മരണത്തിനുമുള്ള ഒരുക്കമായി ആ വിശുദ്ധ നഗരത്തിൽ അവസാനമായി പ്രവേശിക്കാൻ തയ്യാറെടുക്കവേ, ദൂരെനിന്ന് ജറുസലെമിനെ നോക്കിക്കൊണ്ടാണ് യേശു ഈ വാക്കുകൾ പറഞ്ഞത്. ഈ വാക്കുകൾ പറയുമ്പോൾ യേശു ആ നഗരത്തെ ഓർത്തു കരഞ്ഞുവെന്ന് സുവിശേഷം പറയുന്നു. തീർച്ചയായും, ഭാവിയിൽ ദേവാലയത്തിനുണ്ടാകാനിരുന്ന ഭൗതിക നാശത്തെയും റോമൻ സൈന്യത്തിന്റെ അധിനിവേശത്തെയും ഓർത്തുള്ള കണ്ണുനീരായിരുന്നില്ല അത് പ്രധാനമായും. മറിച്ച്, അനേകരുടെ വിശ്വാസമില്ലായ്മയെ ഓർത്തുള്ള കണ്ണുനീരായിരുന്നു അത് ഒന്നാമതായും മുഖ്യമായും. അതായിരുന്നു അവിടുന്ന് വിലപിച്ച യഥാർഥ നാശം.
മുകളിൽ സൂചിപ്പിച്ചതുപോലെ, എ.ഡി. 70-ൽ സൈന്യാധിപനായ ടൈറ്റസ് ജറുസലെം നഗരം ഉപരോധിക്കുകതന്നെ ചെയ്തു. ചക്രവർത്തിയായ തന്റെ പിതാവിന്റെ അധികാരത്തിൻകീഴിൽ പ്രവർത്തിച്ച ടൈറ്റസ് ദേവാലയം മാത്രമല്ല, നഗരത്തിന്റെ വലിയൊരു ഭാഗവും നശിപ്പിക്കുകയും അവിടെ വസിച്ചിരുന്ന യഹൂദരെ കൊന്നൊടുക്കുകയും ചെയ്തു.
ലോകത്തിന്റെ രക്ഷയ്ക്കായുള്ള അന്തിമ ബലിക്കുഞ്ഞാടായി സ്വന്തം ജീവൻ അർപ്പിക്കുന്നതിന് അവസാനമായി ദേവാലയത്തിൽ പ്രവേശിക്കാനായി ജറുസലെം നഗരത്തെ സമീപിക്കുമ്പോൾ, ആ വിശുദ്ധ നഗരത്തിലെ അനേകർ തന്റെ രക്ഷാകരമായ ബലി സ്വീകരിക്കുകയില്ലെന്ന് യേശുവിന് അറിയാമായിരുന്നു. ആ നഗരത്തിലെ അനേകർ ആസന്നമായ തന്റെ മരണത്തിന്റെ ഉപകരണങ്ങളായിത്തീരുമെന്നും ലോകത്തിന്റെ രക്ഷകനെ വധിക്കുന്നതിൽ അവർക്ക് യാതൊരു പശ്ചാത്താപവും ഉണ്ടാകുകയില്ലെന്നും അവിടുത്തേക്ക് അറിയാമായിരുന്നു. ഈ ഒരു കാര്യം എളുപ്പത്തിൽ ശ്രദ്ധിക്കപ്പെടാതെ പോകാമെങ്കിലും, യേശുവിന്റെ പ്രതികരണം ഭയമോ കോപമോ വെറുപ്പോ ആയിരുന്നില്ലെന്ന് ഊന്നിപ്പറയേണ്ടതുണ്ട്. മറിച്ച്, അവിടുത്തെ പ്രതികരണം വിശുദ്ധ ദുഃഖമായിരുന്നു. അവരിൽ അനേകർ അധികം വൈകാതെ തന്നോട് ചെയ്യാനിരുന്ന കാര്യങ്ങൾ അറിഞ്ഞിരുന്നിട്ടും, ആ നഗരത്തെയും അതിലെ നിവാസികളെയും ഓർത്ത് അവിടുന്ന് കരഞ്ഞു.
നിങ്ങൾ അനീതിക്ക് ഇരയാകുമ്പോൾ എങ്ങനെയാണ് പ്രതികരിക്കുന്നത്? പൊട്ടിത്തെറിക്കാറുണ്ടോ? കുറ്റം വിധിക്കാറുണ്ടോ? സ്വയം ന്യായീകരിക്കാൻ ശ്രമിക്കാറുണ്ടോ? അതോ നമ്മുടെ കർത്താവിനെ അനുകരിച്ച് നിങ്ങളുടെ ആത്മാവ് വിശുദ്ധ ദുഃഖത്താൽ നിറയാൻ അനുവദിക്കാറുണ്ടോ? വിശുദ്ധ ദുഃഖം സ്നേഹത്തിന്റെ ഒരു പ്രവൃത്തിയാണ്; പീഡനത്തോടും അനീതിയോടുമുള്ള ഉചിതമായ ക്രൈസ്തവ പ്രതികരണവും അതുതന്നെ. എന്നാൽ, പലപ്പോഴും നമ്മുടെ പ്രതികരണം വിശുദ്ധ ദുഃഖമല്ല, കോപമാണ്. ഇതിലെ പ്രശ്നം, വിശുദ്ധമല്ലാത്ത കോപത്തോടെ പ്രതികരിക്കുന്നത് ഒരു നന്മയും കൈവരുത്തുന്നില്ല എന്നതാണ്. യേശുവിനെ അനുകരിക്കാൻ അത് നമ്മെ സഹായിക്കുന്നില്ല; നാം ആരോടാണോ കോപിക്കുന്നത്, അവർക്കും അത് സഹായകമാകുന്നില്ല. കോപമെന്ന വികാരം ചിലപ്പോൾ നന്മയ്ക്കായി ഉപയോഗിക്കാനാകുമെങ്കിലും, അത് സ്വാർഥത നിറഞ്ഞതും നമ്മോടു ചെയ്ത ഏതെങ്കിലും അനീതിയോടുള്ള പ്രതികരണവുമാകുമ്പോൾ പാപമായിത്തീരുന്നു. വിശുദ്ധമല്ലാത്ത ഈ കോപത്തിനു പകരം, യേശുവിനെ അനുകരിച്ച് വിശുദ്ധ ദുഃഖം വളർത്താൻ ശ്രമിക്കുക. ഈ പുണ്യം നിങ്ങളെ വേദനിപ്പിച്ചവരോടുള്ള സ്നേഹത്തിൽ വളരാൻ നിങ്ങളുടെ ആത്മാവിനെ സഹായിക്കുക മാത്രമല്ല, അവർ ചെയ്തതെന്തെന്ന് കൂടുതൽ വ്യക്തമായി കാണാനും അതുവഴി പശ്ചാത്തപിക്കാനും അവരെ സഹായിക്കുകയും ചെയ്യും.
നിങ്ങളുടെ ജീവിതത്തിൽ നേരിടുന്ന തിന്മയോടുള്ള സ്വന്തം സമീപനത്തെക്കുറിച്ച് ഇന്ന് വിചിന്തനം ചെയ്യുക. നിങ്ങളുടെ ആന്തരികവും ബാഹ്യവുമായ പ്രതികരണങ്ങൾ ശ്രദ്ധാപൂർവം പരിഗണിക്കുക. നിങ്ങൾ കാണുകയും അനുഭവിക്കുകയും ചെയ്യുന്ന പാപങ്ങളെ ഓർത്ത് സ്നേഹത്തോടെ വിലപിക്കാറുണ്ടോ? നിങ്ങളുടെ സ്വന്തം പാപങ്ങളെയും മറ്റുള്ളവരുടെ പാപങ്ങളെയും ഓർത്ത് വിശുദ്ധ ദുഃഖത്തോടെ വിലപിക്കാറുണ്ടോ? സ്നേഹത്തിന്റെ ഈ രൂപം നിങ്ങളിൽ വളർത്താൻ പരിശ്രമിക്കുക. അപ്പോൾ, നിങ്ങൾ ചെയ്യുന്ന പാപങ്ങളിൽനിന്നും മറ്റുള്ളവരുടെ പാപങ്ങൾമൂലം നിങ്ങൾ സഹിക്കുന്ന അവസ്ഥകളിൽനിന്നും മാറ്റമുണ്ടാകാൻ സഹായിക്കുന്നതിനുള്ള പ്രേരണയായി അതു മാറുമെന്ന് നിങ്ങൾ കണ്ടെത്തും.
ദുഃഖിതനായ എന്റെ കർത്താവേ, അനേകരുടെ പാപങ്ങൾ അങ്ങ് സഹിച്ചു. അങ്ങയോട് ക്രൂരതയും അനീതിയും കാട്ടപ്പെട്ടു. അങ്ങ് മുൻകൂട്ടി കണ്ടവ ഉൾപ്പെടെ ഈ പാപങ്ങളോടെല്ലാം വിശുദ്ധ ദുഃഖത്തിന്റെ സ്നേഹത്തോടെയാണ് അങ്ങ് പ്രതികരിച്ചത്. ആ ദുഃഖം എല്ലാവരോടും യഥാർഥ അനുകമ്പയും കരുതലും പുലർത്താൻ അങ്ങയെ നയിച്ചു. അങ്ങയുടെ ദുഃഖിതഹൃദയത്തിന്റെ വിശുദ്ധിയിൽ എനിക്കും പങ്കുചേരാനാകേണ്ടതിന്, അങ്ങയുടെ ഇതേ സ്നേഹം അനുകരിക്കാനുള്ള കൃപ എനിക്കു നൽകണമേ. ഈശോയേ, അങ്ങയിൽ ഞാൻ ശരണപ്പെടുന്നു.
ക്രിസ്തുരാജനോടുള്ള നൊവേന
നവംബർ 12–20, 2021
ദൈവകരുണയെക്കുറിച്ചുള്ള വിചിന്തനങ്ങൾ
ആണ്ടുവട്ടത്തിലേക്കുള്ള വിശുദ്ധലിഖിത ധ്യാനങ്ങൾ
ഇന്നത്തെ വിശുദ്ധർ –
അപ്പസ്തോലന്മാരായ വിശുദ്ധ പത്രോസിന്റെയും പൗലോസിന്റെയും ബസിലിക്കകളുടെ പ്രതിഷ്ഠ
വിശുദ്ധ റോസ് ഫിലിപ്പീൻ ഡുഷേൻ, കന്യക
വിശുദ്ധ കുർബാനയിലെ വായനകൾക്കുള്ള തിരഞ്ഞെടുപ്പുകൾ
