ദൈവഹിതത്തിലേക്ക് ഓടിയണയുക

2023 ഡിസംബർ 20, ബുധനാഴ്ച
ആഗമനകാല വാരദിനം
ഇന്നത്തെ വായനകൾ

ദൂതൻ അവളോടു മറുപടി പറഞ്ഞു: “പരിശുദ്ധാത്മാവ് നിന്റെമേൽ വരും; അത്യുന്നതന്റെ ശക്തി നിന്റെമേൽ നിഴൽ വിരിക്കും. അതിനാൽ ജനിക്കാനിരിക്കുന്ന ശിശു പരിശുദ്ധൻ, ദൈവപുത്രൻ എന്നു വിളിക്കപ്പെടും.” ലൂക്കാ 1:35

യേശുവിനെക്കുറിച്ച് നിങ്ങൾക്കറിയാവുന്നതെല്ലാം തൽക്കാലം മാറ്റിവെക്കാൻ ശ്രമിക്കുക. നമ്മുടെ പരിശുദ്ധ അമ്മ ആദ്യമായി കേട്ടതുപോലെ, പ്രധാനദൂതനായ ഗബ്രിയേലിന്റെ ഈ വാക്കുകൾ കേൾക്കുന്നതായി സങ്കൽപ്പിച്ച് ധ്യാനിക്കുക. പുരുഷനുമായി ബന്ധമുണ്ടായിട്ടില്ലെങ്കിലും തനിക്ക് ഒരു ശിശു ജനിക്കുമെന്ന് മറിയത്തെ അറിയിച്ചു. പരിശുദ്ധാത്മാവ് അവളുടെമേൽ നിഴൽ വിരിക്കുമ്പോഴാണ് ഈ ഗർഭധാരണം സംഭവിക്കുകയെന്നും അറിയിച്ചു. അവളുടെ ശിശു ദൈവപുത്രനായിരിക്കുമെന്നും അവളോടു പറഞ്ഞു. മഹത്വപൂർണനായ ഈ പ്രധാനദൂതൻ അറിയിച്ച വിസ്മയകരമായ വെളിപ്പെടുത്തലുകളെക്കുറിച്ച് മറിയം എന്തായിരിക്കും ചിന്തിച്ചിട്ടുണ്ടാവുക?

ഒരു സാധാരണ വ്യക്തി മിക്കവാറും ഇതൊരുതരം മിഥ്യാനുഭവമാണെന്നും താൻ കാണുന്നതും കേൾക്കുന്നതും താൽക്കാലികമായ ഏതോ മാനസിക അസ്വസ്ഥതയുടെ ഫലമാണെന്നും നിഗമനം ചെയ്യുമായിരുന്നു. ഒരുപക്ഷേ അവൾ സ്വപ്നം കാണുകയായിരുന്നോ? അതോ അറിയാതെ കഴിച്ച എന്തെങ്കിലും കാരണമാണോ അവൾക്ക് ഈ അനുഭവമുണ്ടായത്?

എന്നാൽ നമ്മുടെ പരിശുദ്ധ അമ്മ ഒരു സാധാരണ വ്യക്തിയായിരുന്നില്ല; അവളുടെ മനസ്സും സാധാരണമായിരുന്നില്ല. അമലമായ പ്രകൃതിയാൽ അവളുടെ മനസ്സ് തികച്ചും തെളിമയുള്ളതായിരുന്നു. ഗബ്രിയേൽ അവളെ അഭിവാദ്യം ചെയ്തപ്പോൾ പറഞ്ഞതുപോലെ, അവളുടെ മനസ്സ് സദാ “കൃപനിറഞ്ഞതും” ആയിരുന്നു. ദൈവത്തിന്റെ സ്വരം അവൾ തിരിച്ചറിഞ്ഞിരുന്നു; ഈ പ്രധാനദൂതൻ തന്നോട് അരുളിച്ചെയ്യുന്നത് ഉന്നതത്തിൽനിന്നുള്ള ഒരു സന്ദേശമാണെന്നും അവൾക്കറിയാമായിരുന്നു. അതിനാൽ അവൾ ശ്രവിച്ചു, സ്വീകരിച്ചു, വിശ്വസിച്ചു, സമ്മതമേകി.

മറിയം കേവലം സമ്മതം നൽകുക മാത്രമല്ല ചെയ്തതെന്നും നമുക്ക് നിഗമനം ചെയ്യാം. ദൈവത്തോടും അവിടുത്തെ ഹിതത്തോടുമുള്ള അവളുടെ സ്നേഹം അത്രമേൽ ശക്തമായിരുന്നതിനാൽ, പ്രധാനദൂതന്റെ ഈ കല്പന നിറവേറ്റാനുള്ള തീവ്രമായ ആഗ്രഹത്താൽ അവൾ അപ്പോൾത്തന്നെ നിറഞ്ഞിട്ടുണ്ടാകും. തനിക്കു ലഭിച്ച ഈ അത്ഭുതകരമായ വിളി സാക്ഷാത്കരിക്കാൻ തന്നാലാവുന്നതെല്ലാം ചെയ്യണമെന്ന വിശുദ്ധമായ ആഗ്രഹത്താൽ അവൾ നിറഞ്ഞിട്ടുണ്ടാകും. ഈ വിളി ഉടൻതന്നെ അവളുടെ ജീവിതത്തിന്റെ മുഖ്യലക്ഷ്യമായി മാറിയിട്ടുമുണ്ടാകും.

നമ്മുടെ പരിശുദ്ധ അമ്മയ്ക്കു ലഭിച്ച അതുല്യവും മഹത്വപൂർണവുമായ ദൈവവിളി നമ്മിലാർക്കും ലഭിച്ചിട്ടില്ലെങ്കിലും, നമുക്കെല്ലാവർക്കും ദൈവം ഒരു ദൗത്യം നൽകിയിട്ടുണ്ട് എന്നത് തീർച്ചയാണ്. ചിലപ്പോൾ നാം അതു കേൾക്കുകയും അതിനെക്കുറിച്ച് ചിന്തിക്കുകയും ചെയ്യുന്നു. ചിലപ്പോൾ അതു സ്വീകരിക്കാൻ നാം തീരുമാനിക്കുന്നു. എന്നാൽ നമ്മുടെ പരിശുദ്ധ അമ്മയെ അനുകരിച്ച് അതിലേക്ക് ഓടിയണയുന്നതാണ് ഏറ്റവും ഉത്തമമായത്. നാം അതു സ്വീകരിക്കാൻ മനസ്സു തുറന്നാൽ മാത്രം പോരാ. അതിനു കീഴടങ്ങിയാൽ മാത്രം പോരാ. നമ്മുടെ ആത്മാവിലെ ഓരോ ആഗ്രഹവും നമ്മിലുള്ള ഓരോ തീക്ഷ്ണാഭിലാഷവും ഓരോ വാഞ്ഛയും ദൈവഹിതം നിറവേറ്റുന്നതിനായി പ്രവർത്തിക്കാൻ നാം അനുവദിക്കുകയും വേണം.

ജീവിതത്തിൽ എന്തു ചെയ്യാനാണ് ദൈവം നിങ്ങളെ വിളിക്കുന്നത്? നിങ്ങളുടെ ലക്ഷ്യം എന്താണ്? നിങ്ങളുടെ ദൗത്യം എന്താണ്? ഈ ചോദ്യങ്ങൾക്ക് ഉത്തരം നൽകാൻ നിങ്ങൾ വിഷമിക്കുന്നുണ്ടെങ്കിൽ, ദൈവം നിങ്ങൾക്കായി തിരഞ്ഞെടുത്തിരിക്കുന്നതു നിറവേറ്റാനുള്ള ആഴമേറിയതും നിങ്ങളുടെ മുഴുവൻ അസ്തിത്വത്തെയും നിറയ്ക്കുന്നതുമായ വിശുദ്ധമായ ആഗ്രഹത്തിനായി പ്രാർഥിച്ചുകൊണ്ട് തുടങ്ങാം. ദൈവഹിതം നിറവേറുക എന്നതു മാത്രമാണ് നിങ്ങൾ ആഗ്രഹിക്കുന്നതെങ്കിൽ, ദൈവം തന്റെ ഹിതം നിങ്ങൾക്കു വെളിപ്പെടുത്തുമ്പോൾ, അതു കൂടുതൽ എളുപ്പത്തിലും വേഗത്തിലും നിറവേറ്റാൻ നിങ്ങൾക്കു കഴിയും.

ദൈവം നിങ്ങൾക്കു നൽകിയിട്ടുള്ള അതുല്യമായ ദൗത്യത്തെക്കുറിച്ച് ഇന്ന് ധ്യാനിക്കുക. നിങ്ങളുടെ ജീവിതംകൊണ്ട് എന്തു ചെയ്യാനാണോ അവിടുന്ന് നിങ്ങളെ വിളിച്ചിരിക്കുന്നത്, അത് നിങ്ങൾക്കു മാത്രമായി നൽകിയിരിക്കുന്ന വിളിയാണ്. അതിൽനിന്ന് ഓടിയകലരുത്. മനസ്സില്ലാമനസ്സോടെ അതു സ്വീകരിക്കരുത്. പകരം, നിങ്ങളുടെ മുഴുവൻ അസ്തിത്വത്തോടുംകൂടെ അതിലേക്ക് ഓടിയണയുക; നിങ്ങളിലൂടെ വലിയ കാര്യങ്ങൾ ചെയ്യാൻ ദൈവത്തെ അനുവദിക്കുക.

പരിശുദ്ധനായ കർത്താവേ, എന്റെ ജീവിതത്തിനായി അങ്ങേക്ക് ഒരു പരിപൂർണമായ പദ്ധതിയുണ്ടെന്ന് ഞാൻ അറിയുന്നു. മറ്റാർക്കും നൽകിയിട്ടില്ലാത്ത ഒരു ദൗത്യം അങ്ങ് എനിക്കു നൽകിയിട്ടുണ്ടെന്നും ഞാൻ അറിയുന്നു. അങ്ങയുടെ ഹിതം പൂർണമായി നിറവേറ്റാനും, അത്യന്തം തീക്ഷ്ണമായ സമർപ്പണത്തോടും ശക്തിയോടുംകൂടെ അതു ചെയ്യാനുമുള്ള വിശുദ്ധമായ ആഗ്രഹത്താൽ എന്റെ ആത്മാവിനെ നിറയ്ക്കണമേ. കർത്താവേ, ഞാനും അങ്ങയുടെ ദാസനാണ്; അങ്ങയുടെ ഹിതമനുസരിച്ച് എനിക്കു സംഭവിക്കട്ടെ. മറിയമേ, ഞങ്ങളുടെ അമ്മേ, ഞങ്ങൾക്കുവേണ്ടി പ്രാർഥിക്കണമേ. യേശുവേ, ഞാൻ അങ്ങയിൽ ശരണപ്പെടുന്നു.

2024-ലേക്ക് പുതിയത്!
ഒരു മികച്ച ക്രിസ്മസ് സമ്മാനം…