ജനുവരി 21, 2023
ആണ്ടുവട്ടത്തിലെ രണ്ടാം വാരത്തിലെ ശനിയാഴ്ച
ഇന്നത്തെ വായനകൾ
കന്യകയും രക്തസാക്ഷിയുമായ വിശുദ്ധ ആഗ്നസ്—ഓർമ്മ
യേശു ശിഷ്യന്മാരോടുകൂടെ വീട്ടിൽ വന്നു. വീണ്ടും ജനക്കൂട്ടം ഒന്നിച്ചുകൂടിയതിനാൽ അവർക്ക് ഭക്ഷണം കഴിക്കാൻപോലും സാധിച്ചില്ല. ഇതു കേട്ടപ്പോൾ അവന്റെ ബന്ധുക്കൾ അവനെ പിടിച്ചുകൊണ്ടുപോകാൻ പുറപ്പെട്ടു. കാരണം, “അവനു സുബോധം നഷ്ടപ്പെട്ടിരിക്കുന്നു” എന്ന് അവർ പറഞ്ഞു. മർക്കോസ് 3:20–21
യേശുവിന്റെ സഹനങ്ങളെക്കുറിച്ചു ചിന്തിക്കുമ്പോൾ, മിക്കവാറും നിങ്ങളുടെ മനസ്സിൽ ആദ്യം വരുന്നത് അവിടുത്തെ കുരിശുമരണമായിരിക്കും. തുടർന്ന്, തൂണിൽ കെട്ടിയുള്ള ചമ്മട്ടിയടിയും കുരിശുവഹിക്കലും അറസ്റ്റുചെയ്യപ്പെട്ടതുമുതൽ മരണംവരെ നടന്ന മറ്റു സംഭവങ്ങളും നിങ്ങൾ ഓർത്തേക്കാം. എന്നാൽ, നമ്മുടെയും എല്ലാവരുടെയും നന്മയ്ക്കായി നമ്മുടെ കർത്താവ് സഹിച്ച മാനുഷികമായ മറ്റു പല വേദനകളുമുണ്ടായിരുന്നു. മുകളിലെ സുവിശേഷഭാഗം അത്തരമൊരു അനുഭവമാണ് നമ്മുടെ മുമ്പിൽ അവതരിപ്പിക്കുന്നത്.
ശാരീരിക വേദന തീർത്തും അഭിലഷണീയമല്ലെങ്കിലും, അത്രതന്നെയോ അതിലേറെയോ സഹിക്കാൻ പ്രയാസമുള്ള മറ്റു സഹനങ്ങളുമുണ്ട്. സ്വന്തം കുടുംബം നിങ്ങളെ തെറ്റിദ്ധരിക്കുകയും സമനില തെറ്റിയ ഒരാളെപ്പോലെ നിങ്ങളോടു പെരുമാറുകയും ചെയ്യുന്നത് അത്തരമൊരു സഹനമാണ്. യേശുവിന്റെ കാര്യത്തിൽ, അവിടുത്തെ ബന്ധുവൃന്ദത്തിലെ പലരും അവിടുത്തെ പരസ്യമായി രൂക്ഷമായി വിമർശിച്ചിരുന്നതായി തോന്നുന്നു; തീർച്ചയായും അവിടുത്തെ സ്വന്തം അമ്മ ഇതിൽ ഉൾപ്പെടുന്നില്ല. ഒരുപക്ഷേ അവർക്ക് അവിടുത്തോട് അസൂയയും ഏതെങ്കിലും തരത്തിലുള്ള ഈർഷ്യയും ഉണ്ടായിരുന്നിരിക്കാം; അല്ലെങ്കിൽ അവിടുത്തേക്ക് ലഭിച്ചുകൊണ്ടിരുന്ന ശ്രദ്ധയെല്ലാം അവരെ ലജ്ജിപ്പിച്ചിരിക്കാം. കാരണമെന്തായാലും, അവിടുത്തോടൊപ്പം ആയിരിക്കാൻ ആഴമായി ആഗ്രഹിച്ചിരുന്ന ജനങ്ങളെ ശുശ്രൂഷിക്കുന്നതിൽനിന്ന് യേശുവിനെ തടയാൻ സ്വന്തം ബന്ധുക്കൾ ശ്രമിച്ചുവെന്നത് വ്യക്തമാണ്. യേശുവിനു “സമനില തെറ്റിയിരിക്കുന്നു” എന്ന കഥ അവിടുത്തെ ബന്ധുക്കളിൽ ചിലർ കെട്ടിച്ചമയ്ക്കുകയും അവിടുത്തെ ജനപ്രീതിക്ക് അറുതിവരുത്താൻ ശ്രമിക്കുകയും ചെയ്തു.
കുടുംബജീവിതം സ്നേഹത്തിന്റെ കൂട്ടായ്മയായിരിക്കണം. എന്നാൽ ചിലർക്ക് അത് ദുഃഖത്തിന്റെയും മനോവേദനയുടെയും ഉറവിടമായി മാറുന്നു. ഇത്തരമൊരു സഹനം അനുഭവിക്കാൻ യേശു സ്വയം അനുവദിച്ചത് എന്തുകൊണ്ടാണ്? സ്വന്തം കുടുംബംമൂലം നിങ്ങൾ അനുഭവിക്കുന്ന ഏതൊരു സഹനത്തിലും നിങ്ങളോടു താദാത്മ്യം പ്രാപിക്കാൻ കഴിയേണ്ടതിനുവേണ്ടിക്കൂടിയായിരുന്നു അത്. കൂടാതെ, അവിടുന്ന് അതു സഹിച്ചതിലൂടെ ഈ തരത്തിലുള്ള സഹനത്തെയും വീണ്ടെടുത്തു; അങ്ങനെ നിങ്ങളുടെ കുടുംബത്തിൽനിന്നുണ്ടാകുന്ന മനോവേദനയ്ക്കും ആ വീണ്ടെടുപ്പിലും കൃപയിലും പങ്കുചേരാൻ വഴിയൊരുക്കി. അതിനാൽ, നിങ്ങളുടെ കുടുംബപ്രയാസങ്ങളുമായി പ്രാർഥനയിൽ ദൈവത്തിലേക്കു തിരിയുമ്പോൾ, പരിശുദ്ധ ത്രിത്വത്തിലെ രണ്ടാമത്തെ വ്യക്തിയും ദൈവത്തിന്റെ നിത്യപുത്രനുമായ യേശു തന്റെ സ്വന്തം മാനുഷിക അനുഭവത്തിൽനിന്ന് നിങ്ങളുടെ സഹനത്തെ മനസ്സിലാക്കുന്നു എന്ന അറിവ് നിങ്ങൾക്ക് ആശ്വാസമാകും. അനേകം കുടുംബാംഗങ്ങൾ അനുഭവിക്കുന്ന വേദന അവിടുന്ന് നേരിട്ടുള്ള അനുഭവത്തിലൂടെ അറിയുന്നു. ഓരോ കുടുംബത്തിലെയും സഹനത്തെ അത്യന്തം കരുണയോടെ കാണാനും അവിടുത്തേക്കു കഴിയും. അങ്ങനെ, തന്നോട് അപേക്ഷിക്കുന്ന ഓരോ വ്യക്തിക്കും ആ സഹനം താങ്ങാൻ മാത്രമല്ല, അതിനെ നന്മയ്ക്കും ദൈവമഹത്വത്തിനുമായി ഉപയോഗിക്കാനും ആവശ്യമായ കൃപ അവിടുന്ന് നൽകുന്നു.
സ്വന്തം കുടുംബത്തിനുള്ളിലെ ഏതെങ്കിലും മനോവേദന ദൈവത്തിനു സമർപ്പിക്കേണ്ടത് എങ്ങനെയെന്ന് ഇന്ന് ചിന്തിക്കുക. നിങ്ങളുടെ പ്രയാസങ്ങൾ പൂർണമായി മനസ്സിലാക്കുന്ന നമ്മുടെ കർത്താവിലേക്കു തിരിയുക. അവിടുത്തെ ശക്തവും കരുണാപൂർണവുമായ സാന്നിധ്യത്തെ നിങ്ങളുടെ ജീവിതത്തിലേക്കു ക്ഷണിക്കുക; അങ്ങനെ, നിങ്ങൾ സഹിക്കുന്നതെല്ലാം തന്റെ കൃപയും കരുണയുമാക്കി രൂപാന്തരപ്പെടുത്താൻ അവിടുത്തേക്കു കഴിയും.
എന്റെ കരുണാനിധിയായ കർത്താവേ, അങ്ങയുടെ സ്വന്തം കുടുംബാംഗങ്ങളുടെ തിരസ്കാരവും പരിഹാസവും ഉൾപ്പെടെ ഈ ലോകത്തിൽ അങ്ങ് ഏറെ സഹിച്ചു. എന്റെ കുടുംബത്തെയും, വിശേഷിച്ച് അതിലുണ്ടായിട്ടുള്ള മനോവേദനകളെയും ഞാൻ അങ്ങേക്കു സമർപ്പിക്കുന്നു. അങ്ങ് വന്ന് കുടുംബത്തിലെ എല്ലാ സംഘർഷങ്ങളെയും അങ്ങയുടെ രക്ഷയാൽ രൂപാന്തരപ്പെടുത്തണമേ. എനിക്കും, സൗഖ്യവും പ്രത്യാശയും ഏറ്റവുമധികം ആവശ്യമുള്ള എല്ലാവർക്കും അവ നൽകണമേ. ഈശോയേ, ഞാൻ അങ്ങയിൽ ശരണപ്പെടുന്നു.
ജീവനുവേണ്ടി 9 ദിവസത്തെ നൊവേന
ജനുവരി 19–27
മൂന്നാം ദിവസം: ജനുവരി 21
ദൈവകരുണയെക്കുറിച്ചുള്ള വിചിന്തനങ്ങൾ
ഇന്നത്തെ വിശുദ്ധർ – കന്യകയും രക്തസാക്ഷിയുമായ വിശുദ്ധ ആഗ്നസ്
വിശുദ്ധ കുർബാനയിലെ വായനകൾക്കുള്ള തിരഞ്ഞെടുപ്പുകൾ
