2022 ഡിസംബർ 22, വ്യാഴാഴ്ച
ആഗമനകാല വാരദിനം
ഇന്നത്തെ വായനകൾ
ആഗമനകാലത്തിലെ ഓ അന്തിഫോണകൾ
ഡിസംബർ 17–23
“എന്റെ ആത്മാവ് കർത്താവിന്റെ മഹത്വം പ്രഘോഷിക്കുന്നു; എന്റെ ചിത്തം എന്റെ രക്ഷകനായ ദൈവത്തിൽ ആനന്ദിക്കുന്നു.” ലൂക്കാ 1:46–47
“ആദ്യം ഉണ്ടായത് കോഴിയോ മുട്ടയോ?” എന്നൊരു പുരാതന ചോദ്യമുണ്ട്. ലോകത്തെയും അതിലെ സകല ജീവജാലങ്ങളെയും താൻ എങ്ങനെ സൃഷ്ടിച്ചു എന്നതിന്റെ ഉത്തരം ദൈവത്തിനു മാത്രമേ അറിയൂ എന്നതുകൊണ്ടാകാം അത് ഇന്നും ഒരു പുരാതന “ചോദ്യമായി” തുടരുന്നത്.
ഇന്ന്, നമ്മുടെ പരിശുദ്ധ അമ്മയുടെ മഹനീയമായ സ്തുതിഗീതമായ മാഗ്നിഫിക്കാത്തിലെ ഈ ആദ്യവരി മറ്റൊരു ചോദ്യം നമ്മുടെ മുമ്പിൽ വയ്ക്കുന്നു. “ഏതാണ് ആദ്യം വരുന്നത്: ദൈവത്തെ സ്തുതിക്കുന്നതോ അതോ അവിടുന്നിൽ ആനന്ദിക്കുന്നതോ?” ഒരുപക്ഷേ നിങ്ങൾ ഒരിക്കലും ഈ ചോദ്യം സ്വയം ചോദിച്ചിട്ടുണ്ടാകില്ല. എങ്കിലും, ഈ ചോദ്യവും അതിന്റെ ഉത്തരവും ധ്യാനിക്കുന്നത് പ്രയോജനകരമാണ്.
മറിയത്തിന്റെ സ്തുതിഗീതത്തിലെ ഈ ആദ്യവരി അവളുടെ ഉള്ളിൽ നടക്കുന്ന രണ്ടു കാര്യങ്ങൾ വ്യക്തമാക്കുന്നു. അവൾ “പ്രഘോഷിക്കുന്നു,” അവൾ “ആനന്ദിക്കുന്നു.” ഈ രണ്ട് ആന്തരിക അനുഭവങ്ങളെക്കുറിച്ച് ചിന്തിക്കുക. ചോദ്യം കുറച്ചുകൂടി വ്യക്തമായി ഇങ്ങനെ ചോദിക്കാം: ആദ്യം ആനന്ദം നിറഞ്ഞതുകൊണ്ടാണോ മറിയം ദൈവത്തിന്റെ മഹത്വം പ്രഘോഷിച്ചത്? അതോ ആദ്യം ദൈവത്തിന്റെ മഹത്വം പ്രഘോഷിച്ചതുകൊണ്ടാണോ അവളിൽ ആനന്ദം നിറഞ്ഞത്? ഒരുപക്ഷേ രണ്ടും ഒരു പരിധിവരെ ശരിയായിരിക്കാം. എന്നാൽ വിശുദ്ധ ഗ്രന്ഥത്തിലെ ഈ വരിയുടെ ക്രമം സൂചിപ്പിക്കുന്നത്, അവൾ ആദ്യം പ്രഘോഷിക്കുകയും അതിന്റെ ഫലമായി ആനന്ദത്താൽ നിറയുകയും ചെയ്തു എന്നാണ്.
ഇത് കേവലം തത്ത്വചിന്താപരമോ സൈദ്ധാന്തികമോ ആയ ഒരു വിചിന്തനമല്ല; മറിച്ച്, നമ്മുടെ അനുദിനജീവിതത്തെക്കുറിച്ച് പ്രധാനപ്പെട്ട ഉൾക്കാഴ്ച നൽകുന്ന, വളരെ പ്രായോഗികമായ ഒരു വിചിന്തനമാണ്. ജീവിതത്തിൽ പലപ്പോഴും ദൈവത്തിനു നന്ദി പറയുന്നതിനും അവിടുത്തെ സ്തുതിക്കുന്നതിനും മുമ്പ് അവിടുന്നിൽനിന്ന് ഒരു “പ്രചോദനം” ലഭിക്കാൻ നാം കാത്തിരിക്കുന്നു. ദൈവം നമ്മെ സ്പർശിക്കുകയും ആനന്ദകരമായ ഒരു അനുഭവത്താൽ നമ്മെ നിറയ്ക്കുകയും നമ്മുടെ പ്രാർഥനയ്ക്ക് ഉത്തരം നൽകുകയും ചെയ്യുന്നതുവരെ നാം കാത്തിരിക്കുന്നു; അതിനുശേഷം നന്ദിയോടെ പ്രതികരിക്കുന്നു. ഇത് നല്ലതാണ്. എന്നാൽ എന്തിന് കാത്തിരിക്കണം? ദൈവത്തിന്റെ മഹത്വം പ്രഘോഷിക്കാൻ എന്തിന് കാത്തിരിക്കണം?
ജീവിതത്തിൽ കാര്യങ്ങൾ പ്രയാസകരമാകുമ്പോൾ നാം ദൈവത്തിന്റെ മഹത്വം പ്രഘോഷിക്കണമോ? അതെ. നമ്മുടെ ജീവിതത്തിൽ അവിടുത്തെ സാന്നിധ്യം അനുഭവപ്പെടാത്തപ്പോഴും നാം ദൈവത്തിന്റെ മഹത്വം പ്രഘോഷിക്കണമോ? അതെ. ജീവിതത്തിൽ ഏറ്റവും ഭാരമേറിയ കുരിശുകൾ നേരിടുമ്പോഴും നാം ദൈവത്തിന്റെ മഹത്വം പ്രഘോഷിക്കണമോ? തീർച്ചയായും, അതെ.
ശക്തമായ ഏതെങ്കിലും പ്രചോദനം ലഭിക്കുകയോ പ്രാർഥനയ്ക്ക് ഉത്തരം ലഭിക്കുകയോ ചെയ്തതിന് ശേഷം മാത്രമല്ല ദൈവത്തിന്റെ മഹത്വം പ്രഘോഷിക്കേണ്ടത്. ദൈവത്തിന്റെ സാമീപ്യം അനുഭവിച്ചറിഞ്ഞതിന് ശേഷം മാത്രവുമല്ല അത് ചെയ്യേണ്ടത്. ദൈവത്തിന്റെ മഹത്വം പ്രഘോഷിക്കുക എന്നത് സ്നേഹത്തിന്റെ കടമയാണ്; എന്തുതന്നെ സംഭവിച്ചാലും, എല്ലാ ദിവസവും എല്ലാ സാഹചര്യങ്ങളിലും എപ്പോഴും അത് ചെയ്യണം. ദൈവം ആരാണെന്നതിന്റെ പേരിലാണ് നാം പ്രാഥമികമായി അവിടുത്തെ മഹത്വം പ്രഘോഷിക്കുന്നത്. അവിടുന്ന് ദൈവമാണ്. ആ ഒറ്റ കാരണത്താൽത്തന്നെ അവിടുന്ന് നമ്മുടെ എല്ലാ സ്തുതികൾക്കും അർഹനാണ്.
എന്നാൽ ശ്രദ്ധേയമായ കാര്യം ഇതാണ്: നല്ല കാലങ്ങളിലും പ്രയാസകരമായ കാലങ്ങളിലും ദൈവത്തിന്റെ മഹത്വം പ്രഘോഷിക്കാനുള്ള തീരുമാനം പലപ്പോഴും ആനന്ദത്തിന്റെ അനുഭവത്തിലേക്കും നയിക്കുന്നു. മറിയത്തിന്റെ ചിത്തം അവളുടെ രക്ഷകനായ ദൈവത്തിൽ ആനന്ദിച്ചതിന്റെ മുഖ്യകാരണം, അവൾ ആദ്യം അവിടുത്തെ മഹത്വം പ്രഘോഷിച്ചതാണെന്ന് തോന്നുന്നു. ആദ്യം ദൈവത്തെ സേവിക്കുകയും അവിടുത്തെ സ്നേഹിക്കുകയും അവിടുത്തെ നാമത്തിനു ചേരുന്ന ബഹുമാനം നൽകുകയും ചെയ്യുന്നതിൽനിന്നാണ് ആനന്ദം വരുന്നത്.
പ്രഘോഷിക്കുകയും ആനന്ദിക്കുകയും ചെയ്യുന്ന ഈ ദ്വിമുഖ പ്രക്രിയയെക്കുറിച്ച് ഇന്ന് ധ്യാനിക്കുക. ആനന്ദിക്കാൻ ഒന്നുമില്ലെന്ന് നമുക്ക് തോന്നിയാലും, പ്രഘോഷണത്തിനായിരിക്കണം എപ്പോഴും ഒന്നാം സ്ഥാനം. എന്നാൽ ദൈവത്തിന്റെ മഹത്വം പ്രഘോഷിക്കാൻ നിങ്ങൾ സ്വയം സമർപ്പിക്കുകയാണെങ്കിൽ, ജീവിതത്തിലെ ആനന്ദത്തിന്റെ ഏറ്റവും ആഴമായ കാരണം നിങ്ങൾ കണ്ടെത്തിയെന്ന് പെട്ടെന്നുതന്നെ തിരിച്ചറിയും: ദൈവംതന്നെയാണ് ആ കാരണം.
ഏറ്റവും പ്രിയപ്പെട്ട അമ്മേ, ദൈവത്തിന്റെ മഹത്വം പ്രഘോഷിക്കാൻ അങ്ങ് തീരുമാനിച്ചു. അങ്ങയുടെ ജീവിതത്തിലും ലോകത്തിലും അവിടുന്ന് ചെയ്ത മഹിമയാർന്ന പ്രവൃത്തികളെ അങ്ങ് അംഗീകരിച്ചു; ഈ സത്യങ്ങൾ പ്രഘോഷിച്ചത് അങ്ങയെ ആനന്ദത്താൽ നിറച്ചു. എനിക്ക് എന്തെല്ലാം വെല്ലുവിളികളോ അനുഗ്രഹങ്ങളോ ലഭിച്ചാലും, ഓരോ ദിവസവും ദൈവത്തെ മഹത്വപ്പെടുത്താൻ ഞാനും പരിശ്രമിക്കേണ്ടതിന് എനിക്കുവേണ്ടി പ്രാർഥിക്കണമേ. പ്രിയ അമ്മേ, അങ്ങയെ അനുകരിക്കാനും അങ്ങയുടെ പരിപൂർണമായ ആനന്ദത്തിൽ പങ്കുചേരാനും എനിക്ക് കഴിയുമാറാകട്ടെ. പരിശുദ്ധ മറിയമേ, എനിക്കുവേണ്ടി പ്രാർഥിക്കണമേ. ഈശോയെ, ഞാൻ അങ്ങയിൽ ശരണപ്പെടുന്നു.
വർഷാവസാനത്തിൽ ഒരു സംഭാവന നൽകുന്ന കാര്യം പരിഗണിക്കാമോ?
ഞങ്ങളുടെ ആഗമനകാല, ക്രിസ്മസ് വിഭവങ്ങൾ കാണുക!
വിശുദ്ധ അന്ത്രയോസിന്റെ ക്രിസ്മസ് നൊവേന
താഴെ കൊടുത്തിരിക്കുന്ന വിശുദ്ധ അന്ത്രയോസിന്റെ ക്രിസ്മസ് നൊവേന പ്രാർത്ഥന, പരമ്പരാഗതമായി വിശുദ്ധ അന്ത്രയോസിന്റെ തിരുനാളായ നവംബർ 30 മുതൽ ക്രിസ്മസിന്റെ തലേദിവസം വരെ ദിവസവും 15 തവണ ചൊല്ലിവരുന്നു.
ദൈവകരുണയെക്കുറിച്ചുള്ള വിചിന്തനങ്ങൾ
വിശുദ്ധ കുർബാനയിലെ വായനകൾക്കുള്ള തിരഞ്ഞെടുപ്പുകൾ
