2023 നവംബർ 30, വ്യാഴാഴ്ച
വിശുദ്ധ അന്ത്രയോസ് ശ്ലീഹാ—തിരുനാൾ
യേശു ഗലീലിക്കടൽത്തീരത്തുകൂടി നടക്കുമ്പോൾ, പത്രോസ് എന്നു വിളിക്കപ്പെടുന്ന ശിമയോനും അവന്റെ സഹോദരനായ അന്ത്രയോസും കടലിൽ വല വീശുന്നതു കണ്ടു; അവർ മീൻപിടിത്തക്കാരായിരുന്നു. അവൻ അവരോടു പറഞ്ഞു: “എന്നെ അനുഗമിക്കുവിൻ; ഞാൻ നിങ്ങളെ മനുഷ്യരെ പിടിക്കുന്നവരാക്കും.” മത്തായി 4:18–19
ഇന്ന് നാം അപ്പസ്തോലന്മാരിൽ ഒരാളായ വിശുദ്ധ അന്ത്രയോസിനെ ആദരിക്കുന്നു. അന്ത്രയോസും സഹോദരൻ പത്രോസും മീൻപിടിത്തക്കാരായിരുന്നു. അധികം വൈകാതെ അവർ മറ്റൊരു തരത്തിലുള്ള മീൻപിടിത്തം ഏറ്റെടുക്കാനിരിക്കുകയായിരുന്നു. യേശു പറഞ്ഞതുപോലെ, അവർ ഉടൻതന്നെ “മനുഷ്യരെ പിടിക്കുന്നവരായി” മാറുമായിരുന്നു. എന്നാൽ നമ്മുടെ കർത്താവ് ഈ ദൗത്യത്തിനായി അവരെ അയയ്ക്കുന്നതിനുമുമ്പ്, അവർ അവിടുത്തെ അനുയായികളാകേണ്ടിയിരുന്നു. നമ്മുടെ കർത്താവ് ആദ്യം ഈ മനുഷ്യരെ പിടിക്കുന്നവനായപ്പോഴാണ് അതു സംഭവിച്ചത്.
ഈ സുവിശേഷഭാഗത്തിൽ, യേശു കടന്നുപോകുന്നതിനിടയിൽ തങ്ങളുടെ തൊഴിലിൽ കഠിനാധ്വാനം ചെയ്തുകൊണ്ടിരുന്ന ഈ രണ്ടു സഹോദരന്മാരെ “കണ്ടു” എന്നതു ശ്രദ്ധിക്കുക. ആദ്യം യേശു അവരെ “കണ്ടു”; അതിനുശേഷം അവരെ വിളിച്ചു. നമ്മുടെ കർത്താവിന്റെ ഈ നോട്ടം ധ്യാനവിഷയമാക്കേണ്ടതാണ്.
നിങ്ങൾ അവിടുത്തിലേക്കു ശ്രദ്ധ തിരിക്കുന്ന നിമിഷത്തിനായി കാത്തുകൊണ്ട്, നമ്മുടെ കർത്താവ് ദൈവികസ്നേഹത്തോടെ നിരന്തരം നിങ്ങളെ നോക്കിക്കൊണ്ടിരിക്കുന്നു എന്ന അഗാധമായ സത്യം മനസ്സിൽ കാണുക. അവിടുത്തെ നോട്ടം നിലയ്ക്കാത്തതും ആഴമുള്ളതുമാണ്. നിങ്ങൾ മറ്റെല്ലാം ഉപേക്ഷിച്ച് തന്നെ അനുഗമിക്കണമെന്നു കൊതിക്കുന്ന നോട്ടമാണത്. തന്നെ അനുഗമിക്കാൻ മാത്രമല്ല, തുടർന്ന് പുറപ്പെട്ടുചെന്ന് മറ്റുള്ളവരെയും വിശ്വാസയാത്രയിലേക്കു ക്ഷണിക്കാനുമുള്ള അവിടുത്തെ സൗമ്യമായ ക്ഷണം നിങ്ങൾ കേൾക്കണമെന്നു കൊതിക്കുന്ന നോട്ടം.
ഈ ആഗമനകാലം ആരംഭിക്കുമ്പോൾ, അന്ത്രയോസിനും പത്രോസിനും ലഭിച്ച വിളി നമ്മുടെതന്നെ വിളിയാകാനും നാം അനുവദിക്കണം. യേശു നമ്മെ നോക്കുകയും നാം ആരാണെന്നു കാണുകയും നമ്മെക്കുറിച്ചുള്ളതെല്ലാം അറിയുകയും തുടർന്ന് ക്ഷണത്തിന്റെ ഒരു വാക്ക് ഉരിയാടുകയും ചെയ്യുമ്പോൾ, അവിടുത്തെ ശ്രദ്ധിക്കാൻ നാം മനസ്സുതുറക്കണം. അവിടുന്നു നിങ്ങളോടു പറയുന്നു: “എന്നെ അനുഗമിക്കുക…” നിങ്ങളുടെ ജീവിതത്തിന്റെ എല്ലാ തലങ്ങളിലും നിറഞ്ഞുനിൽക്കേണ്ട ഒരു ക്ഷണമാണിത്. യേശുവിനെ “അനുഗമിക്കുക” എന്നാൽ മറ്റെല്ലാം പിന്നിൽ ഉപേക്ഷിച്ച്, നമ്മുടെ കർത്താവിനെ അനുഗമിക്കുന്നതു ജീവിതത്തിന്റെ ഏക ലക്ഷ്യമാക്കുക എന്നാണ്.
ദുഃഖകരമെന്നു പറയട്ടെ, പലരും തങ്ങളുടെ ജീവിതത്തിലെ ഈ വിളിക്കു കാര്യമായ ശ്രദ്ധ നൽകുന്നില്ല. അവിടുത്തെ വാക്കുകൾ കേൾക്കുന്നവർ ചുരുക്കമാണ്; പ്രതികരിക്കുന്നവർ അതിലും കുറവാണ്; തങ്ങളുടെ ജീവിതം പൂർണമായി സമർപ്പിച്ചുകൊണ്ട് പ്രതികരിക്കുന്നവർ അതിലും കുറവാണ്. നമ്മുടെ കർത്താവിന്റെ വിളിയോടു നിങ്ങൾ എങ്ങനെ പ്രതികരിക്കുന്നുവെന്ന് ഒരിക്കൽക്കൂടി വിലയിരുത്താനുള്ള അവസരമാണ് ആഗമനകാലത്തിന്റെ ആരംഭം.
യേശു നിങ്ങളോട് ഈ വാക്കുകൾ പറയുന്നതിനെക്കുറിച്ച് ഇന്ന് ധ്യാനിക്കുക. ആദ്യം, നിങ്ങളുടെ ആത്മാവിന്റെ സർവശക്തിയോടുംകൂടെ അവിടുത്തോട് “അതെ” എന്നു പറഞ്ഞിട്ടുണ്ടോ എന്ന ചോദ്യം വിചിന്തനം ചെയ്യുക. രണ്ടാമതായി, ഈ യാത്രയിലേക്കു നിങ്ങൾ ക്ഷണിക്കണമെന്ന് നമ്മുടെ കർത്താവ് ആഗ്രഹിക്കുന്നവരെക്കുറിച്ചു ചിന്തിക്കുക. ആരെ ക്ഷണിക്കാനാണ് യേശു നിങ്ങളെ അയയ്ക്കുന്നത്? നിങ്ങളുടെ ജീവിതത്തിലുള്ള ആരാണ് അവിടുത്തെ വിളിയോടു തുറവുള്ളവരായിരിക്കുന്നത്? നിങ്ങളിലൂടെ ആരെയാണ് യേശു തന്നിലേക്ക് ആകർഷിക്കാൻ ആഗ്രഹിക്കുന്നത്? ഇതിൽ ഉൾപ്പെട്ടിരിക്കുന്നതെല്ലാം ഉടനടി മനസ്സിലായില്ലെങ്കിലും നമ്മുടെ കർത്താവിനോട് “അതെ” എന്നു പറഞ്ഞ ഈ അപ്പസ്തോലന്മാരെ അനുകരിക്കുക. ഇന്ന് “അതെ” എന്നു പറയുക; മഹത്വപൂർണമായ ഈ വിശ്വാസയാത്രയിൽ ഇനി എന്തു ചെയ്യേണ്ടിവന്നാലും അതിനു സന്നദ്ധരും ഒരുക്കമുള്ളവരുമായിരിക്കുക.
എന്റെ പ്രിയ കർത്താവേ, ഇന്ന് ഞാൻ അങ്ങയോട് “അതെ” എന്നു പറയുന്നു. അങ്ങ് എന്നെ വിളിക്കുന്നത് ഞാൻ കേൾക്കുന്നു. അങ്ങയുടെ വിശുദ്ധവും പരിപൂർണ്ണവുമായ തിരുവിഷ്ടത്തിന് എന്നെത്തന്നെ പൂർണ്ണമായി സമർപ്പിച്ചുകൊണ്ട്, അത്യുദാരതയോടെ പ്രത്യുത്തരിക്കാൻ ഞാൻ തീരുമാനിക്കുന്നു. അങ്ങേക്കും എന്റെ ജീവിതത്തിലെ അങ്ങയുടെ ദൈവികവിളിക്കും എന്നെ പൂർണ്ണമായി സമർപ്പിക്കാനും ഒന്നും മാറ്റിവയ്ക്കാതിരിക്കാനും എനിക്കാവശ്യമായ ധൈര്യവും ജ്ഞാനവും നൽകണമേ. ഈശോയേ, ഞാൻ അങ്ങയിൽ ശരണപ്പെടുന്നു.
അമലോത്ഭവ നൊവേന
നവംബർ 29 – ഡിസംബർ 7
വിശുദ്ധ അന്ത്രയോസിന്റെ ക്രിസ്മസ് നൊവേന
താഴെ നൽകിയിരിക്കുന്ന വിശുദ്ധ അന്ത്രയോസിന്റെ ക്രിസ്മസ് നൊവേന പ്രാർഥന, വിശുദ്ധ അന്ത്രയോസിന്റെ തിരുനാളായ നവംബർ 30 മുതൽ ക്രിസ്മസിന്റെ തലേന്ന് വരെ ദിവസവും 15 പ്രാവശ്യം ചൊല്ലുന്നതാണ് പരമ്പരാഗത രീതി.
ഞങ്ങളുടെ ആഗമനകാല വിഭവങ്ങൾ കാണുക!
ദൈവകരുണയെക്കുറിച്ചുള്ള വിചിന്തനങ്ങൾ
ഇന്നത്തെ വിശുദ്ധൻ – വിശുദ്ധ അന്ത്രയോസ് ശ്ലീഹാ—തിരുനാൾ
വിശുദ്ധ കുർബാനയിലെ വായനകൾക്കുള്ള തിരഞ്ഞെടുപ്പുകൾ
