ജനുവരി 26, 2023
ആണ്ടുവട്ടത്തിലെ മൂന്നാം വാരത്തിലെ വ്യാഴാഴ്ച
ഇന്നത്തെ വായനകൾ
മെത്രാന്മാരായ വിശുദ്ധ തിമോത്തേയോസും തീത്തോസും—അനുസ്മരണം
“വെളിപ്പെടാനല്ലാതെ ഒന്നും മറഞ്ഞിരിക്കുന്നില്ല; വെളിച്ചത്തു വരാനല്ലാതെ ഒന്നും രഹസ്യമായിരിക്കുന്നില്ല.” മർക്കോസ് 4:22
ഇന്നത്തെ സുവിശേഷത്തിലെ എത്ര ആകർഷകമായ ഒരു ചെറിയ വാക്യം! ഈ വാക്യത്തിന്റെ അർത്ഥമെന്താണ്? ഇതിന്റെ അർത്ഥത്തെക്കുറിച്ച് പലരും പല വ്യാഖ്യാനങ്ങൾ നൽകിയിട്ടുണ്ടെങ്കിലും, കൂടുതൽ ഉൾക്കാഴ്ചയ്ക്കായി നമുക്ക് കത്തോലിക്കാ സഭയുടെ മതബോധനഗ്രന്ഥത്തിലേക്കു തിരിയാം:
സത്യം തന്നെയായ ക്രിസ്തുവിന്റെ സന്നിധിയിൽ, ഓരോ മനുഷ്യനും ദൈവവുമായുള്ള ബന്ധത്തിന്റെ യാഥാർഥ്യം അനാവരണം ചെയ്യപ്പെടും. ഓരോ വ്യക്തിയും തന്റെ ഭൗമികജീവിതത്തിൽ ചെയ്തതോ ചെയ്യാതെ വിട്ടതോ ആയ നന്മയെ, അതിന്റെ ഏറ്റവും ദൂരവ്യാപകമായ പരിണതഫലങ്ങൾവരെ, അന്ത്യവിധി വെളിപ്പെടുത്തും… (CCC #1039).
ഈ ഭാഗം “തനതുവിധി”യെക്കുറിച്ചുള്ള വിഭാഗത്തിൽനിന്നല്ല, “അന്ത്യവിധി”യെക്കുറിച്ചുള്ള വിഭാഗത്തിൽനിന്നാണ് എടുത്തിരിക്കുന്നത്. ഈ ലോകത്തുനിന്നു നാം കടന്നുപോകുന്ന നിമിഷത്തിൽ നമുക്കെല്ലാവർക്കും തനതുവിധി ഉണ്ടാകും. ദൈവത്തിന്റെ മുമ്പാകെ വ്യക്തിപരമായും സ്വകാര്യമായും നമ്മുടെ പാപങ്ങളുടെയും സദ്ഗുണങ്ങളുടെയും കണക്കു നൽകലായിരിക്കും അത്. എന്നാൽ അന്ത്യവിധി കാലത്തിന്റെ അന്ത്യത്തിൽ സംഭവിക്കും. എല്ലാവരുടെയും മേലുള്ള, തികച്ചും നിർണായകവും പരസ്യവുമായ ഒരു സാർവത്രിക വിധിയായി അതിനെ കാണണം. അതിനാൽ, മതബോധനഗ്രന്ഥത്തിലെ ഈ വാക്യം സൂചിപ്പിക്കുന്നത് നമ്മുടെ നല്ല പ്രവൃത്തികളും ദുഷ്പ്രവൃത്തികളും എല്ലാവരും കാണത്തക്കവിധം വെളിപ്പെടുത്തപ്പെടുമെന്നാണ് എന്നു തോന്നുന്നു.
മുകളിൽ നൽകിയ തിരുവചനഭാഗവും മതബോധനഗ്രന്ഥത്തിലെ ഭാഗവും, അന്ത്യവിധിയിൽ കുമ്പസാരമെന്ന കൂദാശയിലൂടെ ക്ഷമിക്കപ്പെട്ടവ ഉൾപ്പെടെ നമ്മുടെ ഏറ്റവും ആഴത്തിൽ മറഞ്ഞിരിക്കുന്ന പാപങ്ങൾപോലും എല്ലാവരും കാണത്തക്കവിധം വെളിപ്പെടുത്തപ്പെടും എന്ന അർത്ഥത്തിൽ വ്യാഖ്യാനിക്കുന്നത് ശരിയാണെങ്കിൽ, ഈ ചിന്ത ആദ്യം അൽപ്പം ഭയപ്പെടുത്തുന്നതായിരിക്കാം. എന്നാൽ അത് അങ്ങനെയാകേണ്ടതില്ല. അത് നമ്മെ സ്വതന്ത്രരാക്കുന്നതായിരിക്കണം.
അന്ത്യവിധിയിൽ നമ്മുടെ ജീവിതത്തിലെ നല്ലതും ചീത്തയുമായ എല്ലാ പ്രവൃത്തികളും എല്ലാവരും കാണത്തക്കവിധം വെളിപ്പെടുത്തപ്പെടുമെങ്കിൽ, സ്വർഗത്തിലുള്ളവർക്ക് അതിലൂടെ ഒരേയൊരു കാര്യം മാത്രമേ സംഭവിക്കൂ: ദൈവത്തിന്റെ മഹത്വവും അതിയായ ആനന്ദവും! മറ്റൊരു വിധത്തിൽ പറഞ്ഞാൽ, നാം ചെയ്ത എല്ലാ പാപങ്ങളും ദൈവം വെളിപ്പെടുത്തുന്നുവെങ്കിൽ, ആ പാപങ്ങളെക്കുറിച്ചുള്ള നമ്മുടെ അനുതാപവും നാം കടന്നുപോയ ശുദ്ധീകരണവും നമുക്കു ലഭിച്ച പാപമോചനവും അവിടുന്ന് വെളിപ്പെടുത്തും. അതിനാൽ, വിശുദ്ധരുടെ കൂട്ടായ്മയിലുള്ളവർ നമ്മെ വിധിക്കുന്ന മനോഭാവത്തോടെ നോക്കുകയില്ല; മറിച്ച്, നാം ദൈവത്തെ മഹത്വപ്പെടുത്തുകയും അവിടുത്തെ സമൃദ്ധമായ കരുണയ്ക്കും പാപമോചനത്തിനും നന്ദി പറയുകയും ചെയ്യുന്നതുപോലെ അവരും ദൈവത്തെ മഹത്വപ്പെടുത്തും. അവിടുന്ന് നമുക്കു നൽകിയ പാപമോചനം നാം എപ്പോഴും ഓർക്കുകയും അതിൽ നിരന്തരം ആനന്ദിക്കുകയും വേണം. അതിനാൽ, എല്ലാം യഥാർഥത്തിൽ വെളിപ്പെടുത്തപ്പെടുന്നുവെങ്കിൽ, നമുക്കെല്ലാവർക്കും ദൈവത്തിന്റെ വിസ്മയകരമായ കരുണയിൽ ഒരുമിച്ച് ആനന്ദിക്കാനും, ദൈവം മറ്റൊരാൾക്കുവേണ്ടി ചെയ്ത സകല കാര്യങ്ങളെയും ഓർത്ത് കൃതജ്ഞതയോടെ പരസ്പരം നോക്കാനും വേണ്ടിയായിരിക്കും അത്.
മഹത്വപൂർണമായ ആ നിമിഷത്തിന്റെ സാധ്യതയെക്കുറിച്ച് ഇന്ന് വിചിന്തനം ചെയ്യുക. നിങ്ങളോടൊപ്പം സ്വർഗത്തിൽ പങ്കുചേരുന്ന എല്ലാവരോടും നിങ്ങളുടെ ജീവിതത്തിലെ ഏറ്റവും ആഴത്തിൽ മറഞ്ഞിരിക്കുന്ന പാപങ്ങളും ഏറ്റവും ആഴമുള്ള സദ്ഗുണങ്ങളും പങ്കുവയ്ക്കാൻ ദൈവത്തെ അനുവദിക്കുമ്പോൾ നിങ്ങൾ അനുഭവിക്കുന്ന സ്വാതന്ത്ര്യം സങ്കൽപ്പിക്കുക. ലജ്ജ ഇല്ലാതാകും. വിധിക്കൽ ഇല്ലാതാകും. ആനന്ദവും കൃതജ്ഞതയും മാത്രം അവശേഷിക്കും. എത്ര മഹത്വപൂർണമായ നിമിഷമായിരിക്കും അത്!
എന്റെ മഹത്വപൂർണ്ണനായ ന്യായാധിപനേ, എന്റെ ജീവിതത്തിൽ അങ്ങ് ചൊരിയുന്ന കരുണയ്ക്കും ക്ഷമയ്ക്കും ഞാൻ നന്ദി പറയുന്നു. എല്ലാ പാപങ്ങളിൽനിന്നും എന്നെ മോചിപ്പിച്ചതിന് ഞാൻ അങ്ങേക്കു നന്ദി പറയുന്നു. എന്റെ ആത്മാവിനെ തുടർന്നും ശുദ്ധീകരിക്കുകയും ഏതൊരു പാപത്തോടുമുള്ള അടുപ്പത്തിൽനിന്നുപോലും എന്നെ മോചിപ്പിക്കുകയും ചെയ്യണമേ. അങ്ങ് എനിക്കുവേണ്ടി ചെയ്തതൊന്നും ഞാൻ ഒരിക്കലും മറക്കാതിരിക്കട്ടെ. അങ്ങയുടെ കരുണ എന്റെ നിത്യാനന്ദത്തിനും അങ്ങയുടെ നിത്യമഹത്വത്തിനും കാരണമാകട്ടെ. ഈശോയേ, ഞാൻ അങ്ങയിൽ ശരണപ്പെടുന്നു.
ജീവനുവേണ്ടിയുള്ള 9 ദിവസത്തെ നൊവേന
ജനുവരി 19–27
എട്ടാം ദിവസം: ജനുവരി 26
ദൈവകരുണയെക്കുറിച്ചുള്ള വിചിന്തനങ്ങൾ
ഇന്നത്തെ വിശുദ്ധർ – മെത്രാന്മാരായ വിശുദ്ധ തിമോത്തേയോസിന്റെയും തീത്തോസിന്റെയും അനുസ്മരണം
വിശുദ്ധ കുർബാനയിലെ വായനകൾക്കുള്ള തിരഞ്ഞെടുപ്പുകൾ
മുകളിൽ നൽകിയിരിക്കുന്ന പ്രധാന ചിത്രം: അന്ത്യവിധി, Wikimedia Commons വഴി
.jpg){kind=link}