2022 നവംബർ 25
ആണ്ടുവട്ടത്തിലെ മുപ്പത്തിനാലാം ആഴ്ചയിലെ വെള്ളിയാഴ്ച
ഇന്നത്തെ വായനകൾ
അലക്സാണ്ട്രിയായിലെ വിശുദ്ധ കത്രീന, കന്യകയും രക്തസാക്ഷിയും—ഐച്ഛിക അനുസ്മരണം
“…ദൈവരാജ്യം സമീപിച്ചിരിക്കുന്നുവെന്ന് അറിയുക.” ലൂക്കാ 21:31b
“സ്വർഗസ്ഥനായ ഞങ്ങളുടെ പിതാവേ” എന്ന പ്രാർത്ഥന ചൊല്ലുമ്പോഴെല്ലാം നാം ഇതിനായി പ്രാർത്ഥിക്കുന്നു. “അങ്ങയുടെ രാജ്യം വരണമേ” എന്നു നാം പ്രാർത്ഥിക്കുന്നു. അങ്ങനെ പ്രാർത്ഥിക്കുമ്പോൾ നിങ്ങൾ അത് ഹൃദയപൂർവം ആഗ്രഹിക്കുന്നുണ്ടോ?
ഈ സുവിശേഷഭാഗത്തിൽ ദൈവരാജ്യം സമീപിച്ചിരിക്കുന്നുവെന്ന് യേശു പറയുന്നു. അത് സമീപത്താണ്; എങ്കിലും പലപ്പോഴും അത് വളരെ അകലെയുമാണ്. രണ്ടു വിധത്തിലാണ് അത് സമീപത്തായിരിക്കുന്നത്. ഒന്നാമതായി, യേശു തന്റെ സർവപ്രഭയോടും മഹത്വത്തോടുംകൂടെ മടങ്ങിവന്ന് സകലതും നവീകരിക്കും എന്ന അർത്ഥത്തിൽ അത് സമീപത്താണ്. അങ്ങനെ, അവിടുത്തെ ശാശ്വതമായ രാജ്യം സ്ഥാപിക്കപ്പെടും.
രണ്ടാമതായി, ഒരു പ്രാർത്ഥനയിലൂടെ നമുക്ക് അതിനെ സമീപിക്കാം എന്ന അർത്ഥത്തിൽ അവിടുത്തെ രാജ്യം സമീപത്താണ്. നാം യേശുവിനെ അകത്തേക്കു പ്രവേശിക്കാൻ അനുവദിച്ചാൽ മാത്രം മതി; നമ്മുടെ ഹൃദയങ്ങളിൽ വന്ന് തന്റെ രാജ്യം സ്ഥാപിക്കാൻ അവിടുന്ന് അതിയായി ആഗ്രഹിക്കുന്നു. നിർഭാഗ്യവശാൽ, പലപ്പോഴും നാം അവിടുത്തെ അകത്തേക്കു പ്രവേശിക്കാൻ അനുവദിക്കുന്നില്ല. നാം പലപ്പോഴും അവിടുത്തെ അകറ്റിനിർത്തുന്നു; അവിടുത്തെ വിശുദ്ധവും പരിപൂർണവുമായ തിരുഹിതത്തിലേക്ക് പൂർണമായി പ്രവേശിക്കണമോ വേണ്ടയോ എന്ന കാര്യത്തിൽ നമ്മുടെ മനസ്സും ഹൃദയവും ചാഞ്ചാടിക്കൊണ്ടിരിക്കുന്നു. അവിടുത്തെ പൂർണമായി സ്വീകരിക്കാനും നമ്മുടെ ഉള്ളിൽ അവിടുത്തെ രാജ്യം സ്ഥാപിക്കപ്പെടാൻ അനുവദിക്കാനും നാം പലപ്പോഴും മടിക്കുന്നു.
അവിടുത്തെ രാജ്യം എത്ര അടുത്താണെന്ന് നിങ്ങൾ തിരിച്ചറിയുന്നുണ്ടോ? ഒരു പ്രാർത്ഥനയും നിങ്ങളുടെ മനസ്സിന്റെ ഒരു തീരുമാനവും മാത്രമേ അതിനായി വേണ്ടൂ എന്നു നിങ്ങൾ തിരിച്ചറിയുന്നുണ്ടോ? നാം അനുവദിച്ചാൽ മാത്രം മതി, നമ്മുടെ അടുക്കൽ വന്ന് നമ്മുടെ ജീവിതത്തിന്റെ നിയന്ത്രണം ഏറ്റെടുക്കാൻ യേശുവിനു കഴിയും. നമ്മെ ഒരു പുതിയ സൃഷ്ടിയാക്കി രൂപാന്തരപ്പെടുത്താൻ കഴിവുള്ള സർവശക്തനായ രാജാവാണ് അവിടുന്ന്. നമ്മുടെ ആത്മാവിൽ പരിപൂർണമായ സമാധാനവും ഐക്യവും കൊണ്ടുവരാൻ അവിടുത്തേക്കു കഴിയും. നമ്മുടെ ഹൃദയങ്ങളിൽ മഹത്തായതും മനോഹരവുമായ കാര്യങ്ങൾ ചെയ്യാൻ അവിടുത്തേക്കു കഴിയും. നാം ഹൃദയപൂർവം ഒരു വാക്ക് പറഞ്ഞാൽ മാത്രം മതി; അവിടുന്ന് വരും.
നിങ്ങളുടെ അടുക്കൽ വന്ന് നിങ്ങളുടെ ജീവിതത്തിൽ തന്റെ രാജ്യം സ്ഥാപിക്കാനുള്ള യേശുവിന്റെ ഹൃദയാഭിലാഷത്തെക്കുറിച്ച് ഇന്ന് ധ്യാനിക്കുക. നിങ്ങളുടെ ഭരണാധികാരിയും രാജാവുമായിരിക്കാനും പരിപൂർണമായ ഐക്യത്തിലും സ്നേഹത്തിലും നിങ്ങളുടെ ആത്മാവിനെ ഭരിക്കാനും അവിടുന്ന് അതിയായി ആഗ്രഹിക്കുന്നു. നിങ്ങളുടെ ഉള്ളിൽ വന്ന് തന്റെ രാജ്യം സ്ഥാപിക്കാൻ അവിടുത്തെ അനുവദിക്കുക.
കർത്താവേ, വന്ന് എന്റെ ആത്മാവിനെ സ്വന്തമാക്കാൻ ഞാൻ അങ്ങയെ ക്ഷണിക്കുന്നു. എന്റെ കർത്താവും എന്റെ ദൈവവുമായി ഞാൻ അങ്ങയെ തിരഞ്ഞെടുക്കുന്നു. എന്റെ ജീവിതത്തിന്മേലുള്ള നിയന്ത്രണം ഞാൻ വിട്ടുകൊടുക്കുകയും എന്റെ ദൈവവും ദൈവിക രാജാവുമായി അങ്ങയെ സ്വതന്ത്രമായി തിരഞ്ഞെടുക്കുകയും ചെയ്യുന്നു. ഈശോയേ, ഞാൻ അങ്ങയിൽ ശരണപ്പെടുന്നു.
ഞങ്ങളുടെ ആഗമനകാല വിഭവങ്ങൾ കാണുക!
