നവംബർ 19, 2021
ആണ്ടുവട്ടത്തിലെ മുപ്പത്തിമൂന്നാം വാരത്തിലെ വെള്ളിയാഴ്ച
ഇന്നത്തെ വായനകൾ
അവൻ എല്ലാ ദിവസവും ദേവാലയപരിസരത്ത് പഠിപ്പിച്ചുകൊണ്ടിരുന്നു. അതേസമയം, പുരോഹിതപ്രമുഖരും നിയമജ്ഞരും ജനനേതാക്കളും അവനെ വധിക്കാൻ ശ്രമിച്ചുകൊണ്ടിരുന്നു. എന്നാൽ, ജനമെല്ലാം അവന്റെ ഓരോ വാക്കും ശ്രദ്ധയോടെ കേട്ടുകൊണ്ടിരുന്നതിനാൽ, തങ്ങളുടെ ലക്ഷ്യം നിറവേറ്റാൻ അവർക്ക് ഒരു വഴിയും കണ്ടെത്താനായില്ല. ലൂക്കാ 19:47–48
അടുത്തുവരുന്ന പെസഹാത്തിരുനാളിനായി യേശു ജറുസലെമിൽ എത്തിയതേയുണ്ടായിരുന്നുള്ളൂ. ആ വിശുദ്ധനഗരത്തിൽ എത്തിയ അവൻ പിറ്റേന്ന് വീണ്ടും മടങ്ങിവന്ന് ദേവാലയപരിസരത്തു പ്രവേശിച്ചു. ദേവാലയത്തിലെ ബലികൾക്കായി മൃഗങ്ങളെ വിറ്റിരുന്നവരുടെ അഴിമതി കണ്ടപ്പോൾ, ദേവാലയത്തെ ഈ അഴിമതിയിൽനിന്നു ശുദ്ധീകരിക്കാനായി യേശു തീക്ഷ്ണതയോടെ പ്രസംഗിച്ചു. ഏശയ്യാ പ്രവാചകനെ ഉദ്ധരിച്ചുകൊണ്ട് അവൻ വിളിച്ചുപറഞ്ഞു: “എന്റെ ഭവനം പ്രാർഥനാലയമായിരിക്കും എന്ന് എഴുതപ്പെട്ടിരിക്കുന്നു; എന്നാൽ നിങ്ങൾ അതിനെ കവർച്ചക്കാരുടെ ഗുഹയാക്കിയിരിക്കുന്നു.” പുരോഹിതപ്രമുഖരുടെയും നിയമജ്ഞരുടെയും ജനനേതാക്കളുടെയും പ്രതികരണം ലൂക്കായുടെ സുവിശേഷം ചൂണ്ടിക്കാണിക്കുന്നു. അവർ “അവനെ വധിക്കാൻ ശ്രമിച്ചുകൊണ്ടിരുന്നു.” എന്നാൽ, സുവിശേഷം തുടർന്നു വിവരിക്കുന്നതുപോലെ, “ജനമെല്ലാം അവന്റെ ഓരോ വാക്കും ശ്രദ്ധയോടെ കേട്ടുകൊണ്ടിരുന്നതിനാൽ, തങ്ങളുടെ ലക്ഷ്യം നിറവേറ്റാൻ അവർക്ക് ഒരു വഴിയും കണ്ടെത്താനായില്ല.”
ഈ ഭാഗത്തെ അതിന്റെ പശ്ചാത്തലത്തിൽ പരിഗണിക്കേണ്ടത് പ്രധാനമാണ്. ദേവാലയത്തെ അഴിമതിയിൽനിന്നു ശുദ്ധീകരിക്കാൻ ലക്ഷ്യമിട്ട വാക്കുകളായിരുന്നു യേശു സംസാരിച്ചത്. ദേവാലയനികുതിയിൽനിന്നു പ്രയോജനം നേടിയിരുന്ന ദേവാലയപുരോഹിതരുടെ അംഗീകാരത്തോടെ, സ്വാർഥലാഭത്തിനായി ദൈവാരാധനയെ ഉപയോഗിച്ച് ദേവാലയത്തെ ഒരു ചന്തയാക്കി മാറ്റിയിരുന്ന അനേകരുണ്ടായിരുന്നു. യേശുവിന് ഇത് വ്യക്തമായി കാണാൻ കഴിഞ്ഞു; ഈ പ്രവൃത്തികളിലെ അഴിമതി ജനങ്ങളിൽ പലരും തിരിച്ചറിഞ്ഞിട്ടുണ്ടാകണം. ആചാരപ്രകാരമുള്ള ബലികൾക്കും പെസഹാഭക്ഷണത്തിനുമായി മൃഗങ്ങളെ വാങ്ങേണ്ടിയിരുന്നെങ്കിലും, ഈ ദുരുപയോഗം അവരിൽ പലരെയും അസ്വസ്ഥരാക്കിയിട്ടുണ്ടാകാനാണ് കൂടുതൽ സാധ്യത. അതിനാൽ, യേശു തീക്ഷ്ണതയോടെ അതിനെ അപലപിച്ചുകൊണ്ട് സംസാരിച്ചപ്പോൾ, അഴിമതിക്കു ഉത്തരവാദികളായവർ കോപാകുലരായി; ജനങ്ങൾക്കാകട്ടെ ആശ്വാസം ലഭിച്ചു. അതുകൊണ്ടാണ് അവർ “അവന്റെ ഓരോ വാക്കും ശ്രദ്ധയോടെ കേട്ടുകൊണ്ടിരുന്നത്.”
സുവിശേഷം എപ്പോഴും ആശ്വാസം പകരുന്നതാണ്. ഹൃദയം തുറന്നിരിക്കുന്നവരെ അത്, പറയപ്പെടുന്ന ഓരോ വാക്കും ശ്രദ്ധയോടെ കേൾക്കാൻ പ്രേരിപ്പിക്കുന്നു. അത് നവോന്മേഷവും ഉണർവും നൽകുന്നു, വ്യക്തതയും പ്രചോദനവും പകരുന്നു. സാധാരണയായി സുവിശേഷത്തെക്കുറിച്ചു ചിന്തിക്കുമ്പോൾ, സൗമ്യമായി ക്ഷണിക്കുന്ന വാക്കുകളാണ് നമ്മുടെ മനസ്സിൽ വരുന്നത്—പാപിയോടുള്ള കരുണയുടെയും ക്ലേശിക്കുന്നവരോടുള്ള അനുകമ്പയുടെയും വാക്കുകൾ. എന്നാൽ ചിലപ്പോൾ നമ്മുടെ കർത്താവിൽനിന്നുള്ള നിർമലമായ സുവിശേഷസന്ദേശം പാപത്തെയും തിന്മയെയും ശക്തമായി എതിർക്കുന്നു. ഇത് തിന്മ പ്രവർത്തിക്കുന്നവരെ ഞെട്ടിച്ചേക്കാമെങ്കിലും, നിർമലമായ വിശ്വാസമുള്ളവർക്ക് ഈ വാക്കുകളും നവോന്മേഷവും ശക്തിയും പകരുന്നു.
ഇന്ന് നമുക്കു സുവിശേഷസന്ദേശം അതിന്റെ പൂർണതയിൽ ആവശ്യമാണ്. മാനസാന്തരത്തിലേക്കുള്ള യേശുവിന്റെ സൗമ്യമായ ക്ഷണം അനേകർ കേൾക്കേണ്ടതുണ്ട്; അതിലൂടെ അവരുടെ കനത്ത ഭാരങ്ങൾ നീങ്ങിപ്പോകുന്നു. എന്നാൽ മറ്റു പലരും തിന്മയെ അപലപിക്കുന്ന അവന്റെ ഉറച്ച വാക്കുകൾ കേൾക്കേണ്ടതുണ്ട്. നമ്മുടെ കർത്താവിന്റെ അപ്പസ്തോലിക ശുശ്രൂഷയിൽ നാം പൂർണമായി പങ്കുചേരണമെങ്കിൽ, ഈ രണ്ടു സന്ദേശങ്ങളും പ്രഘോഷിക്കപ്പെടേണ്ടത് സഭയ്ക്ക് ഒന്നാകെ ആവശ്യമാണ്. തിന്മയെ അപലപിക്കാനും ശാസിക്കാനും മറ്റുള്ളവരെ മാനസാന്തരത്തിലേക്കു വിളിക്കാനും നമ്മുടെ കർത്താവിനു മാത്രമേ അവകാശമുള്ളൂ. എന്നാൽ നമ്മുടെ കർത്താവിന്റെ ഈ ദൗത്യത്തിൽ പങ്കുചേരാൻ നാമെല്ലാവരും വിളിക്കപ്പെട്ടിരിക്കുന്നു. മറ്റുള്ളവരുടെ ഹൃദയങ്ങളെ വിധിക്കാൻ നമുക്ക് അവകാശമില്ലെങ്കിലും, നമ്മുടെ ലോകത്തിലും നമ്മുടെ സഭയ്ക്കുള്ളിൽപ്പോലും വസ്തുനിഷ്ഠമായ തിന്മയും ക്രമക്കേടും കാണുമ്പോൾ, നമ്മുടെ കർത്താവിനോടൊപ്പം നാം വിളിച്ചുപറയണം: “എന്റെ ഭവനം പ്രാർഥനാലയമായിരിക്കും; എന്നാൽ നിങ്ങൾ അതിനെ കവർച്ചക്കാരുടെ ഗുഹയാക്കിയിരിക്കുന്നു.” സത്യം ധൈര്യത്തോടും നിർഭയത്വത്തോടുംകൂടെ പ്രഘോഷിക്കുകയും മറ്റുള്ളവരെ മാനസാന്തരത്തിലേക്കു വിളിക്കുകയും ചെയ്യുന്ന ദൈവദൂതരുടെ വിശുദ്ധവും ദൈവപ്രചോദിതവുമായ വാക്കുകൾ കേൾക്കുമ്പോൾ, അവരുടെ ഓരോ വാക്കും ശ്രദ്ധയോടെ കേൾക്കുന്ന നമുക്ക് അവ പ്രചോദനവും ഉണർവും ആശ്വാസവും പകരണം.
ദൈവപ്രചോദിതവും ലോകത്തിനുള്ളിലെയും നമ്മുടെ സഭയ്ക്കുള്ളിൽപ്പോലുമുള്ള അഴിമതിക്കെതിരെ തീക്ഷ്ണമായി നിലകൊള്ളുന്നതുമായ, നമ്മുടെ കാലഘട്ടത്തിൽ പ്രഘോഷിക്കപ്പെടേണ്ട സുവിശേഷസന്ദേശങ്ങളെക്കുറിച്ച് ഇന്ന് വിചിന്തനം ചെയ്യുക. ഇത്തരത്തിലുള്ള വിശുദ്ധമായ പ്രസംഗത്തെ പിന്തുണയ്ക്കാനും അതിൽനിന്നു പ്രചോദനം ഉൾക്കൊള്ളാനും മനസ്സു തുറക്കുക. ഇന്ന് ദൈവത്തിന്റെ പ്രവാചകരുടെ ഈ വിശുദ്ധവാക്കുകൾ ഓരോന്നും ശ്രദ്ധയോടെ കേൾക്കുക. നിങ്ങൾ അങ്ങനെ ചെയ്യുമ്പോൾ, ദൈവം അവരെ സംരക്ഷിക്കുകയും തന്റെ വിശുദ്ധമായ ശുദ്ധീകരണദൗത്യം തുടരാൻ അവരെ പ്രചോദിപ്പിക്കുകയും ചെയ്യും.
എന്നെ ശുദ്ധീകരിക്കുന്ന കർത്താവേ, നമ്മുടെ ലോകത്തിനുള്ളിലെയും ചിലപ്പോഴൊക്കെ നമ്മുടെ സഭയ്ക്കുള്ളിൽപ്പോലുമുള്ള അഴിമതി അങ്ങയുടെ വിശുദ്ധമായ പ്രസംഗവും ശുദ്ധീകരണപ്രവർത്തനവും ആവശ്യപ്പെടുന്നു. അങ്ങ് ദേവാലയം ശുദ്ധീകരിച്ചതുപോലെ എല്ലാവരും ശുദ്ധീകരിക്കപ്പെടേണ്ടതിന്, അങ്ങയുടെ ദൂതരെ ആവശ്യമുള്ളവരുടെ അടുക്കലേക്ക് അയയ്ക്കണമേ. അങ്ങ് എന്നെ വിളിക്കുന്ന വിധങ്ങളിൽ ഈ ദൗത്യത്തിൽ ഞാനും പങ്കുചേരട്ടെ. കരുണയും തീക്ഷ്ണതയും നിറഞ്ഞ അങ്ങയുടെ സ്നേഹഹൃദയത്തിൽനിന്നു പുറപ്പെടുന്ന ഓരോ വാക്കും ഞാൻ എപ്പോഴും ശ്രദ്ധയോടെ കേൾക്കട്ടെ. ഈശോയേ, അങ്ങയിൽ ഞാൻ ശരണപ്പെടുന്നു.
ക്രിസ്തുരാജനോടുള്ള നൊവേന
നവംബർ 12–20, 2021
ദൈവകരുണയെക്കുറിച്ചുള്ള വിചിന്തനങ്ങൾ
ആണ്ടുവട്ടത്തിലേക്കുള്ള വിശുദ്ധലിഖിത ധ്യാനങ്ങൾ
വിശുദ്ധ കുർബാനയിലെ വായനകൾക്കുള്ള തിരഞ്ഞെടുപ്പുകൾ
_-_James_Tissot.jpg){kind=link}