സെപ്റ്റംബർ 12, 2023
ആണ്ടുവട്ടക്കാലം ഇരുപത്തിമൂന്നാം ആഴ്ചയിലെ ചൊവ്വാഴ്ച
ഇന്നത്തെ വായനകൾ
പരിശുദ്ധ കന്യകാമറിയത്തിന്റെ വിശുദ്ധനാമം—ഐച്ഛിക അനുസ്മരണം
അവൻ അവരോടൊപ്പം ഇറങ്ങിവന്ന് ഒരു സമതലത്തിൽ നിന്നു. അവന്റെ ശിഷ്യരുടെ ഒരു വലിയ ഗണവും യൂദയായിൽനിന്നും ജറുസലെമിൽനിന്നും ടയിർ, സീദോൻ എന്നീ തീരപ്രദേശങ്ങളിൽനിന്നും വളരെയധികം ജനങ്ങളും അവന്റെ വാക്കുകൾ കേൾക്കാനും തങ്ങളുടെ രോഗങ്ങളിൽനിന്ന് സൗഖ്യം പ്രാപിക്കാനും വന്നിരുന്നു; അശുദ്ധാത്മാക്കളാൽ പീഡിപ്പിക്കപ്പെട്ടിരുന്നവരും സുഖം പ്രാപിച്ചു. അവനിൽനിന്ന് ശക്തി പുറപ്പെട്ട് എല്ലാവരെയും സുഖപ്പെടുത്തിയിരുന്നതിനാൽ ജനക്കൂട്ടത്തിലുള്ള എല്ലാവരും അവനെ സ്പർശിക്കാൻ ശ്രമിച്ചു. ലൂക്കാ 6:17–19
പരമ്പരാഗതമായി “സമതലത്തിലെ പ്രസംഗം” എന്നറിയപ്പെടുന്ന പ്രസംഗം ലൂക്കായുടെ സുവിശേഷം നമുക്കു മുന്നിൽ അവതരിപ്പിക്കുന്നു. ഈ പ്രസംഗത്തിൽ ലൂക്കാ ഉൾപ്പെടുത്തിയിരിക്കുന്ന മിക്കവാറും എല്ലാ കാര്യങ്ങളും മത്തായിയുടെ “മലയിലെ പ്രസംഗ”ത്തിലും കാണാം. എന്നാൽ, ലൂക്കായിൽ കാണാത്ത ചില പ്രബോധനങ്ങൾ മത്തായി കൂട്ടിച്ചേർക്കുന്നുണ്ട്. മത്തായിയുടെ പ്രസംഗത്തിന് മൂന്ന് അധ്യായങ്ങളുള്ളപ്പോൾ ലൂക്കായുടേതിന് ഒരു അധ്യായം മാത്രമാണുള്ളത്.
ഈ ആഴ്ച മുഴുവൻ നാം വായിക്കാനിരിക്കുന്ന “സമതലത്തിലെ പ്രസംഗ”ത്തിന്റെ ഈ ആമുഖത്തിൽ, യേശുവിനെ ശ്രവിക്കാൻ ദൂരദിക്കുകളിൽനിന്ന് അനേകം ആളുകൾ വന്നതായി ലൂക്കാ ചൂണ്ടിക്കാണിക്കുന്നു. ഈ ജനക്കൂട്ടത്തിൽ അനേകം യഹൂദർ മാത്രമല്ല, വിജാതീയപ്രദേശമായ ടയിർ, സീദോൻ എന്നിവിടങ്ങളിൽനിന്നുള്ള അനേകം ആളുകളും ഉണ്ടായിരുന്നു. ഇത്രയധികം ആളുകളെ ആകർഷിച്ചത് എന്തായിരുന്നു? യേശുവിന്റെ പ്രസംഗം “കേൾക്കാനും” “സൗഖ്യം പ്രാപിക്കാനുമാണ്” അവർ വന്നത്. വലിയ അധികാരത്തോടെയും ജീവിതങ്ങളെ മാറ്റിമറിക്കുന്ന രീതിയിലും യേശു സംസാരിച്ചിരുന്നതിനാൽ അവിടുത്തെ വാക്കുകൾ കേൾക്കാൻ അവർ ആഗ്രഹിച്ചു. യേശു പ്രകടമാക്കിയ സൗഖ്യദായകമായ ശക്തി അവരെ പ്രത്യേകമായി വിസ്മയിപ്പിച്ചു. മുകളിലെ ഭാഗത്തിന്റെ അവസാന വാക്യം സൗഖ്യത്തിനായുള്ള ഈ ആഗ്രഹത്തിന് വലിയ ഊന്നൽ നൽകുന്നു. “അവനിൽനിന്ന് ശക്തി പുറപ്പെട്ട് എല്ലാവരെയും സുഖപ്പെടുത്തിയിരുന്നതിനാൽ ജനക്കൂട്ടത്തിലുള്ള എല്ലാവരും അവനെ സ്പർശിക്കാൻ ശ്രമിച്ചു.”
തന്റെ പരസ്യശുശ്രൂഷയിൽ സഞ്ചരിച്ചുകൊണ്ടിരിക്കെ യേശു ശക്തിയേറിയ അനേകം അത്ഭുതങ്ങൾ പ്രവർത്തിച്ചു എന്നത് ശ്രദ്ധേയമാണ്. തന്റെ ശുശ്രൂഷയുടെ ആരംഭത്തിൽ ഇത് പ്രത്യേകിച്ചും പ്രകടമായിരുന്നു. അനേകർക്ക് അവിടുന്ന് വളരെ പെട്ടെന്നുതന്നെ പ്രസിദ്ധനായിത്തീർന്നു; ചുറ്റുമുള്ള പല പട്ടണങ്ങളിലും അവിടുന്ന് സംസാരവിഷയമായി. എന്നാൽ, കാലം കടന്നുപോയപ്പോൾ യേശു അത്ഭുതങ്ങളെക്കാൾ തന്റെ പ്രബോധനത്തിന് കൂടുതൽ ഊന്നൽ നൽകി എന്നതും ശ്രദ്ധേയമാണ്.
നമ്മുടെ കർത്താവിലേക്ക് നിങ്ങളെ ആകർഷിക്കുന്നത് എന്താണ്? ഒരുപക്ഷേ, ഇന്ന് ദൈവം പ്രകടമായ അനേകം അത്ഭുതങ്ങൾ പ്രവർത്തിച്ചാൽ പലരും വിസ്മയിച്ചേക്കാം. എന്നാൽ ശാരീരികമായ അത്ഭുതങ്ങളല്ല നമ്മുടെ കർത്താവിന്റെ ഏറ്റവും മഹത്തായ പ്രവൃത്തി. അതിനാൽ, അവിടുന്നുമായുള്ള നമ്മുടെ ബന്ധത്തിന്റെ മുഖ്യശ്രദ്ധ അവയിലായിരിക്കരുത്. അവിടുത്തെ വിശുദ്ധ വചനം നമ്മിൽ ആഴത്തിൽ പതിയുകയും നമ്മെ രൂപാന്തരപ്പെടുത്തുകയും അവിടുന്നുമായുള്ള കൂട്ടായ്മയിലേക്ക് നമ്മെ ആകർഷിക്കുകയും ചെയ്യുന്നു എന്നതായിരിക്കണം നമ്മുടെ കർത്താവിലേക്ക് നാം ആകർഷിക്കപ്പെടുന്നതിന്റെ മുഖ്യകാരണം. സുവിശേഷസന്ദേശം ആഴത്തിൽ വേരൂന്നുകയും സഭ രൂപംകൊള്ളുകയും ചെയ്തിരിക്കുന്ന ഇക്കാലത്ത് ശാരീരികമായ അത്ഭുതങ്ങൾ അപൂർവമാണ് എന്ന വസ്തുതയിൽനിന്ന് ഇത് വ്യക്തമാണ്. അവ സംഭവിക്കുന്നുണ്ട്; എന്നാൽ യേശു തന്റെ പരസ്യശുശ്രൂഷയ്ക്ക് തുടക്കം കുറിച്ചപ്പോൾ സംഭവിച്ച അതേ രീതിയിലല്ല.
നമ്മുടെ കർത്താവിലേക്ക് നിങ്ങൾ ആകർഷിക്കപ്പെടുന്നതിന്റെ മുഖ്യകാരണത്തെക്കുറിച്ച് ഇന്ന് വിചിന്തനം ചെയ്യുക. നിങ്ങളുടെ ഹൃദയത്തിന്റെ ആഴങ്ങളിൽ സംസാരിക്കപ്പെടുന്ന അവിടുത്തെ സജീവവചനം അന്വേഷിക്കുക. ആന്തരിക രൂപാന്തരമാണ് ഇന്ന് സംഭവിക്കുന്ന ഏറ്റവും പ്രധാനപ്പെട്ട അത്ഭുതം. ഒരു വ്യക്തി ദൈവം സംസാരിക്കുന്നത് കേൾക്കുകയും ആ വചനത്തോട് പ്രതികരിക്കുകയും തന്റെ ജീവിതം മാറ്റാൻ അവിടുത്തെ അനുവദിക്കുകയും ചെയ്യുമ്പോൾ, നമുക്ക് എപ്പോഴെങ്കിലും അനുഭവിക്കാനാകുന്ന കൃപയുടെ ഏറ്റവും പ്രധാനപ്പെട്ട അത്ഭുതങ്ങളിൽ ഒന്നാണ് സംഭവിക്കുന്നത്. നാം അവിടുത്തിലേക്ക് ആകർഷിക്കപ്പെടുകയും അവിടുത്തെ അന്വേഷിക്കുകയും അവിടുന്ന് നയിക്കുന്നിടത്തെല്ലാം അവിടുത്തെ അനുഗമിക്കുകയും ചെയ്യേണ്ടതിന്റെ കേന്ദ്രകാരണവും ഇതുതന്നെയാണ്.
അത്ഭുതങ്ങൾ പ്രവർത്തിക്കുന്ന എന്റെ കർത്താവേ, നിശ്ശബ്ദതയും ഏകാന്തതയും നിറഞ്ഞ എന്റെ ആന്തരികജീവിതത്തിന്റെ മരുഭൂമിയിൽ എന്നെ പഠിപ്പിച്ചുകൊണ്ട് അങ്ങയിലേക്ക് എന്നെ ആകർഷിക്കണമേ. എനിക്കു പുതുജീവൻ നൽകാനായി അങ്ങ് എന്നോടു സംസാരിക്കുന്ന വചനം കേൾക്കാൻ കഴിയേണ്ടതിന് അങ്ങയെ അന്വേഷിക്കാൻ എന്നെ സഹായിക്കണമേ. അങ്ങയുടെ വിശുദ്ധ വചനം എന്നെ കൂടുതൽ പൂർണ്ണമായി രൂപാന്തരപ്പെടുത്തി, ഞാൻ ആയിത്തീരണമെന്ന് അങ്ങ് ആഗ്രഹിക്കുന്ന നവസൃഷ്ടിയാക്കി എന്നെ മാറ്റേണ്ടതിന് ഞാൻ എപ്പോഴും അങ്ങയെ ശ്രവിക്കട്ടെ. ഈശോയേ, ഞാൻ അങ്ങയിൽ ശരണപ്പെടുന്നു.
വ്യാകുലമാതാവിനോടുള്ള നൊവേന
പരമ്പരാഗതമായി സെപ്റ്റംബർ 7–15 തീയതികളിൽ ചൊല്ലുന്നു
ദൈവകരുണയെക്കുറിച്ചുള്ള വിചിന്തനങ്ങൾ
ആണ്ടുവട്ടത്തിലേക്കുള്ള വിശുദ്ധലിഖിത ധ്യാനങ്ങൾ
ഇന്നത്തെ വിശുദ്ധൻ – പരിശുദ്ധ കന്യകാമറിയത്തിന്റെ വിശുദ്ധനാമം
വിശുദ്ധ കുർബാനയിലെ വായനകൾക്കുള്ള തിരഞ്ഞെടുപ്പുകൾ
