നല്ല ഇടയന്റെ സംരക്ഷണത്തിൽ

ഒക്ടോബർ 5, 2023
ആണ്ടുവട്ടക്കാലത്തിലെ ഇരുപത്തിയാറാം ആഴ്ചയിലെ വ്യാഴാഴ്ച
ഇന്നത്തെ വായനകൾ

യേശു മറ്റു എഴുപത്തിരണ്ട് ശിഷ്യന്മാരെ നിയോഗിച്ച്, താൻ സന്ദർശിക്കാൻ ഉദ്ദേശിച്ചിരുന്ന എല്ലാ പട്ടണങ്ങളിലേക്കും സ്ഥലങ്ങളിലേക്കും തനിക്കു മുമ്പായി ഈരണ്ടുപേരായി അയച്ചു. അവൻ അവരോടു പറഞ്ഞു: “വിളവു സമൃദ്ധമാണ്; വേലക്കാരോ ചുരുക്കവും. അതിനാൽ, തന്റെ വിളവെടുപ്പിനു വേലക്കാരെ അയയ്ക്കാൻ വിളവിന്റെ നാഥനോടു പ്രാർഥിക്കുവിൻ. നിങ്ങൾ പോകുവിൻ; ഇതാ, ചെന്നായ്ക്കളുടെ ഇടയിലേക്ക് ആട്ടിൻകുട്ടികളെ എന്നപോലെ ഞാൻ നിങ്ങളെ അയയ്ക്കുന്നു.” ലൂക്കാ 10:1–3

നമ്മുടെ കർത്താവ് തന്റെ ശിഷ്യന്മാരെ ചെന്നായ്ക്കളുടെ ഇടയിലേക്ക് ആട്ടിൻകുട്ടികളെപ്പോലെ അയയ്ക്കുന്നത് എന്തുകൊണ്ടായിരിക്കും? ആദ്യം ഇത് നമ്മിൽ ആശങ്കയുണർത്തിയേക്കാം. അവർക്ക് ഉപദ്രവം നേരിടേണ്ടിവരുന്ന ഒരു സാഹചര്യത്തിലേക്കാണോ കർത്താവ് അവരെ അയയ്ക്കുന്നതെന്നും നാം ചിന്തിച്ചേക്കാം. ഇതിനെക്കുറിച്ച് വിശദീകരിക്കുമ്പോൾ വിശുദ്ധ അംബ്രോസ് പറയുന്നത്, ഈ ശിഷ്യന്മാർ ഭയപ്പെടേണ്ട യാതൊരു കാരണവുമില്ലെന്നാണ്; കാരണം, തന്റെ ആടുകളെ എപ്പോഴും സംരക്ഷിക്കുന്ന നല്ല ഇടയനാണ് യേശു. ഈ ദൗത്യത്തിലും ഭാവിയിലെ എല്ലാ ദൗത്യങ്ങളിലും ഈ ശിഷ്യന്മാർ ഏതുതരം അപകടമാണ് നേരിടേണ്ടിവരുക എന്നു ചിന്തിക്കുന്നതും, നാം ഭയപ്പെടേണ്ട ഒരേയൊരു അപകടവുമായി അതിനെ താരതമ്യം ചെയ്യുന്നതും പ്രയോജനകരമാണ്.

ഈ സാഹചര്യത്തിലെ “ചെന്നായ്ക്കൾ” വിശേഷിച്ചും അക്കാലത്തെ ക്രൂരരായ ചില മതനേതാക്കളും ഭരണാധികാരികളും, അതുപോലെ ശിഷ്യന്മാരെയും അവരുടെ പ്രബോധനത്തെയും നിരസിക്കുന്നവരുമാണ്. നമ്മുടെ കർത്താവും അവിടുത്തെ ശിഷ്യന്മാരും ലോകത്തിൽ നേരിട്ട അപകടത്തെ നോക്കുമ്പോൾ, അത് പീഡനത്തിന്റെ അപകടമായിരുന്നുവെന്ന് നാം കാണുന്നു. എന്നാൽ, അത് ഒരാൾ ഭയപ്പെടേണ്ട “അപകടം” ആണോ? തീർച്ചയായും അല്ല; കാരണം, അതിനു മുന്നിൽ യേശു ഒരിക്കലും ഭയന്നു പിന്മാറിയില്ല. പീഡനത്തിന്റെ ഇതേ അനുഭവം യേശുവിന്റെ അനുയായികൾക്കും ഉണ്ടായതെങ്ങനെയെന്ന് അപ്പസ്തോലന്മാരുടെ നടപടികളിൽ നാം കാണുന്നു. എന്നാൽ ദൈവിക കാഴ്ചപ്പാടിൽ, ഒരാളുടെ ആത്മാവിന് നിത്യമായ നാശം വരുത്താൻ കഴിയുന്നതു മാത്രമാണ് യഥാർഥ “അപകടം”: അതായത്, പാപം.

പാപത്തിനു മാത്രമാണ് യഥാർഥ നാശം വരുത്താൻ കഴിയുന്നത്; പീഡനത്തിനോ മരണത്തിനുപോലുമോ അതിനു കഴിയില്ല. അതിനാൽ, യേശു തന്റെ ശിഷ്യന്മാരെ “ചെന്നായ്ക്കളുടെ ഇടയിലേക്ക് ആട്ടിൻകുട്ടികളെപ്പോലെ” അയച്ചപ്പോൾ, ഈ ലോകത്തിൽ അവർ നേരിടേണ്ടിവരുന്ന പീഡനത്തെക്കുറിച്ച് അവിടുത്തേക്ക് പൂർണമായ അറിവുണ്ടായിരുന്നു. എങ്കിലും അവിടുന്ന് അവരെ പ്രോത്സാഹിപ്പിച്ച് അയച്ചു. കാരണം, ഒടുവിൽ അവർക്ക് പീഡനവും മരണവും സഹിക്കേണ്ടിവന്നാലും, അതിന്റെ മധ്യത്തിൽ അവർ പുലർത്തുന്ന വിശ്വാസവും ധൈര്യവും നിത്യജീവിതത്തിൽ അവർക്കു പുണ്യം നേടിക്കൊടുക്കുമെന്നും, മറ്റുള്ളവരുടെ വിശ്വാസജീവിതത്തിൽ കൃപയുടെ ഉപകരണമായിത്തീരുമെന്നും അവിടുന്ന് അറിഞ്ഞിരുന്നു. ആദിമസഭയിൽ പൊതുവേ പറഞ്ഞിരുന്നതുപോലെ, “രക്തസാക്ഷികളുടെ രക്തം ക്രൈസ്തവരുടെ വിത്താണ്.” അതുകൊണ്ട്, ഈ ആടുകളെ ചെന്നായ്ക്കളുടെ ഇടയിലേക്ക് അയച്ചപ്പോൾ, നല്ല ഇടയനായ യേശു അവരുടെ ആത്മാക്കളോടൊപ്പവും സഞ്ചരിച്ചു; അവരുടെ സദ്ഗുണം സംരക്ഷിക്കുകയും വിശ്വാസത്തിനു സാക്ഷ്യം വഹിക്കാൻ അവരെ ശക്തിപ്പെടുത്തുകയും ഭയത്തിൽനിന്നും പാപത്തിൽനിന്നും അവരെ കാത്തുസൂക്ഷിക്കുകയും ചെയ്തു. ശരീരത്തിന്റെ മരണമോ ലോകത്തിലെ സൽപ്പേരിന്റെ നഷ്ടമോ അവർ ഭയപ്പെടണമെന്ന് അവിടുന്ന് ആഗ്രഹിച്ചില്ല. മറിച്ച്, ആത്മാവിന്റെ മരണത്തെ മാത്രം അവർ ഭയപ്പെടണമെന്നായിരുന്നു അവിടുത്തെ ആഗ്രഹം; നല്ല ഇടയനായ അവിടുന്ന് അവരുടെ ആത്മാക്കളെ അതിൽനിന്ന് ശക്തമായി സംരക്ഷിച്ചു.

നമ്മുടെ കർത്താവ് നിങ്ങളെയും ചെന്നായ്ക്കളുടെ ഇടയിൽ ഒരു ആട്ടിൻകുട്ടിയെപ്പോലെ അയയ്ക്കുന്നു എന്ന മഹത്തായ സത്യത്തെക്കുറിച്ച് ഇന്ന് വിചിന്തനം ചെയ്യുക. പാപത്തിലേക്കു നയിക്കുന്ന എണ്ണമറ്റ പ്രലോഭനങ്ങളിൽനിന്ന് കർത്താവ് നിങ്ങളെ കാത്തുസൂക്ഷിക്കുമെന്ന് വിശ്വസിച്ച്, നിങ്ങളുടെ ജീവിതത്തിൽ ദൈവഹിതം നിറവേറ്റാൻ നിങ്ങൾക്ക് മനക്കരുത്തും ധൈര്യവും ആവശ്യമാണ്. നിങ്ങൾ മുന്നോട്ടു പോകുമ്പോൾ, ലോകത്തിലെ മറ്റുള്ളവരിൽനിന്ന് പരുഷമായ പെരുമാറ്റവും കുറ്റവിധിയും പല രൂപത്തിലുള്ള പീഡനങ്ങൾപോലും നേരിടേണ്ടിവന്നാൽ ആശ്ചര്യപ്പെടരുത്. അങ്ങനെ സംഭവിക്കുമ്പോൾ സദ്ഗുണത്തോടെ പ്രതികരിക്കുക. വിശ്വാസവും പ്രത്യാശയും ഉപവിയും നിങ്ങളുടെ ജീവിതത്തിൽ സജീവമായി നിലനിർത്തുക. നിത്യമായ നാശം വരുത്താത്ത വിധത്തിൽ നിങ്ങളെ ഉപദ്രവിക്കാൻ കഴിയുന്നവരെ ഭയപ്പെടരുത്. പകരം, അനന്തരഫലങ്ങൾ എന്തുതന്നെയായാലും, സ്നേഹിക്കാനും ദൈവത്തിന്റെ കരുണയും സത്യവും നമ്മുടെ ലോകത്തിൽ പങ്കുവയ്ക്കാനുമുള്ള നിങ്ങളുടെ ദൗത്യത്തിൽ ഉറച്ചുനിൽക്കുക. അങ്ങനെ ചെയ്യുന്നത് കൃപയുടെ എണ്ണമറ്റ ആന്തരിക അനുഗ്രഹങ്ങൾ കൊണ്ടുവരും; നിങ്ങൾക്കു സങ്കൽപ്പിക്കാൻ കഴിയുന്നതിലും അപ്പുറമുള്ള വിധങ്ങളിൽ തന്റെ കൃപയുടെ ഉപകരണമായി നിങ്ങളെ ഉപയോഗിക്കാൻ ദൈവത്തിന് അവസരമൊരുക്കുകയും ചെയ്യും.

എന്റെ ധീരനായ കർത്താവേ, ഈ ലോകത്തിലെ കാഠിന്യവും ക്രൂരതയും അങ്ങ് നേരിട്ടു. ഒടുവിൽ, സ്വന്തം ജീവൻ സ്വമനസ്സാ അർപ്പിച്ചുകൊണ്ട് അങ്ങയുടെ ദൈവിക സ്നേഹത്തിനു സാക്ഷ്യം നൽകാൻ അത് അങ്ങയെ പ്രാപ്തനാക്കി. അങ്ങയുടെ ദൗത്യം നിറവേറ്റാൻ എന്നെ അയയ്ക്കുകയും സകല ദൈവിക പുണ്യങ്ങളാലും എന്നെ ശക്തിപ്പെടുത്തുകയും ചെയ്യണമേ. അങ്ങനെ, ഒരു തരത്തിലുള്ള പീഡനത്തെയും ഭയപ്പെടാതെ, വിശ്വാസമെന്ന ദാനത്തിലൂടെ എല്ലാ ഭയങ്ങളെയും അതിജീവിച്ച്, അങ്ങയോടുള്ള സ്നേഹത്തിൽ ഞാൻ എന്നും ഉറച്ചുനിൽക്കട്ടെ. പ്രിയ കർത്താവേ, എന്റെ ജീവിതം അങ്ങയുടേതാണ്. അങ്ങയുടെ തിരുമനസ്സുപോലെ എന്നെ നയിക്കണമേ. ഈശോയേ, ഞാൻ അങ്ങയിൽ ശരണപ്പെടുന്നു.