ഒക്ടോബർ 10, 2023
ആണ്ടുവട്ടക്കാലം ഇരുപത്തിയേഴാം ആഴ്ചയിലെ ചൊവ്വാഴ്ച
ഇന്നത്തെ വായനകൾ
പലവിധ ശുശ്രൂഷകളാൽ ഭാരപ്പെട്ട മർത്താ അവന്റെ അടുത്തുവന്ന് പറഞ്ഞു: “കർത്താവേ, ശുശ്രൂഷ ചെയ്യാൻ എന്റെ സഹോദരി എന്നെ തനിച്ചാക്കിയിരിക്കുന്നത് അങ്ങ് ശ്രദ്ധിക്കുന്നില്ലേ? എന്നെ സഹായിക്കാൻ അവളോടു പറയണമേ.” കർത്താവ് അവളോടു മറുപടി പറഞ്ഞു: “മർത്താ, മർത്താ, നീ പല കാര്യങ്ങളെക്കുറിച്ച് ഉത്കണ്ഠപ്പെടുകയും വ്യാകുലപ്പെടുകയും ചെയ്യുന്നു. ഒരു കാര്യം മാത്രമേ ആവശ്യമുള്ളൂ. മറിയം കൂടുതൽ നല്ല ഭാഗം തിരഞ്ഞെടുത്തിരിക്കുന്നു; അത് അവളിൽനിന്ന് എടുക്കപ്പെടുകയില്ല.” ലൂക്കാ 10:40–42
പലവിധത്തിൽ, നമ്മുടെ കർത്താവിന്റെ ഈ വാക്കുകൾ സുവിശേഷത്തിലെ ഏറ്റവും പ്രധാനവും കേന്ദ്രസ്ഥാനത്തുള്ളതുമായ സന്ദേശത്തെ സംഗ്രഹിക്കുന്നു. ഓരോ ദിവസവും “കൂടുതൽ നല്ല ഭാഗം” തിരഞ്ഞെടുക്കാൻ നാമെല്ലാവരും വിളിക്കപ്പെട്ടിരിക്കുന്നു.
മർത്താ, മറിയം, ലാസർ എന്നിവർ യേശുവിന്റെ അടുത്ത സുഹൃത്തുക്കളായിരുന്നു. ജറുസലെമിൽനിന്ന് അൽപദൂരം മാത്രമുണ്ടായിരുന്ന അവരുടെ ഭവനം അവൻ പതിവായി സന്ദർശിച്ചിരുന്നു. ഈ അവസരത്തിൽ യേശു അവരുടെ ഭവനം സന്ദർശിക്കുമ്പോൾ, ഈ സഹോദരങ്ങളിൽ ഒരാളായ മറിയം യേശുവിന്റെ പാദത്തിങ്കൽ ഇരുന്ന് അവന്റെ വാക്കുകൾ കേൾക്കുകയും അവനോടു സംസാരിക്കുകയും ചെയ്യുകയായിരുന്നു. അതിഥിസൽക്കാരത്തിന്റെ പ്രധാന കാര്യങ്ങളിൽ തിരക്കിലായിരുന്ന മർത്താ മറിയത്തോട് അസ്വസ്ഥയായതുപോലെ തോന്നി. അതിനാൽ, തന്നെ സഹായിക്കാൻ മറിയത്തോടു പറയണമെന്ന് ആവശ്യപ്പെട്ടുകൊണ്ട് അവൾ യേശുവിനെ സമീപിച്ചു. എന്നാൽ അങ്ങനെ ചെയ്യുമ്പോൾ, മറിയത്തെ അവളുടെ ജീവിതത്തിലെ ഏറ്റവും പ്രധാനപ്പെട്ട ലക്ഷ്യത്തിൽനിന്ന് പിന്തിരിപ്പിക്കാനും അറിയാതെ അവൾ ശ്രമിക്കുകയായിരുന്നു.
യേശുവിന്റെ പാദത്തിങ്കൽ ഇരുന്നുകൊണ്ട്, ജീവിതത്തിൽ നാം ഏറ്റവും കൂടുതൽ ശ്രദ്ധ കേന്ദ്രീകരിക്കേണ്ടത് എന്തിലാണെന്നതിന് മറിയം നമുക്ക് മാതൃക നൽകി. പാചകം, ശുചീകരണം, ജോലി, വിനോദം, മറ്റുള്ളവരെ പരിചരിക്കൽ തുടങ്ങിയ ആവശ്യമായ പല കാര്യങ്ങളാൽ നമ്മുടെ ദിവസങ്ങൾ നിറഞ്ഞിരിക്കുമെങ്കിലും, എന്തിനുവേണ്ടിയാണോ നാം സൃഷ്ടിക്കപ്പെട്ടത്, നിത്യത മുഴുവൻ നാം എന്താണോ ചെയ്യാനിരിക്കുന്നത്, അത് നാം ഒരിക്കലും മറക്കരുത്: മഹത്വപൂർണനായ നമ്മുടെ ദൈവത്തെ ആരാധിക്കുക.
നിങ്ങളുടെ ദിവസം നിറയ്ക്കുന്ന കാര്യങ്ങളെല്ലാം പരിചിന്തിക്കുക. നിങ്ങൾ ചെയ്യുന്നവയിൽ മിക്കതും പ്രധാനപ്പെട്ടവയായിരിക്കാം. എങ്കിലും, നമ്മുടെ കർത്താവിനെ ആരാധിക്കാനും അവനെ ശ്രവിക്കാനും പ്രാർഥനയിലൂടെ അവനെ മഹത്വപ്പെടുത്താനും നിങ്ങൾ ദിവസവും സമയം മാറ്റിവയ്ക്കുന്നുണ്ടോ? ജീവിതത്തിലെ പ്രധാനപ്പെട്ട മറ്റു പല കടമകൾക്കും അത്ര പ്രധാനമല്ലാത്ത കാര്യങ്ങൾക്കും നമുക്ക് പലപ്പോഴും സമയം കണ്ടെത്താൻ കഴിയുന്നു. വീട്ടുജോലികളിൽ നാം മണിക്കൂറുകൾ ചെലവഴിച്ചേക്കാം, സിനിമകളിൽ മുഴുകിയേക്കാം, വൈകുന്നേരങ്ങൾ മുഴുവൻ വായനയ്ക്കായി മാറ്റിവച്ചേക്കാം, ജോലിസ്ഥലത്തെ കടമകൾ നിറവേറ്റിയേക്കാം. എന്നാൽ നമ്മുടെ ദൈവത്തോടുള്ള നിശ്ശബ്ദ പ്രാർഥനയ്ക്കും ആരാധനയ്ക്കുമായി ദിവസവും ഒന്നോ രണ്ടോ മിനിറ്റുകൾ മാത്രം മാറ്റിവയ്ക്കുന്നു—അതുപോലും മാറ്റിവയ്ക്കുന്നുണ്ടെങ്കിൽ!
ദിവസവും ഒരു മണിക്കൂർ മുഴുവൻ “കൂടുതൽ നല്ല ഭാഗം” തിരഞ്ഞെടുക്കാൻ നിങ്ങൾ തീരുമാനിച്ചാൽ നിങ്ങളുടെ ജീവിതത്തിന് എന്തു സംഭവിക്കും? നിങ്ങളുടെ ദിവസത്തിലെ ആദ്യമണിക്കൂർ സുവിശേഷഭാഗത്തിലെ മറിയത്തെ അനുകരിക്കാൻ സമർപ്പിക്കുമെന്നും, നിശ്ശബ്ദ പ്രാർഥനയിലൂടെയും ധ്യാനത്തിലൂടെയും യേശുവിനെ ആരാധിക്കുകയല്ലാതെ മറ്റൊന്നും ചെയ്യുകയില്ലെന്നും നിങ്ങൾ തീരുമാനിച്ചാലോ? ആ സമയത്ത് ചെയ്യാൻ കഴിയുന്ന മറ്റു പല ജോലികളെക്കുറിച്ചായിരിക്കാം ആദ്യം നിങ്ങൾ ചിന്തിക്കുക. ദിവസവും ദീർഘനേരം പ്രാർഥിക്കാൻ സമയമില്ലെന്ന് നിങ്ങൾ തീരുമാനിച്ചേക്കാം. എന്നാൽ അതു സത്യമാണോ? ഒരുപക്ഷേ, നിങ്ങൾ നിങ്ങളോടുതന്നെ മർത്തായെപ്പോലെ പെരുമാറുകയായിരിക്കാം: നിങ്ങളുടെ സമയം കൂടുതൽ പ്രധാനപ്പെട്ട കാര്യങ്ങൾക്കായി വിനിയോഗിക്കണമെന്നും, ദിവസവും ആരാധനയിലും പ്രാർഥനയിലും യേശുവിനോടൊപ്പം തനിച്ചിരിക്കാൻ സമയം ചെലവഴിച്ചില്ലെങ്കിലും അവൻ അതു മനസ്സിലാക്കുമെന്നും നിങ്ങൾ സ്വയം പറയുകയായിരിക്കാം. നിങ്ങളുടെ അവസ്ഥ ഇതാണെങ്കിൽ, ഈ സുവിശേഷഭാഗം വളരെ ശ്രദ്ധയോടെ ശ്രവിക്കുക. പലവിധത്തിൽ, നിങ്ങളെക്കുറിച്ച് ഇങ്ങനെ പറയാൻ യേശു ആഴമായി ആഗ്രഹിക്കുന്നു. ഓരോ ദിവസവും ദീർഘമായ ഒരു സമയത്തേക്ക് നിങ്ങൾ കൂടുതൽ നല്ല ഭാഗം തിരഞ്ഞെടുത്തിരിക്കുന്നുവെന്നും, അത് നിങ്ങളിൽനിന്ന് എടുക്കപ്പെടുകയില്ലെന്നും നിങ്ങളെക്കുറിച്ച് പറയാൻ അവൻ ആഗ്രഹിക്കുന്നു.
ജീവിതത്തിൽ ഏറ്റവും പ്രധാനപ്പെട്ടത് എന്താണെന്ന് ഇന്ന് വിചിന്തനം ചെയ്യുക. ഏറ്റവും പ്രധാനപ്പെട്ടതിനെ അവഗണിച്ചുകൊണ്ട് ജീവിതത്തിലെ മറ്റെല്ലാ പ്രധാന കടമകളും മാത്രം നിറവേറ്റാനുള്ള ഒഴികഴിവുകളും പ്രലോഭനങ്ങളും അകറ്റിക്കളയുക. നിശ്ശബ്ദ പ്രാർഥനയ്ക്കും ആരാധനയ്ക്കുമായി ഓരോ ദിവസവും ധാരാളം സമയം നിങ്ങൾ തനിക്കായി മാറ്റിവയ്ക്കണമെന്ന് യേശു തീർച്ചയായും ആഗ്രഹിക്കുന്നു എന്ന ലളിതമായ സത്യത്തെക്കുറിച്ച് വിചിന്തനം ചെയ്യുക. ഒഴികഴിവുകൾക്കും ശ്രദ്ധ പതറിക്കുന്ന കാര്യങ്ങൾക്കും വഴങ്ങരുത്. യേശുവിനെ ആരാധിച്ചും ശ്രവിച്ചും സ്നേഹിച്ചും അവന്റെ പാദത്തിങ്കൽ നിലകൊള്ളാൻ സ്വയം സമർപ്പിക്കുക. അങ്ങനെ ചെയ്താൽ, നിങ്ങളുടെ ജീവിതം കൂടുതൽ ക്രമബദ്ധമാകുന്നുവെന്നും, പ്രാർഥനയിൽ ചെലവഴിക്കുന്ന സമയം നിങ്ങൾ ദിവസവും നിറവേറ്റുന്ന മറ്റേതൊരു പ്രധാന കടമയെക്കാളും കൂടുതൽ നല്ല ഫലങ്ങൾ പുറപ്പെടുവിക്കുന്നുവെന്നും നിങ്ങൾ കണ്ടെത്തും.
എന്നെ ക്ഷണിക്കുന്ന എന്റെ കർത്താവേ, നിശ്ശബ്ദവും ഭക്തിനിർഭരവുമായ പ്രാർഥനയിൽ അങ്ങയെ ആരാധിക്കുന്നതാണ് ഓരോ ദിവസവും ഞാൻ നിറവേറ്റേണ്ട ഏറ്റവും പ്രധാനപ്പെട്ട കടമയെന്ന് ഞാൻ ഉറച്ചു വിശ്വസിക്കുന്നു. അങ്ങ് ആഗ്രഹിക്കുന്നത്ര സമയം നിശ്ശബ്ദവും സ്നേഹപൂർണവുമായ പ്രാർഥനയ്ക്കായി നീക്കിവച്ചുകൊണ്ട് ഓരോ ദിവസവും അങ്ങയെ ആരാധിക്കുന്നതിൽനിന്ന് ഒന്നും എന്നെ പിന്തിരിപ്പിക്കാതിരിക്കട്ടെ. പ്രിയ കർത്താവേ, പ്രാർഥനയാകുന്ന ഈ ദാനം ഞാൻ കണ്ടെത്തുകയും മറിയത്തോടും മഹിമയണിഞ്ഞ സകല വിശുദ്ധരോടുമൊപ്പം അങ്ങയുടെ പാദത്തിങ്കൽ ഇരിക്കുകയും ചെയ്യട്ടെ. ഈശോയേ, ഞാൻ അങ്ങയിൽ ശരണപ്പെടുന്നു.
ദൈവകരുണയെക്കുറിച്ചുള്ള വിചിന്തനങ്ങൾ
ആണ്ടുവട്ടത്തിലേക്കുള്ള വിശുദ്ധലിഖിത ധ്യാനങ്ങൾ
വിശുദ്ധ കുർബാനയിലെ വായനകൾക്കുള്ള തിരഞ്ഞെടുപ്പുകൾ
