ക്രിസ്തുവിന്റെ ജനനത്തെക്കുറിച്ചുള്ള ധ്യാനം

2023 ഡിസംബർ 25, തിങ്കളാഴ്ച

അവർ തിടുക്കത്തിൽ ചെന്ന് മറിയത്തെയും യൗസേപ്പിനെയും പുൽത്തൊട്ടിയിൽ കിടക്കുന്ന ശിശുവിനെയും കണ്ടു. ഇതു കണ്ടപ്പോൾ, ഈ ശിശുവിനെക്കുറിച്ച് തങ്ങളോടു പറഞ്ഞിരുന്ന സന്ദേശം അവർ അറിയിച്ചു. ഇടയന്മാർ പറഞ്ഞതു കേട്ടവരെല്ലാം അത്ഭുതപ്പെട്ടു. മറിയമാകട്ടെ, ഇവയെല്ലാം ഹൃദയത്തിൽ ധ്യാനിച്ചുകൊണ്ട് സൂക്ഷിച്ചു. ലൂക്കാ 2:16–19

ക്രിസ്മസ് ആശംസകൾ! നമ്മുടെ ആഗമനകാല ഒരുക്കങ്ങൾ പൂർത്തിയായിരിക്കുന്നു. തന്റെ ജനനത്തിന്റെ മഹത്വപൂർണമായ ആഘോഷത്തിലേക്കു പ്രവേശിക്കാൻ നമ്മുടെ കർത്താവ് ഇപ്പോൾ നമ്മെ ക്ഷണിക്കുന്നു!

വിസ്മയം ജനിപ്പിക്കുന്ന ക്രിസ്മസിന്റെ രഹസ്യം നിങ്ങൾ എത്രത്തോളം മനസ്സിലാക്കുന്നുണ്ട്? ദൈവം മനുഷ്യനായി ഒരു കന്യകയിൽനിന്നു ജനിച്ചതിന്റെ പ്രാധാന്യം നിങ്ങൾ എത്ര പൂർണമായി ഗ്രഹിക്കുന്നുണ്ട്? ലോകരക്ഷകന്റെ ജനനത്തിന്റെ മനോഹരവും എളിമ നിറഞ്ഞതുമായ കഥ പലർക്കും ഏറെ പരിചിതമാണ്. എന്നാൽ ആ പരിചയം, നാം ആഘോഷിക്കുന്നതിന്റെ അർത്ഥതലങ്ങളിലേക്ക് ആഴത്തിൽ ഇറങ്ങിച്ചെല്ലുന്നതിൽനിന്ന് നമ്മുടെ ബുദ്ധിയെ തടയുന്ന, അപ്രതീക്ഷിതമായ ഒരു ദോഷഫലം ഉളവാക്കിയേക്കാം.

മുകളിൽ ഉദ്ധരിച്ച സുവിശേഷഭാഗത്തിന്റെ അവസാന വരി ശ്രദ്ധിക്കുക: “മറിയമാകട്ടെ, ഇവയെല്ലാം ഹൃദയത്തിൽ ധ്യാനിച്ചുകൊണ്ട് സൂക്ഷിച്ചു.” ഈ ക്രിസ്മസ് ദിനത്തിൽ ധ്യാനിക്കാൻ എത്ര മനോഹരമായ വാക്കുകൾ! തന്റെ പുത്രനും ദൈവപുത്രനും ലോകരക്ഷകനുമായവന്റെ ജനനരഹസ്യം മറ്റാരെക്കാളും വളരെ ആഴത്തിൽ മനസ്സിലാക്കിയിട്ടുണ്ടാവുക മറിയമാതാവാണ്. അവൾ ഗർഭം ധരിക്കുമെന്നും അവൻ ജനിക്കുമെന്നും അറിയിച്ചുകൊണ്ട് ഗബ്രിയേൽ പ്രധാനദൂതൻ പ്രത്യക്ഷപ്പെട്ടത് അവൾക്കാണ്. തന്റെ പുത്രനായ ദൈവപുത്രനെ ഒൻപതു മാസം തന്റെ അമലമായ ഉദരത്തിൽ വഹിച്ചത് അവളാണ്. അവളുടെ ബന്ധുവായ എലിസബത്ത് ഇപ്രകാരം ഉദ്ഘോഷിച്ചതും അവളോടാണ്: “സ്ത്രീകളിൽ നീ ഏറ്റവും അനുഗൃഹീതയാണ്; നിന്റെ ഉദരഫലവും അനുഗൃഹീതമാണ്” (ലൂക്കാ 1:42). മറിയമാണ് അമലോത്ഭവയായവൾ; ജീവിതത്തിലുടനീളം എല്ലാ പാപങ്ങളിൽനിന്നും സംരക്ഷിക്കപ്പെട്ടവൾ. ഈ ശിശുവിനെ പ്രസവിച്ചതും കരങ്ങളിൽ വഹിച്ചതും മുലയൂട്ടിയതും അവളാണ്. തന്റെ ജീവിതത്തിൽ സംഭവിച്ച അവിശ്വസനീയമായ ആ സംഭവം മറ്റാരെക്കാളും നന്നായി നമ്മുടെ പരിശുദ്ധ അമ്മ മനസ്സിലാക്കിയിരുന്നു.

എന്നിട്ടും, മുകളിലെ സുവിശേഷം പറയുന്നത് “മറിയമാകട്ടെ, ഇവയെല്ലാം ഹൃദയത്തിൽ ധ്യാനിച്ചുകൊണ്ട് സൂക്ഷിച്ചു” എന്നാണ്. ഇതു നമ്മോടു പറയുന്ന ഒരു കാര്യം ഇതാണ്: യേശുവിന്റെ അമ്മയും ദൈവമാതാവുമായ മറിയത്തിനുപോലും ഈ അതിപരിശുദ്ധ രഹസ്യം ധ്യാനിക്കാനും അതിനെക്കുറിച്ച് ചിന്തിക്കാനും അതിന്റെ മാധുര്യം ആസ്വദിക്കാനും സമയം ആവശ്യമായിരുന്നു. അവൾ ഒരിക്കലും സംശയിച്ചില്ല. എന്നാൽ അവളുടെ വിശ്വാസം നിരന്തരം ആഴപ്പെട്ടുകൊണ്ടിരുന്നു; അവളുടെ ഹൃദയം അളക്കാനാവാത്തതും ഗ്രഹിച്ചുതീർക്കാനാവാത്തതുമായ മനുഷ്യാവതാരരഹസ്യം ധ്യാനിച്ചുകൊണ്ടിരുന്നു.

ഇതു നമ്മോടു പറയുന്ന മറ്റൊരു കാര്യം ഇതാണ്: ദൈവപുത്രന്റെ ജനനരഹസ്യത്തിലേക്ക് കൂടുതൽ ആഴത്തിൽ പ്രവേശിക്കാൻ നാം ആഗ്രഹിക്കുന്നെങ്കിൽ, നാം സ്വയം സമർപ്പിക്കേണ്ട “ധ്യാനത്തിന്റെ” ആഴത്തിന് അതിരുകളില്ല. തിരുപ്പിറവിയുടെ വിവരണം വായിക്കുക, പുൽക്കൂട് ഒരുക്കുക, ക്രിസ്മസ് ആശംസാകാർഡുകൾ കൈമാറുക, വിശുദ്ധ കുർബാനയിൽ പങ്കെടുക്കുക തുടങ്ങിയവ ക്രിസ്മസ് വിശുദ്ധമായി ആഘോഷിക്കുന്നതിൽ മുഖ്യസ്ഥാനമുള്ളവയാണ്. എന്നാൽ, പ്രത്യേകിച്ച് പ്രാർഥനാവേളയിലും ക്രിസ്മസ് കുർബാനയിലും “ധ്യാനിക്കുന്നതും” “വിചിന്തനം ചെയ്യുന്നതും” നമ്മുടെ വിശ്വാസത്തിന്റെ ഈ രഹസ്യത്തിലേക്ക് നമ്മെ കൂടുതൽ കൂടുതൽ ആഴത്തിൽ നയിക്കും.

ഇന്ന് നമ്മുടെ പരിശുദ്ധ അമ്മയോടൊപ്പം വിചിന്തനം ചെയ്യുക. മനുഷ്യാവതാരത്തെക്കുറിച്ച് ധ്യാനിക്കുക. ആദ്യത്തെ ക്രിസ്മസിന്റെ ആ രംഗത്തിൽ നിങ്ങളെത്തന്നെ സങ്കൽപ്പിക്കുക. പട്ടണത്തിലെ ശബ്ദങ്ങൾ കേൾക്കുക. കാലിത്തൊഴുത്തിലെ ഗന്ധങ്ങൾ അനുഭവിക്കുക. ആരാധനയോടെ ഇടയന്മാർ മുന്നോട്ടുവരുന്നതു കാണുക. ക്രിസ്മസിന്റെ രഹസ്യത്തെക്കുറിച്ച് കൂടുതൽ അറിയുന്തോറും, യഥാർഥത്തിൽ നിങ്ങൾ അറിയുന്നതും മനസ്സിലാക്കുന്നതും എത്ര കുറവാണെന്ന് കൂടുതൽ ബോധ്യമാകുന്നു എന്നു തിരിച്ചറിഞ്ഞുകൊണ്ട് ആ രഹസ്യത്തിലേക്ക് കൂടുതൽ പൂർണമായി പ്രവേശിക്കുക. എന്നാൽ എളിമയോടെയുള്ള ആ തിരിച്ചറിവാണ്, ഈ ദിവസം നാം ആഘോഷിക്കുന്നതിനെ കൂടുതൽ ആഴത്തിൽ മനസ്സിലാക്കുന്നതിലേക്കുള്ള ആദ്യപടി.

കർത്താവേ, അങ്ങയുടെ ജനനത്തിന്റെ വിസ്മയം ഞാൻ നോക്കിക്കാണുന്നു. ദൈവവും പരിശുദ്ധ ത്രിത്വത്തിലെ രണ്ടാമത്തെ വ്യക്തിയുമായ അങ്ങ്, ദൈവത്തിൽനിന്നുള്ള ദൈവവും പ്രകാശത്തിൽനിന്നുള്ള പ്രകാശവുമായ അങ്ങ്, ഞങ്ങളിൽ ഒരുവനായി, ഒരു കന്യകയിൽനിന്നു ജനിച്ച് പുൽത്തൊട്ടിയിൽ കിടത്തപ്പെട്ട എളിയ ശിശുവായി. മഹിമയേറിയ ഈ സംഭവത്തെക്കുറിച്ച് ധ്യാനിക്കാനും ഈ രഹസ്യത്തെ ഭയാദരവോടെ വിചിന്തനം ചെയ്യാനും അങ്ങ് ഞങ്ങൾക്കുവേണ്ടി ചെയ്തതിന്റെ അർത്ഥം കൂടുതൽ പൂർണ്ണമായി ഗ്രഹിക്കാനും എന്നെ സഹായിക്കണമേ. പ്രിയ കർത്താവേ, ലോകത്തിലേക്കുള്ള അങ്ങയുടെ ജനനത്തിന്റെ മഹിമയേറിയ ഈ ആഘോഷത്തിനായി ഞാൻ അങ്ങേക്കു നന്ദി പറയുന്നു. ഈശോയേ, ഞാൻ അങ്ങയിൽ ശരണപ്പെടുന്നു.

ഞങ്ങളുടെ ക്രിസ്മസ് വിഭവങ്ങൾ കാണുക!

തിരുവചന ധ്യാനങ്ങൾ

2024-ലേക്ക് പുതിയത്!
ഒരു മികച്ച ക്രിസ്മസ് സമ്മാനം…