യേശു എപ്പോഴും കൂടെയുണ്ട്

2022 ഓഗസ്റ്റ് 1
ആണ്ടുവട്ടക്കാലത്തിലെ പതിനെട്ടാം ആഴ്ചയിലെ തിങ്കളാഴ്ച
ഇന്നത്തെ വായനകൾ

മെത്രാനും സഭാപ്രബോധകനുമായ വിശുദ്ധ അൽഫോൻസ് മരിയ ദെ ലിഗോരി—ഓർമ്മ

സ്നാപകയോഹന്നാന്റെ മരണത്തെക്കുറിച്ച് കേട്ടപ്പോൾ യേശു വഞ്ചിയിൽ കയറി തനിച്ച് വിജനമായ ഒരിടത്തേക്കു മാറിപ്പോയി. ഇതറിഞ്ഞ ജനക്കൂട്ടം തങ്ങളുടെ പട്ടണങ്ങളിൽനിന്ന് കാൽനടയായി അവനെ അനുഗമിച്ചു. കരയ്ക്കിറങ്ങിയപ്പോൾ വലിയ ജനക്കൂട്ടത്തെ കണ്ട് അവന്റെ ഹൃദയം അവരോടുള്ള അനുകമ്പയാൽ നിറഞ്ഞു; അവരിലെ രോഗികളെ അവൻ സുഖപ്പെടുത്തി. മത്തായി 14:13-14

മാനുഷികമായി പറഞ്ഞാൽ, സ്നാപകയോഹന്നാന്റെ മരണം യേശുവിന്റെ ഹൃദയത്തെ ദുഃഖിപ്പിച്ചു. യേശു യോഹന്നാനെ സ്നേഹിച്ചിരുന്നു; യോഹന്നാന്റെ ശിരച്ഛേദനം അവിടുത്തെ അഗാധമായി ദുഃഖിപ്പിച്ചു. അതുകൊണ്ട് അവിടുന്ന് ഒരു വള്ളത്തിൽ കയറി തനിച്ച് ഒരു വിജനസ്ഥലത്തേക്കു പോയി. എന്നാൽ ജനക്കൂട്ടത്തിന് ഇനിയും ഏറെ ലഭിക്കാനുള്ള ദാഹമുണ്ടായിരുന്നു! യേശുവിനെ കാണാനും അവിടുത്തെ വാക്കുകൾ കേൾക്കാനും അവർ ആഗ്രഹിച്ചു. രോഗികളായ അനേകരെ അവർക്ക് അറിയാമായിരുന്നു; യേശു അവരെ സുഖപ്പെടുത്തണമെന്ന് അവർ ആഗ്രഹിച്ചു. അതിനാൽ, തനിച്ചായിരിക്കാൻ ജനക്കൂട്ടത്തിൽനിന്ന് അവിടുന്ന് മാറിപ്പോയിരുന്നിട്ടും അവർ അവിടുത്തെ തേടിച്ചെന്നു.

യേശുവിന്റെ പ്രതികരണം എന്തായിരുന്നു? അവിടുന്ന് അവരെ നോക്കി നെടുവീർപ്പിട്ടുകൊണ്ട്, “ഇവർ എന്തുകൊണ്ട് എന്നെ തനിച്ചുവിടുന്നില്ല? ഞാൻ ദുഃഖത്തിലാണെന്ന് ഇവർക്ക് അറിയില്ലേ?” എന്ന് തന്നോടുതന്നെ പറഞ്ഞോ? ഇല്ല. പകരം, യേശു അവരോടുള്ള കരുണയാലും അനുകമ്പയാലും നിറഞ്ഞു; അവരിലെ അനേകം രോഗികളെ സുഖപ്പെടുത്താൻ അവിടുന്ന് അവരുടെ അടുക്കലേക്കു ചെന്നു.

നമ്മുടെ കർത്താവിന്റെ ഹൃദയത്തെയും അനുകമ്പയെയും അടുത്തറിയാൻ ഇത് നമ്മെ സഹായിക്കുന്നു. പലപ്പോഴും ദൈവത്തിന്റെ അടുക്കലേക്കു പോകാൻ നമുക്ക് ഭയമാണ്. നമ്മുടെ പാപം നിമിത്തം അവിടുത്തിലേക്കു തിരിയാൻ നാം ഭയപ്പെടുന്നു. അവിടുന്ന് നമ്മെക്കുറിച്ച് എന്തു ചിന്തിക്കുമെന്നും നമ്മോട് എന്തു പറയുമെന്നും നാം ഭയപ്പെടുന്നു. കുറ്റബോധവും ലജ്ജയും നമ്മെ അലട്ടുന്നു; തൽഫലമായി, അവിടുത്തെ തേടിച്ചെല്ലാൻ നമുക്കു കഴിയാതെ പോകുന്നു.

എന്നാൽ ഈ സംഭവത്തിൽ തന്നെ തേടിച്ചെന്നവരോട് യേശുവിന് അനുകമ്പ തോന്നിയതുപോലെ, നാം അവിടുത്തെ തേടിച്ചെല്ലുമ്പോഴെല്ലാം നമ്മോടും അവിടുത്തേക്ക് ഏറ്റവും ആഴമായ അനുകമ്പ എപ്പോഴും ഉണ്ടായിരിക്കും. നമ്മുടെ ജീവിതം പാപത്തിൽ ആണ്ടുപോയിരിക്കുന്നുവെന്ന് തിരിച്ചറിഞ്ഞിട്ടും നാം അവിടുത്തെ അടുക്കലേക്ക് ഓടിച്ചെന്നാൽ, അനുകമ്പയോടും കരുണയോടുംകൂടെ അവിടുന്ന് നമ്മെ നോക്കും. അവിടുത്തെ സൗഖ്യവും കരുണയും തേടി നാം വീണ്ടും വീണ്ടും അവിടുത്തിലേക്കു മടങ്ങിവരുന്നത് അവിടുത്തേക്ക് ഒരിക്കലും മടുപ്പുണ്ടാക്കുന്നില്ല. നാം എപ്പോഴും അവിടുന്നിൽ പ്രത്യാശവെക്കുകയും ഏറ്റവും വലിയ വിശ്വാസത്തോടെ അവിടുത്തിലേക്കു തിരിയുകയും വേണം.

നിങ്ങൾ ആയിരിക്കുന്ന അവസ്ഥയിൽത്തന്നെ യേശുവിലേക്കു തിരിയാൻ നിങ്ങൾക്ക് എത്രമാത്രം സ്വാതന്ത്ര്യമുണ്ടെന്ന് ഇന്ന് വിചിന്തനം ചെയ്യുക. അവിടുന്ന് നിങ്ങളെക്കുറിച്ച് എന്തു ചിന്തിക്കുമെന്ന ഭയമോ ആശങ്കയോ നിങ്ങൾക്കുണ്ടോ? നിങ്ങളുടെ പാപത്തെയോ ബലഹീനതയെയോ ഓർത്ത് നിങ്ങൾ ലജ്ജിക്കുന്നുണ്ടോ? അവിടുന്ന് നിങ്ങളെ വിധിക്കുമെന്നും നിങ്ങളെക്കുറിച്ച് കരുതലുണ്ടാകില്ലെന്നും നിങ്ങൾ ആശങ്കപ്പെടുന്നുണ്ടോ? അവിടുത്തെ സമൃദ്ധമായ കരുണയിൽ വിശ്വാസമർപ്പിച്ച് ഭയമില്ലാതെ അവിടുത്തെ അടുക്കലേക്ക് ഓടിച്ചെല്ലുക.

അത്യന്തം കരുണയുള്ള എന്റെ കർത്താവേ, അങ്ങയുടെ സ്നേഹത്തിലും കരുണയിലും ആശ്രയിക്കാൻ എന്നെ സഹായിക്കണമേ. ഞാൻ അങ്ങയുടെ അടുക്കലേക്കു വരണമെന്ന് അങ്ങ് എപ്പോഴും ആഗ്രഹിക്കുന്നുവെന്ന് അറിയാൻ എന്നെ സഹായിക്കണമേ. ഞാൻ അങ്ങയുടെ അടുക്കൽ വരുന്നതിൽ അങ്ങ് ഒരിക്കലും മടുക്കാത്തതുപോലെ, അങ്ങയുടെ അടുക്കൽ വരുന്നതിൽ ഞാനും ഒരിക്കലും മടുക്കാതിരിക്കട്ടെ. ഈശോയേ, ഞാൻ അങ്ങയിൽ ശരണപ്പെടുന്നു.