ഏപ്രിൽ 29, 2022
ഈസ്റ്റർകാലം രണ്ടാം ആഴ്ചയിലെ വെള്ളിയാഴ്ച
ഇന്നത്തെ വായനകൾ
സിയെന്നായിലെ വിശുദ്ധ കത്രീന, കന്യകയും വേദപാരംഗതയും—അനുസ്മരണം
യേശു കണ്ണുകളുയർത്തി, വലിയൊരു ജനക്കൂട്ടം തന്റെ അടുക്കലേക്കു വരുന്നതു കണ്ടപ്പോൾ ഫിലിപ്പോസിനോടു ചോദിച്ചു: “ഇവർക്കു ഭക്ഷിക്കാൻ വേണ്ടത്ര ഭക്ഷണം നാം എവിടെനിന്നു വാങ്ങും?” അവനെ പരീക്ഷിക്കാനാണ് യേശു ഇതു ചോദിച്ചത്; താൻ എന്തു ചെയ്യാൻ പോകുന്നുവെന്ന് അവിടുത്തേക്ക് അറിയാമായിരുന്നു. യോഹന്നാൻ 6:5–6
താൻ എന്തു ചെയ്യാൻ പോകുന്നുവെന്ന് ദൈവത്തിന് എപ്പോഴും അറിയാം. നമ്മുടെ ജീവിതത്തെക്കുറിച്ച് അവിടുത്തേക്ക് എപ്പോഴും തികഞ്ഞ ഒരു പദ്ധതിയുണ്ട്. എല്ലായ്പ്പോഴും. അപ്പവും മീനും വർധിപ്പിച്ച അത്ഭുതത്തിലെ ഒരു ചെറിയ ഭാഗമാണ് മുകളിലെ വചനഭാഗത്തിൽ നാം വായിക്കുന്നത്. അവരുടെ പക്കലുണ്ടായിരുന്ന ഏതാനും അപ്പവും മീനും വർധിപ്പിച്ച് അയ്യായിരത്തിലധികം ആളുകൾക്ക് ഭക്ഷണം നൽകാൻ പോകുകയാണെന്ന് യേശുവിന് അറിയാമായിരുന്നു. എന്നാൽ അതു ചെയ്യുന്നതിനുമുമ്പ് ഫിലിപ്പോസിനെ പരീക്ഷിക്കാൻ അവിടുന്ന് ആഗ്രഹിച്ചു; അങ്ങനെതന്നെ ചെയ്തു. യേശു എന്തുകൊണ്ടാണ് ഫിലിപ്പോസിനെ പരീക്ഷിക്കുന്നത്? എന്തുകൊണ്ടാണ് ചിലപ്പോഴൊക്കെ നമ്മെയും പരീക്ഷിക്കുന്നത്?
ഫിലിപ്പോസ് എന്തു പറയുമെന്ന് അറിയാനുള്ള ആകാംക്ഷകൊണ്ടല്ല യേശു അങ്ങനെ ചെയ്തത്. ഫിലിപ്പോസിനെ വെറുതെ കളിപ്പിക്കുകയുമായിരുന്നില്ല അവിടുന്ന്. മറിച്ച്, ഫിലിപ്പോസിന് തന്റെ വിശ്വാസം പ്രകടിപ്പിക്കാൻ അവസരം നൽകുകയായിരുന്നു അവിടുന്ന്. അതിനാൽ, വാസ്തവത്തിൽ ഫിലിപ്പോസിനുണ്ടായ ഈ “പരീക്ഷണം” അവനുള്ള ഒരു ദാനമായിരുന്നു; കാരണം, പരീക്ഷയിൽ വിജയിക്കാനുള്ള അവസരം അത് അവനു നൽകി.
മാനുഷിക യുക്തിയെ മാത്രം ആശ്രയിക്കാതെ വിശ്വാസത്തിന്റെ അടിസ്ഥാനത്തിൽ പ്രവർത്തിക്കാൻ ഫിലിപ്പോസിനെ സഹായിക്കുകയായിരുന്നു ഈ പരീക്ഷണത്തിന്റെ ലക്ഷ്യം. തീർച്ചയായും, യുക്തിപൂർവം ചിന്തിക്കുന്നത് നല്ലതാണ്. എന്നാൽ പലപ്പോഴും ദൈവത്തിന്റെ ജ്ഞാനം മാനുഷിക യുക്തിയെ അതിലംഘിക്കുന്നു. മറ്റൊരു വിധത്തിൽ പറഞ്ഞാൽ, അത് യുക്തിയെ തികച്ചും പുതിയൊരു തലത്തിലേക്ക് ഉയർത്തുന്നു. ദൈവത്തിലുള്ള വിശ്വാസംകൂടി കണക്കിലെടുക്കുന്ന ഒരു തലത്തിലേക്ക് അതിനെ എത്തിക്കുന്നു.
അതിനാൽ, ദൈവപുത്രൻ തങ്ങളോടൊപ്പമുണ്ടെന്ന വസ്തുത കണക്കിലെടുത്ത് ഒരു പരിഹാരം നിർദേശിക്കാനായിരുന്നു ആ നിമിഷത്തിൽ ഫിലിപ്പോസ് വിളിക്കപ്പെട്ടത്. എന്നാൽ അവൻ പരീക്ഷയിൽ പരാജയപ്പെടുന്നു. ഇരുനൂറു ദിവസത്തെ കൂലിപോലും ആ ജനക്കൂട്ടത്തിനു ഭക്ഷണം നൽകാൻ തികയില്ലെന്ന് അവൻ ചൂണ്ടിക്കാണിക്കുന്നു. എന്നാൽ അന്ത്രയോസ് ഒരുവിധത്തിൽ സഹായത്തിനെത്തുന്നു. ഏതാനും അപ്പവും കുറച്ചു മീനും കൈവശമുള്ള ഒരു ബാലൻ അവിടെയുണ്ടെന്ന് അന്ത്രയോസ് പറയുന്നു. നിർഭാഗ്യവശാൽ, അവൻ ഇങ്ങനെയും കൂട്ടിച്ചേർക്കുന്നു: “എന്നാൽ ഇത്രയധികം പേർക്ക് ഇവകൊണ്ട് എന്തു പ്രയോജനം?”
എങ്കിലും, അന്ത്രയോസിലുള്ള വിശ്വാസത്തിന്റെ ഈ ചെറിയ തീപ്പൊരി മതി, ജനക്കൂട്ടത്തോട് ചാരിയിരിക്കാൻ പറഞ്ഞ് ഭക്ഷണം വർധിപ്പിക്കുന്ന അത്ഭുതം പ്രവർത്തിക്കാൻ യേശുവിന്. ഈ ഏതാനും അപ്പത്തെയും മീനിനെയും കുറിച്ച് പറയേണ്ടത് പ്രധാനമാണെന്ന ഒരു ചെറിയ ഉൾക്കാഴ്ചയെങ്കിലും അന്ത്രയോസിന് ഉണ്ടായിരുന്നതായി തോന്നുന്നു. അന്ത്രയോസിൽനിന്ന് ഇതു സ്വീകരിക്കുന്ന യേശു ബാക്കിയെല്ലാം നിർവഹിക്കുന്നു.
അൽപ്പമാത്രമായ വിശ്വാസംപോലും എത്ര വിലയേറിയ ദാനമാണെന്ന് ഇന്ന് ധ്യാനിക്കുക. എന്തു ചെയ്യണമെന്ന് അറിയാത്ത വിഷമകരമായ സാഹചര്യങ്ങളിൽ നാം പലപ്പോഴും അകപ്പെടാറുണ്ട്. യേശുവിന് പ്രവർത്തിക്കാൻ നമ്മിൽ എന്തെങ്കിലുമുണ്ടാകേണ്ടതിന്, അൽപ്പമെങ്കിലും വിശ്വാസമുണ്ടാകാൻ നാം പരിശ്രമിക്കണം. അവിടുന്ന് എന്തു ചെയ്യാൻ ആഗ്രഹിക്കുന്നു എന്നതിന്റെ പൂർണചിത്രം നമുക്കു ലഭിച്ചെന്നുവരില്ല; എങ്കിലും ദൈവം നമ്മെ ഏതു ദിശയിലേക്കാണ് നയിക്കുന്നത് എന്നതിനെക്കുറിച്ച് ഒരു ചെറിയ ധാരണയെങ്കിലും നമുക്കുണ്ടാകണം. ഈ അൽപ്പവിശ്വാസമെങ്കിലും പ്രകടിപ്പിക്കാൻ കഴിഞ്ഞാൽ, നാമും പരീക്ഷയിൽ വിജയിക്കും.
കർത്താവേ, എന്റെ ജീവിതത്തെക്കുറിച്ചുള്ള അങ്ങയുടെ പൂർണ്ണമായ പദ്ധതിയിൽ വിശ്വസിക്കാൻ എന്നെ സഹായിക്കണമേ. ജീവിതം നിയന്ത്രണാതീതമാകുന്നതായി തോന്നുമ്പോഴും എല്ലാം അങ്ങയുടെ നിയന്ത്രണത്തിലാണെന്ന് അറിയാൻ എന്നെ സഹായിക്കണമേ. ആ നിമിഷങ്ങളിൽ ഞാൻ പ്രകടമാക്കുന്ന വിശ്വാസം അങ്ങേക്കുള്ള ഒരു സമ്മാനമാകട്ടെ; അങ്ങനെ അങ്ങയുടെ മഹത്വത്തിനായി അങ്ങേക്ക് അത് ഉപയോഗിക്കാമല്ലോ. ഈശോയേ, ഞാൻ അങ്ങയിൽ ശരണപ്പെടുന്നു.
ദൈവകരുണയെക്കുറിച്ചുള്ള വിചിന്തനങ്ങൾ
ഇന്നത്തെ വിശുദ്ധ – സിയെന്നായിലെ വിശുദ്ധ കത്രീന, കന്യകയും വേദപാരംഗതയും
വിശുദ്ധ കുർബാനയിലെ വായനകൾക്കുള്ള തിരഞ്ഞെടുപ്പുകൾ
